Home » Articles » சிந்திக்க வைக்கும் சீனா- 4

 
சிந்திக்க வைக்கும் சீனா- 4


பன்னீர் செல்வம் Jc.S.M
Author:

ஷியான் பழமையான நகரம். முந்தைய சீனாவின்  தலைநகரம். இந்நகரில் ஷியான் கோட்டை நகரச் சுவர் உள்ளது. ஒரு கோடி மக்கள் இந்நகரில் வசிக்கின்றனர்.

இருசக்கர வாகனங்கள் செல்ல தனிப்பாதை உள்ளது. ஆனால் குறைவான 2 சக்கர வாகனங்களே உள்ளன. இந்நகரின் சுற்றுச்சுவர் செவ்வக வடிவில் உள்ளது. 13 கி.மீ நீளமுள்ளது. இந்நகரில் சுமார் 30 இலட்சம் கார்கள் உள்ளனவாம். 14 ம் நூற்றாண்டில் கட்டப்பட்ட சுவர் இது.

ரயில் நிலையத்திலிருந்து வெளியே வந்து, பஸ் இருக்கும் பகுதிக்குச் சென்றோம். வெயிலால் பலர் குடை பிடித்துச் சென்றனர். பெட்டிகளை வேனில் ஏற்றிக் கொண்டு ஓட்டலுக்குச் சென்றனர். எங்கள் பசிக்கு சப்வே வெஜ் சாண்ட்விச், நீர், டப்பா கோக்பானம் கொடுத்தனர்.

சுவைத்துச் சாப்பிட்டோம். பஸ் நேரே ஷியான் சுவர் சென்றது. நுழைவு டிக்கெட் எடுத்துக் கொடுத்து மேலே அனுப்பினர்.

இந்தச் சுவற்றில் 120 மீட்டர் நீளத்துக்கு ஒரு காவல் கோபுரம் கட்டியுள்ளனர். வேகமாக இழுத்து விடும் அம்பு சுமார் 60 மீட்டர் தூரம் போகுமாம். அதனால் இந்த தூரம் என்றனர்.

கிழக்கு வாயில் வழியாக 70 படிகள் ஏறி கோட்டைக்குச் சென்றோம். ஒரு மணி நேரம்  சுற்றிப் பார்த்தோம். இந்த ஊரைச் சேர்ந்தவர் ஜி ஜின் பிங் தான் சீனாவின் ஜனாதிபதியாம். போக்குவரத்து நெரிசலைக் குறைக்க மக்கள் BMW ஐ பயன்படுத்துங்கள் என்று சொன்னாராம்.

பொதுவாக BMW என்பது ஒரு வகையான கார். ஆனால் அவர் சொன்னது B- BUS; M- METRO (RAIL) W- WALK அரசு வாகனங்களான பஸ், ரயில் மற்றும் நடந்து சென்றால் சுற்றுச்சூழல் மாசடையாது. பொருளும் சேமிக்கலாம்; உடலும் நலமாக இருக்கும்.

பகல் 12.15 க்கு பஸ் ஏறி ரெட் போர்ட் என்ற இந்திய  உணவகம் சென்றோம். நம் சமையல் கலைஞர்கள் மதிய உணவாக சாதம், சாம்பார், ரசம், மோர், கூட்டு, அப்பளம், பொரியல் வழங்கினர். சுவைத்து சாப்பிட்டு டைடான் ஜின் செங் ஆர்ட் ஓட்டல்  சென்று அறைகளில் தங்கினோம்.

குளித்து, சிறிது நேரம் ஓய்வுக்குப்பின் மாலை 4 மணிக்கு பஸ் ஏறி 30 நிமிட பயணத்தில் முஸ்ஸிம் தெரு சென்றோம். தெருவின் இருபுறமும் சைவ, அசைவ உணவகங்கள், பொருட்கள் விற்பனைக் கடைகள், பார்வையாளர்களை ஈர்க்க வித்தியாசமான உடையணிந்து சுத்தியலால் இரும்பை அடித்தனர்.

200 மீட்டர் நீளமுள்ள தெருவில் கூட்டமோ கூட்டம், இந்த இடம் உணவுப் பிரியர்களின் சொர்க்கம் என்றனர்.

அரபு, பெர்சிய நாட்டு வணிகர்களான முஸ்ஸீம்கள் வணிகம் செய்ய இங்கு வந்து, தங்கி இங்கு வசித்த பெண்களை மணந்து கொண்டு வசிப்பதாய் கூறினர். பெரும்பாலான கார்கள் பேட்டரியில் ஓடுவதால், சாலைகளில் புகை இல்லை.

எங்களுடன் வந்தவர்களுள் ஒருவர் மட்டும் வரவில்லை. சுமார் 1 மணி நேரம் காத்திருந்தோம். 2 பேர் இறங்கி அவரை அழைத்து வருவதாய் கூற, மற்றவர்கள் பஸ் ஏறி ரெட் போர்ட் உணவகத்தில் நம் சமையல் சப்பாத்தி, மசால் பக்கோடா, பாயாசம், தயிர்சாதம் சாப்பிட்டு அறைக்குத் திரும்பினோம்.

அசதியில் நேரத்தில் தூங்கினேன். என்னுடன் அறையில் நெல்லை வேலாயுதம் என்பவர் தங்கினார். பிஎஸ்என்எல் அலுவலராகப் பணியாற்றி விருப்ப ஓய்வு பெற்றுக் கொண்டாராம்.

பேசுவதில் அளவு கடந்த ஆர்வம். குழுவாக வந்த 10 பேர் நேரம் காலம்  தெரியாமல் பானம் அருத்தி சூழ்நிலையைக் கெடுத்தனர். அதற்காகவே சுற்றுலா வந்தவர்களாம். காணாமல் போனவரையும் அழைத்து வந்துவிட்டனர்.

மறுநாள் காலை தயராகி, காலை உணவாக கஞ்சி, பழம், காய், கேக், ஜூஸ் சாப்பிட்டேன். 8.15 க்கு ஏறி புறப்பட்டோம். கைடு ஜெஸிகா உயரம் குறைந்த மாது. 10 வயதில் மகன் இருப்பதாயும், பெற்றோருடன் ஓரே வீட்டில் வசிப்பதாயும் சொன்னார்.

மண்ணிலிருந்து( சிற்பங்கள்) பொம் மைகள் செய்யும் பேக்டரி சென்று பார்த்தோம் 10.45 க்கு டெர கோட்டா சிப்பாய் மியூசியம் சென்றோம். வழியில் கோதுமை வயல்கள் உள்ளன.

முகப்பில் இறங்கி 15 நிமிட நடையில் கல்லறைக் கட்டடம் ( தாஜ் மஹால் போன்றது) சென்றோம். சிலர் கட்டணம் செலுத்தி பேட்டரி வாகனத்தில் வந்தனர். இக்கட்டடங்கள் பூமிக்கு கிழே உள்ளன.

5 இடங்களில் பூமிக்கு கிழே தோண்டி எடுத்த சிப்பாய்  சிற்பங்களை காட்சிப் பொருளாக அடுக்கி வைத்துள்ளனர்.

கி. மு. 3 ம் நூற்றாண்டில் அரசாண்ட சக்கரவர்த்தி ஹூவாங் என்பவர் தன் இறப்புக்குப் பின் பாதுகாப்புக்காக இதை 7.20 இலட்சம் பணியாட்களை வைத்து 40 ஆண்டுகள் கட்டினராம். அவர் கி. மு 210 ல் இறந்து விட்டாராம்.

தனக்குச் சொந்தமான அந்த இடத்தில் 1974 ம் ஆண்டு ஒரு விவசாயி கிணறு தோண்டும் போது, இச்சிற்பங்களைக் கண்டுபிடித்தாராம்.

அரசுக்குத் தெரிவித்த பின், அரசாங்கம் தம் பொறுப்பில் எடுத்துக் கொண்டு 1979 முதல் பொது மக்கள் பார்வைக்கு விடுகிறதாம்.

இதைக் கண்டு பிடித்த விவசாயியை கவுரவிக்க அவருக்கு ஓர் அறை வழங்கியுள்ளது. அவர் எழுதிய புத்தகங்கள் வாங்குவோர் அவருடன் போட்டோ எடுத்துக் கொள்ளலாம்.

பூமிக்குள் 3.30 மீட்டர் உயர சுவர் எழுப்பி அதற்குள் சீனாவின் முதல் சக்கரவர்த்தி தன் மரணத்துக்குப்பின் தனக்குப் பாதுகாவலாக சிப்பாய்கள்,  குதிரைகள், ரதங்களை எனச் செய்ய வைத்தார்.

இதுவரை 3 குழிகளுள் சுமார் 8000 வீரர்கள், 130ரதங்கள், 520 குதிரைகள் ஆகிய  உருவங்கள் சக்கரவர்த்தியின் சவக்குழிக்கு அருகில் கண்டுபிடித்துள்ளனர். களிமண் போன்ற பிரவுன்- ஆரஞ்ச் கலர் மண்ணில் இச்சிற்பங்களை உருவாக்கினர்.

ஆண்டுக்கு சுமார் 10 லட்சம் பயணியர் பார்ப்பதாய் கூறினார். இதை 8 வது உலக .அதிசியம் என்றும் கூறுகின்றனர்.

பின் பஸ் ஏறி 2.15 மணிக்கு ரெட்போர்ட் உணவகம் சென்று மதியம் வழக்கம் போல் சாப்பாடு, வடை, பாயாசத்துடன் சாப்பிட்டு மழைத்துறலின் ஊடே வைல்டு கூஸ் பகோடா என்ற புத்த மத நினைவுக் கட்டடம் பார்த்தோம்.

கி.பி. 652 ல் கட்டப்பட்டு பின் 704 ல் சரி செய்யப்பட்டு 54 மீட்டர் உயரத்திலிருந்த இக்கட்டடம் நிலநடுக்கத்தால் பாதிக்கப் பட்டது. இப்போது 210 அடி உயரத்துடன் உள்ளது. பல புத்தர் சிலைகளைப் பார்த்தோம்.

மக்கள் வழிபாடு, தியானம், செய்தனர். பின் பஸ் ஏறி ஷான்ஸி, சன்சைன்லிடோ கிராண்ட் தியேட்டர் சென்றோம்.

மாலை 6.20 மணி முதல் 7.30 வரை டேங்க் டைனஸ்டி கலாச்சாரப் பிரதிபலிப்பு இசை நாட்டியம் பார்த்தோம். மிக விரைவாக காட்சிகள் கையாளப் பட்டன. மொத்தம் 11 விதமான நடனம். ராயல் டான்ஸ், ஸ்பிரிங் நிலா, ஷாப்ட் டான்ஸ், கார்டன், புத்திசம், நீள ஸ்லீவ் டான்ஸ், இறகு நடனம், ஆட்டம், அரசர் பெருமை போன்றவை.

மிக அற்புதமாயிருந்தது. ஒவ்வொரு நிகழ்வுக்கு முன்னும் சிறு அறிவிப்பு. மிகக்குறுகிய நேரத்தில் காட்சி அமைப்பு (சீன் செட்டிங்) மாற்றப்பட்டு, கலைஞர்களும் மிகச் சிறப்பாக  ஆடினர். கட்டாயம் பார்க்க வேண்டிய நிகழ்ச்சி.

இரவு ரெட்போர்ட் உணவகம் சென்று இட்லி, சட்னி, தயிர்சாதம் சாப்பிட்டு அறைக்குத் திரும்பி உறங்கினோம்.

உடன் வந்து அன்பர் ஒருவருக்கு பிறந்த நாள் என்பதால் கேக் வெட்டி  கொண்டாடினர்.

தொடரும்.

இந்த இதழை மேலும்


Share
 

No comments

Be the first one to leave a comment.

Post a Comment


 

 


November 2018

நோபல்பரிசு – 2018
சின்ன சின்ன மாற்றங்கள் பெரிய மாறுதல்கள்
வெற்றி உங்கள் கையில்-59
வாசியுங்கள்! வாகை சூடலாம்! – 2
இலட்சியத்தை நோக்கி
மண்ணின் மகத்துவம் மகாத்மா காந்தியடிகள்
எப்போதோ போட்ட விதை!
முயன்றேன் வென்றேன்…
தன்னம்பிக்கை மேடை
மற்றவர்களை வசீகரிப்பது எப்படி?
அற்ப சுகங்களுக்காக வாழ்வை மலிவு விலைக்கு விற்கலாமா?
காய்ச்சலால் வரும் வலிப்பு (Febrile Fits)
வாழ நினைத்தால் வாழலாம் – 22
வின்னர்ஸ் அகாடமியின்
அலங்கரித்துக் கொள்…
துணிந்தவருக்கில்லை துயர்-நீங்கள் துணிச்சல் மிக்கவரா?
பயணங்கள் வெறுப்பதில்லை
சிந்திக்க வைக்கும் சீனா- 4
எதிர்பார்ப்பைப் பூர்த்தி செய்… எதிர்காலத்தை நேர்த்தி செய்…
உள்ளத்தோடு உள்ளம்