மொழியை நேசி...! முன்னேற்றத்தை சுவாசி..!! - தன்னம்பிக்கை | தன்னம்பிக்கை

Home » Cover Story » மொழியை நேசி…! முன்னேற்றத்தை சுவாசி..!!

 
மொழியை நேசி…! முன்னேற்றத்தை சுவாசி..!!


ஆசிரியர் குழு
Author:

ஆர்.சி. மதிராஜ்

கவிஞர் மற்றும் எழுத்தாளார்

சென்னை

தமிழ் இலக்கிய மரபில் உள்ள இலக்கிய வகைமையில் தனிச்சிறப்புடையது கவிதை. தொல்காப்பியர் காலம் தொடங்கி இன்று வரை தமிழில் ஏராளமான கவிதை இலக்கியங்கள் தோன்றியுள்ளது. அதில் ஒவ்வொரு கவிஞர்களுக்கும் ஒரு எழுத்து நடை இருக்கும். அந்த வகையில் இவரின் நடை நாம் அன்றாடம் புழுங்கும் சொற்களிலிருந்து கவிதை எழுதும் ஆற்றல் மிக்கவர்.

இவரின் கவிதை அனைத்தும் கேட்பதற்கு இனிமையாகவும், படிப்பதற்குச் சுவையாகவும், சமுதாய நலன் கருதியும் எழுதும் ஆற்றல் பெற்றவர்.

மனிதன் தன் புறக்கண்ணால் பார்க்க இயலாத பலவற்றையும் மனத்தின் அகக்கண்ணால் இன்பம் காண முடியும் அதற்கு கவிதை மிகப் பெரும் துணையாக இருக்கிறது, அந்த வகையில் கவிதையின் கற்பனையை மிக அழகான முறையில் கருத்துக்களை எடுத்தாளும் திறம் மிக்க கவிஞர்.

கவிஞர், எழுத்தாளர், படைப்பாளர், வசனகர்த்தா, நாடக ஆசிரியர், நாவலாசிரியர், திறானாய்வாளர் என பன்முகத்திறமை கொண்ட திரு ஆர். சி. மதிராஜ் அவர்களின் நேர்காணல் இனி நம்மோடு….

கே: உங்களின் பிறப்பும், பின்புலமும் பற்றி?

பெற்றோர் வைத்த பெயர் ராஜா. பிறந்தது வளர்ந்தது விழுப்புரம் மாவட்டத்தைச் சேர்ந்த கச்சிராயபாளையம் என்னும் சிற்றூர். மேல்நிலைப்பள்ளியை சொந்த ஊரிலேயே முடித்து, பாலிடெக்னிக் படிப்பை ராசிபுரம் முத்தாயம்மாள் கல்லூரியில் முடித்தேன். சிறு வயது முதலே ஓவியம் கவிதையின் பால் ஈர்ப்பு கொண்டு எழுதத் துவக்கினேன். கல்லூரி காலத்தில் அனைத்து வார இதழ்களிலும், கவிதைகள் கட்டுரைகள் எழுதினேன். மாலை மதியில் நாவல் ஒன்றும் பிரசுரம் ஆனது. பத்திரிக்கைகளில் பணிப்புரிய வேண்டும் என்று 90 களில் சென்னை வந்தேன். பத்திரிகைகளில் எழுதத் துவங்குகையில் ஆர்.சி. மதிராஜ் என்று வைத்துக்கொண்டேன்.

கே: கவிதை எழுதும் ஆர்வம் எழுந்ததற்கான காரணம் ஏதாவது இருப்பின் விபரம்?

கவிதைகள் மொழியை சுண்டக்காய்ச்சிய வடிவம் என்பது எனது கருத்து. விதைக்குள் ஒளிந்திருக்கும் ஆலமரம் போல, ஒரு மொழியின் சுவையை நிச்சயம் ஒரு கவிதை அடக்கி வைத்திருக்கும். மேலும் ஒன்றை வெளிப்படையாக சொல்வதை விட கவிதைக்குள் பூடகமாகவோ ரசனையாகவோ சொல்லும் முறை எனக்கு வெகுவாகப் பிடித்ததும் காரணம்.

கே: தங்களின் முதல் கவிதை மற்றும் அதைப்பற்றி ஓரிரு வரிகளில்…

முதல் கவிதை தினமலர் இணைப்பான வாரமலரில் பிப்ரவரி 14, 1993 அன்று வெளியானது.

இனியவளே…

உன் விழிகள் மட்டும்

என்னை முத்தமிடட்டும்

நான்

கம்பனையும்

காளிதாசனையும்கூட

தோற்கடிப்பேன்.

என்ற கவிதை அது. அந்த மற்றும் அதைத் தொடர்ந்த வருடங்களில் வார மாத இதழ்களில் தொடர்ந்து ஏராளமான கவிதைகள் எழுதிவந்தேன்.

கே: தாங்கள் இயற்றியுள்ள கவிதைகள் எப்பொருண்மையை மையமிட்டு எழுதப்பட்டவை?

பழந்தமிழ் இலக்கியங்கள் காதலையும் வீரத்தையும் மையப்படுத்தி எழுதப்பட்டது போல… என்னுடைய பெரும்பாலான கவிதைகள் காதலை மையப்படுத்தி  எழுதப்பட்டவை.  கொஞ்சம் தத்துவ விசாரங்களாகவும், கொஞ்சம் சமூக அக்கறையும் என் கவிதைகளில் இழையோடுகின்றன.

கே: உங்களது கவிதைகளில் உங்களுக்கு மிகவும் பிடித்தது?

கடினமான கேள்வி எழுதப்படும் எல்லாப் படைப்புகளையும் எனக்குப் பிடித்துதான் எழுதுகிறேன். தனியாக ஒன்றைச் சொல்வது மிகவும் கடினம். எழுதி முடித்த பிறகு அடுத்தடுத்து அதைவிட சிறப்பான ஒன்றை எழுதவேண்டும் என்று தோன்றும். ஆனாலும் விகடனில் ‘அப்பா’ பற்றி எழுதி வெளிவந்த ஒரு கவிதை பலராலும் மிகவும் பாராட்டப்பட்டது. வேலை நிமித்தம் அப்பா அம்மாவைப் பிரிந்து நகரத்து வாழ்வை மேற்கொள்ளும் ஒரு மகனின் நினைவாக எதை எழுதியிருந்தேன். அதை வேண்டுமானால் உங்களுடன் பகிர்கிறேன்.

ஊருக்குச் சென்று

திரும்பும்போதெல்லாம்

சொல்லுவார் அப்பா

உடம்பைப் பார்த்துக்கப்பா என்று

எனக்கும் ஆசைதான்

சேர்ந்தாற்போல்

நான்குநாள் விடுமுறைளில்

அருகிலேயே இருந்து

அப்பாவைக் கவனித்துக்கொள்ள

என்றாலும்

ஒருபோதும் முடிந்ததில்லை

ஒவ்வொர் இரவிலும்

கட்டிப்பிடித்தபடி

தூக்கத்தில் மேலே போடும்

மகனின் கால்பிடித்து

அமுக்கிவிடுவேன் இதமாக

அப்பாவை எண்ணிக்கொண்டு

கே: தற்கால இலக்கியங்களில் கவிதையைத் தவிர வேறு ஏதேனும் பொருண்மைகளில் உதாரணமாக நாடகம், சிறுகதை, நாவல் போன்றவற்றில் ஆர்வம் உண்டா? அது பற்றி…

கவிதை தவிர, வார மாதப் பத்திரிக்கைகளில் ஐம்பதுக்கும் மேற்பட்ட சிறுகதைகள் எழுதியுள்ளேன். குமுதம் குழுமத்திலிருந்து வந்த ‘மாலைமதி’ யில் ஒரு நாவல் எழுதியுள்ளேன். பிறகு பத்திரிக்கைகளில் வடிவமைப்பாளராகப் பணிபுரியத் தொடங்கிய போது எழுதுவது தடைப்பட்டது. ‘எழுதுபவற்றை அப்படியே விட்டுவிடாமல் புத்தகமாக வெளியிட வேண்டும்’ என்ற அண்ணன் அறிவுமதியின் அறிவுரைப்படி குறைந்தது ஒவ்வொரு வருடமும் ஒரு புத்தகமாக வெளியிடவேண்டும் என்று நினைத்து வெளி வந்தவையே இந்தப் புத்தகங்கள்.

மனித உறவுகள், மனித உறவுகளின் சிக்கல்கள், மனித நாகரிகம், மனித மன உணர்வுகள் அவற்றின் கண்ணீர், துரோகம், காமம், காதல், காயம் ஒரு மனித மனம் எப்போது எப்படி செயல்படுகிறது? அது அவ்வாறு செயல்படுவதற்கான காரணம் என்ன? என்றெல்லாம் விரிவாக உளவியல் அளவில் ஒரு புத்தகம் எழுதவேண்டும் என்று விருப்பம். அதற்காக நிறையப் படித்துக்கொண்டிருக்கிறேன்.

இந்த இதழை மேலும்


Share
 

No comments

Be the first one to leave a comment.

Post a Comment


 

 


November 2017

கொழுப்பும் ஆயுளும்
சிந்தனை மாற்றமே வாழ்க்கையின் முன்னேற்றம்
நவம்பர் மாத உலக தினங்கள்
கரும்பின் தோற்றமும் வளர்ச்சியும்
பாம்புக்கடி
நெஞ்சம் குளிர்ந்த நிறைவான வாழ்த்து !
பயமும் பணிவும்
உள்ளே பார் உன்னை தெரியும்..
விரும்பிய தருணங்களை திரும்பிப் பார்க்கிறேன்
சுவாமி விவேகானந்தரின் வெற்றிச் சிந்தனைகள்
மனவயல்
வெற்றியை நோக்கிப் பயணம் செய்யுங்கள்!
நேசி; உபயோகி
முதலில் அடிவாரத்தை தொடுவோம், பின்னர் சிகரத்தை தொடலாம்.
வெற்றி உங்கள் கையில்- 47
வாழ நினைத்தால் வாழலாம் – 10
நீயின்றி அமையாது உலகு..!
தன்னம்பிக்கை மேடை
மொழியை நேசி…! முன்னேற்றத்தை சுவாசி..!!
உள்ளத்தோடு உள்ளம்