Home » Articles (Page 2)

அற்ப சுகங்களுக்காக வாழ்வை மலிவு விலைக்கு விற்கலாமா?

வீரா வீறுகொண்டு எழுந்து நில் எழுச்சி கொள்

விதிக்குப் பயந்தவனாலும்

சதிக்குப் பயந்தவனாலும்

ஒன்றும் செய்துவிட முடியாது.

இளமைத் தடுமாற்றம் என்பது அனைவரது வாழ்விலும் நிகழக்கூடிய ஒரு நிகழ்வாகும்.

காதலும் காமமும் எழும்பொழுது அவ்வுணர்வுகளுக்கு சற்று நேரம்  வரும் மயக்கமும் புத்துணர்ச்சியும், பூரிப்பும்தான் அத்தடுமாற்றமாகும்.

அந்நேரத்தில் சுய கட்டுப்பாடுடனும், ஆளுமையுடனும் தடுமாற்றத்தையும் கவனக் குறைவையும் தடுப்பது இளமைக்காலம் வீண் போவதைத் தடுத்து நிறுத்துவதற்கான வழிகளாகும்.

உடல் உறுப்புகளை இயக்க சுய கட்டுபாடு என்பது மிகமிக அவசியம்.

கை, கால், கண் போன்றவற்றை வெளிக்கட்டுப்பாடு உறுப்புகள் எனவும்; நாக்கு, இதயம், உணர்வுகள் போன்றவற்றை உள் கட்டுப்பாடு உறுப்புகள் எனவும் கட்டுப்பாடுறுப்புகளை இருவகையாகப் பிரிக்கலாம்.

சுய கட்டுப்பாடு இரு உறுப்புகளுக்குமே முக்கியமெனக் கருதலாம். இக்கட்டுப்பாடே ஒருவன் தவறான திசையில், பிழையான வழியில் செல்வதைத் தடுத்து நிறுத்தி அழிவிலிருந்து காக்கும்.

எனக்கு கட்டுப்பாடு இருக்கிறதா, இல்லையா என்பதை சோதிக்க ஒரு வழி சொல்லுங்கள் என்று ஒரு கேள்வியை முன் வைக்கலாம்.

இன்று நீ அதிகாலையில் எழுந்திருக்க வேண்டும்.

அதிகாலை 5 மணிக்கு கடிகார அலாரம் உன்னை எழுப்பினால் நீ உன் சுய கட்டுபாட்டுக்குள் இல்லை என்று அர்த்தம்.

அதே அதிகாலை 5 மணிக்கு அலாரம் கடிகாரத்தை நீ எழுப்பினால் நீ உன் சுய கட்டுப்பாட்டுக்குள்ளும் சுய ஆளுமைக்குள்ளும் இருக்கின்றாய் என்று அர்த்தம்.

அழிவுப்பாதையில் தீய வழியில் செல்வதைத் தடுக்கவும், தவிர்க்கவும் இக்கட்டுப்பாடு மனிதனுக்கு பெரிதும் பயன்படுகிறது.

ஆளுகையை உள்புறம், வெளிப்புறம் என இரண்டாகப் பிரித்தாலும், சிந்தனை, செயல், எண்ணம், மனம் போன்ற உள் ஆளுகையை கட்டுப்பாட்டுடன் மிகவும் சரியாக மேற்கொண்டாலே போதும்; வெளிப்புற உறுப்புகளின் கட்டுப்பாட்டை முழுவதும் தடுத்து நிறுத்தி சுய ஆளுகையில் வெற்றியடைந்து விடலாம்.

உள்புற கட்டுப்பாடில்லாததனால் வெளிப்புறம் தீய செயல்களில் ஈடுபடுகிறது. உள்புற ஆளுகை இல்லை என்றால் இரண்டிலும் தவறுகள் நடக்கும், என்றும் நடந்து கொண்டேதானிருக்கும்.

மனித மனம் நன்மை, தீமை என இரண்டு வழிகளிலும் செல்லும்.

அதில் நல்ல வழியில் மட்டுமே செல்ல மனதைப் பழக்கிக் கொள்ள வேண்டும்.

உடலில் இருக்கின்ற இயந்திரங்களில் மனம்தான் பெரியது என்றாலும் .அந்த மனம் மனிதனுக்குக் கட்டுப்படக்கூடிய பணிவைப் பெற்றிருக்கிறது.

பலர் சில அற்ப சுகங்கள் தான் வாழ்க்கை என்று நினைத்து அதில் மூழ்கி கட்டுப்பாடிழந்து முடிவில் அதிலேயே மூழ்கியும் விடுகின்றனர்.

இந்த இதழை மேலும்

காய்ச்சலால் வரும் வலிப்பு (Febrile Fits)

காய்ச்சலால் வரும் வலிப்பு என்பது 6 மாதம் முதல் ஐந்து வயது வரை உள்ள குழந்தைகளுக்கு ஏற்படும். இது 100 குழந்தைகளில் ஐந்து பேரில் காணப்படலாம். உடலின் வெப்பநிலை உயரும் போது, அதாவது காய்ச்சல் வரும்பொழுது வலிப்பு வர வாய்ப்புகள் உண்டு.

பெற்றோர் இருவரும் தங்களின் சிறுவயதில் இந்நோயால் பாதிக்கப் பட்டிருந்தால், அவர்களின் குழந்தைக்கு 10% முதல் 20% வரை காய்ச்சலால் வரும் வலிப்பு ஏற்பட வாய்ப்புகள் உண்டு. மேலும் பெற்றோர் இருவரும் மற்றும் முதல் குழந்தையும் இந்நோயால் பாதிக்கப்பட்டிருந்தால் இரண்டாவது குழந்தைக்கு 20% முதல் 30% வரை ஏற்பட வாய்ப்புண்டு.

அறிகுறிகள்

  • இவை ஏற்படும்போது குழந்தை சில நிமிடங்களுக்கு நினைவிழக்கலாம். தொடர்ந்து கை மற்றும் கால்களில் விறைப்புத்தன்மை ஏற்படலாம்.
  • தலை பின்னோக்கி தள்ளப்பட்டு, கை, கால்களில் வலிப்பு ஏற்படலாம்.
  • தோல் வெளிர் நிறமாகவோ அல்லது நீல நிறமாகவோ மாறலாம்.
  • ஒரு சில நிமிடங்களுக்குள் வலிப்பு நின்றுவிடும். அதன்பிறகு குழந்தை சிறிது நேரத்திற்கு நினைவின்றி இருக்கும். பிறகு மெதுவாக சுயநினைவு திரும்பும்.

என்ன செய்ய வேண்டும்

குழந்தைக்கு வலிப்பு ஏற்படும்போது நிதானம் காப்பதே மிக அவசியம். குழந்தையின் தலையை ஒருபக்கமாகத் திருப்பிப் புரையேறுவதைத் தடுக்க வேண்டும். குழந்தையின் வாயில் எந்தவொரு பொருளையும் வைக்கக்கூடாது. கைகளில் இரும்புச் சாமான்களை கண்டிப்பாகக் கொடுக்கக்கூடாது. வலிப்பு நின்றவுடன் குழந்தையை ஒருபக்கமாக படுக்க வைக்க வேண்டும் (Recovery Position). ஒருவேளை வலிப்பு நீடிக்குமானால் அவசர மருத்துவ உதவிக்கு ஆம்புலன்ஸை அழைக்க வேண்டும்.

சிகிச்சை வலிப்பு நீண்ட நேரம் நீடிக்கும் சமயங்களில் மிடிசோலம், லோரசிபம், ளடியசிபம் போன்ற மருந்துகள் ஊசி மூலமாகவே அல்லது ஆசனவாய் வழியாகவோ கொடுக்க வேண்டும்.

இந்த இதழை மேலும்

வாழ நினைத்தால் வாழலாம் – 22

நல்லவர்கள்

வாழ்வில் வெற்றிக்காற்றை மட்டுமே சுவாசிக்கும் வாசக நண்பர்களே! கோவையின் பிரபலமான கல்லூரிகளில் அதுவும் ஒன்று.  2 நாள் பயிலரங்க வகுப்பில் மாணவர்கள் ஒவ்வொருவரும் என்னென்ன திறமைகளை அறிந்துகொண்டு, வளர்த்துக்கொண்டு வந்தால் சிறக்க முடியும் என்ற கண்ணோட்டத்தில் சென்று கொண்டிருந்தது.  பயிற்சியின் ஒரு பகுதியாக நல்லவர்களை இனம் காண்பது எப்படி? – என்ற கேள்வி.

புத்தகங்கள் வாசிப்பது என்பது அறிதாகிவிட்ட நிலையில், தொலைக்காட்சிகளும், திரைப்படங்களும் மாணவர்களை – குறிப்பாக ஆசிரியர்களுடனான நட்புறவில் எப்படி இருக்கிறார்கள் என்று காட்சிப்படுத்தும் விதம் கவலை அளிப்பதாகவே இருக்கின்றது.

நகைச்சுவை எனும் போர்வையில் ஆசிரியர்களை அவமானப்படுத்துவது – மாணவனின் முதல் பணி என்று போதிக்கப் படுகின்றது.  கல்லூரிக்கு வரும்போது ஆயுதங்களை ஏந்தி வருவதுதான் வீரத்தின் வெளிப்பாடு என்பது போன்ற ஒரு Projection – பல மாணவர்கள் இப்போது கல்லூரிக்கு கையில் கத்தியுடன்.  Bus Day எனும் பெயரில் சக பயணிகளை சங்கடத்தில் ஆழ்த்தும் சம்பவங்கள்.  போதைப்பொருள்களின் பொக்கிஷ கிடங்காக பல மாணவர்களின் புத்தகப் பையும், மனமும் குப்பைகளாக.

கண்டிக்க வேண்டிய பெற்றோர் – கண் இருந்தும் குருடர்களாக.  தண்டிக்க துணியும் ஆசிரியர்கள் – தண்டனைக்கு சிக்கும் தடத்தில் தனியனாய்.

மாணவன் கொடுக்கும் Fees முக்கியமா?, நல்லதை போதிக்கும் ஆசிரியன் முக்கியமா? அல்லது மாணவனை “மாண்புமிகு” ஆக்க விழையும் “மாண்பு (மிகு) முக்கியமா?- என்ற குழப்பத்தில் நிராதரவான நிலையில் நிர்வாகம். அங்கங்கே சில குரல்கள் ஆசிரியர்களின் தரத்தை (கல்வியில், தனிப்பட்ட முறையில்) சீர்தூக்கிப் பார்க்கச் சொல்லும் சிந்தனைகள் – சிதறல்களாக.  இப்படி மொத்தக்கடலும் சேறாக கலங்கி இருக்கும் நிலையில் – முத்தெடுப்பது இருக்கட்டும், நல்ல மீன்களை (மாணவர்களை) இந்த சமூகம் எப்படி பெறப்போகின்றது?

“இந்தியாவின் எதிர்காலம் மாணவர்களின் கையில்” என்று மேடைப் பிரசங்கங்கள்.  “மாணவர்களின் கையில் என்ன”? என்ற எதார்த்தத்துக்கு விடை தெரிந்தவன் சொல்லும் விளக்கங்கள் கூட இன்று விமர்சனத்துக்கு ஆளாகும் விதண்டாவாதம்.

சரியான பாதையில் தான் இந்த சமூகம் போய்க் கொண்டிருக்கின்றதா?

“உன் நண்பனை காட்டு – நீ யார் என்று சொல்கின்றேன்” – என்ற கூற்றுக்கு எத்தனை மாணவர்களால் தன் நட்பு வட்டத்தை பட்டியலிட முடியும்?

“இனம் இனத்தோடு – பணம் பணத்தோடு” என்பதுபோல் – “நம் இன்றைய நிலை, நாம் தற்போது கொண்டிருக்கும் நண்பர்களின் பிரதிபலிப்பு.  “நாளைய நம் வாழ்வு, இனி நாம் கொள்ளப்போகும் நண்பர்களின் பிரதிபலிப்பு”

நம் நண்பர்கள் நல்லவர்களா என்பது இருக்கட்டும்.  முதலில், நாம் நல்லவர்களா என்ற தற்சோதனையை ஒவ்வொரு மனிதனும் எடுக்கவேண்டிய கட்டாய சூழ்நிலை தான் இப்போது.  மகாபாரதத்தில் நல்லவர்கள் பக்கம் நான் இருப்பேன் என்றான் கண்ணன்.  இப்போதோ கண்ணனையும் காணோம், நல்லவனையும் காணோம் – என்பது போன்ற ஒரு தோற்றம்.

“நல்லவர்கள்” – உங்கள் நல்வாழ்வுக்கு வழி சொல்லும் வழி காட்டிகள்.

“நல்லவர்கள்” – துவண்டு விழும்போது தோள் கொடுப்பவர்கள்

“நல்லவர்கள்” – அக்கறையை வெளிப்படுத்தும் அகல் விளக்குகள்

“நல்லவர்கள்” – ஆலோசனை வேண்டின் கலப்படமில்லா கருத்து சொல்பவர்கள்

“நல்லவர்கள்” – கோபத்தை நெஞ்சில் வைக்காமல் வார்த்தைகளால் மட்டுமே வடித்து சொல்பவர்கள்.

நல்லவர்களை அடையாளம் கண்டாக வேண்டிய கட்டத்தில் தான் நம் கால்கள்!  எப்படி?

உங்கள் வாழ்வில் நீங்கள் “நல்லவர்கள்” என்று அடியாளம் கண்டவர்கள் யார்?

இந்த இதழை மேலும்

வின்னர்ஸ் அகாடமியின்

அப்துல் கலாம் அவர்களின் பிறந்த நாள் மற்றும் இளைஞர்கள் எழுச்சி தினம்

இரண்டாம் ஆண்டு கொண்டாட்டம் அக்டோம்பர் – 18

கடந்த 13-10-2018 மற்றும் 14-10-2018 ஆகிய இரு நாட்கள் டாக்டர். ஏ.பி.ஜே. அப்துல்கலாம் அவர்களின் பிறந்தநாள் விழா இளைஞர்களின் எழுச்சி தினமாக வின்னர்ஸ் அகாடமியின் சார்பில் அறிவியல் விழாவாக இரண்டாவது ஆண்டாக வின்னர்ஸ் அகடாமி (வின்னர்ஸ் டியூசன் மற்றும் டுட்டோரியல் சென்டர் – பா. நா. புதூர் மற்றும் நாவாவூர் பிரிவு) மிகவும் சிறப்பாக நடைபெற்றது. இதில் கோவை மாவட்டத்திலுள்ள பல்வேறு பள்ளி மாணவ / மாணவியர்களுக்கு இடையே ஆன ஓவியப் போட்டி, பேச்சுப் போட்டி, கட்டுரைப் போட்டி மற்றும் நாடகப் போட்டி என பல்வேறு வகையான போட்டிகள் நடைபெற்றது. இதில் கோவைமாவட்டத்தில் உள்ள 25க்கும் மேற்பட்ட பள்ளி மாணவ / மாணவியர்கள் கலந்து கொண்டு அவரவர் திறமையை வெளிக்காட்டினர்.

அதனைத் தொடர்ந்து 14-10-2018 அன்று காலை 10 மணி அளவில் வின்னர்ஸ் குழுமத்தின் சார்பில் கலை மற்றும் இலக்கிய விழாக்களும், சமூக விழிப்புணர்வு தொடர்புடைய குறுநாடகங்கள் மற்றும் இந்தியா 2020 என்ற தலைப்பில் மாணவ மாணவிகளுக்கு இடையே ஆன பட்டிமன்றமும் நடைபெற்றது. இதில் மாணவர்கள் சிறப்பாக கலந்து கொண்டு கண்ணுக்கு விருந்தளித்தனர் மற்றும் அதனைத் தொடர்ந்து போட்டியில் வெற்றி பெற்ற மாணவர்களுக்கு சான்றிதழ்களும் பதக்கங்களும் கோப்பைகளும் வழங்கப்பட்டது.

இவ்விழாவில் வின்னர்ஸ் அகாடமியின் இயக்குநர் திரு. ஏ. பிரசாத் அவர்களும், அகம் அறக்கட்டளையின் செயலாளர் சசிகுமார் மற்றும் வடிவேல் அவர்களும் கலந்து கொண்டனர்.

இவ்விழாவில் சிறப்பு விருந்தினர்களாக அரைஸ் கட்டளையின் தலைவர் திரு. வின்ஸ் அவர்களும், டாக்டர். அப்துல் கலாமிடம் பயின்ற மாணவர் அரைஸ் அறக்கட்டளையின் நிர்வாக இயக்குநர் திரு. கணேஷ் அவர்களும் மற்றும் தமிழ்நாடு பெயிண்டிங் கான்டிராக்டர்ஸ் அசோசியேசன் தலைவர் திரு. ஜி. பன்னீர் செல்வம் அவர்களும், மற்றும் யாழ் தொலைக் காட்சி முதன்மை செயலாளர் திருமதி. தீபா அவர்களும் கலந்து கொண்டனர்.

மாணவர்களுக்கு சிறப்புரை வழங்குவதற்காக சக்சஸ் IAS அகாடமியின் முதல்வர் திரு. நாகேந்திரன் அவர்களும், ரங்கநாதன் பாலிடெக்னிக் கல்லூரியின் முதல்வர் செல்வி. B. அருணா அவர்களும் கலந்து கொண்டு மாணவர்களுக்கு சிறப்புரை அளித்தனர்.

இவ்விழாவில் பல்வேறு பள்ளியின் மாணவ / மாணவிகள் ஆசிரியர்கள் மற்றும் பெற்றோர்களும், தொலைக்காட்சி நண்பர்களும் மற்றும் வின்னர்ஸ் அகாடமியின் நிர்வாகிகளும், மாணவ / மாணவியர்களும் மற்றும் ஆசிரியர்களும் கலந்து கொண்டனர்.

இந்த இதழை மேலும்

அலங்கரித்துக் கொள்…

சரித்திர நாயகனே

அங்கே பார் உன் அரியாசனம்

அலங்கரிக்கப்பட்ட சரியாசனம்…

தொலைவில் இருக்கிறது என்று தொய்ந்து விடாதே…

எட்டமுடியவில்லை என்று ஏமாந்து விடாதே…

தானாக கிடைத்துவிடும் என்று தள்ளியும் நிற்காதே

இது போட்டி நிறைந்த உலகம்…

உன்னைப் போலவே இக்களத்தில் எத்தனையோ கால்கள்

கண்ணில் இலட்சிய கனவுகளுடன்

கனலாய் அனலாய் புறப்படத் தயராக இருக்கிறார்கள்

நீயும் புறப்படு..இயல்பாக இல்லாமல் இடியாகப் புறப்படு

இக்களம் எப்படியாகவும் இருக்கலாம்

கத்தியடி படலாம்…கல்லடிப் படலாம்

உணவின்றி தாகம் தணிய தண்ணீர் இன்றி

அல்லல் படலாம் அவஸ்தைப் படலாம்…

எதையும் வெல்ல முடியும் என்று

வீரமுழக்கம் உங்களுக்குள் இட்டுக் கொள்ளுங்கள்…

சாதிக்கப் புறப்பட்டுவிட்டு

சகுணம் பார்த்துக் கொண்டிருக்காதீர்கள்

உன் எல்லை என்ன? உன் எதிர்பார்ப்பு என்ன?

என்று தீர்மானித்து விட்டால்

மழைக்கு காத்திருக்கும் விவசாயி போல

இலை இழந்த மரம் பருவத்திற்கு காத்திருப்பது போல

உன்னுள் ஓரு நம்பிக்கை அணையா விளக்காய்

சுடரொளி விட்டு எரிந்து கொண்டிருக்க வேண்டும்….

இந்த இதழை மேலும்

துணிந்தவருக்கில்லை துயர்-நீங்கள் துணிச்சல் மிக்கவரா?

துணிச்சல் என்பது எந்தச் சூழ்நிலையிலும் அச்சமோ, பயமோ இல்லாமல் மனிதன் தைரியமாக செயல்படுவதை குறிக்கிறது. உனக்கு துணிச்சல் இருந்தால் என்னோடு மோதிப்பார் என்பர். அவர் துணிச்சல் நிறைந்த புதுமைப்பெண் என்பர்.

பொதுவாக, நேர்மையாக இருந்தால் யாருக்கும் பயப்படத் தேவையில்லை. நேர்மையானவர்களுக்கு துணிச்சல் சற்று அதிகம்தான். திமிரானவர்களிடம் சுயநலம் சற்று குறைவுதான். துணிச்சல் என்பது முன்னேறிப் போகும் பலமல்ல. பலம் இல்லாத போதும் முன்னேறும் மனஉறுதி. தவறானவர்களின் செயல்பாட்டை தட்டிக் கேட்பதற்கு தைரியம் துணிச்சல் தேவை. நாம் சரியானவர்களாக இருந்தால்தான் தவறானவர்களை தட்டிக் கேட்க முடியும். நேர்மையற்றவர்களால் துணிச்சலாக இருக்க முடிவதில்லை.

பலம் வாய்ந்தவரை விமர்சிக்க துணிச்சல் தேவை. வலிமையானவர்கள் கொடுக்கும் சங்கடங்களைக் கண்டு அஞ்சாமல், நியாயம் என்று மனதில்படுவதை தயக்கம் இன்றி வெளிப்படுத்தும் துணிச்சல் மிக்க குணம் உடையவர்கள்தான்  தலைவர்களாகிறார்கள்.

துணிச்சல் என்பது பயத்தை துறப்பது அல்ல. அது பயத்தைத் தாண்டிய பார்வை.

நேர்மையான மனிதனின் ஆழமான புரிதல் துணிச்சலைத் தருகிறது. துணிச்சல்மிக்கவர்களை அடிமையாக்க முடியாது. ஆடும், சிங்கமும் கடவுளால் படைக்கப்பட்ட உயிர்கள்தான். ஆட்டை வெட்டி சாப்பிடுகிறார்கள். சிங்கத்தை வெட்டி சாப்பிடுவதில்லை. விரல் நகமாய் இருந்தால் வெட்டிவிடுவார்கள். விரலாய் இருந்தால்,  மோதிரம் அணிவிப்பார்கள். இதுதான் உலகம்.

சார்பு காரணமாக மனைவி கணவனுக்கு பயந்து அடங்கிப் போகிறார். (சில குடும்பங்களில்). அச்சத்தின் உச்சத்தை எட்டும்போது துணிச்சல் மனிதனுக்கு தானாகவே வரும். துன்பத்திலும், சோகத்திலும் தவிக்கும்போது துவண்டுவிடாமல் இருக்க துணிச்சல் தேவை. இழப்பதற்கு எதுவும் இல்லை என்ற நிலையில் மனிதனுக்கு துணிச்சல் அதிகமாகிறது. இதுதான் சாதனையாளர்களின் பின்புலம். எல்லாவற்றையும் இழந்தபின் வரும் துணிச்சல் அதீத பலம் வாய்ந்தது.

எதிர்பாராத இக்கட்டான சூழலில், செய்வதறியாமால் திகைக்காமல், திருடனை எதிர்த்து போராடுவது, நீரில் விழுந்து விட்டவர்களைக் காப்பாற்றுவது, தீயில் சிக்கிக் கொள்பவர்களை பத்திரமாக மீட்பது போன்றவை துணிவான செயல்களே.

உண்மையைச் சொல்ல பயப்படத் தேவையில்லை. விமர்சனத்தை எதிர்கொள்ளும் நேர்மையோ, துணிச்சலோ, இல்லாதவர்கள் சரித்திரத்திலும் நினைவிலும் நிலைக்க வாய்ப்பில்லை. முற்போக்குவாதியாக இருப்பதற்கு ஏராளமான துணிச்சல் தேவை. நம்மை சீண்டிப் பார்ப்பவர்களுக்கு நாம் யார் என்று காட்ட வேண்டிய நிலை வாழ்வில் வரத்தான் செய்கிறது. விண்வெளிப் பயணத்திற்கு ஆயத்தமாகிறவர்கள் கடினமான பயிற்சிகளை மேற்கொண்டு விண்வெளிக்குப் பறக்கத் தயாராகிறார்கள். செவ்வாய்கிரகத்திற்குச் செல்வதற்கு துணிச்சல் வேண்டுமல்லவா?. மனிதனுக்கு சிக்கல் அதிகமாகும் போது எல்லோரும் அவமானப்படுத்துவார்கள். ஒரு கட்டத்தில் துணிச்சல் வந்து விடும்.

துணிவு மிகுந்தவர்களால்தான் லஞ்சம் வாங்குபவர்களை வலை விரித்துப் பிடிக்க அரசுக்கு உதவ முடிகிறது. சிறையில் லஞ்சம் கொடுத்து  குற்றவாளிகள் சொகுசாக இருந்ததைக் கண்டு பிடித்து வெளிச்சத்துக்குக் கொண்டு வந்த துணிச்சல் மிக்க பெண் உயர் அதிகாரிக்கு பாராட்டு குவிந்த செய்திகளை படித்து இருப்பீர்கள்.

துணிவே துணையான காவலர்கள் ரவுடிகளை கூட்டமாக கைது செய்கிறார்கள். தனி ஆளாக வாழ்வில் சில சிக்கல்களை சந்திக்க துணிச்சல் வேண்டும். அநீதியை எதிர்த்து சட்டப் போராட்டம் நடத்தி வெற்றி பெறுபவர்கள் உள்ளனர். கைப்பையை பறித்துச் சென்ற திருடனை பெண் ஒருவர் தனியாளாக துரத்திச் சென்று பிடித்து போலீசிடம் ஒப்படைத்த பத்திரிக்கை செய்தி வியப்பை அளித்தது.

காண்டாலிஸா ரைஸ் அமெரிக்க நாட்டின் செயலராக இருந்த போது துணிச்சல்மிகு பெண்களை உலகறியச் செய்ய வேண்டும் என ஒரு விருதை ஏற்படுத்தினார். இவ்விருதுக்காக ஒவ்வொரு வருடமும் உலகின் பல்வேறு நாடுகளில் பல்வேறு இன்னல்களுக்கும் இடையே பலருக்காகத் துணிச்சலாகப் பணிபுரியும் பெண்களை அமெரிக்க அரசு தெரிவு செய்கிறது.

இந்த இதழை மேலும்

பயணங்கள் வெறுப்பதில்லை

நாம் ஊர்ப் பயணம் மேற்கொள்ளும் போது அனேகமாக நாம் இரண்டு விஷயங்களுக்குத்தான் சங்கடப்படுகிறோம். ஒன்று, பயணத்தின் போது செலவாகும் பணத்திற்கு. மற்றொன்று பயணத்தால் கெடுத்துக்கொண்ட உடல் ஆரோக்கியம். இந்த இரண்டுமே ஒன்றுக்கொன்று தொடர்புடையவையே. பயணங்களில் ஆரோக்கியமாக இருக்கத் தெரிந்துகொண்டால் நாம் அதற்காக அதிகப்படியான செலவைச் செய்ய வேண்டியதில்லை. அதேபோல், பயணங்களில் அனாவசியமாக மனதையும் உடலையும் கெடுக்கும் செலவுகளைச் செய்யாதிருந்தால் நம் ஆரோக்கியம் நிலைக்கும். ஆனந்தமான பயணத்திற்கு அடித்தளமாக விளங்கும் ஆரோக்கியத்தை எப்படி பயணத்தின்போது பார்த்துக்கொள்வது என்று தெரிந்து கொண்டால் பயணங்கள் வெறுப்பதில்லை. ஆகவே அது பற்றி விரிவாக இப்புத்தகத்தில் பார்ப்போம்.

நாம் மேற்கொள்ளும் பயணங்கள் சுமையாக அல்லாமல், சுகமாக அமைய நாம் எவற்றிலெல்லாம் கவனம் செலுத்த வேண்டும் என்றும் அவற்றை எப்படிக் கையாள வேண்டும் என்றும் தெரிந்துகொள்வது நல்லது. ஆக, அதற்கு பயண கால சங்கடங்களை நாம் இனங்காண வேண்டும். அவை முறையே

  1. பயணக் களைப்பு: பயணத்தின் போது ஏற்படும் களைப்பால் பயணங்களை முழுமையாக அனுபவிக்க முடியாமல் போகிறது. பயணம் முடித்த பின்பும் ஏற்படும் களைப்பால் நம் வேலை நேரம் கெடுகிறது.
  2. உணவுப் பிரச்சனைகள்: நம் வீட்டுச் சாப்பாடு போல் பயணச் சாப்பாடு இருக்காதுதான். ஆனால், அதனால் ஆரோக்கிய பிரச்சனைகள் ஏற்படுவது நல்லதல்லதானே?
  3. தண்ணீர் ஒவ்வாமை: புதிய இடத்து தண்ணீர் ஏற்படுத்தும் உடல் ஒவ்வாமை பிரச்சனைகளை சமாளிப்பது எப்படி? குடிப்பதற்கு மினரல் வாட்டர் பயன்படுத்தலாம், ஆனால், குளிப்பதற்கு?
  4. கிருமித் தொற்று பயம்: நீண்ட தூரப் பயணங்களில் நாம் கண்டிப்பாக வழியில் உடற்கழிவை வெளியேற்றியாக வேண்டும். அசுத்தமான சூழலின் கிருமித்தொற்று அபாயத்தைத் தவிர்ப்பது எப்படி?
  5. பயணகால உடைத் தெரிவு: பயணகாலத்தில் எவ்விதமான உடைகளைத் தெரிவு செய்வது?
  6. மலச்சிக்கல் பிரச்சனைகள்: பயணத்தில் ஏற்படும் காய்ச்ச லான மற்றும் வெப்பமான தன்மையால் ஏற்படும் மலச்சிக்கல் பிரச்சனைகளை தவிர்ப்பது எப்படி?
  7. தூக்கமின்மை: புதிய இடத்தில் புதிய சூழலில் நாம் எப்படி நிம்மதியாகத் தூங்குவது?
  8. அவசரநிலைச் சமாளிப்பு: எதிர்பாராத அவசரச் சூழலில் நம் ஆரோக்கியத்தை காப்பது எப்படி?
  9. சத்து பற்றாக்குறைகள்: ஹோட்டல் சாப்பாட்டின் சத்து பற்றாக்குறைகளை ஈடு செய்வது எப்படி?
  10. சக்தி பற்றாக்குறைகள்: பயண கால உடல் செயலாக்கத்தால் ஏற்படும் சக்தி பற்றாக்குறைகளை எப்படி ஈடு செய்வது?

    இந்த இதழை மேலும்

சிந்திக்க வைக்கும் சீனா- 4

ஷியான் பழமையான நகரம். முந்தைய சீனாவின்  தலைநகரம். இந்நகரில் ஷியான் கோட்டை நகரச் சுவர் உள்ளது. ஒரு கோடி மக்கள் இந்நகரில் வசிக்கின்றனர்.

இருசக்கர வாகனங்கள் செல்ல தனிப்பாதை உள்ளது. ஆனால் குறைவான 2 சக்கர வாகனங்களே உள்ளன. இந்நகரின் சுற்றுச்சுவர் செவ்வக வடிவில் உள்ளது. 13 கி.மீ நீளமுள்ளது. இந்நகரில் சுமார் 30 இலட்சம் கார்கள் உள்ளனவாம். 14 ம் நூற்றாண்டில் கட்டப்பட்ட சுவர் இது.

ரயில் நிலையத்திலிருந்து வெளியே வந்து, பஸ் இருக்கும் பகுதிக்குச் சென்றோம். வெயிலால் பலர் குடை பிடித்துச் சென்றனர். பெட்டிகளை வேனில் ஏற்றிக் கொண்டு ஓட்டலுக்குச் சென்றனர். எங்கள் பசிக்கு சப்வே வெஜ் சாண்ட்விச், நீர், டப்பா கோக்பானம் கொடுத்தனர்.

சுவைத்துச் சாப்பிட்டோம். பஸ் நேரே ஷியான் சுவர் சென்றது. நுழைவு டிக்கெட் எடுத்துக் கொடுத்து மேலே அனுப்பினர்.

இந்தச் சுவற்றில் 120 மீட்டர் நீளத்துக்கு ஒரு காவல் கோபுரம் கட்டியுள்ளனர். வேகமாக இழுத்து விடும் அம்பு சுமார் 60 மீட்டர் தூரம் போகுமாம். அதனால் இந்த தூரம் என்றனர்.

கிழக்கு வாயில் வழியாக 70 படிகள் ஏறி கோட்டைக்குச் சென்றோம். ஒரு மணி நேரம்  சுற்றிப் பார்த்தோம். இந்த ஊரைச் சேர்ந்தவர் ஜி ஜின் பிங் தான் சீனாவின் ஜனாதிபதியாம். போக்குவரத்து நெரிசலைக் குறைக்க மக்கள் BMW ஐ பயன்படுத்துங்கள் என்று சொன்னாராம்.

பொதுவாக BMW என்பது ஒரு வகையான கார். ஆனால் அவர் சொன்னது B- BUS; M- METRO (RAIL) W- WALK அரசு வாகனங்களான பஸ், ரயில் மற்றும் நடந்து சென்றால் சுற்றுச்சூழல் மாசடையாது. பொருளும் சேமிக்கலாம்; உடலும் நலமாக இருக்கும்.

பகல் 12.15 க்கு பஸ் ஏறி ரெட் போர்ட் என்ற இந்திய  உணவகம் சென்றோம். நம் சமையல் கலைஞர்கள் மதிய உணவாக சாதம், சாம்பார், ரசம், மோர், கூட்டு, அப்பளம், பொரியல் வழங்கினர். சுவைத்து சாப்பிட்டு டைடான் ஜின் செங் ஆர்ட் ஓட்டல்  சென்று அறைகளில் தங்கினோம்.

இந்த இதழை மேலும்

வெற்றி உங்கள் கையில் – 58

நமக்குள் ஓர் ஆயுதம்

அவர் ஒரு மிகச்சிறந்த குரு.

அவரிடம் பலர் சீடர்களாக இருந்தனர்.

குருவுக்கு அழகில் சிறந்த ஒரு மகள் இருந்தாள். அந்தப் பேரழகிக்கு திருமணம் செய்ய முடிவு செய்தார் குரு.

திருமண ஏற்பாடுகளை குரு செய்துகொண்டிருந்தபோது, அந்தப் பேரழகியை மணம் முடிக்க ஏராளமானபேர் முன்வந்தார்கள். “இவர்களில் யாரைத் மணமகனாகத் தேர்வு செய்வது?” என்பதில் குருவுக்கு குழப்பம் ஏற்பட்டது.

“ஏதாவது ஒரு போட்டிவைத்து, அந்தப் போட்டியில் வெற்றி பெற்றவர்களுக்கு தனது மகளை திருமணம் செய்து கொடுக்கலாம்” என்று அவர் முடிவு செய்தார்.

“என்ன போட்டி வைக்கலாம்?” என்று முடிவு செய்வதற்குள் அவர் குழம்பிப்போனார். முடிவில், போட்டியாளர்கள் அனைவரையும் ஒரே இடத்திற்கு அழைத்தார்.

“என் மகளை திருமணம் செய்ய நீங்கள் எல்லோரும் ஆசைப்படுகிறீர்கள். உங்களுக்கு நான் ஒரு போட்டி வைக்கப்போகிறேன். போட்டி மிக எளிதான ஒன்றுதான். உங்கள் அனைவரிடமும் இரண்டு கேள்விகள் கேட்பேன். அந்த இரண்டு கேள்விகளுக்கும் சரியான பதிலை சொல்பவர்களுக்கு எனது மகளை மணம் முடித்துத் தருவேன்” என்றார் குரு.

“போட்டி எப்படி அமையும்? என்பதை நாளை உங்களுக்குத் தெரிவிப்பேன். இன்று நீங்கள் போகலாம். விருப்பப்பட்டவர்கள் போட்டியில் கலந்துகொள்ளலாம்” என்றும் சொன்னார்.

குருவின் அறிவிப்பைக் கேட்ட இளைஞர்கள், அடுத்தநாள் குருவின் வீட்டின்முன்பு பெருங்கூட்டமாகக் கூடினார்கள். குரு அந்தக் கூட்டத்தினரைப் பார்த்து, முதல் கேள்வியைச் சொன்னார்.

“இந்த உலகத்தில் மிகவும் இனிமையான பொருள் எது? அந்தப் பொருளை நாளைக்கு நீங்கள் இங்கே கொண்டு வாருங்கள்” என்றார்.

மறுநாள், சிலர் இனிக்கும் கரும்போடு வந்தார்கள். வேறுசிலர், அதிகமாய் இனிக்கும் சர்க்கரையோடு வந்து நின்றார்கள். இன்னும்சிலர், இனிப்புப் பலகாரங்களைக் கொண்டுவந்து ‘இதுதான் இனிப்பான பொருள்’ என்று சொன்னார்கள். வேறுசிலர், தேனைக் கொண்டு வந்தார்கள். ஆனால், வந்திருந்த கூட்டத்தில் ஒரேயொரு இளைஞன் மட்டும் மூடப்பட்ட ஒரு சிறு பெட்டியோடு வந்து நின்றான். அவன் குருவின் சீடர்களில் மிக ஏழ்மையான சீடன்.

குரு அவனைப் பார்த்து ஆச்சரியப்பட்டார்.

“நீயும் இந்தப் போட்டிக்கு வந்திருக்கிறாயே? உனக்கு என்ன தகுதி இருக்கிறது?” – என்று கேட்டார்.

“குருவே… நான் உங்கள் மகளை அதிகம் விரும்புகிறேன். அவளைக் காதலித்து வருகிறேன். அதனால்தான், போட்டியில் கலந்துகொண்டேன்” என்றான்.

இந்த இதழை மேலும்

வாசியுங்கள்! வாகை சூடலாம்

(வெற்றிச் சிந்தனைகள் நூல்களின் அறிமுகம்)

தன்னம்பிக்கை மாத இதழின் வாசிப்பாளர்களுக்கு எனது வணக்கங்கள். நான் இந்தத் தொடரில் ஒவ்வொரு மாதமும் வெற்றிச் சிந்தனைகள் குறித்து மேல்நாட்டு அறிஞர்களால் எழுதப்பட்ட ஏதேனும் ஒரு நூலை அறிமுகம் செய்ய இருக்கின்றேன். இத்தொடரை நீங்கள் தொடர்ந்து படிக்கும்போது வாசிக்கும் பழக்கத்தால் ஒருவர் எப்படி வெற்றி பெறும் ஆற்றலுடையவர் ஆகிறார் என்பதை நீங்கள் உணர்ந்துகொள்ள முடியும்.

வாசிக்கவும் மற்றும் வாழ்வை வளமாக்கவும் (Read and get Rich)

இந்த நூல் அமெரிக்க நாட்டைச் சேர்ந்த பர்க் ஹெட்ஜஸ் (Burker Hedges) என்பவர் எழுதியது. (இதனை மஞ்சுள் பப்ளிஷிங் ஹவுஸ் எனும் நிறுவனம் தமிழில் வெளியிட்டுள்ளது. தமிழில் ஆலிரத் அசோக்குமார் என்பவர் மொழியாக்கம் செய்துள்ளார்.) சரியான நேரத்தில் சரியான புத்தகம் உங்கள் வாழ்க்கையை மாற்றக்கூடும். இதற்கு நானே ஒரு ஆதாரமாக இருக்கின்றேன் என்று இந்த நூலின் ஆசிரியரே தன்னை உதாரணமாகக் காட்டி, அவர் வாழ்க்கையை மாற்றிய உலகிலேயே மிகச் சிறந்த விற்பனையாளர் (The Greatest Salesman in the world) என்ற புத்தகம் பற்றி வாசகர்களுக்கு அறிமுகம் செய்கிறார். அதுவரை தான் ஒரு சாதாரண வேலையில் குறைந்த சம்பளத்திற்கு வேலைசெய்து வந்தேன். இந்த நூலைப் படித்ததும் செல்போன், தொலைபேசி விற்பனை நிறுவனத்தில் வேலைக்குச் சேர்ந்து, மிக விரைவில் செல்போன் தொலைபேசி தயாரிக்கும் தொழில் நிறுவனம் தொடங்கி வெற்றிகரமான தொழில்முனைவராக ஆனதாகச் சொல்கிறார்.

வாசிக்கும் பழக்கம் மற்ற எந்தவொரு செயல்பாட்டைக் காட்டிலும் நமது உள்ளார்ந்த ஆற்றலை வெளியிடக்கூடிய சக்தி உடையது. ஒரு சிறந்த புத்தகமானது ஒரு வங்கியைக் காட்டிலும் மேலும் அதிக உண்மையான செல்வத்தைக் கொண்டிருக்கிறது. பெரும்பாலானவர்களின் வெற்றி மற்றும் தோல்வியை அவர்கள் தேர்வு செய்யும் விருப்பத் தேர்வுகளே முடிவு செய்கின்றனவேயன்றி வாய்ப்புக்கள் அல்ல என்பதை பர்க்ஹெட்ஜஸ் அழுத்தம் திருத்தமாகக் கூறுகிறார்.

வாழ்க்கையை மாற்றிய புத்தகங்கள்

எந்த புத்தகம் உங்கள் வாழ்க்கையை மாற்றும் என்பது உங்களுக்கே ஒருபோதும் தெரியாது. அதுவே வாசிப்பதில் இருக்கும் அழகாகும்; அது, அற்புதமான உள்நோக்கும் நுண்ணறிவுகள் ஊடாக. உங்கள் வாழ்க்கையில் உடனடி நிலை மாற்றங்களை எடுக்கும் ஆற்றலை தன்னுள் கொண்டிருக்கிறது. சாதாரண ஏழைக்குடும்பத்தில் பிறந்த ஆபிரகாம் லிங்கனை அமெரிக்காவின் ஜனாதிபதியாக ஆக்கியது அவர் படித்த புத்தகங்களே என்று அடித்துச் சொல்கிறது இந்தப் புத்தகம். இந்த உலகத்தில் முன்னேறுவதற்கு உதவும் மிகச் சிறந்த கருவி வாசிக்கும் பழக்கமே என்பதை லிங்கன் தனது இளம் வயதிலேயே புரிந்துகொண்டார். அதனால்தான் ஏழ்மையான நிலையில் இருந்து வரலாற்றில் இடம்பிடிக்கும் அளவுக்கு மாபெரும் மனிதராக உயர்ந்தார். அதுமட்டுமல்ல வாசித்தல் பழக்கமே அவரை சிறந்த மேடைப் பேச்சாளராக மாற்றியது என்றும் அவரது வரலாற்றைப் படிப்பதன் மூலம் தெரிகிறோம். அதேபோன்று அமெரிக்காவின் மூன்றாவது ஜனாதிபதியான ஹாரி ட்ரூமன் கல்லூரிப் படிப்புக் கூட இல்லாத நிலையில்; அவருக்கு இப்படியொரு வெற்றி கிடைக்கக் காரணமாக அமைந்தது அவரது வாசிப்புப் பழக்கமே என்று சொல்லப்படுகிறது. முதல் தர தலைவர் ஒருவருக்கு வாசிக்கும் பழக்கம் ஒரு மைல் என்பதைத் தெரிந்திருந்தார். அவரின் சொற்களில் சொல்வது எனில், ஒவ்வொரு வாசிப்பாளரும் ஒரு தலைவராக இருப்பது இல்லை, ஆனால் ஒவ்வொரு தலைவரும் நிச்சயம் ஒரு வாசிப்பாளரகத்தான் இருப்பார். இந்தியாவின் முதல் ஜனாதிபதி சர்வ பள்ளி டாக்டர் இராதாகிருஷ்ணன் எப்போதும் படித்துக்கொண்டே இருந்த ஒரு கல்வியாளர் என்பது நாம் அறிந்ததே. அதேபோன்று பேரறிஞர் அண்ணா, முத்தமிழ் அறிஞர் டாக்டர் கலைஞர் கருணாநிதி போன்ற தலைவர்கள் எப்போதும் புத்தகங்களை வாசித்துக்கொண்டே இருந்தவர்கள் என்பது இங்கு நினைக்கத்தக்கது.

ஒரு புத்தகத்தை எப்படி வாசிப்பது

 இந்தப் புத்தகத்தின் முக்கியமான பகுதி இதுதான்.

  1. புத்தகத்தின் முக்கிய பகுதிகளை முதலில் வாசிக்கவும்,
  2. சுறுசுறுப்பாக வாசித்து குறிப்புகள் எடுக்கவும்,
  3. உங்கள் குறிப்புகளை மதிப்பாய்வு செய்யவும்

என்று பரிந்துரைக்கும் பர்க் ஹெட்ஜஸ்; இவை ஒவ்வொன்றையும் விளக்குகிறார். ஒரு வீட்டை வாங்க விரும்புபவர் அந்த வீட்டின் புகைப்படத்தைப் பார்த்து உடனே வாங்கி விடுவதில்லை. நேரில் சென்று வீட்டின் அனைத்துப் பகுதியிலும் நுழைந்து எல்லாப் பகுதிகளையும் ஆய்வு செய்து அதன் பின்னரே வாங்க முடிவு செய்வார். இது போன்றதே புத்தக வாசிப்பும். ஒரு புத்தகத்தை வாசிப்பதற்கு முன்னதாக, அந்தப் புத்தகத்தின் ஒட்டுமொத்த அம்சங்களையும் பார்க்க நீங்கள் ஒருசில நிமிடங்கள் எடுத்துக்கொள்ள வேண்டும். அதன்பின்பு பொருளடக்கம், முக்கியமான அத்தியாயங்கள் என்று முக்கிய பகுதிகளை முதலில் வாசிப்பதால் பிரமிக்கத்தக்க  முக்கியமான அனுபவம் கிடைக்கக்கூடும்.

இந்த இதழை மேலும்