Home » Articles » உங்கள் கவனத்திற்கு

 
உங்கள் கவனத்திற்கு


சீனிவாசன் D
Author:

சென்ற இதழ் தொடர்ச்சி….

நீங்கள் டென்ஷனாகவோ, பதட்டமாகவோ இருந்தால் உங்கள் தசைகளை இறுக்கமாகின்றன. தசை இறுக்கம் சில நேரம் நீடித்தால் தசைகள் வலிக்க ஆரம்பிக்கின்றன. உதாரணமாக நீண்ட நேரம் கனமான பொருளை கையில் வைத்திருந்தால், கைவலி ஏற்படும். அதே போல் கழுத்தின் பின்புறம் தசை இறுக்கும் ஏற்பட்டால் தலைவலி வரலாம்.

அறிவியல் முறையில் பார்த்தால் நீங்கள் பதட்டமாக இருக்கும்போது உங்கள் உடலில் ‘அட்ரினலின்’ என்ற ஹார்மோன் சுரக்கிறது. அது உங்களை வெவ்வேறு பகுதிகளில் பல மாற்றங்கள் சென்ற இதழில் சொன்ன அறிகுறிகள் ஏற்படவும் காரணமாகிறது.

உதாரணமாக சிறுவயதில் தெருவில் சென்று கொண்டிருக்கும்பொழுது, நீங்கள் ஒரு நாயைப் பார்த்தால் அந்த இடத்தை விட்டு ஓடுவதற்கோ அல்லது நாயை கல்லை எடுத்து நாயை துரத்துவதற்கோ முயற்சி செய்வீர்கள். இந்த சமயத்தில் உங்கள் இதயதுடிப்பு அதிகமாவதை நீங்கள் உணர்வீர்கள். மேலும் மூச்சு விடுவது சிரமமாகி வியர்வை அதிகமாக கை கால்கள் உதற ஆரம்பிக்கின்றன. அதாவது கஷ்டம் வரும்பொழுது ஒன்று அதை விட்டு விலக வேண்டும் அல்லது அதை எதிர்கொள்ள வேண்டும்.

இவ்விரண்டிற்குமே உங்கள் உடலைத் தயார் செய்ய ‘அட்ரினலின்’ என்ற ஹார்மோன் தேவைப்படுகிறது. இந்த ‘அட்ரினலின்’ உங்கள் உடலில் எவ்வாறு மாற்றங்களை ஏற்படுத்துகிறது என்று பார்ப்போம்.

பயப்படக்கூடிய சூழ்நிலைகளில் மிகவும் கவனமாகவும் ஒரு தெம்புடனும் இருப்பது அவசியம். கவனத்தை அதிகரிப்பதற்கு தசைகளுக்கும் இரத்த ஓட்டம் அதிகமாகி செல்கிறது. அதனால் வயிற்றுக்கும், குடலுக்கும் இரத்த ஓட்டம் குறைந்து விடுகிறது. இதனால் வயிறு புரட்டுவது போல் சில நேரங்களில் அடிக்கடி மலம் கழிக்க வேண்டும் என்கிற உணர்வு இதனாலேயே வருகிறது.

பதட்ட நிலையில் தசைகளுக்கு அதிக ஆக்ஸிஜன் தேவைப்படுகிறது. இதனால் நுரையீரல் வேகமாக இயங்குவதால் மூச்சுவிடுவது சிரமமாகிறது. பதட்ட நிலையில் மூளை, தசைகள் போன்ற இடத்திற்கு இரத்தத்தை அதிகமாக செலுத்துவதற்காக இதயம் வேகமாக இயங்குகிறது. இதனால் இரத்தக்கொதிப்பும் நெஞ்சு படபடப்பும் வருகிறது.

பயம் மற்றும் டென்ஷன் போன்ற சூழ்நிலைகளை எதிர்கொள்ளவோ அல்லது விட்டு விலகவோ உடலில் அதிக சக்தி தேவைப்படுகிறது. அதிகமான சக்தியைப் பயன்படுத்தும்போது உடல் சூடாகின்றது. சூடான உடலைக் குளிர்ச்சிப்படுத்த வேண்டும். உடல் குளிர்ச்சியாவதற்கு அதிகம் வியர்க்க வேண்டும். பதட்ட நிலையில் அதிகம் வியர்ப்பதற்கு இதுவே காரணமாகும்.

டென்ஷன் மற்றும் மனப்பதட்டமான சூழ்நிலைகளில் மூச்சை வேகமாகவும் மேலோட்டமாகவும் விடுவதால் இரத்தத்தில் கரியமில வாயு (Co2) குறைகிறது. இதனால் இரத்தத்தில் உள்ள அமிலத்தன்மை குறைந்து காரத்தன்மை அதிகரிக்கின்றது. (Respiratory Alkalosis). இது இரத்தக் குழாய்களை சுருங்கச் செய்கிறது. இதன் காரணமாக மூளைக்குச் செல்லும் இரத்தத்தின் அளவ குறைகிறது. இதன் விளைவாக மூளைக்கு குறைந்த அளவு பிராண வாயு (O2) செல்கிறது. மற்றும் இரத்தத்தில் கால்சியத்தின் அளவு குறைகிறது. இதனால் உடலில் ஊசி குத்துவது போலவும் கை கால்கள் மரத்துப் போவது போலவும் மற்றும் நரம்பு இழுப்பது போன்ற உணர்வுகளும் ஏற்படும். தலை சுற்றல், தலை பாரமாக இருப்பது போன்ற உணர்வு, இதயத்துடிப்பு அதிகரித்தல் போன்ற உணர்வுகளும் ஏற்படும்.

சாதாரண சூழ்நிலையிலும் நெஞ்சு படபடப்பு, மூச்சு திணறல், தலை சுற்றல் ஆகியவை உங்களுக்கு இருப்பதாக உணர்ந்தால் கீழே உள்ள பரிசோதனையை செய்து பாருங்கள்.

நூறு மீட்டர் ஓட்டப்பந்தயங்களில் ஓடி விட்டு வந்தவர் போல, மிக வேகமாக மூச்சை தொடர்ந்து இரண்டு நிமிடங்கள் இழுத்து விட்டுப் பாருங்கள். இவ்வாறு செய்யும்பொழுது உங்கள் நோய் அறிகுறிகள் மீண்டும் ஏற்பட்டால் உங்களுக்கு 98% மனப்பதட்ட நோய் இருக்கிறது என்று அர்த்தம்.

ஒரு முக்கியமான காரியத்தை மேற்கொள்ளும் முன் உங்கள் தசைகள் இறுகுவதை நீங்கள் பெரும்பாலும் உணர்ந்திருக்கமாட்டீர்கள். இந்த காரியத்தை செய்து முடித்த பின் முதுகுவலியோ கழுத்து பின்புறம் வலியோ உங்களை வாட்டியிருக்கும். பயத்தில் தசை இறுகுவதே இதன் காரணமாகும்.

கண்ணாம்பாள், வயது 35

கணவர் விவசாயி. குடும்பம் ஓரளவு சீராக சென்று கொண்டிருந்தது. கண்ணம்மாவிற்கு அவ்வப்போது தலைவலி, கழுத்துவலி வந்தன. சிறிது நேரம் ஓய்வெடுத்துவிட்டு தன் வேலைகளைத் தொடர்வார். வலி அடிக்கடி உண்டாயிற்று. ஒரு மருத்துவரை அணுகினார். அவர் கொடுத்த மாத்திரைகளை சாப்பிட்டார். சிறிதளவும் மாற்றம் இல்லை. வயிற்று எரிச்சல் வேறு வர ஆரம்பித்தது. வீட்டு வேலை செய்வதே கடினமாக இருந்தது. வேறு வழியில்லாமல் பொறுத்துக்கொண்டார். உடலில் சக்தி இல்லாமல் ஒரு அசரிக்கையுடன் இருந்தார். உடல் எரிச்சல் உண்டாயிற்று. உறவினர்களின் ஆலோசனையால் ஒரு நரம்பியல் நிபுணரிடன் சென்றார். அவர் பரிசோதனைகள் செய்துவிட்டு உடலில் எந்தக் கோளாறும் இல்லை என்றார்.

ஆனால் கண்ணம்மாவிற்கு உபாதைகள் தொடர்ந்து நீடித்தன. இரவில் சரியாக தூக்கம் வரவில்லை. பசி குறைந்தது. கை கால் குடைச்சல், மலம், சிறுநீர் கழிப்பதில் சிரம்ம் உண்டாயிற்று. இவற்றை எல்லாம் எண்ணும்பொழுது அடிக்கடி அழுகை வந்தது.

இவ்வாறு மூன்று வருடங்கள் ஓடி விட்டன. ஒரு பெண் டாக்டரை அணுகினார். அவர் ஸ்கேன் செய்து பார்த்தும் ஒரு மாற்றமும் தென்படவில்லை. அவர் கண்ணம்மாவை ஒரு மனநல மருத்துவரிடம் அனுப்பினார். முதலில் கண்ணம்மாவின் மனம் இதற்கு ஒத்து கொள்ளவில்லை. ஆனால் தன் வேதனைக்கு ஒரு விமோசனம் கிடைத்தால் போதும் என்று மனநல மருத்துவரிடம் போனார்.

நேர்முக உரையாடலின்போது அவர் தன் உடல் உபாதைகளை மட்டுமே திரும்பத் திரும்பக் கூறிக்கொண்டிருந்தார் தன் குடும்பத்தைப் பற்றியும் கணவரைப் பற்றியும் அதிகமாகக் கேட்டவுடன், அவர் ஒவ்வொன்றாகக் கூற ஆரம்பித்தார். எப்பொழுதாவது மது அருந்தும் பழக்கமுள்ள தன் கணவர் கடந்த சில ஆண்டுகளாக தினமும் அதிகமாகக் குடித்தார். வேலைக்கும் சரியாகச் செல்வதில்லை. தினமும் வீட்டில் சண்டை, அடி, உதை, அவமானம், பணக்கஷ்டம், கடன் தொல்லை, தன் மேல் தேவையில்லாத சந்தேகம் வேறு. இவற்றையெல்லாம் தாங்க முடியாத கண்ணம்மாவிற்கு அழுகை வந்தது.

எங்காவது தனியாக ஓடிவிடலாமா? தற்கொலை செய்து கொள்ளலாமா? என்றெல்லாம் எண்ணினார். ஆனால் குழந்தைகளை நினைத்து இதற்கும் மனம் முன்வரவில்லை. தன் கஷ்டத்தை எவரிடமாவது சொல்லி ஆற்றிக்கொள்ளலாம் என்றால் அது அவமானமாகத் தோன்றியது. இவ்வாறு ஏற்பட்ட மனச் சோர்வை வெளியிலும் சொல்ல முடியாமல், தானும் தாங்க முடியாமல் பல உடல் உபாதைகளுக்கு ஆளாகி அவதிப்பட்டார்.

முப்பத்திரண்டு வயது இரவிக்குமார்

ஒரு பி.காம். பட்டதாரி. அரசு நிறுவனத்தில் வேலை செய்பவர். ஒரு தனியார் மருத்துவமனையில் அவசர சிகிச்சைப் பிரிவில் மயக்க நிலையில் சேர்க்கப்பட்டிருந்தார். அவர் எலிப்பாஷான மருந்ததைக் குடித்த விட்டதாகக் கூறப்பட்டது. சிகிச்சை தொடங்கி சில நாட்களில் தெளிவானார். மனநல மருத்துவரின் ஆலோனை கேட்கப்பட்டது. தொடக்கத்தில் ரவிக்குமார் பல காரணங்களைச் சொல்லித் தட்டிக்கழித்தார். பல முறை தொடர்ந்து கேட்ட பிறகு, மெதுவாக தன் கஷ்டங்களை எல்லாம் கூற ஆரம்பித்தார்.

இரவிக்குமாருக்கு எட்டு ஆண்டுகளுக்கு முன்பிருந்த உடல் அசரிக்கை அடிக்கடி உண்டாயிற்று. எந்த வேலையும் செய்ய முடியாமல் இருந்தது. ஒரு பொது மருத்துவரை ஆலோசித்து மருந்துகள் வாங்கி சாப்பிட்டார். சிறிதளவு முன்னேற்றம் இருந்தது. ஆனால் சில நாட்களிலேயே மறுபடியும் அதே தொல்லைகள் தொடர்ந்தன. மேலும் கை கால் மதமதப்பு, உடல் எரிச்சல் உண்டாயிற்று. தன் வேலைகளில் சரியாக கவனம் செலுத்த முடியாமல் அவதிப்பட்டார்.

ஒரு நரம்பியல் நிபுணரை அணுகி தேவையான பரிசோதனைகளை மேற்கொண்டார். ஆனால் மூளையிலோ, நரம்புகளிலோ எந்த ஒரு பாதிப்பும் இல்லை என்று கூறப்பட்டது. ஆனால் இரவிக்குமாருக்கு தொல்லை நீடித்தது. சரியாக உறக்கம் வருவதில்லை பசி குறைந்தது. மற்றவருடன் கலகலப்பாக இருக்க முடியவிலை. டி.வி. பார்ப்பது, வானொலி கேட்பது போன்றவற்றில் கூட நாட்டம் குறைந்தது. அவரது நண்பர்கள், அவர் முன்பு போல் இல்லை என்று கூறினர். இதைக் கேட்டு இரவிக்குமாரின் மனம் நொந்தது. எந்தக் காரணமும் புலப்படவில்லை. நிரந்தரமான வேலை, போதுமான அளவு வருமானம் குடும்பத்தில் குழப்பம் கிடையாது. சொத்துப் பிரச்சனையோ, பங்காளிகள் தொந்தரவோ ஏதுமில்லை. அப்படியிருந்தும் தனக்கு ஏன் இந்த மனச்சோர்வு? என்று எண்ணிக் கவலையுற்ற இரவிக்குமார் தான் வாழ்வதைவிட இறப்பதே மேல் என்று முடிவு செய்தார்.

நாற்பத்தெட்டு வயதான டாக்டர் ஜானகி

ஒரு மகப்பேறு மருத்துவ நிபுணர். கணவர் என்ஜினியர். பெண் மக்கள் இருவருக்கும் திருமணம் செய்தாகிவிட்டது. காலையில் 2 மணி நேரம் தன் நோயாளிகளைப் பார்ப்பது போக மீதி நேரம் ஓய்வெடுத்துக் கொண்டு தான் இருப்பார். பத்திரிக்கை வாசிப்பது, வீடியோ பார்ப்பது என்று தன் நேரத்தைக் கழித்தார். எப்பொழுதாவது கணவர் வேலை முடிந்து சீக்கிரம் வீட்டுக்கு வந்தால் இருவரும் வெளியே சென்று உணவருந்துவார்கள். வீட்டு வேலைகளையெல்லாம் கவனிப்பதற்கு வேலை ஆட்கள் உண்டு. இவ்வாறிருக்கையில் டாக்டர் ஜானகி அவ்வப்போது தலைவலி ஏற்பட்டதும் தானே சில மாத்திரைகளை உட்கொண்டார். பயன் இல்லை. மேலும் கழுத்து பின்புறம் வலி அடிக்கடி ஏற்பட்டது. எந்த வேலை செய்தாலும் சீக்கிரமே அசரிக்கை ஏற்பட்டது. மற்றவர்களுடன் கலகலப்பாகப் பேசுவது குறைந்தது. தன் கணவர் கேட்டதற்கு தான் நன்றாகத்தான் இருப்பதாகக் கூறினார். ஆனால் தொந்தரவுகள் அதிகமாயின. கை, கால் மதமதப்பு, உடல் எரிச்சல் உண்டாயிற்று. இதைத் தாங்க முடியமால், சில இரத்தப் பரிசோதனைகளை மேற்கொண்டார். எல்லாம் நார்மலாக இருந்தது. நரம்புக் கோளாறாக இருக்கலாம் என்றெண்ணி தலைக்கு ஸ்கேன் எடுத்துப் பார்த்தார். அதிலும் ஒரு கோளாறும் தென்படவில்லை. அவரது நண்பரான நரம்பு சிகிச்சை நிபுணர் டாக்டர் ஜானகிக்கு மனச் சோர்வினால் கூட இவ்வித உடல் உபாதைகள் வரலாம் என்று கூறினார். இதைக் கேட்ட டாக்டர் ஜானகி மனச் சோர்வா? தனக்கா? என்று நினைத்து தட்டிக் கழித்தார். ஆனால் அவரால் தன் வேலைகளில் கவனம் செலுத்த முடியவில்லை. சரியாக உறக்கம் வருவதில்லை. பசி குறைந்தது. டி.வி. பார்ப்பது, பாட்டு கேட்பது போன்றவற்றில் கூட நாட்டம் குறைந்தது.

தன் நோயாளிகளிடம் எரிந்து விழுந்தார். தங்கமான குணமுடைய டாக்டர் ஜானகி இவ்வாறு கோபப்படுவதை க்ண்டு நோயாளிகள் வியந்தனர். தாங்கள் முன்பு போல் இல்லை என்ற தன் நோயாளிகள் கூறுவதைக் கேட்ட டாக்டர் ஜானகிக்கு தன் மேலேயே ஒரு வெறுப்பு உண்டாயிற்று. காரணம் என்னவென்று தெரியாமல் தவித்தார். சந்தோஷமான வாழ்க்கைக்கு தேவையான எல்லா வசதிகளும் அளவுக்கு அதிகமாகவே இருந்தன. ஆனாலும் மனதில் வெறுமை, இதையெண்ணி அடிக்கடி அழுகை வந்தது. தான் இவ்வாறு வாழ்ந்து என்ன பயன் என்று தோன்றிற்று.

ஒரு முடிவுக்கு வந்தார். வேலையாட்கள் எல்லாம் சென்ற பிறகு, மயக்க மருந்தை ஊசி மூலம் தானே செலுத்திக் கொண்டார்.

அதிர்ஷ்டவசமாக அன்று வீட்டுக்கு சீக்கிரம் வந்த கணவர், உடனே அவரை மருத்துவ மனைக்கு அழைத்துச் சென்று காப்பாற்றினார். உடல் நலம் தேறிய பிறகு அவர் மன நல மருத்துவரிடம் கூறியது என்ன?

மனத்தளர்ச்சி, மனப்பதட்டம், மன இறுக்கம் ஆகியவற்றிலிருந்து எவ்வாறு மீள்வது?

அடுத்த இதழில்…..


Share
 

6 Comments

  1. vigneshkumar says:

    மிகவும் பயனுள்ளதாக இருந்தது… பல சந்தேகங்களுக்கு ஒரு நல்ல பதில் கிடைத்தது மனதிற்கு மகிழ்ச்சியாக உள்ளது ………

  2. john paul says:

    மிகவும் பயனுள்ளதாக இருந்தது

  3. K RANJITH KUMAR says:

    மிகவும் பயனுள்ளதாக இருந்தது. அடுத்த இதழில் eppoluthu varum…சென்ற இதழ் patikka enna seiya ventum..

  4. Peer Mohamed says:

    Sir,

    The same problem my mother facing, so i want to know this continuation. can you send the link.

Post a Comment


 

 


March 2008

திறந்த உள்ளம்
பெண்ணின் மேம்பாடு சமுதாயத்தின் மேம்பாடு
உள்ளத்தோடு உள்ளம்
நட்புகள் சேர்ந்தால் வெற்றிகள் குவியும்
காலத்தை வெல்வோம்
உங்கள் கவனத்திற்கு
இங்கு இவர் இப்படி வெற்றியின் எல்லை வெளியிடத்தில் இல்லை!
உன்னைத்தேடி வீதிகள் வாரா!
வியாபாரத்தின் ஒரே முதலாளி
வளர்ச்சி! முதிர்ச்சி!
உலகில் புதிய உயிரினத்தை செயற்கை முறையில் உருவாக்க முடியுமா?
வேரில் பழுத்த பலா
ஏற்றுங்கள் நல்ல எண்ணத்தின் தீபங்களை
கேள்வி பதில்
வெற்றிப் படிக்கட்டுகள்
”நினைக்கும்” வகையில்
''நினைக்கும்'' வகையில்
மனிதா மனிதா
சிந்தனைக்கு
நிறுவனர் நினைவுகள்
ஒழுங்கான செயல்
மரபணு மாற்றம் – காலத்தின் கட்டாயம்
துணிவுடன் போராடு வெற்றி வரும்
தேர்வு எழுதும் மாணவர்களே!