மாணவ/மாணவிகள் கல்வியில/வாழ்வில் வெற்றியடைய…..
முன்னுரை
கடந்த பத்து ஆண்டுகளாக ஆயிரக்கணக்கான மாணவ, மாணவிகளுக்கு இந்தியா, மலேசியா மற்றும் சிங்கப்பூரில் பயிற்சிகள் நடத்தினேன். பெற்றோர்களுக்கும் ஆசிரியர்களுக்கும் பயிற்சிகள் நடத்தினேன். பல பள்ளிகளில் Joy of Teaching & Effectiveness என்ற தலைப்பில் பயிற்சிகள் நடத்தியதோடு மாணவர்கள் பிரச்சனைகள் பற்றிக் கலந்துரையாடல் நிகழ்த்தினேன். பெற்றோர்களிடம் பிள்ளைகள் பற்றிய பிரச்னைகள் பற்றிக் கேட்டுத் தீர்வுகள் பல அளித்தேன். இவை பற்றி அவ்வப்போது மனநல மருத்துவர்களிடமும், மனோதத்துவப் பேராசிரியர்களிடமும் ஆலோசனைகள் கேட்டேன். இவற்றையெல்லாம் தொகுத்து ஒரு தொடராய் எழுத முடிவு செய்துள்ளேன்.
பிரச்னைகள்
மாணவர் பிரச்னைகளை அறிய பயிற்சி நடத்திய ஆரம்ப காலங்களில் “கேள்விகள் கேளுங்கள்” என்பேன். “பயிற்சி முடிந்து தனியாக என்னிடம் பிரச்சனைகளைச் சொல்லித் தீர்வு பெறுங்கள் “என்பேன். இந்த வகையில் ஒரு சிலருடைய பிரச்னைகளை அறிய முடிந்தது. ஆனால் பேசாத மாணவர்கள் கூச்சம், அச்சம், தயக்கம் உள்ள மாணவர்களின் பிரச்னைகளை அறிவது எப்படி?
பிரச்னைகளை எழுதுக
பெரும்பாலான பயிற்சிகள் இரண்டு தினங்கள் நிகழ்வதால்,முதல் நாள் பயிற்சியின் முடிவில் “நண்பர்களே! உங்களிடம் ஒரு வெள்ளைத்தாள் வழங்கப்படும். அதில் உங்களுடைய கேள்விகள் / தடைகள்/ பிரச்னைகள் பற்றி எழுதுங்கள். உங்கள் பெயர், வகுப்பு, பள்ளி எதுவும் எழுத வேண்டாம். (விரும்பினால் எழுதலாம்). நீங்கள் படிப்பில் அதிக மதிப்பெண் பெற உங்களிடம் உள்ள தடைகள்/ சிக்கல்கள்/ பலவீனங்கள் என்ன? மனம் விட்டு எழுதுங்கள். நூற்றுக்கு நூறு சிறந்த குணங்கள் 1. Positive Qualities உள்ள மனிதர் என்று எவருமில்லை. 100% கெட்ட குணங்கள் 2. Negative Qualities உள்ள மனிதர் யாருமில்லை. ஆகவே நீங்கள் என்ன எழுதினாலும் நான் தவறாக நினைக்க மாட்டேன்; எழுதுங்கள்” என்ற ஒரு பெரிய முன்னுரை கொடுத்து ஊக்கப்படுத்தி எழுதச் சொல்லி வாங்குவேன். அவற்றையெல்லாம் படித்துப்பார்த்துத் தீர்வுகளை அடுத்தநாள் பயிற்சியின்போது கொடுப்பேன்.
பிரச்னைகளின் வகைகள்
பல ஊர்கள், பல பள்ளிகள், பல வயது மாணவர்கள் பிரச்னைகளை ஆய்ந்து பார்த்ததில் இன்றைய மாணவர்களின் பிரச்னைகள் நாம் மாணவர்களாய் இருந்தபோது வந்த சிக்கல்களைவிட கடுமையாக இருக்கின்றன. நிறைய diversio-deviations கவனச் சிதறதல்களையெல்லாம் மீறி அவர்கள் வெற்றி பெற வேண்டியுள்ளது. இன்றைய மாணவர் பிரச்னைகளை இரண்டு வகையாகப் பிரிக்கலாம்.
1. மனம் பற்றிய பிரச்சினைகள்
2. வழிமுறை பற்றிய பிரச்சினைகள்.
மனம் பற்றிய பிரச்சினைகள் : (சுருக்கமாக)
1. பல மாணவர்கள் கீழ்க்கண்டவாறு சொல்கிறார்கள்.
அ. ஐயா! நான் படித்தால் மதிப்பெண் பெறுவேன். ஆனால் படிப்பதில்லை. சோம்பல், தள்ளிப்போடல் இந்த இரண்டும் என்னை ஆட்டிவிக்கின்றன. எப்படி வெல்வது?
ஆ. அதிகாலை எழ எண்ணிவிட்டுப் படுப்பேன். ஆனால் எழ முடிவதில்லை. பீப் அலாரம் அடிக்கும். ஆனால் அதை நிறுத்தி விட்டு உறங்கிவிடுவேன்.
பின்னால் வருந்துவேன். சில சமயம் உடல் சோர்வாக இருக்கும். சிலசமயம் மனம் சலிப்பாய் இருக்கும். எப்படி அதிகாலைப் பழக்கத்தை உருவாக்குவது?
இ. வகுப்பில் கவனிக்க வேண்டும் என்று எண்ணுவேன். ஆனால் மனம் சிதறுகிறது. எப்படி கவனிக்கும் தன்மையை உருவாக்குவது.
ஈ. வகுப்பில் தூக்கமாய் வருகிறது. சில சமயம் சிறிது நேரம் படித்துக் கொண்டிருப்பேன். கண்கள் சொருகும். இரவு தூங்கியும் அதிகத் தூக்கம் வரக்காரணம் என்ன?
உ. ஆசிரியர் என்னைத்திட்டி விட்டால் – வகுப்பில் அனைவரின் முன்னால் ஏதேனும் கேட்டுவிட்டால் – மனம் அதையே எண்ணும். யார் என்னைக் குறை சொன்னாலும், நண்பர்களோடு ஒரு சிறு பிணக்கு ஏற்பட்டாலும் புத்தகத்தை எடுத்து வைத்தால் அதுதான் நினைவுக்கு வருகிறது. மன ஒருமைப்பாடு Concentration பாதிக்கப்பட்டு விடுகிறது.
ஊ. எல்லோரும் “படி! படி!” என்று நச்சரிப்பது, தொடர்ந்து அறிவுரை, கண்காணிப்பது, நம்பிக்கையற்ற தன்மை இது எரிச்சல் ஊட்டுகிறது. என்ன செய்வது?
எ. நண்பர்கள் என்னைத் திசை திருப்புகின்றனர். அவர்களை முறைத்துக் கொள்ள முடியவில்லை. என்ன செய்வது?
ஏ. சில பாடங்கள் பிடிக்கவில்லை. அதை படிப்பதென்றாலே வெறுப்பாக உள்ளது.
ஐ.பத்தாம் வகுப்புக்கு மேலுள்ள மாணவர்கள் சிலர் எழுதியிருந்தனர். செக்ஸ் மற்றும் காதல் எண்ணங்கள் வருகின்றன. மனத்தை எப்படி கட்டுப்பாட்டில் கொண்டு வருவது?
இவ்வாறாக இவைகளெல்லாம் மனம் சம்பந்தமான பிரச்னைகள்.
வழி முறைகள் பற்றிய பிரச்னைகள்
1. ஐயா! நான் தொடர்ந்து படிக்கிறேன். மார்க் வருவதில்லை. வருடம் முழுதும் நன்கு படித்து தேர்வு எழுதும் போது பயம், டென்ஷன் இவற்றால் மறந்துவிடுகிறது. என் செய்வது?
2. விரைந்து படித்து நினைவில் வைப்பது எப்படி? (நான் அதிக நேரம் எடுத்துக் கொள்கிறேன்).
3. கணக்கில் 100% வாங்குவது எப்படி? ஏதேனும் தவறு செய்து, முழு மதிப்பெண் பெற முடியவில்லை.
4. நினைவாற்றலை எப்படிப் பெருக்குவது?
5. சூத்திரங்கள் மற்றும் சமன்பாடுகள் Formulas & Equations எப்படி நினைவில் வைப்பது?
6. மொத்தத்தில் எல்லாப் பாடங்களிலும் அதிக மதிப்பெண்கள் பெறுவது எப்படி?
இது போல வழிமுறைகள் பற்றிய பிரச்சினைகள் நிறைய உள்ளன.
இவற்றிற்கு தீர்வுகள் என்ன?
– தொடரும்
2 comments Posted in Articles