Home » Cover Story » சிந்தனைகள் மலர்க!

 
சிந்தனைகள் மலர்க!


கந்தசாமி இல.செ
Author:

சிந்தனைகள் மலர்க

வாழ்க்கை மிகவும் விரிவானது. ஆனால் பலர் அதைக் குறுகிய வட்டத்துக்குள் அடக்கி விடுகிறார்கள். விரிந்த எண்ணங்கள் நம்மை உயர்த்தவும் நமது மனச்சுமைகளைக் குறைக்கவும் பயன்படும் என்பதை அவர்கள் எண்ணிப் பார்ப்பதில்லை.

தங்களைப் பற்றி எண்ணித் தங்கள் குறைகளைக் களையவும் நிறைகளை வளர்த்துக் கொள்ளவும் கூட அவர்கள் முயற்சிப்பதில்லை. அதனால் பலருடைய வாழ்க்கை சுவையாக இருப்பதற்குப் பதிலாக சுமையாகிப் போய்விடுகின்றது.

‘சிந்தனை செய் மனமே’ என்று நமது முன்னோர்கள் சொன்னதைக் கண்மூடித்தனமாக வழிபாட்டுப் பாடலாகக் கொள்ளாமல் உண்மையிலே நம்மைப் பற்றியும் நம்மைச் சார்ந்தவர்களைப் பற்றியும் சிந்திக்க வேண்டும். எண்ணிப் பார்க்க வேண்டும்.

எண்ணங்கள்

திடீர் திடீர் என்று நம் உள்ளத்தில் தோன்றுகின்ற எண்ணங்களைப்பற்றி எண்ணிப் பார்க்க வேண்டும். சில நேரங்களில் நல்ல எண்ணங்கள் தோன்றுகின்றன. சில நேரங்களில் கெட்ட எண்ணங்கள் தோன்றுகின்றன. இதற்கு அடிப்படை காரணம் என்ன என்று எண்ணிப் பார்க்க வேண்டும். அப்படி எண்ணும்போது சில உண்மைகள் புலப்படுகின்றன. அப்படி எண்ணும்போது சில உண்மைகள் புலப்படுகின்றன.

மூன்று சூழ்நிலைகளில்

எண்ணங்களுக்கு அடிப்படையாதாகச் சாதாரண மனிதர்களுக்கு அமைவது. அவர்கள் பார்ப்பது அவர்கள் கேட்பது அவர்கள் பழுகுவது இம் மூன்றின் அடிப்படையில் இரு விதமான எண்ணங்களும் தோன்றுகின்றன. இதை மிக எளிதில் உணர்ந்து கொள்ளலாம். திடீர் திடீர் என்று நாம் பார்த்த காட்சி நம் உள்ளத்தில் ஆழப்பதிந்து விடுகின்றது. அல்லது ஒரு பாதிப்பை ஏற்படுத்தி விடுகின்றது. கன்னியாகுமரியிலுள்ள விவகானந்தர் சிலை நமக்கு நினைவுக்கு வருகின்றது. தாஜ் மகாலைப் பார்த்த போது நம்மோடு உடன் வந்த இளம் தம்பதிகளின் உருவம் நம் மனக்கண் முன் தோன்றுகின்றது. நாம் துன்பத்தில் இருந்தபோது நம் கண்ணீரைத் துடைத்து முதுகைத்தட்டிக் கொடுத்த அன்பான கரங்கள், நினைவுக்கு வருகின்றன.

அறிவுரைகள்

அதே போல் ஏதோ ஒரு சமயம் கேட்ட ஒரு சொற்பொழிவில் ஏதோ ஒரு கருத்து நமது மனதில் ஆழப் பதிந்து விடுகிறது. எவ்வளவு துன்பம் வந்தாலும் கலங்கக்கூடாது; கவலைப்படவும் கூடாது’ என்ற கருத்தை நாம் யாரோ ஒருவருடைய பேச்சின்மூலம் ஆழப்பதித்து வைத்துள்ளோம். சிலருடய சொற்பொழிவு பொழுது போக்காவும், சிலருடைய சொற்பொழிவு பொருள் பொதிந்ததாகவும் இருப்பதை நாம் உணர்கிறோம். சில நேரங்களில் தெருவில் பேசிக்கொண்டு போகின்ற இருவரின் அரைகுறையான வார்த்தைகள் கூட நமக்கு அறிவுரைகளாகப் படுகின்றன.

பழக்கங்கள்

பழக்கம்கூட அப்படித்தான். சிலருடைய பழக்கங்கள் நம்மை நல்ல வழியில் செல்லத் தூண்டுகின்றன. சிலருடைய பழக்கங்கள் நம்மைத் தீயவழியில் செல்லத் தூண்டுவதோடு – அப்படிச் செல்வது தவறில்லை என்ற துணிவையும் நல்குகின்றன. இப்படித்தான் வாழவேண்டும் என்ற சிலரின் வரையறுத்த வாழ்க்கை முறை நமக்குப் பாடமாக அமைவதையும் நம்மால் உணர முடிகிறது. சிலர் நம்மையும் அறியாமல் நம் வாழ்கைக்கு வழிகாட்டிகளாகவும் முன்னோடிகளாகவும் விளங்குகிறார்கள்.

இவைகள் எல்லாம் நம் மனத்தில் ஆழப்பதிந்து இவற்றின் ஒட்டுமொத்தமான வெளியீடாக நமது உள்ளம் சில கருத்துக்களை வெளிக் கொணர்கிறது. நல்ல காட்சிகள் நல்ல பேச்சுக்கள் நல்ல பழக்கங்கள் மிகுந்திருந்தால், அந்தத் தாக்கம் நல்ல எண்ணங்களைப் பிறப்பிக்கிறது. மாறான பாதிப்புகள் மிகுந்திருந்தால் நமது உள்ளமும் மாறான எண்ணங்களையே விளைவிக்கும் வயலாக மாறிவிடுகிறது ‘தினை விதைத்தன் தினை அறுப்பான்’.

நிலமும் மனமும்

அதனால்தான் ‘நமது பார்வையும் பேச்சும் பழக்கமும் சரியாக இருக்க வேண்டும்’ என்று பெரியவர்கள் அடிக்கடி சொல்கிறர்கள். இந்த மூன்று படிநிலைகளும் சரியாக இருந்தாலும் நாம் நம்மைப்பற்றி மறு பரிசீலனை செய்வது மிகவும் இன்றியமையாததாகும். உள்ளம் நிலம் போன்றது. நிலத்தில் நல்ல விதைகளை விதைத்தாலும் கூடவே களைகளும் வளர்வதுபோல நல்ல எண்ணங்களுக்கு இடையே தீய எண்ணங்களும் தோன்றுவது உண்டு. உழவன் களைகளைக் களைந்து பயிர்களைக் காப்பது போல நாமும் நம் தீய எண்ணங்களை அவ்வப்போது களைந்து நல்ல எண்ணங்களை வளர்த்துக்கொள்ள வேண்டும்.

இதற்குத்தான் சிந்தனை வேண்டும் என்பது. ‘இந்தத் தீய எண்ணம் தோன்றக் காரணம் என்ன?’ என்று சிந்தித்துப்பார்க்க வேண்டும். அவ்வாறு தோன்றிய எண்ணத்தை எண்ணிப்பார்க்க வேண்டும். அப்போது ஓர் உண்மைப் புலப்படும். அதுதான் தவறான, முறை கேடான, அளவுக்கும் அதிகமான ஆசை என்பது நியாயமான ஆசைகளை யாரும் குறை கூறுவது இல்லை; குறைத்து மதிப்பிடுவதும் இல்லை; குறைத்து மதிப்பிடுவதும் இல்லை. ஆனால் தவறான ஆசைகளை வளர்த்துக்கொள்வதால் தவறான எண்ணங்கள் தோன்றித் தவறான செயலில் ஈடுபடத் தூண்டுகிறது.

அஞ்சி அஞ்சிச் சாவோர்

மேலும் ‘தவறான ஆசை வைத்து முன்னேறியவர்கள் எல்லாம் நன்றாகத்தானே இருக்கிறார்கள். நாமும் ஏன்இவ்வாறு முன்னேறக்கூடாது என்று எண்ணுகிறவர்களும் இருக்கிறார்கள். நல்லதுக்கு உதாரணம் எடுத்துக் கொள்ள வேண்டுமே ஒழியத் தவறான செயல்களுக்கு உதாரணம் எடுத்துக்கொள்ளக்கூடாது.அன்றியும் தவறான வழயில் முன்னேறியவர் வெளிப்படையாக மகிழ்ச்சியாக இருப்பது போலத் தோன்றினாலும் உள்ளூர அஞ்சி அஞ்சிச் சாகின்றவர்களாகவே இரக்க முடியும் என்பதை உணர வேண்டும். திருடர்கள் நல்லுறக்கம் கொள்ள முடியுமா? அப்படியே உறங்கினாலும் அதை நல்லுறக்கம் என்று கொள்ள முடியுமா?

எண்ணித் துணிக!

அதனால் நம் குறைகளை நாம் எண்ணிப்பார்த்து நம்மை நாம் சீர்படுத்திக்கொள்ள வேண்டும். இவ்வாறு நாள்தோறும் செய்து வந்தால், காலையில் இப்படி நடந்து கொண்டிருக்கலாம். என்று மாலையில் நாம் எண்ணிப் பார்த்தால் மறுநாள் காலை நல்ல பொழுதாகக் கழியும். நாம் நல்லவர்களாக மற்றவர்கள் கண்ணுக்கும் படுவோம். இவ்வாறு சின்னச்சின்னச் செயல்களையும் எண்ணிப்பார்த்தவர்கள் தான் மிகப் பெரிய மனிதர்களாகமாறி இருக்கிறார்கள். வளர்ந்து இருக்கிறார்கள்.

இரண்டையும் களைவோம்

நம் எண்ணத்தில் இரண்டும் கலந்து இருக்க வேண்டும். ஒன்று தனி மனிதன் தன் குறைகளை களைவது; மற்றொன்று தனி மனிதன் தான் வாழும் சமுதாயத்தில் உள்ள குறைகளைக் களைவது. இந்த எண்ணத்தோடு செயல்பட்டால் நாமும் வளர்வதோடு சமுதாயமும் நலம்பெறும் என்பது திண்ணம். இதற்கு நம்மை நாம் ஒரு குறுகிய வட்டத்துக்குள் அடைத்துக்கொள்ளாமல் சுதந்திரமாகவாழும் மன நிலையை வளர்த்துக்கொள்ள வேண்டும்.

நேரான எண்ணங்கள்

குனிந்து உட்காராமல் நிமிர்ந்து உட்காருங்கள். உங்கள் எண்ணத்தின் வளைஐ நிமிர்த்துங்கள். விருப்பு வெறுப்புக்கு இடமின்றி உங்களைப்பற்றி நீங்கள் சிந்தித்துப் பாருங்கள். உங்கள் குறைநிறைகளைக் கணக்கிட்டுப் பாருங்கள். இனி இவ்வாறு முறைகேடாக நடந்த உகொள்ளக்கூடாது என்று முடிவு எடுங்கள். இப்படித்தான் நடந்து கொள்ள வேண்டும் என்று உறுதி கொள்ளுங்கள். தொடக்கத்தில் நிமிர்ந்து நிற்பது துன்பமாகத் தோன்றினாலும், தொடர்ந்து செல்லும்போது நிமிர்ந்த நன்னடையே நேரான எணங்களை வளர்விக்கும். மலர்விக்கும். சிந்தனைகள் மலரச் செயல்படுவோம்!

(முற்றும்)


Share
 

No comments

Be the first one to leave a comment.

Post a Comment


 

 


March 1993

சாதனையாளர்களின் மூன்று குணங்கள்
பிரச்சனையா உங்களுக்கா?
டாக்டர் இல.செ.க. பாதையில்
தன்னம்பிக்கையின் உதயம்
விவேகானந்தரின் அறிவுரைகள்
உங்கள் பக்கம்
சாதனையாளர்களின் 3 குணங்கள்
சிந்தனைகள் மலர்க!
சாதனையாளர்களின் மூன்று குணங்கள்