தன்னம்பிக்கை மேடை - தன்னம்பிக்கை | தன்னம்பிக்கை

Home » Articles » தன்னம்பிக்கை மேடை

 
தன்னம்பிக்கை மேடை


சைலேந்திர பாபு செ
Author:

நேயர் கேள்வி

படித்தவர்களை விட படிக்காதவர்கள் தான் அதிகம் சம்பாதிக்கிறார் என்ற பொதுவான கருத்து ஒன்று உண்டு. நிச்சயம் அந்தக் கருத்து ஏற்புடையது தானா..? அது பற்றிச் சொல்லுங்கள்?

பிரவீன்ராஜ், தனியார் ஊழியர்

சிவகங்கை மாவட்டம்

படித்தவர்களை விட படிக்காதவர்கள் தான் அதிகம் சம்பாதிக்கிறார்கள் என்பது ஒரு பேச்சு; ஆனால் அது பொதுவான கருத்து என்று சொல்ல முடியாது. அப்படிப்பட்ட பேச்சுக்கள் ஏற்புடையது தானா என்றால், ஏற்புடையது அல்ல என்று தான் பதில் சொல்ல வேண்டும்.

எடுத்துக்காட்டு:

கல்வித்துறையைப் பார்ப்போம். படிக்காத ஒரு நபர் பள்ளி காவலாளி, பட்டயப்படிப்பு படித்தவர் ஆரம்பப்பள்ளி ஆசிரியர், பட்டப்படிப்பு படித்தவர் இடைநிலைப்பள்ளி ஆசிரியர், முதுநிலைப் பட்டப்படிப்பு படித்தவர் மேல்நிலைப்பள்ளி ஆசிரியர், முனைவர் (Ph.D) படிப்பு படித்தவர் கல்லூரிப் பேராசிரியர் என்று பணியாற்றுவதைப் பார்க்கிறோம். இவர்கள் அனைவருக்கும் அவரவர் தகுதிக்கேற்ப ஊதியம் தரப்படுகிறது. காவலாளிக்கு குறைந்த ஊதியம், கல்லூரிப் பேராசிரியருக்கு அதிகப்பட்ச ஊதியம். இவர்களுக்குள் கல்வி என்ற வேறுபாட்டைத் தவிர வேறு என்ன இருக்க முடியும்..? ஆக இங்கு படித்தவர்கள் தான் அதிகம் சம்பாதிக்கிறார்கள். அதுவும் உயர்கல்வி அடிப்படையில் சம்பளம் அதிகரிக்கிறது.

இப்போது நீங்கள் ஒருகேள்வி கேட்கக்கூடும். சரி, பள்ளிகளிலும், கல்லூரிகளிலும் படிப்பிற்கேற்ப ஊதியம் என்பது இருக்கட்டும். இவர்கள் படித்தவர்கள்; ஆனால் ஒன்றுமே படிக்காத ஒருவர்தானே பள்ளிக்கூடத்தை நடத்திக் கொண்டிருக்கிறார்..? அவருக்குத் தானே அதிக வருமானம், அது எப்படி..?

தொழில் முனைவர்கள்:

இந்தக் கேள்வி ஒரு நியாயமான கேள்வி. ஆனால் இந்தக் கேள்வியை நீங்கள் நன்கு ஆராயவேண்டும். இன்றெல்லாம் பள்ளிகளையும், கல்லூரிகளையும் தோற்றுவிப்பவர்கள் அனைவருமே படிக்காதவர்கள் அல்ல. சென்னை SSN பொறியியல் கல்லூரியைத் தோற்றுவித்த சிவ நாடார் கோவை PSG கல்லூரியில் பொறியியல் படித்தவர், இந்துஸ்தான் கம்யூட்டர் நிறுவனத்தை (HCL) தோற்றுவித்த முன்னணி தொழிலதிபர்.

படிக்காதவர்கள் பலரும் கல்வி நிறுவனங்களை நிறுவி, வெற்றிகரமாக நடத்தி வருகின்றனர் என்பது உண்மைதான். ஆனால் அப்படிப்பட்ட கல்விச்சாலை நிறுவனர்களை எப்படிப் படிக்காதவர்கள் என்று சொல்ல முடியும்..? அவர்கள் பள்ளிகள் அல்லது கல்லூரிகளில் படிக்காதவர்கள் எனலாம். காமராஜர் கல்லூரியில் படிக்கவில்லை, ஆனால் அவர் படிக்காதவரா..? இல்லை. அவர் அரசியல் களம், சிறைச்சாலை, சுதந்திரப் போராட்ட களம், பத்திரிக்கைகள், அரசுஅறிக்கைகள், வெள்ளையர்கள், அரசு அதிகாரிகள் என்று பல இடங்களில் பலரிடம் பல உண்மைகளைக் கற்றுக் கொண்டார். எனவே தான் அவர் ஒரு நல்ல ஆட்சியைத் தமிழகத்திற்குத் தந்தார். அவரிடம் இருந்த நேர்மைக் குணமும், எளிமையும், பகுத்தறிவும் கல்வி கற்றவர் பலரிடம் இல்லை.

உண்மைக்கல்வி:

படிக்காத ஒரு பெரியவர் கல்லூரி ஒன்றை நிறுவி, படாதபாடுபட்டு, அதை பெரிய கல்லூரியாக வளர்த்து, பெரும் வருமானமும் சம்பாதிக்கும் நிலையில் அவரைப் படிக்காதவர் என்று ஏளனம் செய்யும் மனப்பான்மை பலரிடம் இருக்கிறது. இது நல்ல மனப்பான்மை இல்லை.  ஏனெற்றால் இந்தக் கல்லூரி நிறுவனருக்கு கனவு ஒன்று பெரிதாக இருக்கிறது.  நான் படிக்கவில்லை, என்றாலும் பலரைப் படிக்க வைக்க வேண்டும் என்ற உயர்நோக்க கனவு அது. அந்தப் பெரிய கனவை நனவாக்க, மன தைரியம் இருந்திருக்கிறது. நிலம் தேர்வு செய்து, பத்திர பதிவு செய்து, அரசு அனுமதியும் வாங்கியிருக்கிறார். இதற்கு இவர் எத்தனைப் பேராசை படைத்தவர்களையும், நேர்மையற்ற அதிகாரிகளையும் பாத்திருப்பார்.?எத்தனை தடைகளைத் தாண்டியிருப்பார்? எத்தனைத் துரோகிகளிடம் சிக்கிருப்பார்? இவை அனைத்தும் வாழ்க்கைப் பாடங்கள். அதுவும் நடைமுறைப் பாடங்கள். இவை வகுப்பில் மனப்பாடம் செய்து கற்ற பாடங்களை விட ஆழமானவை. இந்தக்கல்லூரி துவக்கும் முயற்சிகளில் தோற்று, கல்லூரியை நிறுவ முடியாமல் திணறி சிறுக சிறுக சேர்த்தப் பணத்தை முற்றிலுமாக இழந்து; கடனாளியாக நிற்கும் கல்லூரி நிறுவனங்கள் ஏராளம். அவர்கள் நம் கண்களுக்குத் தெரியமாட்டார்கள். மீதமுள்ள வெற்றி பெற்ற கல்லூரி நிறுவனர்கள் தான் நம் கண்களுக்குத் தெரிகின்றனர். அவர்களது வருமானத்தை ஒப்பிட்டுத்தான், படிக்காதவர்களுக்கு சம்பளம் அதிகம் என்றும் பேசுகிறோம். இப்படி அனுபவங்கள் மூலமும், நூல்கள் மூலமும், நடைமுறை மூலமும், தோல்விகள் மூலமும் கற்பவர்களும் “படித்தவர்கள்” தான்.

படிக்காதவர்:

அப்படி என்றால் படிக்காதவர்கள் என்பவர் யார்? என்று நீங்கள் கேட்க்கலாம். யாரிடம் எப்படி பேச வேண்டும் என்று தெரியாதவர்கள், வரவு செலவு பார்க்கத் தெரியாதவர்கள், மக்களைப் பற்றி கல்வியறிவு (Human psychology) இல்லாதவர்கள், ஊதாரித்தனம் உள்ளவர்கள், சோம்பேறிகள், கனவு இல்லாதவர்கள், உலக நடப்புத் தெரியாதவர்கள், புத்தகம் வாசிக்க மறுப்பவர்கள், மனிதர்களை வெறுப்பவர்கள், ஏழைகளுக்கு உதவாதவர்கள், விஞ்ஞானத்தை நம்பாதவர்கள், மூடநம்பிக்கைகாரர்கள், சாதி வெறியர்கள், குழந்தைகளையும், பெண்களையும் அடிமையாக நடத்துபவர்கள், நேர்மையற்றவர்கள் இவர்களைப் படிக்காதவர்கள் எனலாம். வளர்ந்த நாடுகளில், இப்படிப்பட்டவர்கள் எதையும் சம்பாதிக்க முடியாது. ஆனால் நமது நாட்டில் மட்டும் பாரம்பரியச் சொத்துக்கள் தானாக வாரிசுகளுக்கு வந்து விடுவதால் நாம் குறிப்பிட்ட படிக்காதவர்களுக்குக் கூட சொத்தும், வருமானமும், மரியாதையும்  வந்து விடுகிறது. ஆனால் அந்த வருமானம் நிலையாக நிற்காது. பெரிய நிறுவனங்கள் பல படிக்காத வாரிசுகள் கையில் சிக்கி சின்னாபின்னமாவதை நீங்கள் கண்கூடாகப் பார்க்கிறீர்கள். இவர்கள் வெளிநாட்டுக் கல்லூரிகளில் படிக்கச் சென்றவர்கள், ஆனால் அங்கு எதையும் படித்ததாகத் தெரியவில்லை. பணச்செருக்கும், வறட்டு கவுரவமும், கஞ்சத்தன்மையும், முட்டாள்தனமும் இவர்களைப் படிக்காதவனாக்கி விடுகிறது.

படிப்பிற்கேற்ற ஊதியம்:

இறுதியாக ஒன்றை சொல்கிறேன். சென்னை IIT என்ற கல்வி நிறுவனத்தில் 100 மாணவர்களுக்கு வேலை கிடைத்தது. அதில் ஒரு மாணவருக்கு ஆண்டுக்கு 1.2 கோடி ஊதியம், இன்னொரு மாணவருக்கு 6 லட்சம் ஊதியம்; மற்றவர்களுக்கு இடைப்பட்ட ஊதியம். ஓரே கல்லூரி, ஒரே B.E பட்டப்படிப்பு, அதே வகுப்பு, அதே பாடங்கள் ஆனால் ஒருவருக்கு 120 லட்சம் ஊதியம்; இன்னொறுவருக்கு  6 லட்சம் ஊதியம். பட்டம் ஒன்றென்றாலும் சம்பளத்தில் பெரிய வேறுபாடு, படிப்பிற்கேற்ற ஊதியம் புரிகிறது அல்லவா..?

படிப்பின் ஆற்றலை உங்களுக்குப் புரிய வைக்க சிலரது ஊதியத்தைச் சொல்லித்தான் ஆக வேண்டும்.

இவர்கள் அனைவரும் இந்தியர்களே! இவர்கள் தொழிலதிபர்கள் அல்ல! ஊதியம் வாங்கும் தலைமை நிர்வாக அதிகாரிகள். இவர்களை நிறுவன சூப்பர் ஸ்டார்கள் எனலாம்.

உங்கள் கவலை: 

உங்கள் கவலை என்ன என்பது எனக்குப் புலப்படுகிறது. சினிமாக்காரர்கள் மற்றும் கிரிக்கெட் விளையாட்டு வீரர்கள் எந்த படிப்பும் இல்லாமல் எந்த தொழிலும் செய்யாமல் பெருஞ்செல்வந்தர்கள் ஆகிவிட்டார்களே! இவர்கள் என்னதான் படித்தார்கள்? என்பது உங்கள் கவலை. சினிமாத்துறை, கிரிகெட் விளையாட்டு போன்றவை பொழுது போக்குகள். இங்கு படிக்காதவர்கள் கூட வெற்றி பெற்று விட்டால் பெரிய வருமானம் வந்து விடுகிறது. ஆனால் இவர்கள் பல போட்டிகளைச் சமாளிக்க வேண்டியிருக்கிறது. விளையாட்டுத்திறன் அல்லது நடிப்புத்திறன் என்பதை அவர்கள் வெளிப்படுத்தியாக வேண்டும். அது மக்களுக்குப் பிடிக்க வேண்டும்; அவர்களுக்கென்று ஒரு கிராக்கி(craze) இருக்க வேண்டும். அப்போதுதான் அவர்களுக்கு பல கோடி ரூபாய்கள் சம்பளம் கிடைக்கும். இது உலக நியதி. இதை நான் ஒப்புக் கொள்கிறேன். ஆனால் இதில் தவறில்லை.!

இன்னொரு உண்மை உங்கள் மனதை நெருடும் என்பதை நான் அறிவேன். படிக்காதவர்கள் ஒரு அதிகாரத்தில் வந்த உடன் ஊழல் புரிந்து பல கோடி சம்பாதிக்கிறார்களே! மணல் அள்ளியவர்கள் கோடிஸ்வரர்களாக இருந்திருக்கிறார்களே! ஒப்பந்தப்பணி எடுத்தவர்கள் அதிகம் சம்பாதித்து விட்டார்களே! என்பது தான் அது. இது உண்மைதான், இங்கு படிக்காதவர்கள் அதிகம் சம்பாதிக்கிறார்கள். ஆனால் இது வருமானம் அல்ல, இது கொள்ளை. கொள்ளை அடிப்பது ஒரு குற்றம். அதைச் செய்பவர்கள் குற்றவாளிகள். குற்றவாளியாக இருந்து ஒரு நாள் பிடிப்பட்டு ஜெயிலுக்குப் போக வேண்டியவர்களைப் பற்றி ஏன் நாம் கவலைப்பட வேண்டும்..? அவர்களைப் போன்றவரின் வருமானம், அதாவது உழைக்காமலேயே சாம்பாதிக்கும் வருமானத்திற்கு ஏன் ஆசைப்பட வேண்டும்? வேண்டாம், வேண்டவே வேண்டாம். நியாமான வருமானம், நமது படிப்பிற்கேற்ற வருமானம், அது குறைவாக இருந்தாலும் நமக்கு அது போதும்.!

முடிவு:

படித்தவர்களே சம்பாதிக்கிறார்கள்; ஆனால் அந்தப் படிப்பு கல்லூரிகளுக்கு வெளியில் படிக்கும் படிப்பும், அவரவர் சொந்த முயற்சியால் படிக்கும் படிப்பும் அடங்கும்.


Share
 

No comments

Be the first one to leave a comment.

Post a Comment


 

 


July 2017

வாழ நினைத்தால் வாழலாம் – 6
இளமை மாறாத இளமையுடன்….
முதுமை – இறைவன் தந்த வரம்!
உள்ளொன்று வைத்து புறமொன்று பேசுவார் உறவு கலவாமை வேண்டும்
நவீன ஜீனோமிக்ஸ் (பகுதி-6)
தோல்வியும்… வெற்றியும்…
உயர்ந்த குடிப்பிறப்பும் சிறந்த இல்லறமும் சமுதாய வளர்ச்சிக்கான இரண்டு வெற்றிப்படிகள்…
மனத்தடையை தகர்த்தால் மாற்றங்கள் மலரும்
ஜீனுக்கு தீனி…!
இரத்தசோகை
வீழ்வேனென்று நினைத்தாயோ?
சிகரமே சிம்மாசனம்
வெற்றி உங்கள் கையில் 43
எதார்த்தம்
நீள் ஆயுள் அவசியமா?
தன்னம்பிக்கை மேடை
மருத்துவத்தில் மகத்துவம் மகப்பேறில் தனித்துவம்
உள்ளத்தோடு உள்ளம்