Home » Articles » மாற்றம் தேவையா?

 
மாற்றம் தேவையா?


கவிநேசன் நெல்லை
Author:

இளமைப்பருவம், இது இனிமை நிறைந்த பருவம். இருந்தபோதும் இந்த வளரும் பருவத்தில் பல்வேறு தேவையற்ற உணர்வுகளும் நம்மை அறியாமலேயே வளர்ந்துவிடுகின்றன.

சிலருக்கு எந்த ஒரு புது இடத்திற்குச் சென்றாலும் பயம் ‘பக்’கென பற்றிக்கொள்கிறது. புதிய நபர்களை சந்திக்கும்போது எரிச்சல் ஏராளமாகவே வந்துவிடுகிறது. புதிய சூழலை அணுகும்போது புரியாத புதிராகத் தோன்றுகிறது.

எந்த ஒரு நல்ல மாற்றத்தையும்கூட எளிதில் ஏற்றுக்கொள்ள மனம் தயங்குகிறது.

“இது தேவையில்லை”.

“இந்த மாற்றம் எனக்கு ஏற்றதல்ல”.

“எனக்கு இது பிடிக்கவே பிடிக்காது”.

என பல்வேறு எண்ணங்களைச் சுமக்கும் ‘மனம்’ வாழ்க்கையில் நிகழும் மாற்றங்களை சந்திக்க மறுக்கிறது.

பள்ளிப்பருவத்தில் இந்த மனநிலை அதிகமான இளம் உள்ளங்களில் இடம்பிடித்து விடுகிறது. சுமார் 2 ஆண்டுகள் படித்த பள்ளியிலிருந்து இன்னொரு புதிய சிறந்த பள்ளியில் சேருவதற்குக்கூட மனம் அச்சத்தின் உச்சியில் நின்று அடம் பிடிக்கிறது.

“எனக்கு ஆங்கிலப் பாடம் பிடிக்காது”.

“கணக்குப் பாடத்தைக் கண்டாலே ஆகாது”.

“வகுப்புக்கு சயின்ஸ் டீச்சர் வந்தாலே வெறுப்பாக இருக்கிறது”.

இப்படி வெறுப்பும், கோபமும் கைகோர்க்கும் சூழல் வாழ்க்கையில் பல நிலைகளில் ஏற்பட வாய்ப்புகள் உள்ளன.

வெறுப்பு, கோபம், எரிச்சல், பயம், பதற்றம்  போன்ற உணர்வுகள் வாழ்க்கையில் எல்லோரிடமும் தோன்றுவது இயற்கைதான். ஆனால் அந்த உணர்வுகளைக் கையாளத் தெரியாத நிலை ஏற்படும்போது வாழ்க்கையில் வெற்றி என்பது கேள்விக்குறியாகிவிடுகிறது.

எனது வாழ்க்கையில் நிகழ்ந்த அனுபவம் சற்று வித்திசாயமானது.

இது  சுமார் 20 வருடங்களுக்கு முன்பு நிகழ்ந்த சம்பவம்.

1994ம் வருடம்.

‘கார்’ ஓட்டும் பயிற்சி பள்ளியில் சேர்ந்து பயிற்சி பெற்றபின், நான் முறையாக ‘லைசென்ஸ்’ பெற்றுவிட்டேன்.

2 மாதங்கள் பயிற்சிக்குப்பின்னர் புதிய கார் வாங்க திட்டமிட்டேன். பலர் பலவித அனுபவங்களைச் சொன்னார்கள்.

“செலவு அதிகமாகும்” என்றார்கள் சிலர். இன்னும்சிலர் “அடிக்கடி கார் ஓட்டிப் பழகினால்தான் ஆக்ஸிடன்ட் இல்லாமல் கார் ஓட்ட முடியும்” என்றார்கள். “இப்போது எல்லா ஊருக்கும் கார் வசதி இருக்கிறது உங்களுக்கு இது தேவையா?”  என்றார்கள்.

கார் ஓட்டுவதற்குப் பயந்த எனக்கு பலரின் ஆலோசனை பதற்றத்தைத் தந்தது. கார் ஓட்டுவதற்கான “தயக்கம்” என்னிடம் வந்து ஓட்டிக்கொண்டது.

எனவே  சொந்தமாக கார் வாங்கும் ஆசைக்கு தடைபோட்டேன்.

15 ஆண்டுகளுக்குப்பிறகு  மீண்டும் கார் வாங்கும் திட்டத்தை அமுல்படுத்த எண்ணினேன்.

சொந்தமாக கார் வாங்க முடிவெடுத்தபோது ‘சிக்கல்’ தலைதூக்கியது.

எனது வீட்டிலிருந்து மெயின்ரோட்டிற்குச் செல்லும் 2 கீ.மீ. பாதை மிகவும் குறுகலானது. டாக்ஸி டிரைவர்கள்கூட அந்தப் பாதையில் கார் ஓட்டிச் செல்லும்போது சிரமப்படுவார்கள்.

என்னால் முடியுமா?

தயக்கம், எரிச்சல், சோகம்  ஆகிய உணர்வுகள் சொந்தமாக வந்துநின்றன. ஆனால், சரியான நேரத்தில் எனது நண்பர் வந்து ஆலோசனை சொன்னார்.

“இந்தப் பாருங்க கவிநேசன். இந்தக் குறுகலான பாதையைப் பார்த்ததும் உங்களுக்கு எரிச்சலும், கோபமும் வருகிறது. சிறுவர்கள் குறுக்கே வருகிறார்கள். வழியில் வாகனங்கள் நிற்கின்றன. இந்த இடைஞ்சல்களையெல்லாம் நீங்கள் நினைத்தாலும் மாற்றமுடியாது. ஏனென்றால், இவை உங்களால் கட்டுபடுத்த முடியாத காரணிகள் (Uncontrollable  Factors) ஆகும்.

ஆனால், இந்தப் பாதையை பார்க்கும்போது வருகின்ற எரிச்சல், கோபம், சோகம், தயக்கம் போன்ற உணர்வுகளை உங்களால் கண்டிப்பாக கட்டுபடுத்த முடியும். ஏனென்றால் அவை உங்களால் கட்டுப்படுத்தக்கூடிய காரணிகள் (Controllable Factors). எனவே நீங்கள்தான் உங்கள் மனதை மாற்றிக்கொள்ள வேண்டும்” என ‘நறுக்’ கென சொன்னார் நண்பர்.

நண்பரின் அறிவுரை என்னை சிந்திக்க வைத்தது.

சிந்தித்துப் பார்த்து என்னை மாற்றிக்கொண்டேன்.

இப்போது கார் ஓட்டும் கலையை மகிழ்வோடு கற்றுக்கொண்டேன்.

டிரைவர் செலவு மிச்சம். எனக்கும் மகிழ்ச்சி. எங்கள் குடும்பத்திற்கும் மகிழ்ச்சி.

சூழ்நிலைகளை சரியாகப் புரிந்து நம்மை மாற்றிக்கொண்டால் நாம் எப்போதும் மகிழ்ச்சியாக இருக்கலாம் என்பதை உணர்ந்துகொண்டேன்.

இதனை தெளிவாக உணர்ந்துகொள்ள – ‘ஓஷோ’ சொன்ன விளக்கம் துணையாக அமையும்.

ஒருமுறை ‘ஓஷோ’ ஓய்வு விடுதி ஒன்றில் இரவு நேரத்தில் தங்கும் சூழல் ஏற்பட்டது.

‘ஓஷோ’ தங்கியிருந்த அறைக்கு அருகிலுள்ள அடுத்த அறையில் மாநில அமைச்சர் ஒருவர் தங்கி இருந்தார்.

அன்று இரவு  அந்த விடுதிக்கு அருகில் ஏராளமான நாய்கள் கூடி தொடர்ந்து சத்தம்போட ஆரம்பித்தன. தூங்கச் சென்ற அமைச்சருக்கு நாய்களின் சத்தம் எரிச்சலைத் தந்தது.

அதிகமான பயணக் களைப்பு. மறுநாளும் பயணம் செல்ல வேண்டும். தூக்கம் கெட்டால் அடுத்தநாள் பயணத்தில் பிரச்சனை ஏற்பட்டுவிடும். அமைச்சருக்கு எரிச்சல் வந்தது.

தொடர்ந்து குறைத்த நாய்களின் சத்தம் அவரது தூக்கத்தைக் கெடுத்தது.

ஆனால் ஓங்கி ஒலித்த நாய்கள் சத்தத்திலும் எந்தவித இடையூறும் இல்லாமல் நிம்மதியாக ‘ஓஷோ’ தூங்கினார்.

தூக்கம் வராமல் தவித்த அமைச்சர் ஓஷோவின் அறைக்கதவைத் தட்டினார்.

“இவ்வளவு நாய்கள் தொடர்ந்து சத்தம் போடுகின்றன. இந்தச் சத்தம் உங்கள் தூக்கத்தைக் கெடுக்கவில்லையா? நீங்கள் எப்படி தூங்குகிறீர்கள்”  எனக் கேட்டார்.

அதற்கு ‘ஓஷோ’ அமைதியாகப் பதில் தந்தார்.

“இந்த நாய்கள் எல்லாம் உங்களுக்கு எதிராகவோ அல்லது ஆதரவாகவோ சத்தம் போடவில்லை. அவைகளுக்கு இந்த ஓய்வு விடுதியில் யார் தங்கி இருக்கிறார்கள் என்று உணரும் பகுத்தறிவும் கிடையாது. இங்கு ஒரு அமைச்சர் இருக்கிறார் என்றும் தெரியாது. நாய்கள் தங்கள் தொழிலான குரைத்து சத்தம் போடும் வேலையைச் செய்கின்றன. நீங்கள் உங்கள் வேலையான தூங்குகின்ற பணியைச் செய்யுங்கள்” என்றார் ஓஷோ.

“இப்படி அதிகமான நாய்கள் சத்தத்தில் என்னால் தூங்கவே முடியாதே”  எனக் கவலையோடு சொன்னார் அமைச்சர்.

ஒஷோ மீண்டும் விளக்கமாக பதில் தந்தார்.

“இப்போது நீங்கள் நாய்கள் சத்தம் போடுவதை எதிர்த்துப் போராட நினைக்கிறீர்கள். இங்கு இப்போதுள்ள பிரச்சனை உங்கள் மனதிலுள்ள எதிர்ப்பு உணர்வுதான். இதனால்தான், நீங்கள் நாய் சத்தத்திற்கு எதிராக செயல்படுகிறீர்கள். சத்தம் போடுகின்ற நாய்கள் எல்லாம் குரைப்பதை நிறுத்தினால்தான், நீங்கள் நிம்மதியாகத் தூங்க முடியும் என்று நினைக்கிறீர்கள். இந்த எண்ணம் ஒரு நிபந்தனையாக (Condition) மாறி உங்கள் மனதில் இருக்கிறது. உங்கள் ‘நிபந்தனை’ பற்றி அந்த நாய்களுக்குத் தெரியாது. நீங்களும் பிடிவாதமாக நிபந்தனையோடு இருக்கிறீர்கள். ‘நாய்களின் சத்தம் இல்லாமல் இருந்தால்தான் தூக்கம் வரும்’ என நினைக்கிறீர்கள். இப்படி ‘கண்டிஷன்’ போடுவது வாழ்க்கையில் நடைமுறைக்கு நல்லதல்ல.

“நாய்களின் சத்தத்தை ஏற்றுக்கொள்வதுதான் சிறந்தது. அந்த நாய்கள் எவ்வளவு சக்தியோடு சத்தம் போடுகின்றன. இந்த இரவிலும் அவைகளின் சக்தியைக் கவனித்துப் பாராட்டினால், அந்த சத்தம்கூட உங்களுக்கு மந்திரமாகத் தோன்றும்” என்றார் ஓஷோ.

ஓஷோவின் ஆலோசனையை ஏற்ற அமைச்சர் மனதை மாற்றிக்கொண்டார். தனது அறைக்குச் சென்று வேறு சிந்தனையை வரவழைத்துக் கொண்டார். இப்போது, அவரால் நிம்மதியாக தூங்க முடிந்தது.

ஓஷோவின் அறிவுரை இதுதான்.

“உன்னைச் சுற்றியிருப்பது உனக்கு எரிச்சல் தந்தால் உனது சிந்தனையை உள்முகமாகத் திருப்பிப்பார். உனது எரிச்சலுக்குக் நீதான் காரணம் என்பதை நீயே புரிந்துகொள்வாய். இந்த எரிச்சலுக்கு காரணம் ‘இது இப்படித்தான் நடக்க வேண்டும்’ என எதிர்பார்த்து நீ செயல்படுகிறாய். உலகம் இப்படித்தான் இயங்கவேண்டும் என நம் ‘நிபந்தனை’ விதிக்க முடியாது. தேவையில்லாத சில நிகழ்வுகளை எதிர்த்துப் போராடும்போதுதான் உன்னிடம் எரிச்சல் உண்டாகிறது”  இந்த ஓஷோவின் சிந்தனை நம்மிடம் மாற்றுச் சிந்தனையை உருவாக்குகிறது அல்லவா!

சிந்தனையில் நல்ல மாற்றங்கள் ஏற்படும்போதுதான் எந்த மாற்றங்களையும் நம்மால் சந்திக்க இயலும்.

மாற்றம் ஒன்றுதான் நம் வாழ்க்கையில் ஏற்றம்தந்து வெற்றியைத் தரும் என்பதை உணர்ந்து செயல்படுவது நல்லது.

எந்த மாற்றம் வந்தாலும் அதில் ஏமாற்றம் உருவாகி நம்மை வீழ்த்தும் நிலையை ஏற்படுத்த அனுமதி வழங்காமல் வாழக்கற்றுக்கொண்டால் வாழ்வில் வெற்றிகள் நிரந்தரமாக நம்மிடம் தங்கிவிடும் அல்லவா!

இந்த இதழை மேலும்

 

No comments

Be the first one to leave a comment.

Post a Comment


 

 


September 2015

அவதூறு அவசியமல்ல
மனதில் உறுதி வேண்டும்
இந்த உலகில் மனிதன் எப்படி வாழ வேண்டும்
மனித வாழ்வில் துலங்காத மர்மங்கள்
பஞ்சதந்திரம் புத்தகங்களுக்கான நேரம்
சத்தும் சக்தியும்
ஓட்டம்
தன்னம்பிக்கையை நாளும் விதையுங்கள்
அறிவார்ந்த அனுபவசாலிகள் ஆலோசனை பெறுதல் அவசியமா?
எழுத்து இதயத்தின் மொழிபெயர்ப்பு
காய்ச்சலால் வரும் வலிப்பு
மாற்றம் தேவையா?
இடைவெளியை பூஜ்யமாக்குவோம்!
தன்னம்பிக்கை மேடை
உள்ளத்தோடு உள்ளம்
என் பள்ளி
எண்ணத்தில் புதுமை…! சாதிப்பில் பெருமை…!!