Home » Articles (Page 2)

விரும்பிய தருணங்களைத் திரும்பிப் பார்க்கிறேன்

தேடிச் சோறு நிதந்தின்று பல

சின்னஞ் சிறுகதைகள் பேசி- மனம்

வாடித் துன்பமிகு உழன்று பிறர்

வாடப் பல செயல்கள் செய்து நரை

கூடிக் கிழப்பருவம் எய்தி கொடுங்

கூற்றுக் கிரையெனப்பின் மாயும் பல

வேடிக்கை மனிதரைப் போல

என்ற பாரதியின் வரிகளுக்கு ஏற்ப வாழ்ந்து வருபவர்.  பாமாலை சூட்டி பரவசம் அடைந்த நவரசப் புலவர்கள் இம்மண்ணில் ஏராளமானோர் உண்டு. அதில் குறிப்பிட்டு சொல்ல வேண்டுமென்றால் இவரை நிச்சயம் சொல்ல வேண்டும். பாரதியின் கவிதைக்கு விடுதலை தான் மூச்சு, பாவேந்தர் கவிதைக்கு பகுத்தறிவு தான் மூச்சு, இவரின்  கவிதைக்கு சமூக அக்கறை தான் மூச்சு என்று சொன்னால் அது மிகையாகது.

அதுமட்டுமின்றி இவர் தமிழ் மொழியில் எடுத்தியம்பாத இலக்கியங்களே இல்லை என்பது தான் நிதர்சனமான உண்மை .60 க்கும் மேலான நூல்களும், 150 க்கும் மேலான ஆய்வுக் கட்டுரைகளும், எழுதியுள்ளார். இவரின் மேற்பார்வையில் 48 மாணவர்கள் பி. எச்டி பட்டமும், 100 க்கும் மேலான எம்ஃபில் பட்டங்கள் பெற்றுள்ளார்கள். கலைமாமணி, ஆட்சிக்குழு உறுப்பினர்,சிறந்த கல்வியாளர், எழுத்தாளர் என பன்முகத்திறமைக் கொண்டிருக்கும் கலைமாமணி முனைவர் தே. ஞானசேகரன் அவர்களின் அனுபவ பகிர்வு இனி நம்மோடு….

என்னுடைய பெயர் தே.ஞானசேகரன், திண்டுக்கல் மாவட்டம் வத்தலக்குண்டு அருகேயுள்ள சாந்திபுரம் எனும் குக்கிராமத்தில் 12. 05. 1960 ஆம் ஆண்டு பிறந்தேன். பெற்றோர் சா. தேவராஜ. ஞானம்மாள். என்னுடன் பிறந்தவர்கள் மொத்தம் மூன்று பேர். முதலாமவர் தினகரன், விவசாயம் பார்க்கிறார். இரண்டாமவர் மதியழகன், வேளாண் அதிகாரி, முன்றாமவர் முனைவர் செயபாலன் ஊட்டி, அரசு கலைக்கல்லூரியில் விலங்கியல் துறைப் பேராசிரிராகப் பணியாற்றுகிறார். அவரது மனைவி.

சி. கஸ்தூரிபாய் இல்லத்தரசி, மகன் அறிவழகன் மேலாண்மைத் துறையில் பிஎச்டி பட்டம் பெற்று இந்திய ஆட்சிப் பணிக்கான தேர்வுக்குத் தன்னைத் தயார் செய்து வருகின்றார். இது தான் என்னுடைய குடும்பமும் பின்னணியும் ஆகும்.

என்னுடைய தந்தை 1940 களில் எட்டாம் வகுப்பு வரை படித்தவர். அந்தக் காலக்கட்டத்தில் இந்தப் படிப்பிற்கு ஏராளமான அரசாங்கப் பணிகள் வீடு தேடி வந்தது. ஆனால், விவசாயத்தை விரும்பிய அவரால் வேறு எந்த பணிக்கும் செல்ல விரும்பவில்லை. அதே போல் என்னுடைய தாயார் ஆரம்பப் பள்ளி வரை மட்டுமே படித்தவர் ஆனாலும் அவரின் அனுபவம் மிகவும் ஞானம் மிக்கது;

தொடக்கக் கல்வியை எனது கிராமத்தருகே உள்ள விராலிமலையன்பட்டியிலும், பள்ளிக்கல்வியை 6ம் வகுப்பு முதல் எஸ்.எஸ்.எல்.சி., வரை வத்தலக்குண்டு ஆண்கள் உயர்நிலைப்பள்ளியிலும் பி.யூ.சி முதல் இளங்கலைப் பட்டத்தை மதுரை வக்புவாரியக் கல்லூரியிலும், முதுகலைப்பட்டத்தை மதுரை யாதவர் கல்லூரியிலும், எம்ஃபில் மற்றும் பி.எச்.டி., பட்டத்தையும் மதுரை காமராசர் பல்கலைக்கழகத்திலும் பயின்றேன்.மதுரைப் பல்கலைக்கழகச் சூழல் சமூகவியல் சிந்தனைகளையும், நுணுகிய ஆய்வுப் போக்கையும் கற்றுத்தந்தது என்பது கூடுதல் சிறப்பு.

நான் இளங்கலை பொருளியல் தான் பயின்றேன். எங்கள் கல்லூரி ஆண்டு விழாவிற்கு  வார்த்தை சித்தன் வலம்புரிஜானும், யாதவர் கல்லூரி முதல்வர் தமிழ்க்குடிமகனும் சிறப்பு விருந்தினர்களாக வந்திருந்தார்கள்.

இந்த இதழை மேலும்

மெய்நிகர்

‘மெய்நிகர்’ உன்னும் சொல்லை நாம் ‘பொய்’ என்று கருதிவிட இயலாது. ‘மெய்நிகர்’ என்றால் ‘மெய்’ அல்லது உண்மைக்கு ஒப்பான அல்லது உண்மைக்கு அருகில் உள்ள விஷயம் என்று கருதலாம். உண்மை என்பதும், மெய்நிகர் என்பதும், அருகருகே இருந்தாலும் வேறுவேறு தான். சிறிது நேரம் மெய்நிகராக இருப்பது, சற்று நேரம் கழிந்து மெய் அன்று என்று பொருள் கொள்ளப்படுவதும் உண்டு. உண்மை பல்வேறு சதவிகிதங்களில் பொய்யுடன் கலந்து காணப்படுவதால், அதன் தாக்கம் போல குறிப்பிடலாம் என்றும் தோன்றுகின்றது. இந்தக் கட்டுரையில் தரப்படும் பல்வேறு எடுத்துக்காட்டுக்கள் மெய் சிலிர்க்கும் மெய் நிகர் அனுபவங்களாக இருக்கக்கூடும்.

விசாகபட்டினத்தில் சந்தித்த கமேண்டர் (BREEZ ANTONY) பிரீஸ் ஆண்டனி அவர்கள் ஒரு கன்னரி (GUNNERY) ஆஃபிஸர். கன் (GUN) என்பது துப்பாக்கியின் ஆங்கில ஒலிபெயர்ப்பாகப் பயன்படுத்தப்பட்டுள்ளது. அவர் தனது நீர்மூழ்கிக் கப்பல் அனுபவங்களை மிகவும் தத்ரூபமாக பகிர்ந்து கொண்டார். நீர்மூழ்கி குறித்த ‘தாஸ் பூட்’ என்னும் ஜெர்மன் மொழியில் எடுக்கப்பட்ட பழைய திரைப்படம் ஒரு மெய்நிகர்ப் படமாகும். மிகுந்த பொருட்செலவில், உண்மையான நீர்மூழ்கியில் இருந்த நட்டு போல்ட்டெல்லாம் எப்படி இருந்ததோ, அதைப்போலவே தத்ரூபமாக  அமைக்கப்பட்டிருந்த மாதிரிகளில் படப்பிடிப்பு நடத்தப்பட்டதாம்.

கிட்டத்தட்ட தரைமட்டத்திலிருந்து பன்னிரண்டு அடி உயரம் வரை, அந்த உருளையான  நீர்மூழ்கிக் கப்பலின் உடல் வடிவத்தை தூக்கி மாட்டினார்கள். அங்கிருந்து ஊசலாட விட்டார்கள். அதற்குள்ளே நடிகர்கள் இருப்பார்கள். அதன் பிறகு நீர்மூழ்கி, மேல் உள்ள நாசகாரி கப்பலில் இருந்து போடப்படும்.  ‘அன்டர் வாட்டர்’ சார்ஜ்கள் எனப்படும் நீரின் கீழ் வெடிகுண்டுகள் வெடித்து தாக்குகையில், அச்சமூட்டும் வகையில் ஆடும், அதிரும், குலுங்கும். இதை தத்ரூபமாக மெய்நிகர் அனுபவமாக படம்பிடிக்க வேண்டி, அந்த பன்னிரண்டு அடி உயரத்தில் கிரேன் மாதிரியான கருவிகள் மூலம் மொத்த உருளையையும் குலுக்கினார்களாம். உள்ளே இரயில் வண்டி போல அடுக்குப் படுக்கைகளில் படுத்திருந்தவர்கள், உருண்டு தடுமாறி விழுவது நிஜம் போலவே இருந்ததன் காரணத்தின் படப்படிப்பு குறித்து படித்த பொழுது புரிந்தது.

பிரீஸ் (BREEZ) என்கின்றசொல்லுக்கு தென்றல் என்று பொருள். தமிழில் பெண்பாற் பெயராக உள்ள சொல்லில் உங்களுக்கு எப்படி பெயர் வந்தது; என்று கேட்டபொழுது, அழகான ஒரு காரணம் கூறினார். கடுமையாக உழைத்துக் களைத்தவன் வேர்வை பொங்க ஒரு மரத்தடியில் சற்றேகண் அயர்ந்தால், அந்த வேளை வானம் தன் வெயிலை குறைக்கின்றது. காற்று தென்றலாகி அவரின் வேர்வையை உலர்த்துகிறது. அப்பொழுது சிரமபரிகாரம் ஏற்படும். அந்த உணர்வை, நீ, சுற்றியுள்ளோருக்குத் தர வேண்டும் என்பதற்காக எனக்கு பிரீஸ் ஆண்டனி என்று பெயர் வைத்தாக அவருடைய தந்தை கூறினாராம். அற்புதமான நோக்கம். என்ன ஒரு மனப்பாங்கு என்று வியந்து போனேன்.

பிரீஸ் என்று அனைவராலும் அன்போடு அழைக்கப்பட்டவர் நீர்மூழ்கிக்குள் சென்றால் அவருக்கும் காற்று குறைவாகத்தான் கிடைக்கிறது. அழகான நகமுரன் நீர்மூழ்கிக்குள் காற்றோட்டம் என்பது ஒரு பெரிய ஆடம்பரம். நீர்மூழ்கிகள் சதா கண்காணிக்க வேண்டும் அல்லது கண்காணிக்கப்பட வேண்டும். இரண்டாம் உலகப்போர் மூண்ட சமயம், சூரியன் மங்காத ஆங்கிலேயே சாம்ராஜ்ஜியத்தின் கடற் படையை -அதன் கப்பல்களை, துறைமுகத்தில் முடங்கித் தூங்க வைத்த யூ போட்டுகள் என்று அழைக்கப்பட்ட ஜெர்மானிய நீர்மூழ்கிக் கப்பல்களின் சரிதம் உலகறிந்தது.

இந்த இதழை மேலும்

புத்தாண்டு சிந்தனைகள்

2017 புத்தாண்டில் அடியெடுத்து வைத்திருக்கிறோம். புத்தாண்டு வாழ்த்துக்கள்! 2016 ம் ஆண்டு நம் நினைவலைகளிலிருந்து சற்று விலகிச் செல்கிறது. பழையன கழிதலும் புதியன புகுதலும் உலக இயல்தானே?

மகிழ்ச்சி, துக்கம், சாதனை, வேதனை, போட்டி, பொறாமை, ஏமாற்றம், ஏக்கம் என எவ்வளவோ சந்தித்திருப்போம். இருக்கட்டும், இனி நடப்பது நல்லதாக அமையட்டும் என்று எண்ணி புத்தாண்டு சபதங்களை, உறுதிமொழிகளை ஏற்போம். அது நம்மை நாமே மேம்படுத்திக் கொள்ள வழிவகுக்கும்.

உலகில் பிறந்த எல்லா மனிதர்களும் ஏதோ ஒரு வகையில் துயரத்தை, சோகத்தை சந்தித்தவர்களாகத் தான் இருப்பார்கள். ஆனால், சிலர் உடனடியாக அதிலிருந்து மீண்டு இயல்பு வாழ்க்கைக்கு வந்து விடுகிறார்கள். பலர் அதிலேயே சிலகாலம் தத்தளித்து பிறகு மீண்டு வருகிறார்கள். இன்னும் சிலர் அதிலேயே மூழ்கிவிடுகிறார்கள். மீண்டு வருவதே இல்லை.

சோகத்திற்கு முக்கியமானது காரணம் இழப்பு. பதவி, புகழ், கௌரவம் போன்றவற்றை இழந்து தவிப்பது ஒருவகை. பணம், பொருள், சொத்து போன்றவற்றைப் பறிகொடுத்து தவிப்பது இரண்டாவது வகை. உறவுகளை நண்பர்களை காலனுக்கு கொடுத்துவிட்டு பரிதவிப்பது மூன்றாவது வகை. இம்மூன்றில் இறப்பு ஏற்படுத்தும் சோகம்தான் உச்சம்.

ஒவ்வொரு தொடக்கத்திற்கும் ஒருமுடிவு தவிர்க்க முடியாதது. ஓட்டப்பந்தயப் போட்டியில் ஓர் எல்லை இருக்கிறது. அந்த எல்லையைத் தொட்டு விடலாம் என்ற எண்ணத்தில் தான் ஓடுகிறார்கள். எல்லையே இல்லாவிட்டால் யார் ஓடுவார்கள்? எதை நோக்கி ஓடுவார்கள்? வாழ்க்கையும் ஒரு ஓட்டப்பந்தயம் தான்!.

மண்ணில்  தோன்றிய ஜீவன்கள் அனைத்திற்கும் மறைவு என்பது நிச்சயம் உண்டு. பூத்த பூ, காயாகி, காய் கனியாகி, கனி விதையாகி, விதை விருட்சமாகிறது. ஒன்றின் மரணம் மற்றொன்றின் ஜனனம். இது இயற்கை கற்றுத் தருகிற வாழ்க்கைப்பாடம்.

மனிதன் பிறக்கும்போதே அவனுடைய இறப்பும் நிச்சயிக்கப்படுகிறது ஆனால், வாழும்போது பிறந்த தேதி தெரியுமே அன்றி, மறையும் தேதி தெரியாது. வாழ்க்கையின் ரகசியம் அங்குதான் ஒளித்துவைக்கப்பட்டிருக்கிறது. அந்தநாள் நம்மைத் தீண்டும்வரை இருப்பவர்களை நேசித்து, எஞ்சி உள்ள வாழ்க்கையைப் பயனுள்ளதாக்கிக் கொள்ள வேண்டும்.

சோகத்தை விலக்கு

கடந்தகாலம் என்பது எல்லோருக்கும் உண்டு. அதில் மகிழ்ச்சியும் இருக்கும், சோகமும் இருக்கும். மகிழ்ச்சியை நினைத்துப் பார்க்க வேண்டும். சோகத்தை மறக்கப்பார்க்க வேண்டும்.

கால்குலேட்டரை உபயோகிக்கும் போது ஒரு கணக்கு முடிந்த பின்பு அதை அழித்து விட்டு அடுத்த கணக்கு போட்டால்தான் சரியான விடை கிடைக்கும். போட்டு முடித்த கணக்குடன் தொடர்ந்து போட்டுக்கொண்டிருந்தால் தவறான விடைதான் வரும். இது நம் வாழ்க்கைக்கும் பொருந்தும்.

கசப்பான பழைய நினைவுகள் நிம்மதி இழக்கச் செய்யும். அவற்றையே நினைத்துக் கொண்டு நிகழ்காலத்தையும், எதிர்காலத்தையும் பாழாக்கிக் கொள்வது மடமை. அத்தகைய சம்பவங்களிலிருந்து அனுபவப்பாடத்தை மட்டும் எடுத்துக் கொண்டு, சம்பவத்தை மறந்துவிட வேண்டும். முழுமையாக மறக்க முடியாவிட்டாலும், அதற்கு முக்கியத்துவம் கொடுக்காமல் விட்டுவிட வேண்டும். இத்தகைய சோகத்திலிருந்து வரவில்லையென்றால், நாளடைவில் உடம்பு துருப்பிடித்த எந்திரம் போலாகிவிடும். படிப்படியாக திறமையும், ஆற்றலும் அரிக்கப்பட்டு விடும். எவ்வளவு விரைவாக சோகம் என்ற புதை மணலில் இருந்து மீண்டு வர முடியுமோ அவ்வளவு விரைவாக விடுபட்டு மீண்டு வரவேண்டும். மாறாக, சோகம் நீடித்தால் குடும்பம், தொழில், வருமானம் என அனைத்தும் பாதிப்புக்குள்ளாகும். நாளடைவில் மனம் அதிலேயே ஒருவகையான சுகம் காணத் தொடங்கி விடும். போட்டி நிறைந்த இன்றைய காலகட்டத்தில் அன்றாட வாழ்வை எதிர்கொள்வதற்கே அதிக அளவில் சக்தி தேவைப்படுகிறது.

இந்த இதழை மேலும்

தன்னம்பிக்கை மேடை

 நேயர் கேள்வி?

வரும் புத்தாண்டுக்கு இளைஞர்களாகிய எங்களுக்கு நீங்கள் கூற விரும்புவது?

அருள்மொழி, கோவை

ஒவ்வொரு புத்தாண்டின்போதும் புது சபதங்கள் எடுப்பதும், அதன்படி சில நாட்கள் செயலில் இறங்குவதும் வாடிக்கையானது. அதுபோல இந்த ஆண்டு முடியும் தருவாயில், புத்தாண்டில் புதிதாக என்ன செய்யலாம்? எந்தப் பழக்கங்களைக் கைவிடலாம் போன்ற சிந்தனையில் வாசகர்கள் இருக்கும் நிலையில், இந்தக் கேள்வி கேட்கப்பட்டிருக்கிறது. நல்ல கேள்வி, சரியான நேரத்தில் கேட்டிருக்கிறீர்கள்.

டிசம்பர் 31, முடிந்தவுடன் ஒரு ஆண்டு நமது வயதுடன் சேர்ந்துவிடுகிறது. இன்னும் சற்று வயதாகிவிட்டது என்ற கவலை இருக்கிறது என்றாலும், எதிர்காலத்தை நினைத்துப்பார்க்கும் போது இன்றைய நாள், நாம் உயிரோடு இருக்கும் மீதி காலத்தின் மிக இளமையான நாள் என்பது புரியும். கடந்த காலத்தைப் பார்க்கும்போது இன்றுதான் நமது வாழ்நாளின் முதிர்ச்சியான நாள் என்பதும் தெரியும்.

இன்று இளைஞர்களாகிய நீங்கள் என்ன செய்ய வேண்டும் என்ற கேள்விக்கு சில யோசனைகளைத் தருகிறேன், அதை 365 நாட்களும் கடைப்பிடித்தால் அவை உங்களுடையப் பழக்கம் ஆகிவிடும், அதுவே உங்கள் நற்குணமும் ஆகிவிடும், உங்களுடைய வாழ்க்கையும் ஆகிவிடும்.

  1. அதிகாலையில் 5 மணிக்கு எழுங்கள்: குறிப்பிட்ட ஒரு வேலை இல்லை என்றாலும் கூட காலை 5 மணிக்கெல்லாம் எழுங்கள். அன்றைய மிகக்கடினமான ஒரு செயலை காலை 5 முதல் 7 மணிக்குள் செய்து முடியுங்கள். உங்களுக்குப் பிடிக்காத ஒரு பாடத்தைக் கூட ஒரு முறை வாசியுங்கள்; ஒன்றும் புரியவில்லை என்றாலும் வாசித்துப் பாருங்கள். காலை வேளையில் எந்த கவலையுமின்றி தூங்கி வழியும் மாணவர்கள் வீணாய் போவதை யாரும் தடுத்து விட முடியாது. அவன் மிகப்பெரிய செல்வந்தனின் மகனாக இருந்தாலும் சரி!
  1. ஒரு மணி நேரம் செய்தித்தாள் படியுங்கள்; தினமும் காலையில் ஒரு மணி நேரம் செய்தித்தாள் படியுங்கள். அதுவும் ஒரு ஆங்கிலப் பத்திரிக்கையைக் கண்டிப்பாகப் படியுங்கள். தமிழ்நாடு, இந்தியா, உலகம் என்று அனைத்துலகிலும் நடக்கும் நிகழ்வுகளை வாசியுங்கள். செய்திகளின் அற்புத் தன்மையை மனதார உணர்ந்து சிரியுங்கள், அழுங்கள், கோபப்படுங்கள். எடுத்துக்காட்டாக ஊழல் புரிபவர்கள் மற்றும் மக்களை ஏமாற்றுவர்கள் மீது சினம் கொள்ளுங்கள்.
  1. தினமும் உடற்பயிற்சி: தினமும் ஒரு மணி நேரமாவது ஒடுங்கள் அல்லது சைக்கிள் மிதியுங்கள். டென்னிஸ், ஷட்டில் போன்ற மற்ற விளையாட்டுகள் கூட நல்லது தான். ஆனால் ஒருமணி நேரமாவது தொடர்ந்து விளையாட வேண்டும். 
  1. உடல் நலம்: உடலில் ஏதேனும் நோய் குறை என்றால், உடனே டாக்டரிடம் சென்று ஆய்வு செய்து சிகிச்சை பெறுங்கள். டாக்டர் என்றால், MBBS படித்தவர்கள் அல்லது BDS படித்தவர்கள் மட்டும் தான்  டாக்டர்கள். அவர்களது மருந்து முறை மட்டும் தான் விஞ்ஞானபூர்வமானது. மற்ற மருத்துவ முறைகளில் உண்மை உண்டு என்று இன்னும் நீருபிக்கப்படவில்லை.

இந்த இதழை மேலும்

இங்கு இவர் இப்படி

உழவர் இரா. கதிர்வேல்

உழவன் இல்லம், வலையபாளையம்.

“பல நாள் பலரும் என்னைப் பார்த்து பொறாமைப்பட்டுள்ளார்கள்.

ஏன் என்று கேட்கும்போதெல்லாம், அவர்கள் கூறும் பதில்,

நாங்களும் படிக்காமலேயே இருந்திருக்கலாம்.

விவசாயம் பார்த்து நிம்மதியாக

வசப்படுத்தியிருக்கலாம்”

அழகு நகர் உண்டாக்கி சிற்றூரும்.

வரப்பெடுத்த வயலும் ஆறு தேக்கிய நல் வாய்க்காலும்

வகைப்படுத்தி நெல் சேர உழுது பயன்விளைவிக்கும்

நிறைஉழைப்புத் தோள்களெல்லாம் எவரின் தோள்கள்?

இவ்வரிகளை எழுதிய பாரதிதாசன், உழவனின் தோள்கள்தான் இவ்வையத்தை வாழ வைக்கிறது உழவுக்குத் தோள்தட்டி தோழமையோடு பறைசாற்றுகிறார். ஆனால், அத்தோழமையுடன் தோள் கொடுக்க இன்றையவர்களில் எத்தனை பேர் தயராக உள்ளார்கள்?

“ஒரு கூடை உமியில் ஒரு நெல் கூட கிடைக்காதா”? என்று திருமூலர் கேட்டார். ஆனால் நான் தேடிய ஒரு கூடை உம்மியில் ஒரு நெல் கிடைத்தது. ஆம், பத்தாம் வகுப்புவரை மட்டுமே படித்து விட்டு, இனி படிக்கப் போவதில்லை என்று முடிவெடுத்தேன், எனது பாட்டன் தொழிலே மேம்பட்ட தொழில் என்பதனை மனதில் கொண்டு, மனமார உழவுத்தொழிலைத் தொடங்கினேன்.

எனது சொந்த ஊர் ஈரோடு மாவட்டத்தில் கோபிசெட்டிப்பாளைத்தை அடுத்த வலையப்பாளையம் ஆகும். சிறுவயது முதலே படிப்பில்  எனக்கு ஆர்வம் கிடையாது. மாறாக ஊருக்கே சோறு போடும் ஒரு உழவனாக உருவெடுக்க வேண்டும் என்பதே வருங்கால கனவாக இருந்தது. அதுவும் நான் கண்ட பகல் கனவு தான்.

“பகல் கனவு பலித்துவிடும்” என்று என் ஆத்தா சொன்னது மெய்யாகி விட்டது. எனக்கு சாப்பாடு ஊட்டிய ஆத்தா இன்று நான் ஒரு உழவனக இருந்து வருகிறேன்.

மேலும், நான் சிறியவனாய் இருக்கும் போதே என் தந்தை காலமாகி விட்டார். அக்காலம் தொட்டு இக்காலம் வரை சொந்த மகனாய் எனது சித்தப்பா என்னை வளர்த்து இச்சமூகத்தில் நற்பெயருடன் வாழவைத்தார் என்பதனை அளவு கடந்த பாசத்துடனும், நேசத்துடனும் கூறிக்கொள்கிறேன்.

பல நாள் பலரும் என்னைப் பார்த்து பொறாமைப்பட்டுள்ளார்கள். ஏன் என்று கேட்கும்போதெல்லாம், அவர்கள் கூறும் பதில், நாங்களும் படிக்காமலேயே இருந்திருக்கலாம். விவசாயம் பார்த்து நிம்மதியாக வசப்படுத்தியிருக்கலாம்அதை விட்டுவிட்டு, படித்து, வேலைக்கு அலைந்து திரிந்து, ஒரு வேலையைக் கண்டுபிடித்து சம்பளம் வாங்கி, வரவு வைத்து, செலவு பார்த்து வாழ்க்கை வாழ்வதற்குள் பாதி வாலிபம் கரைசேர்ந்து விட்டது, என்பார்கள்.

இதைக்கேட்கும் போதெல்லாம், நான் விவசாயம் செய்தவரை எண்ணி மகிழ்ச்சியடைந்தது உண்டு. ஆனால் எனது தோழன் ஒரு குண்டைப் போட்டான். நண்பா, விவசாயம் செய்வர்களுக்கு எல்லாம் மணப்பெண் கிடைப்பதில்லை. பார்த்துக்கோடா! என்றான்,திகைத்துப் போனேன். ஆனால் என் திகைப்பைத் தீர்த்து வைக்க ஒரு நற்செய்தி வந்தது, பெண் பார்த்துவிட்டார்கள் என்று.

அதுவும் அவர் ஒரு ஒரு கல்லூரி உதவிப்பேராசிரியை என்றும். கணிதத்துறையில் M.Sc.., M.Phil., பட்டம் பெற்றவர் என்றும் சொன்னார்கள் .நம்பமுடியவில்லை இதுவெல்லாம் நடக்கக்கூடிய செயலா? வேண்டாம் என்று எண்ணினேன். அதற்குள், பெண்ணுக்கு உன்னைப் பிடிவிட்டது. இன்னும் இரண்டு மாதத்தில் திருமணம்,என்றார்கள்.

இந்த இதழை மேலும்

உழவுத் தொழிலுக்கு வாருங்கள்

உழவுத்தொழில் என்பது இந்த மண்ணின் அடையாளம் ஆகும்.

உலகத்தில் உயர்ந்த தொழில் ஒன்று உண்டு என்றால் அது உழவுத்தொழிலே! உழவுத் தொழிலுக்கு ஈடு இணை எதுவுமே இங்கில்லை.. உயிர்கள் அனைத்தையும் காப்பாற்றும் உழவுத் தொழிலே முதன் முதலில் மனிதகுலம், இம்மண்ணில் செய்த தொழில். நம் மூதாதையர்களால் போற்றி வளர்க்கப்பட்ட இத்தொழில், இன்னும் சில காலத்தில் இம்மண்ணிலே கொடிகட்டி பறக்கப்போவது உறுதி.

எனக்கு நன்றாக நினைவு இருக்கிறது. எங்க அப்பா எங்க நிலத்தில் உழவு செய்ய, அதிலே எங்க அம்மா விதை விதைக்க, விதை முளைத்து பயிராகும் போது கூடவே வளரும் களைகளை, எங்க சொந்தக்காரர்களைக் கூப்பிட்டு பிடுங்கி, வளர்ந்த பயிரை, இரவு, பகலாக உயிரைக் கொடுத்து, அங்கேயே கிடையாய்க் கிடந்து, தண்ணீர் பாய்ச்சி பூச்சி மருந்து தெளித்து, ஆடு, மாடு மனுச, மக்க, கண்ணுபடாமா, ஒவ்வொரு நாளும், பார்த்து பார்த்து விளஞ்ச வெள்ளாமையை அறுவடை செஞ்சு, அதை பக்குவமா பாடம் பண்ணி, சிந்தாம, செதராமா, மாட்டு வண்டியில ஏற்றி வீடு போயி கொண்டு சேர்க்கம் போது எங்க குடும்பத்துல இருந்த குதூகலத்திற்கு அளவே கிடையாது. அந்த சந்தோசம், மகிழ்ச்சி, பேரானந்தம் எந்த லோகத்திலும் கிடைக்காது போங்க. என் புள்ளைகள் என்ன பாவம் செஞ்சுச்சோ, அந்த சந்தோசம் என்னன்னு தெரியாமலே வளருது. இதற்குக் காரணம் காலம்தான். உழவுத்தொழிலின் உயர்வை அவர்கள் கண்ணில் காட்டாமல் மறைத்து விட்டது.

உழவுத்தொழில் என்பது இந்த மண்ணின் அடையாளம் ஆகும். உழவு, நிலத்தின் மேல் மண்ணை வளமாக்குவதுடன், அதை மென்மையாக்கவும் உதவுகிறது. நிலத்தில் பயிர் செய்யும் முன் அந்நிலத்தை, உழவேண்டும், பிறகு மண் கட்டிகளை உடைத்து விட்டு, உழுத மண்ணை ஓரிருமுறைபுரட்டிப்போட்டு சரிபடுத்தி, பின்பு பாத்திகட்டி அந்தப் பாத்திக்குள், மழைநீர் மற்றும் பாசன நீரை மின் மோட்டர் கொண்டோ கவளை மற்றும் ஏற்றம் கொண்டோ இறைத்து நிலத்தினுள் உட்புக வழி செய்ய வேண்டும். இப்படிச் செய்வதால், மண் அரிப்பும், நீர் இழப்பும் தவிர்க்கப்படுவதுடன், மண்ணில் உள்ள நுண் துளைகள் வழியாக நீர் கீழே சென்று, நிலத்தடி நீராகி, மீண்டும் கிணற்றுக்குள் வந்து சேரும். எவ்வளவு அற்புதமான அறிவியில் இது! இதுமட்டுமா?

மேல் மண்ணை உழவு செய்வதால், அதில் வளரும் பயிருக்குத் தேவையான காற்று அந்த மண்ணுக்குள் செல்கிறது. அதோடு பயிறுக்குத் தேவையான ஈரப்பதமும், காற்றும், மண்ணில் இருந்தே கிடைக்க வழிவகுக்கின்றது. மேலும், காற்றின் தன்மையை அடிக்கடி மாற்றிக் கொள்ளவும், மண்ணின் வெப்ப நிலையை அதிகப்படுத்திக் கொள்ளவும் ஏதுவாகிறது. இவை எல்லாம் எவ்வளவு பெரிய விசயங்கள்!

பயிரிட இருக்கும் நிலத்தை உழவு செய்தவதால், மேலும் பல நன்மைகள் விளைகின்றன. முந்தைய பயிரின் கழிவுப் பொருட்கள், களையப்பட்டு, நிலம் தூய்மை அடைகிறது. பூமியை நன்கு உழும்போது, நிலத்தில் சூரிய ஒளிபட்டு, பூச்சிகள் எல்லாம் மண்ணின் மேல் பாகத்திற்கு வருகின்றன. இவ்வவாறு வரும் பூச்சிகளை பறவைகள், கொத்திக் கொண்டு சென்று விடுகின்றன.  இப்படி, பல்வேறு பலன்கள், உழவு செய்வதால், பயிரிடும் நிலத்திற்கு கிடைக்கின்றன என்பது இன்றுள்ள எத்தனை பேருக்குத் தெரியும்!

உழவு என்பதே, மனிதன் மரக்கலப்பையை மண்ணில் அழுத்தி, அதை மாட்டைக் கொண்டு ஓட்டி, ஒரே நேர்கோட்டில் இழுத்துச் செல்லும் தொழிலாகும். இதனால், நிலத்தின் மேல் மண்ணை அது திறந்து விடுகின்றன. இதுவே மரபு சார்ந்த உழவுத் தொழிலாக நீண்டநாள் பின்பற்றப்பட்டு வந்தது.

அதனைத் தொடர்ந்து இரும்புக் கலப்பையைப் பூட்டி உழுகின்றமுறைவந்தது. காலப்போக்கில், பயிர்த் தொழிலுக்கு தேவையான வேலையாட்கள் கிடைக்காத நிலை உருவானதும், டிராக்டர் கொண்டு உழவு செய்யப்பட்டது.

இந்த இதழை மேலும்

குழந்தை உணவு

குழந்தை உணவு என்பது குழந்தை தாய்ப்பாலிருந்து மற்ற உணவுகளுக்கு மாறும் காலகட்டம் ஆகும். இந்த காலகட்டத்தில் சக்தி மற்றும் புரதம் குறைவான உணவு கொடுக்கப்படும் பொழுது குழந்தைகளுக்கு சத்துணவு குறைபாடு ஏற்படும்.

இந்த சத்துள்ள உணவை கொடுக்கும் பொழுது இதற்காக நாம் அதிகம் செலவிட வேண்டியதில்லை. விலை குறைவான எளிதில் கிடைக்கக்கூடிய உணவுகளைக் கொண்டு எல்லோரும் தயாரிக்கலாம். இதைக் கருத்தில் கொண்டு குழந்தை உணவைத் தயாரிக்கக்கூடிய விளக்க முறைகள் கொடுக்கப்பட்டுள்ளது.

இந்த உணவைக் கொடுக்கும் கட்டத்திலும்கூட தாய்ப்பாலைத் தவிர்க்க வேண்டிய அவசியமில்லை. எவ்வளவு நீண்ட நாட்கள் கொடுக்க முடியுமோ அவ்வளவு நாட்கள் கொடுக்கலாம். அது குழந்தையின் ஆரோக்கியத்திற்கு நல்லது. 7-8 மாத காலகட்டத்தில் குழந்தையின் வளர்ச்சி அதிகமாகும் போது தாய்ப்பால் ஆர்வம் குறைகின்றது. பொதுவாக 9-ல் இருந்து 12 மாதங்கள் ஆனவுடன் தாய்ப்பாலைத் தவிர்க்க ஆரம்பிக்கும். இந்தக் காலகட்டத்தில் இதன் விளையாட்டு மற்றும் சுற்றுப்புறத்தில் ஆர்வங்கள் அதிகரிப்பதே இதற்குக் காரணம். குழந்தை உணவை ஆரம்பிக்கும் பொழுது ஒவ்வொரு உணவாக ஆரம்பிக்க வேண்டும். ஒவ்வொரு உணவையும் ஒரு வார காலம் புகட்டவேண்டும். இது குழந்தையின் உடல் அதை ஏற்றுக் கொள்ள வழி வகுக்கும். பின்பு அடுத்த புதிய உணவைக் கொடுக்கலாம்.

உணவு கொடுக்கும் போது கவனிக்க வேண்டியவை

  1. முதலில் நீங்கள் குழந்தை உணவைக் கொடுக்க ஆரம்பிக்கும் பொழுது, குழந்தை உணவின் தன்மைக்கும், சுவைக்கும் பழக்கப்படுத்திக் கொள்ள வேண்டும். அதனால் முதல் சில நாட்கள் உணவைக் கொடுத்தவுடன் துப்பும். இது இயல்பாக நடக்கக்கூடிய நிகழ்ச்சி ஆனாலும், குழந்தை துப்பினால் கூட உணவைக் கொடுப்பதை நிறுத்தக்கூடாது. சில நாட்களில் குழந்தை உணவை ஏற்றுக் கொண்டு விடும்.
  2. குழந்தைக்கு உணவு கொடுக்கும் பொழுது ஒரு முறைக்கு ஒரு உணவை மட்டும் தரவேண்டும். இது நமக்கு குழந்தைக்கு எந்த உணவில் அலர்ஜி உண்டு என்று அறிய உதவும்.
  3. குழந்தைக்கு அவசர அவசரமாக உணவு கொடுக்கக் கூடாது. மெதுவாக விளையாட்டுடனும், பேச்சுடனும் சந்தோஷமாக கொடுக்க வேண்டும்.
  4. உங்கள் குழந்தைக்கு இணை உணவு கொடுக்கும் பொழுது சத்தத்தினாலோ அல்லது மற்ற ஒலிகளினாலோ கவரப்படலாம். அதனால் அதன் கவனம் மறுபடியும் நம்மீது திரும்பும் வரை பொறுத்திருந்து தரவேண்டும்.
  5. குழந்தையின் உணவு வேளையின் போது குழந்தைக்கு நாம் பாதுகாப்பாக இருக்க வேண்டும். குழந்தையைத் தனியாக விட்டுச் செல்லக்கூடாது.
  6. உங்கள் குழந்தை தொடர்ச்சியாக ஒரு உணவைத் தவிர்த்தால் இரண்டு வாரங்கள் கழித்து அதை கொடுக்கவும். அப்படியும் மறுக்கும் பட்சத்தில் அதைச் சிறிது சிறிதாக குழந்தைக்கு மிகவும் பிடித்த உணவில் கலந்து கொடுக்கவும்.
  7. சில சமயங்களில் உணவுகளை அவசரமாகவோ, அளவுக்கு அதிகமாகவோ சாப்பிட்டால் வாந்தியோ, அல்லது உணவைத் துப்பவோ செய்யும்.

இந்த இதழை மேலும்

ஓடுவது கடிகார முள் அல்ல, உன்னுடைய வாழ்க்கை

‘காத்திருக்கும் நேரத்தில்

கையில் புத்தகம் வைத்திருந்தால்

அதைக் படித்து காத்திருக்கும் நேரத்தை

வீணடிக்காமல் பார்த்துக் கொள்ளலாம்.’

நேரம் நம் அனைவருக்கும் இலவசமானது தான்.ஆனால்,அது எப்போதும் விலை மதிப்புமிக்கதாகவே உள்ளது. நாம் ஒருபோதும் நேரத்தின் எஜமானர்களாக முடியாது. நேரத்தை நம்மால் பிடித்து வைக்கவும் முடியாது. அதை சரியாகப் பயன்படுத்திக் கொள்ளத் தான் முடியும்.

வாழ்வில் ஒருமுறை நாம் இழந்த நேரத்தை திரும்ப பெறமுடியவே முடியாது. நமக்கு மிகவும் அரிதான இந்த தேவையான நேரத்தை, மிகவும் மோசமாகப் பயன்படுத்துபவர்களே நம்மில் அதிகம்.

அரிதிலும், அரிதான நிகரற்ற ஒரு பரிசை யாருக்கேனும் நீங்கள் தர முடியுமென்றால், அது உங்களுடைய நேரம்தான்.

நேரம் பணத்தை விட மதிப்பு வாய்ந்தது. உங்களால் பணத்தைக் கூட சம்பாதித்து விட முடியும். ஆனால், நேரத்தை உங்களால் பெறவே முடியாது.

குறிப்பிட்ட இடத்திற்கு ஒரு நிமிடம் தாமதமாக செல்வதை விட, ஒரு மணி நேரம் முன்னதாகவே சென்று விடுவது மிகவும் மேலானது. நேரம் உருவாக்கப்பட வேண்டிய ஒன்று.

எனக்கு நேரம் இல்லை, என மறுப்பதன் உண்மையான அர்த்தம் என்னவென்றால், அதைச் செய்ய எனக்குத் துளியும் விருப்பமில்லை, என்பதாகும்.காலமும், கடல் அலையும் யாருக்காகவும் காத்திருப்பதில்லை, என்பது பழமொழி.

போதுமான நேரம் இல்லை, என்று சாக்குப் போக்கு சொல்வதை ஏற்கவே இயலாது. நமக்கு ஒரு நாளைக்கு எவ்வளவு நேரமோ, அதே அளவு நேரம்தான் குடியரசுத் தலைவருக்கும் பிரதம மந்திரிக்கும் உள்ளது.

எல்லா செல்வமும் உடைய ஒருவரை நான் ஒரு போதும் தேடவில்லை. ஆனால், என்னுடன் நேரத்தைச் செலவிட முடிந்த ஒருவரே தேவை. அவர் எல்லாவற்றையும் விட மேலானவர்; என நான் கருதுகிறேன்.

வாழ்வில் நாம் திரும்பப் பெறமுடியாதவை மூன்று: அவை 1. சொல்லிவிட்ட வார்த்தை 2. தவறவிட்ட வாய்ப்பு, 3. கடந்து விட்ட நேரம் ஆகியவைகளாகும். நேரம் வேகமாகப் பறக்கிறது. நாம் நல்ல விமானியாக இருந்து காலத்தைப் பயன்படுத்த வேண்டும்.

நேரம் எல்லாவற்றையும் மாற்றுகிறது. எந்த வகையில் நாம் நம் நேரத்தை செலவழிக்கிறோமோ, அதுதான் வாழ்வில் நாம் யார் என்பதைத் தீர்மானிக்கிறது. இழந்த செல்வத்தைச் சாம்பாதித்து விடலாம். இழந்த உடல் நலத்தைச் சரி செய்து விடலாம். ஆனால், இழந்த நேரத்தைப் பெறவே முடியாது.

பறவை உயிருடன் இருக்கும்போது எறும்புகளை உண்கிறது. பறவை இறந்து விட்டால், எறும்புகள் பறவையை உண்கின்றன. ஒரு மரத்திலிருந்து பல லட்சம் தீக்குச்சிகளைத் தயாரித்து விடலாம். ஆனால், ஒரே ஒரு தீக்குச்சி பல மரங்களை எரித்துவிடும். எந்த நேரத்திலும் மனிதனின் சந்தர்ப்ப சூழ்நிலைகள் மாறலாம். அதனால், யாரையும் ஒரு போதும் காயப்படுத்தி பேசுவதோ, குறைவாக மதிப்பிடுவதோ கூடாது. இன்று நீங்கள் சக்தி வாய்ந்தவராக இருக்கலாம். நாளை அந்த நிலை மாறிவிடும் ஏனென்றால், நேரம் உங்களை விட பல மடங்கு சக்தி வாய்ந்தது.

நமக்கு நேரம் நிறைய இருந்தும்,. குறைவான பணிகளை மட்டும் செய்து கொண்டு இருக்கிறோம் என்றால், அதை உடனடியாக மாற்றிக் கொள்ள வேண்டும்.

இந்த இதழை மேலும்

கலைவரிசை

ஒரு புகைப்படம் ஆயிரம் வார்த்தைகளுக்கு சமம்”, என்றொரு வரலாற்று வழக்கு உண்டு.

விசாகபட்டினம் ஒரு அற்புதமான நகரம். அன்றைய இராமகிருஷ்ணா மிஷன் கடற்கரை தினந்தோறும் வருக! என்று கண்களுக்குள் பேசிக்கொண்டே இருந்தது. கடற்படை பயிற்சிக்காக விசாகபட்டின போர்க்கப்பல்கள் நிற்கும் தளத்தை காணும் வாய்ப்பு கிடைத்தது. போர்க்கப்பல்களின் அருகே, சிந்துவீர் என்னும் நீழ்மூழ்கி கப்பலை காணும் வாய்ப்பும் கிடைத்தது. போர்க்கலை மானுட  வாழ்வின் தேர்ச்சி கொள்ள வேண்டிய அறுபத்து நான்கு கலைகளின் ஒன்றாகும். பயிற்சியில் கர்னல் பி.எம். கரியப்பா என்னும் இராணுவ அதிகாரியை சந்தித்து அனுபவம் மெய் சிலிர்க்க வைத்து ஒன்று.

விக்கி பீடியாவின் தமிழ் இணைய தளம். மொழிஞாயிறு ஞா. தேவ நேயப் பாவணர் தொகுத்த செந்தமிழ் சொற்பிறப்பியன் பேரகரமுதலி என்கின்றமிக்ஷனரி (இப்படி முதலிலேயே சொல்லுங்க, என்கிறீர்களா? பட்டியலிட்டுள்ள அறுபத்து நான்கு கலைகளையும் படிக்கத் தருகின்றது.

எழுத்திலக்கணம் (1), லிகிதம்  எழுத்தாற்றல் (2), கணிதம் (3), அலங்காரம் (18), யோகம் (10), போர்ப்பயிற்சி (34) என்கின்றஇந்த பட்டியல் வரிசை பலமுறைமாற்றப்பட்டு புதிதாக பல கலைகள் சேர்க்கப்பட்டு உள்ளன.

நிறைய பகுத்தறிவுக்கு ஒவ்வாத சூனியம், மந்திரம் போன்றதலைப்புகள் கூட கலைவரிசையில் இடம் வெற்றிருப்பதை காணலாம். கலை வரிசையில்  பட்டிலை பார்ப்பது ‘கற்றது கையளவு’ என்று உணர செய்கின்றஒரு அனுபவமாகத்தான் இருக்கிறது.

யானையேற்றம், குதிரையேற்றம் என்கிற தலைப்புகளுக்கும் போர்பயிற்சியை தவிர்த்து தனியாக தரப்பட்டுள்ளது. போர்களின் முக்கியத்துவத்தை காட்டுகிறது. பல்வேறு முறை மாற்றியமைக்கப்பட்ட பட்டியல்கள் விக்கிப்பீடியாவில் உள்ளன. அதுபோன்றஇன்னொரு பட்டியலில்  பாட்டு முதலிடம் பிடித்துள்ளது. மஹாகவி பாரதியின் “நல்லதோர் வீணை செய்தே, அதை நலங்கெட புழுதியில் எறிவதுண்டோ!” என்னும் உணர்ச்சி மிகுந்த பாடலை உள்ளார்ந்த மெய்த்தன்மையோடு, வகுப்பறையில் பவர் பாயிண்ட் பிரசன்டேஷனக்கு சற்று முன்பாக பாடி, அதன் ஆங்கில பொருளையும் விளக்கம் அளித்த பொழுது பயிற்சியிலிருந்த கர்னல் கரியப்பா முதலானோர் மிகவும் பாராட்டினர்.

“ஒரு புகைப்படம் ஆயிரம் வார்த்தைகளுக்கு சமம்”, என்றொரு வரலாற்று வழக்கு உண்டு. அதுபோல நல்ல பெருத்தமான இடத்தில் இருத்தி உள்ளார்ந்த உண்மை உணர்ச்சியை கலந்து இசையோடு குழைத்து இராகத்தில் மிதக்க விடப்படும் பொருள் செறிந்த சொற்கள் கொண்ட பாடல் குறைந்தபட்சம், இரண்டாயிரம் வார்த்தைகளுக்குச் சமம் ஆகிவிடக் கூடும்.

மீண்டும் கலைவரிசை பட்டியலுக்கு வருவோம். அதில் தோட்ட வேலை, தையல் வேலை எல்லாம் சேர்க்கப்பட்டுள்ளது. நாற்பதாயிரம் இடத்தில் “நாட்டு மொழி அறிவு”  என்றுள்ளது. பல்வேறு பாஷைகளில் பாண்டித்யம் பெற்று இருப்பது மட்டுமல்லாமல், அமெரிக்க குடியரசு தலைவர் தேர்தல், இந்திய பொருளாதார பண மதிப்பு தாள்களின் மாற்றம் முதலான பொது அறிவு செய்திகளை அறிந்திருப்பதையும், புரிந்திருப்பதையும் சேர்த்துக் கொள்ளலாம்.

ஆயிரத்து தொள்ளாயிரத்து தொன்னூற்றி ஒன்பது… கர்னல் அப்பொழுது கேப்டன் (முன்பு வாழ்ந்த ஃபீல்டு மார்ஷன் கரியப்பா அவர்களின் சொந்த ஊரான கூர்க் பகுதி, கர்நாடகா அங்கிருந்து வந்துள்ள 47 வயது இளம் இளைஞர்தான் நாம் காணும் கரியப்பா) அவருடைய தாய்க்கு உடல்நிலை சரியில்லை. ஜம்மு காஷ்மீரில் இருந்து பெங்களூ மருத்துவ மனைக்கு பறந்து வருகிறார் கரியப்பா. இரண்டு மாத விடுமுறைகொடுத்திருந்தார்கள். தாயின் அருகே இருவாரங்கள் இருந்து கவனித்தார்.

வருத்தத்திற்குரிய வகையிலேயே அவரது தாய் இறைவனடி சேர்ந்தார். கரியப்பா இரண்டு நாட்கள் துக்கத்தில் மூழ்கி ஈம சடங்குளை எல்லாம் நிறைவேற்றினார்.

மூன்றாவது நாள் ஒரு வெள்ளை தாள் எடுத்து இராணுவ தலைமைக்கு ஒரு கடிதம் எழுதினார். இரண்டு மாத விடுமுறைக்கான நியாயம் இனிமேலும் அர்த்தமுள்ளதாக இல்லை. எனவே, என்னை தாய்நாட்டின் பணிக்காக திரும்ப அழைத்துக்கொள்ளுங்கள் என்று அடிக்கடி கனத்த மனதோடும், நிமிர்ந்த நெஞ்சோடும் எழுதப்பட்டிருந்தது. அவ்வமயம் கார்கில் வார் வெடித்திருந்தது. கேப்டன் கரியப்பா, உடனே இமயமலையின் உச்சிப்பகுதிக்கு அனுப்பி வைக்கப்பட்டார். லே, லடாக் அருகில் அமைந்த பனி மூடிய சிகரங்களை நோக்கி அதிவேகமாக பயணித்தார். இந்த நிஜத்தை வகுப்பறையில் கூறும்பொழுது தன் தாயின் நினைவுகளில் அது குறித்து பேசுகையில் சில நேரம் தத்தளித்தார்…. பின் தொடர்ந்தார்…

கலைவரிசையில் போர்க்கலை இருந்தாலும், போரால் பெரும் சிரமங்கள், வரலாற்று வடுக்கள் ஏற்படுவதை சீரணிக்கவே முடியவில்லை. உடையார் என்னும் பாலகுமாரன் அவர்களது புத்தகம் படிக்கும்பொழுது, அதில் ஆதித்த கரிகாலன் என்றசோழ இளவரசரது போர் முறைகுறித்து தெரிந்து கொள்ள நேர்ந்தது. இயன்றஅளவு போர்கள் இல்லாத உலகம் அமைய வேண்டுமென உள்ளம் வேண்டுகிறது.

கேப்டன் கரியப்பாவிற்கு ஒரு மலை முகட்டை கைப்பற்றும் பேட்டில் – சிறுபோர், பொறுப்பு தரப்பட்டது. அதை நிறைவேற்றிய அற்புதத்திற்காக அவருக்கு வி.எஸ்.எம். வீர் சக்ரா விருது அளிக்கப்பட்டு, கௌரவப்படுத்தப்பட்டுள்ளார்.

இந்த இதழை மேலும்

கறுப்புப் பணத்திற்குக் கடிவாளம்

(அகில இந்திய வானொலியின் சென்னை ரெயின்போ பண்பலையில் 16.11.2016 பிற்பகல் 5 முதல் 6 மணி வரை ஒலிப்பரப்பான(லைவ்) நிகழ்ச்சியில் பங்கேற்றுப் பேசிய கருத்துக்களின் அடிப்படையில் எழுதப்பட்ட கட்டுரை.) இது முற்றிலும் ஆசிரியரின் கருத்துக்கள்.

நவம்பர் 8 ஆம் தேதி செவ்வாய்க்கிழமை இரவு இனி 500, 1000 ரூபாய் நோட்டுகள் செல்லாது என்று அதிரடியாக அறிவிக்கப்பட்டது. கறுப்புப் பண முதலைகளைக் குறி வைத்து, இந்த துல்லியமான தாக்குதல் அறிவிப்பை பாரதப் பிரதமர் நரேந்திர மோடி அவர்கள் அறிவித்தவுடன், அத்தகையோர் செய்வதறியாது உறைந்து போனார்கள்.

முந்தைய நடவடிக்கைகள்

இந்தியா வரலாற்றில் சுதந்திரத்திற்குப் பின் எடுக்கப்பட்டிருக்கும் ஐந்தாவது துணிச்சலான நடவடிக்கை இது.

  • முதல் இரண்டு நடவடிக்கைக்கள் பிரதமர் இந்திரா காந்தி அவர்களால் கொண்டு வரப்பட்ட மன்னர் மானிய ஒழிப்பும், வங்கிகள் தேசியமயமாக்கலும் (Bank Nationalisation) ஆகும்.
  • முன்றாவது நடவடிக்கை தேசம் மிகப் பெரிய பொருளாதார நெருக்கடியில் சிக்கித் தவித்த போது, பிரதமர் நரசிம்மராவ் அவர்கள் பொருளாதார சீர்திருத்தத்திற்கு வித்திட்டு தாராளமயமாக்கள் (Globalisation) கொள்கையை நடைமுறைப்படுத்தியது.
  • நான்கவாது நடவடிக்கை எதுவென்றால், உலக அரங்கில் இந்தியாவை அணு ஆயுத பலம் பொருந்திய நாடாக அறிவிக்கும் வகையில், பிரதமர் வாஜ்பாய் அரசு 1998ல் பொக்ரானில் நடத்திய அணு ஆயுத சோதனையாகும்.
  • ஐந்தாவது நடவடிக்கைதான் இப்போது கறுப்புப் பணத்திற்குக் கடிவாளம் போடும் வகையில், பிரதமர் நரேந்திரமோடி அவர்கள் எடுத்துள்ள ரூ. 500 மற்றும் 1000 ரூபாய் நோட்டுக்கள் செல்லாது என்ற இந்த முடிவாகும்.

தேசப் பொருளாதாரத்தில் புழங்கும் அதிகப்படியான கறுப்புப் பணத்தின் அபாய அளவு குறித்து, ரிசர்வ் வங்கியின் முன்னாள் ஆளுநர் ரகுராம் ராஜன் அவர்கள் ‘இந்தியாவில் சட்டப்படி புழங்கும் பணத்தின் அளவை விட, அதிக அளவிலான பணம், அரசு வங்கிகள் அல்லாமல், வேறு வழிகளில் புழங்கி வருகிறது’ என்று வேதனையோடு குறிப்பிட்டுள்ளார். அதாவது கணக்கில் காட்டப்பட்ட வெள்ளைப் பணத்தை விட, கணக்கில் காட்டாத கறுப்புப்பணம் அதிகம் என்பதை மறைமுகமாக சுட்டிக்காட்டியுள்ளார்.

‘Black Money’ என்று சொல்லப்படும் கறுப்புப் பணம் என்பது குறுக்கு வழியில் சம்பாதித்த, கணக்கில், காட்டப்படாத பணம். அதாவது மத்திய மற்றும் மாநில அரசுகளுக்குச் செலுத்த வேண்டிய வணிக வரி, சேவை வரி, வருமான வரி, கலால் வரி, முத்திரைத்தாள் கட்டணம் போன்ற வரிகளை முறைப்படி வைத்திருக்கும் பணம் என்று சொல்லலாம். கறுப்புப் பணத்தின் அஸ்திவாரம் ஊழல், லஞ்சம், வரி ஏய்ப்பு, ஏமாற்றுதல் போன்றவையாகும்.

கறுப்புப் பணத்தின் தீமைகள்

உலக முன்னணி நாடுகளில் அதிக அளவு பணப்புழக்கம் இருக்கும் நாடு இந்தியா. கடந்த 6 ஆண்டுகளில் வங்கிகளின் புழக்கத்தில் இருந்த தொகை 40 சதவீதம் அதிகரித்துள்ளது. இந்த காலகட்டத்தில் 500 ரூபாய் நோட்டுக்களின் புழக்கம் 76 சதவீதமும், 1000 ரூபாய் நோட்டுக்களின் புழக்கம் 106 சதவீதமும் அதிகரித்துள்ளது. புழக்கத்தில் உள்ள நோட்டுக்களில் 85 சதவீதம் 500, 1000 ரூபாய் நோட்டுகள் என்பது குறிப்பிடத்தக்கது.

கறுப்புப் பணம் ஒரு பக்கம் சிக்கல் என்றால், மறுபக்கம் கள்ள நோட்டுகள் பெருஞ்சிக்கல். 500, 1000 ரூபாய் நோட்டுக்களில் 10 சதவீதம் கள்ள நோட்டுக்கள். தீவிரவாதக் கும்பலும், மாபியாக்களும் தங்களுடைய பரிவர்த்தனைகளுக்கு கறுப்புப் பணத்தையும், கள்ள நோட்டுகளையும் பயன்படுத்துகிறார்கள்.

கறுப்புப் பணத்தினால் ஒரு நாட்டின் வளர்ச்சி குறைந்து, வறுமை மிகுந்து விலைவாசியும், பணவீக்கமும், வரி விதிப்பும் உயர்கிறது. பொருளாதாரத்தை பீடித்துள்ள இந்தக் கொடிய நோயை அகற்ற மேற்கொள்ளப்பட்ட அறுவைச் சிகிச்சைதான் இந்த அறிவிப்பு.

இது அதிரடி நடவடிக்கை என்றாலும் அவசர நடவடிக்கை அல்ல. படிப்படியாக மேற்கொள்ளப்பட்ட நடவடிக்கையாகும். இதில் ஏறத்தாழ இரண்டு காலத்திட்டமிடல் இருந்திருக்கிறது. யாருக்கும் சந்தேகம் ஏற்படாத வண்ணம், மிகவும் ரகசியமாகவும், சாதுர்யமாகவும் நகர்த்திக் கொண்டு வரப்பட்ட நடவடிக்கை இது.

நமது அரசு 2015ல் ‘வெளிநாட்டில் இருக்கும் கறுப்புப் பணத்தை வரி மற்றும் அபராதம் செலுத்தி சரி செய்து கொள்ளலாம்’, என்ற திட்டத்தை அறிவித்தது. 2016ல் ஜூலை முதல் செப்டம்பர் வரை, ‘உள்நாட்டுக் கறுப்புப் பணத்தை வரி மற்றம் அபராதத் தொகைகளாக 45 சதவீதம் செலுத்தி சரி செய்து கொள்ளலாம்’, என்று அறிவித்தது.

இந்த இதழை மேலும்