Home » Articles » பருவத்தே பயிர் செய்…

 
பருவத்தே பயிர் செய்…


பன்னீர் செல்வம் Jc.S.M
Author:

 ‘ஆடிப்பட்டம் தேடி விதை’ , நம் முன்னோர்கள் தம் அனுபவத்தால் இந்தச் சொற்களை சொன்னார்கள். விதைப்பது என்பது நல்ல விளைச்சல் தொடர்ச்சியான அறுவடை இவற்றையும் உள்ளடக்கும்.

இவற்றுக்கு அடிப்படையானது சரியான காலத்தில் விதைப்பது தான். பட்டம் என்பதைப் பருவம் என்றும் சொல்லலாம்.

‘பருவத்தே பயிர் செய்’ என்பது இன்னோர் அனுபவச்சொல். ஆழ்ந்து யோசித்தால், பருவம் என்பது பயிருக்கு மட்டுமல்ல; அப்பயிரை விளைவிக்கும் மனிதகுலத்துக்கும் மிகவும் அவசியமானதாகும்.

மனித வாழ்க்கையில் பருவத்தே செய்ய வேண்டிய செயல்கள் பல இருந்தாலும், மிக முக்கியமானவை, பள்ளிக்குச் செல்வது. பணிக்குச் செல்வது. இல்லறம் துவங்குவது, வாரிசை உருவாக்குவது ஆகும்.

படிப்பு

கல்வியின் ஓர் அங்கம் படிப்பு.  ஆனால், படிப்பே கல்வி ஆகாது. கல்வி என்பதை கற்றல் மூலம் பெறலாம். கற்றல் என்பது பார்ப்பது, கேட்பது, படிப்பது, சிந்திப்பது என்று நான்கு வகைப்படும்.

பரிணாம வளர்ச்சியில் முந்தைய ஆரோக்கிய வாழ்வு சிதைக்கப்பட்டு, செயற்கையாக வாழும் சூழல் உருவாகி விட்டது. உள் ஒன்று வைத்துப் புறம் ஒன்று பேசும் நிலை தான் எங்கும் நிலவுகிறது.

பிறந்த குழந்தைக்கு 5 வயது நிறைந்த பின்பே பள்ளிக்கு அனுப்பிய காலம் 60 ஆண்டுகளுக்கு முன் நடைமுறையில் இருந்தது. அதுவரை தெருவில் குழந்தைகளுடன் விளையாடுவது. இயற்கை வழியில், மூத்தோர்களிடம் கதை கேட்டும், வீட்டில் உள்ளோர் வாழ்க்கை முறைகளைப் பார்த்தும் கற்றனர்.

இன்று அந்த வாய்ப்பு குழந்தைகளுக்கு மறுக்கப்பட்டு விட்டது. கதை கேட்டும் நீதிமுறைகளை அறிந்தும் கடைப்பிடிக்கும் வாய்ப்பும், வீட்டில் பலரும் இணைந்து வாழும் சூழல், அவர்களது செயல்களைப் பார்த்து, தாமும் அவைகளைச் செய்யும் வாய்ப்பும், பணி காரணமான வெளியிடத் தனிக் குடும்ப வசிப்பால் சாத்தியமில்லாமல் போய்விட்டது.

பொருளாதாரத்தில் எந்த நிலையில் இருந்தாலும், குழந்தைகளுக்கு 2 வயது முடிந்த உடனேயே அவர்களை விளையாட்டுப்பள்ளி, கிண்டர் கார்டன், பால்வாடி எனப் பல நிலைகளில் இயற்கைக்கு முரணாக வளர்க்கிறோம்.

பருவம் தவறி, முரண்பட்டு, உரிய வயதுக்கு முன்பே பள்ளிக்கு அனுப்பி, அவர்களைப் படிக்க வைக்கிறோம் என்ற பெயரில் நல்ல பண்பாட்டுக் கல்வி கற்கும் வாய்ப்பை வழங்க மறந்து விட்டோம்.

பசி வந்தபின் அருந்தும் உணவு முழுமையான பலனைத்தரும். ஆனால், பசிக்காதபோது உண்ணும் உணவு அஜீரணமாகி உடல் நலத்தைக் கெடுத்து விடும்.

இதுபோலதான், உரிய விளைச்சலுக்குப் பின் செய்யும் அறுவடையால் அதிக மகசூல் பெறலாம். அதற்கு முன்பே அறுவடை செய்தால் பாலையும், பதரும்தான் மிச்சம். இன்று நாம் விரும்பி நம் குழந்தைகளுக்கு வழங்கும் படிப்பு இவை போல்தான் உள்ளன. அன்பை, அரவணைப்பை, கொஞ்சுதலை எதிர்பார்க்கும் பருவத்தில், கண்டிப்பு, கறார், கால அளவுக்கு கட்டுப்படுதல், தண்டனைகள் எனத் தேவையற்றவைகளைத் திணித்து, அந்தக் குழந்தைகளைக் கசக்கிப் பிழிந்து விடுகிறோம்.

இந்த இதழை மேலும்


Share
 

No comments

Be the first one to leave a comment.

Post a Comment


 

 


October 2016

சிகரமே சிம்மாசனம்…
பெண் குழந்தைகள்
முயன்றேன் வென்றேன்….
காந்தியடிகளின் ஆன்மீக வழிநெறிகள்
அதிசய மாற்றத்தின் ரகசியம்
நம்மை முதுமையாக்கும் உணவுகள்
பிரச்சனை…
வலிகளைத் தாண்டிய வரலாறு
விரும்பிய தருணங்களைத் திரும்பிப் பார்க்கிறேன்
வெற்றி உங்கள் கையில்….
எண்ணத்துப்பூச்சி…
பருவத்தே பயிர் செய்…
சர்வதேச அகிம்சை தினம்
தன்னம்பிக்கை மேடை
மனதின் உயர்வே! மனிதனின் உயர்வு!
உள்ளத்தோடு உள்ளம்