Home » Articles » மற்றவர்களைத் தாழ்வாக நினைக்காதீர்கள்

 
மற்றவர்களைத் தாழ்வாக நினைக்காதீர்கள்


சௌதாமினி
Author:

நீங்கள் ஒரு திருமணத்திற்குச் செல்கிறீர்கள் உங்களை வரவேற்பவர் “வாங்க!” என்று வாய் நிறைய, மனம் நிறைய அழைத்தால் உங்களுக்கு எவ்வளவு மகிழ்ச்சியாக இருக்கும்.  அதை விட்டு விட்டு வரவேற்பில் நிற்கும் உங்கள் சொந்தக்காரப் பெண், உங்கள் மனைவியின் பெயரைச் சொல்லி “கமலா வரவில்லையா?” என்று கேட்கிறார். அதைக் கேட்ட உங்களுக்கு எப்படி இருக்கும்?  “என்னை வாங்க என்று வரவேற்காமல், திருமணத்திற்கு வராத என் மனைவியை வரவில்லையா? என்று கேட்கிறாரே!”  என்று நீங்கள் நினைப்பீர்களா? இல்லையா?

“வாங்க, வாங்க!…” என்று வாய் நிறைய உங்களை அழைத்து விட்டு, “உங்கள் மனைவி ஏன் வரவில்லை?” என்று கேட்டால் கூட நாகரீகமாக இருக்கும். வராத உங்கள் மனைவியை மட்டும் வராதது குறித்து விசாரிப்பது நாகரீகக் குறைவாகத் தெரியவில்லையா?

சில பேருக்கு எப்படிப் பேச வேண்டும் என்பது தெரிவதில்லை. சில பேர் உங்கள் மேல் இருக்கும் பொறாமையின் காரணமாகவோ அல்லது உங்களை மிகவும் தாழ்வாக நினைப்பதன் காரணமாகவோ உங்களை “வாங்க!” என்று அழைக்கவே மாட்டார்கள். நீங்கள் பலமுறை கவனித்துப் பாருங்கள். உங்களுக்குக் காரணம் தெளிவாகப் புரியும்.

இந்நிகழ்ச்சி உளவியல் ரீதியாகவோ அல்லது உதாசீன மனப்பான்மையின் காரணமாகவோ நடந்திருக்கலாம். எதுவாக இருந்தாலும் தவறு தவறுதான்! உங்கள் சொந்தக்காரப் பெண், உங்களைத் தாழ்வாக நினைப்பதுதான், உங்களை வரவேற்காததற்கு முக்கியக் காரணமாகும்.

கணவனும், மனைவியும் வாழ்க்கையில் நொந்து நொடிந்து போன ஒரு விதவையின் வீட்டுக்குச் செல்கிறார்கள். கணவனை இழந்த அந்த விதவை “வாம்மா! வா… நன்றாக இருக்கிறாயா? ரமேஷ் எப்படி இருக்கின்றான்?” என்றெல்லாம் விசாரித்தவர், கணவனைச் சரியாகவே மதிக்கவில்லை. தலையை அசைத்து “வா” என்பது போல ஜாடை காட்டினாள். அவனை அந்த விதவை மிகவும் தாழ்வாக நினைத்ததுதான் காரணமாகும். அவனை அவள் கொஞ்சம் கூட மதிப்பதில்லை.

பல நாட்கள் கழித்து நன்கு பழகிய உறவினரைச் சந்திக்கின்றீர்கள். வீட்டில் அவர் மட்டுமே இருந்தார். மனைவியும் மகனும் கடைவீதிக்குச் சென்றிருந்தார்கள். அப்போது அவரைப் பார்த்து “நலமாக இருக்கிறீர்களா?” என்று அன்போடு விசாரிக்கிறீர்கள். அவர் மூன்று வருடங்களுக்கு முன்பு இருதய அறுவை சிகிச்சை செய்து கொண்டவர். இது உங்களுக்கு நன்றாகத் தெரியும். அவர் மேல் இருக்கும் அன்பின் காரணமாக, அவரது நலம் குறித்து விசாரிக்கிறீர்கள். ஆனால் அந்த உறவினரோ “இப்படித் தான் என்னைக் கேட்பதா? எனக்கு ஒன்றும் இல்லை. நான் நன்றாகத்தான் இருக்கிறான். இனி நீர் இப்படி எல்லாம் கேட்கக் கூடாது. இது நாகரீகமற்ற பேச்சு” என்று பொரிந்து தள்ளிவிட்டார். நான்கு பேருக்கு முன்னால் நீங்கள் நலமாக இருக்கிறீர்களா? என்று கேட்டிருந்தால் உங்களைக் கடித்திருப்பார். உங்கள் கன்னத்தில் ‘பளார்’ என்று அறைந் திருப்பார். அவருக்குக் கௌரவம்தான் முக்கியம். உடல் நலமெல்லாம் பிறகுதான்.

இந்நிகழ்ச்சிக்குப் பின் ஒரு வாரம் கழித்துப் பெருஞ்செல்வந்தர் ஒருவர் தன் மனைவியுடன் இவரைப் பார்ப்பதற்கு வந்திருந்தார். நண்பர்கள் புடைசூழ அவர்களுடன் சிரித்துப் பேசிக் கொண்டிருந்தார். “உங்கள் உடம்பு நன்றாக இருக்கின்றதா? மருந்துகளைச் சாப்பிட்டு வருகின்றீர்களா?…. மருந்துகளைத் தொடர்ந்து சாப்பிட்டு வருகின்றீர்களா? இந்த மருந்துகளை ஆயுள் முழுவதும் சாப்பிட வேண்டுமே!…” என்றார், இவரிடம். உங்கள் உறவினர், அவர் பேசியதைக் கேட்டுக் கொஞ்சம் கூட வருத்தப்படவில்லை. “டாக்டர் சொன்னபடி சாப்பிட்டுத் தானே ஆக வேண்டும்?” என்று முக மலர்ச்சியோடு கூறினார்.

செல்வந்தர் கேட்டது நாகரீகமுள்ள பேச்சு! நீங்கள் கேட்டது நாகரீகமற்ற பேச்சாம்!…. எப்படியிருக்கிறது பாருங்கள். உங்களை உங்கள் உறவினர் மிகவும் தாழ்வாக நினைத்துவிட்டார். வாழ்க்கையில் உயரத் துடிப்பவர்கள், மற்றவர்களை மிகவும் தாழ்வாக நினைக்கவே கூடாது.

மற்றவர்களைத் தாழ்வாக நினைப்பவர்களால் எந்தக் காலத்திலும் முன்னுக்கு வரவே முடியாது. வாழ்க்கையில் முன்னுக்கு வந்தவர்களை, “நீங்கள் மற்றவர்களைத் தாழ்வாக நினைத்தது உண்டா?” என்று கேட்டுப் பாருங்கள். “என்னுடைய உயர்வைப் பற்றியே நான் சிந்தித்துக் கொண்டிருந்தேன். மற்றவர்களைத் தாழ்வாக நினைப்பதற்கு எனக்கு நேரமேது?” என்று தான் அவர்கள் சொல்வார்கள்.

எனவே நீங்கள் எவரையும் தாழ்வாகவோ, இழிவாகவோ நினைக்கக் கூடாது. உயர்ந்த எண்ணமுடையவர்; மற்றவருக்கு மதிப்புக் கொடுத்துக் கம்பீரமாக வாழ்பவர், எவரையும் தாழ்வாக நினைக்கவே மாட்டார்.

ஒருமுறை இந்தியாவின் ஜனாதிபதியாக இருந்த டாக்டர் ராதாகிருஷ்ணன், ரஷ்ய நாட்டு அதிபர் ஸ்டாலினைச் சந்தித்தார். இருவரும் நீண்ட நேரம் உரையாடிக் கொண்டிருக்கும் போது டாக்டர் இராதாகிருஷ்ணன், ஸ்டாலின் முதுகை மெல்லத் தடவிக் கொடுத்தார். ஸ்டாலின் நெகிழ்ந்து போனார். “இதுவரை எத்தனையோ தலைவர்கள் என்னைப் பார்க்க வந்திருக்கிறார்கள். அவர்கள் என்னை சர்வாதிகாரியாகத் தான் பார்த்தார்கள். அவர்கள் என்னைத் தாழ்வாக நினைத்தார்கள். நீங்கள் ஒருவர் மட்டுமே என்னை மிகவும் உயர்வாக நினைத்து, மதிப்புக் கொடுத்ததோடு, மிகவும் அன்பாகப் பழகுகின்றீர்கள். நீங்கள் என்னைத் தொட்டதும் ஒரு புத்துணர்ச்சி என்னுள் தோன்றியது” என்றார்.

இந்த இதழை மேலும்


Share
 

No comments

Be the first one to leave a comment.

Post a Comment


 

 


December 2017

எண்ணியதை செய்யுங்கள்
வாழ நினைத்தால் வாழலாம் -11
நிர்வாகம் ஒரு நடைமுறை சார்ந்த அறிவியல்
சத்துச் சேமிப்புக் கூடங்கள்
மற்றவர்களைத் தாழ்வாக நினைக்காதீர்கள்
மனமாற்றமும், மகத்தான வெற்றியும்
தீவிர மூச்சுப்பாதை சுவாச மண்டல நோய்கள்
முந்தின கை ஜெயிக்கும்
உங்கள் ஆசைகள் நியாயமானதா? முறையற்றதா?
எண்ணத்தின் மேன்மை கொள்…
தோல்வியைத் தொடர விடலாமா?
டிசம்பர் மாத உலகதினங்கள்
மணவயல்
வெற்றி உங்கள் கையில்
துபாய்க்கு வாங்க!
சிறுகதைகளின் சிறப்பு அம்சங்கள்
மாற்றமே நம் முன்னேற்றம்…
தன்னம்பிக்கை மேடை
நினைத்ததை முடித்திடு… நிலவிலும் கால் பதித்திடு…
உள்ளத்தோடு உள்ளம்