April, 2016 | தன்னம்பிக்கை

Home » 2016 » April

 
  • Categories


  • Archives


    Follow us on

    என் பள்ளி

    திருமதி. சிவகாமி இராமநாதன்

    ஆசிரியர் ( ஓய்வு)

    கோவை.

    “சட்டங்கள் செய்வதும், பட்டங்கள் ஆள்வதும்

    பாரினில் பெண்கள் நடத்த வந்தோம்

    எட்டு மறிவினில் ஆணுக்குப் பெண் – இங்கே

    இளைப்பில்லை கண்டீர்”.

    – மகாகவி பாரதியார்

    குடும்பத்தில் பெற்றோருக்கு நல்ல மகளாய், கணவருக்கு நல்ல துணைவியாய், பிள்ளைகளுக்கு நல்ல தாயாய் வாழ்ந்து பலர் போற்றும்படி தன் வாழ்க்கையை அமைத்து வாழும் திருமதி. சிவகாமி அவர்களின் பள்ளி அனுபவங்கள் நம்மோடு…

    தற்போதைய நாமக்கல் மாவட்டத்தில் உள்ள சித்தளந்தூர் என்னும் குக்கிராமத்தில், ஒரு சாதாரண குடும்பத்தில் பிறந்தேன். என் தந்தை திரு. செங்கோடக்கவுண்டர், தயார் பாப்பாயம்மாள். எனக்கு முன் பிறந்த மூத்த சகோதரர்கள் இரண்டு பேர் திரு. நடராஜன், திரு. கிருஷ்ணன். கடைசியாக பிறந்த பெண் குழந்தை நான் என்பதால் பெற்றோருக்கும், சகோதரர்களுக்கும் என்மீது அளவு கடந்த அன்பு எப்பொழுதும் இருக்கும்.

    என் தந்தை காவல்துறையில் பணியாற்றினார். சற்று கண்டிப்புடன் இருப்பார். ஏதேனும் தவறு செய்தால் மட்டும் அவரிடமுள்ள கண்டிப்பு வெளியே வரும். நான் ஒருமுறைகூட அவரிடம் திட்டு வாங்கியதே இல்லை என்பதுதான் உண்மை.

    காவல்துறையில் இருந்ததால் என் அப்பாவிற்கு அடிக்கடி பணி இடமாற்றம் ஏற்படும். இதனால், வீடும் ஊரும் மாறிக்கொண்டே இருக்கும்.

    இதனால் என் தொடக்கப்பள்ளி என் சொந்த ஊரில் அமையாமல் சேலம் மாவட்டம் ஓமலூரிலுள்ள பாத்திமா புனித அன்னைபள்ளியில் படிப்பைத் தொடங்கினேன்.

    இப்பள்ளி மற்றும் ஆசிரியர்களை எனக்கு மிகவும் பிடித்து விட்டது.

    நான் தொடக்ககல்வி பயிலும் போதே படிப்பையும், பாட்டுப்பாடுவதையும் மிக அழகாக கற்றுக்கொண்டேன். குறிப்பாக பாரதியார் பாடல்கள், சுதந்திரப்பாடல்கள் என்று நிறையப்பாடல்களை மனப்பாடம் செய்து வைத்திருந்தேன். பள்ளி விழாவில் ஆசிரியர்கள் முதலில் என்னைத்தான் தேர்வு செய்வார்கள்.

    அந்தளவிற்கு அப்பள்ளியில் அனைவருக்கும் பிடித்த மாணவியாக மாறிவிட்டேன். நான் 4ம் வகுப்பு படிக்கும் பொழுது என் தந்தைக்கு மீண்டும் பணி இடமாற்றம். இதனால், இப்பள்ளியை விட்டு வேறு பள்ளிக்குச் செல்லும் சூழல் ஏற்பட்டது.

    என் தந்தைக்கு சற்று மனவருத்தம், நாம் இவ்வாறு இடமாறுவது இவர்களின் படிப்பையும் பாதிக்கிறதே என்று நினைத்தார். ஆனால், என் படிப்பின் மீது மிகவும் நம்பிக்கை கொண்டிருந்தார். அவரின் நம்பிக்கையை நான் ஒரு போதும் வீணடித்ததே கிடையாது. அந்தளவிற்கு என்னுடைய தேர்வுமுடிவுகள் இருக்கும்.

    எந்த பள்ளிக்கு போனாலும் ஆசிரியர்களுடன் நான் நெருங்கி பழகி விடுவேன். காரணம் நன்றாக படிக்கும் பிள்ளைகளுக்கு ஆசிரியர்கள் அதிக முக்கியத்துவம் கொடுப்பார்கள்.

    ஒரு சமயம் என் வாழ்க்கையில் நடந்த சுவாரசியமான சம்பவம் என்றே சொல்லலாம். அது என்னவென்றால் பத்தாம் வகுப்பு பொதுத் தேர்வு எழுதி முடிவுக்காக காத்திருந்த தருணம், என் தந்தை ஸ்டேசனில் அவருடன் காவல்துறையில் பணியாற்றும் மற்ற அதிகாரிகளுடன் தேர்வு முடிவுகளைப் பார்த்துக் கொண்டிருந்தார்.

    என் தேர்வு எண்ணை மற்றவர்கள் கேட்க என் தந்தையும் கொடுக்கிறார். ஆனால், அந்த செய்தித்தாளில் என் தேர்வு எண் இல்லை. எனது தந்தை என் மீது மிகுந்த நம்பிக்கை வைத்திருந்தார். அதைப் பொய்யாக்கி விட்டேன் என்று என் மனம் மிகவும் வலித்தது. ஆனாலும், எனக்கு நம்பிக்கை வரவில்லை. ஒரு வாரம் சென்றது. என்னை அழைத்து நீ தேர்வில் வெற்றி பெற்று விட்டாய் சில காரணத்தால் உன் எண் அன்று வரவில்லை என்ற சொன்னார். எனக்கு மிகுந்த மகிழ்ச்சி, வீட்டிற்கு வந்து சொன்னேன். அனைவரும் மிகுந்த ஆனந்தமடைந்தார்கள்.

    பள்ளியில் படிக்கும் பொழுது நிறைய ஆசிரியர்களை சந்திப்போம். அவர்களிடமிருந்து ஏதேனும் ஒன்றைக்கற்றுக் கொள்வோம். அவ்வாறு என் மனதில் நின்றவர்கள் திரு. சிவசண்முகம் காலந்தவறாமை இவரின் முக்கியமான குணங்களில் ஒன்று. தமிழாசிரியராக பணியாற்றிய திரு. பழனியாண்டி அவர்கள் தமிழ் உச்சரிப்பு, இலக்கியங்கள் நடத்துவதில் வல்லவர்.

    இப்படியே காலம் சென்றது. ஆசிரியர் பயிற்சிப்படிப்பை முடித்து ஆசிரியராக  பணியில் அமர்ந்தேன். அதன் பிறகு திருமணம், குழந்தைகள், பேரப்பிள்ளைகள் என்று வாழ்க்கைச் சக்கரத்தோடு பயணித்து, தன்னலான அளவு இந்த சமுதாயத்திற்கு பயன்பாடாக இருந்து வருகிறேன்.

    நம் உயர்வுக்காக சில வழிகள்….

    தன்னம்பிக்கை

    தன்னம்பிக்கை என்பது தனிப்பெரும் செல்வம். தன்னம்பிக்கை அனைவருக்கும் இருக்கும். ஆனால், நம் உள்மனதில் இருந்து உறுதியாக ஒரு செயலை முடித்து வெற்றி பெறுபவனே வெற்றியாளன். தோல்வியைப்பற்றி கவலைப்படாதவனே தன்னம்பிக்கை உள்ளவன். ஆகவே, ஒவ்வொரு மனிதனுக்கும் தன்னம்பிக்கை தேவை. வளர்ப்போம், வெற்றி பெறுவோம்…

    குறிக்கோள்

    ஒவ்வொரு மனிதனுக்கும் இன்றியமையாததது உணவு. அதே போல் நம் வாழ்க்கையில் குறிக்கோள் இன்றியமையாத ஒன்று. குறிக்கோளை நோக்கிய பயணம் செய்தால் நாம் வெற்றி பெறுவத சுலபம். ஆகவே, குறிக்கோளை முடிவு செய்யுங்கள்.

    அடைவதற்கான வழிகள்

    திட்டமிடுதல்

    நாம் ஒரு செயலைச் செய்வதற்கும், ஆழமாக சிந்தித்து திட்டமிடல் அவசியம். திட்டமிடாத செயல் வெற்றியடையாது என்பது சான்றோர் கூற்று.

    நேர மேலாண்மை

    நாம் ஒரு செயலைச் செய்வதற்கு முன் திட்டமிடல் அவசியம். அதேபோல் நேர மேலாண்மை முக்கியம். அனைவருக்கும் 24 மணி நேரம் என்றால் நேரத்தை பயன்படுத்துபவனுக்கு 25 மணி நேரம் கிடைக்கும்.

    முயற்சி

    மேலே கூறிய வழிகளை பயன்படுத்தினால் வெற்றி நமை தேடி வரும்

    உடல்

    உடல் விலைமதிப்பற்ற சொத்து. இதை வைத்து பணம், பெயர், புகழ், நன்மதிப்பு என்று எதையும் சம்பாதிக்க முடியும். உங்கள் உடலை நேசியுங்கள், உடல்நலத்தைக் காக்கும் 100 சதவீதப் பொறுப்பையும் நீங்களே எடுத்துக்கொள்ளுங்கள். உங்கள் உடலை நீங்கள் நேசித்தால் உங்கள் உடல் மீது உங்களுக்கு மரியாதை ஏற்படும். என்றுமே இளமையும் தோற்றத்தில் மிளிரும் (என் உடலை நேசிக்கிறேன்) என்று தினமும் சொல்லவும்.

    உறக்கம்

    மனிதனின் திசுக்கள் புத்துயிர் பெற, நமக்கு 6 மணி நேரம் உறக்கம் தேவை.

    தியானம்

    நம் மனதையும், உடலையும் கட்டிப்போட முடியாது. ஆனால், தியானத்தால் வெல்ல முடியும். இன்றிலிருந்து தொடங்குங்கள் நீங்கள் நினைத்ததை சாதிப்பீர்கள்.

    உடற்பயிற்சி

    ஒவ்வொரு மனிதனின் உடல் இயற்கையாக படைக்கப்பட்டது. நம் உடல் மீது அக்கறை கொண்டால், உடற்பயிற்சி செய்ய தூண்டு, உற்சாகமாக வலம் வந்து உடலை கட்டுக்கோப்பாகவும் வைத்துக்கொள்ள உதவும்.

    சரிவிகித உணவு

    நமக்கு கடவுள் அளித்த வரம் உணவு. உணவை நாம் தினமும் சரிவிகிதமாக எடுத்து நம் உடலுக்கு சக்தியை கொடுத்து வளமாக வைத்துக் கொள்வோம்.

    சந்தோஷம்

    மேலே கூறப்பட்ட தலைப்பு அனைத்தையும் கடைப்பிடித்தால், சந்தோஷம் தானகவே கிட்டும். ஆனால், முயற்சி, விடாமுயற்சி, தொடர்ச்சி, பயிற்சி போன்றவை அவசியம். அனைவரும் இதை கடைப்படியுங்கள் 30 நாட்களுக்குள், உங்களுக்குள் ஒரு மாற்றம் வரும். இந்த சந்தோஷம் தான் மனமகிழ்ச்சி. இதுவே வெற்றியை நம் மனதுக்கு கொடுக்கும் அருமருந்து.

    உள்ளத்தில் இளமையைப் பாதுகாப்பதே

    முதுமையை வெல்ல உண்மையான வழி

    கடந்த காலச் சோதனைகளின் சுருக்கம்

    தான் அனுபவம்.

    செய்ய முடிந்தவன் சாதிக்கிறான்

    செய்ய முடியாதவன் போதிக்கிறான்.

    வாழ்வில் வெற்றி அடைய வாழ்த்துவோம்…

    பஞ்சதந்திரம் – 7

    பதினெண் கீழ் கணக்கு (18-ன் மகத்துவம்)

    வாழ்வில் வெற்றி காற்றை மட்டுமே சுவாசிக்கும் வாசக நண்பர்களே…!

    அனைத்து அம்சங்களும் பொருந்தி இருக்கிறது. இவரது வாழ்க்கை அனைத்து வளங்களோடும் அருமையாக இருக்கும் – என்று எப்போதுமே சொல்லும் ஒரு ஜோதிட விர்ப்பன்னர் – எனக்கு ஒரு தன்னம்பிக்கை வித்தகராகவே தோன்றினார்.

    சமீபத்தில் ஒரு நிறுவனத்தில் பயிற்சி வகுப்பு எடுக்க அழைப்பு விடுத்தனர். அப்போது, இவர்தான் எங்கள் நிறுவனத்தின் சிறந்த “வேலையாள்” (Best Employee of the Year என்ற பரிசினை கடந்த 5 வருடங்களாக ஜெயித்துக்கொண்டிருக்கிறார் என்று ஒருவரை அறிமுகம் செய்து வைத்தனர். எனக்கு மிகவும் மகிழ்ச்சியாக இருந்தது. எப்படி இது சாத்தியம்…? என்று அவரிடம் கேட்டேன்.

    பதில் எனக்கு மிகுந்த வியப்பாகவும், அதே நேரம் திருப்தியாகவும் இருந்தது. அந்த நண்பரின் விசாலமான பார்வையும், வாழ்க்கை குறித்த அவரின் அணுகுமுறையும் என்னை மிகவும் பிரமிக்க வைத்தது.

    அந்த பதில்  – இதுதான்…

    எனக்கு 6 நண்பர்கள் இருக்கிறார்கள். என்னுடைய வெற்றிக்காக, லட்சியத்துக்காக என்னுடனேயே இருந்து, என்னை ஊக்குவிக்கிறார்கள். எப்போதாவது நான் சோர்ந்து போனால் – என்னை உற்சாகப்படுத்தி – நாங்கள் உன்னோடு இருக்கும்போது நீ ஏன் கவலைப்படுகிறாய்…? இன்னும் நிறைய நிறைய வெற்றிகளை, புகழ்களை உனக்காக நீங்கள் நாங்கள் உருவாக்க இருக்கிறோம். அதை வரவேற்க நீ தயாராக வேண்டாமா…? என்றே சொல்வார்கள். அவர்களின் பெயர்கள் திரு. சுக்கிரன், திரு. ராகு, திரு. கேது, திரு. சந்திரன், திரு. குரு, மற்றும் திரு. சூரியன் என்று சொன்னார்.

    அவர்களை பார்க்க முடியுமா…? என்றேன். என் நண்பர்கள் எல்லோருக்கும் தெரிந்த பிரபலங்கள்தான் ஆனால், பார்க்க முடியாது என்றார். வேலை நாட்கள் எப்படி…? 24 மணிநேரமும் ஓயாமல் உழைத்துக்கொண்டே இருப்பீர்களா…? என்று கேட்டேன். அதிர்ஷ்ட நாட்கள் என்று ஏதேனும் உண்டா…? என்றும் கேட்டேன்.

    அவர் சொன்னார், செவ்வாய்க்கிழமை, புதன்கிழமை மற்றும் சனிக்கிழமை நான் விடுப்பு எடுக்காத நாட்கள். ஏனென்றால் ஞாயிற்றுக்கிழமை, திங்கள் கிழமை, வியாழக்கிழமை போவே இந்த நாட்களில் எனக்கு எப்ல்போதுமே நம்பிக்கை உண்டு. ஒவ்வொரு நாளும் ஒரு பெரிய வெற்றியை எனக்குத்தர காத்திருக்கிறது என்றார்.

    இந்த நண்பரின் தகவல்களுடன் அந்த ஜோசியரை நான் சந்தித்தேன். ஜோதிடர், இவருக்கு ஜோதிடமே தேவையில்லை. வழக்கமாக நான் சொல்வது அனைத்துமே இவரிடம் ஏற்கனவே இருக்கிறது என்றார்.

    என்ன நண்பர்களே… ஏதோ ஒரு சிறு பொறி உங்கள் மூளையை தட்டுகிறது அல்லவா…? நான் எதை சொல்ல வருகிறேன் என்ற ஊகித்து விட்டீர்கள் என்று தெரிகிறது.

    உங்கள் அறிவுக்கூர்மைக்கு சபாஷ்…

    இன்னும் புரியாத நண்பர்களை இக்கட்டுரையின் துவக்கத்திலிருந்து படிக்க வேண்டுகிறேன்…

    சரி இப்போது விஷயத்துக்கு வருகிறேன்.

    9 கிரகங்களையும் ஒருவன் தன் நண்பனாகவும், நன்மை செய்பவையாகவும் கொண்டு செயல்பட்டால், வெற்றியும், சாதனையும் அவரை உயரத்தில் வைக்கும் என்பதை நாம் உணர முடியும்.

    சரி, கிரகங்களை விடுங்கள். வெற்றி பெற உண்மையாக விரும்பும் ஒருவரின் உண்மையான தன்மைகள் இயல்பிலேயே எப்படி இருக்க வேண்டும் என்று பார்ப்போமா…?

    17 தன்மைகள் என்று மானுடம் கூறுகிறது. அதை 3 தொகுப்புக்குள் அடக்கிவிட முடியும்.

    1. தாய் தந்தை உதவியின்றி – கல்வியும், ஞானமும் பெற முடியாது. அதற்கு உதவி செய்து, தன்னலம் பாராது உழைத்து வளர்த்த பெற்றோர்களை முதியோர் இல்லத்தின் முற்றத்தில் விடும் மக்கள் மனம் மாற வேண்டும்.

    மிகவும் துதிக்கப்பட வேண்டியவர்கள் தாய் தந்தை.

    1. நமது நண்பர்கள் கூறியபடி, ஒவ்வொரு நாளும் இன்பமும், வெற்றியுமாக அளிக்கும் நாட்களின் மதிப்பை உணர்வது.

    மிக மிக நல்ல நாள் இன்று

    1. நம்பிக்கை துரோகமும், வன்மமும் வாழ்வின் மகிழ்ச்சியை, வளத்தை சூறையாடும் நிலையில் – அந்த வட்டத்தில் நான் இல்லை, எனக்குள் அன்பும், அமைதியுமே குடியிருக்கிறது என்று மன்னிக்கும் மனோபாவத்தை வளர்த்துக்கொள்வது.

    மிகப்பெரிய வெகுமதி – மன்னிப்பு

    1. வல்லவனுக்க – வையகத்தில் உண்டு – என்பது முற்றிலும் உண்மை. ஆணவம் அரசனையும் அழிக்கும் என்பதற்கு துரியோதனயை கொண்டு தெளிவு கொள்வது…

    மிகவும் வேண்டியது பணிவு

    1. பொருளாதார சூழ்நிலையில் ஒருவர் செல்வந்தராகவும், மற்றவர் ஏழையாகவும் இருந்தாலும் தூய்மையான அன்பை அறிந்து வெறுக்காமல், ஏளனம் செய்யாமல் சமமாக பாவித்து பழகும் குணத்தை குசேலர் – கிருஷ்ணர் நட்பிலிருந்து அறிந்து கொள்வது

    மிகவும் வேண்டாததது வெறுப்பு…

    1. பல காலமாக மழையே இல்லாத ஒரு ஊரில் பெரிய மகானின் கருணையால் யாகம் செய்து, பூஜையின் முடிவில் மழை வரும் என்ற அறிவிப்பை கேட்டும் எல்லோரும் வெறுமனே பூஜைக்கு வர ஒரு சிறுவன் மட்டும் கையில் குடையோடு வந்தானே அந்த சிறுவனிடமிருந்து நாம் அறிந்து கொள்வது.

    மிகப்பெரிய தேவை நம்பிக்கை

    1. பணம், புகழ், பதவி எனக்கு வேண்டும் என்பதற்கும் எனக்கே வேண்டும் என்பதற்கும் நிறைய மாறுபாடு இருக்கிறது என்று உணர்தல்.

    மிகக்கொடிய நோய் பேராசை…

    1. தமிழோடு விளையாட வந்ததாக நக்கீரர் சொன்னார். நம்பினோம். ஆனாலும், சக மனிதனும் மனிதனே என்று உணர்தல்

    மிகவும் சுலபமானது குற்றம் கானல் தவிர்ப்போம்

    1. ஆமை புகுந்த இடம் அழிந்துவிடும் என்பார்கள். அது உண்மையான தெரியாது. ஆனால், கல்லாமை, இல்லாமை போன்றே ஒன்றும் உண்டு என்று அறிதல்.

    கீழ்த்தரமான விஷயம் – பொறாமை – அதை தவிர்த்தல்

    1. உண்மை என்ன என்று தெரிந்து கொள்ளவும் விரும்பாமல், காதால் கேட்டதை அப்படியே பரப்பி, ஒளிபரப்பி – பலரையும் குழப்புவது தேவையற்றது என்று அறிதல்.

    நம்பக்கூடாததது – வதந்தி

    1. மழைநேரத்தில் – ஓஸ்ôமல் கூச்சலிடும தவளை, கடைசியில் பாம்பின் பசிக்கு இரையாகி மரணத்தை தழுவுவதிலிருந்து நாம் தெரிந்து கொள்ளுதல்

    ஆபத்தை விளைவிப்பத – அதிக பேச்சு. அதை குறைத்துக் கொள்ளுதல்.

    1. வேற்றுமுகம் பாராமல் பழகுவதே நட்பின் சிறப்பு. அதன் உன்னதமான உயரமே மனதினை பிரதிபலிப்பது. உணர்வுகளை பகிர்வது – என்று நட்பின் தூய்மையை உணர்த்துவது.
    2. அம்பு எய்தும் போட்டியில் கலந்து கொள்ள முடியாமல் தலைகுனிந்து கர்ணன் நின்றபோது, தோல் கொடுத்து ராஜ்ஜியம் கொடுத்து, தன்னம்பிக்கையும் கொடுத்த துரியோதனனிடமிருந்து நாம் தெரிந்து கொள்ளுதல்

    செய்யக்கூடியது உதவி

    1. வேலை செய்யாத ஒரு சோம்பேறிக்கு ஒருவன் பாராட்டுவிழா நடத்த முடிவு செய்து – முறையாக அழைப்பு விடுத்தான். நான்தான் நிகழ்ச்சிக்கு வரவே மாட்டேனே, யாரை பாராட்டுவாய் என்று திருப்பிக்கேட்ட அன்பரிடமிருந்து நாம் அறிந்து கொள்ள வேண்டியது…

    விளக்கப்பட வேண்டியது சோம்பேறித்தனம்…

    1. சரி, தவறு என்று ஏதும் பார்க்காமல், தனது மானத்தை காப்பாற்றியவரின் மீது விசுவாசம் கொண்டு போர்களத்தில், என் உயிர் போன பின்புதான் உன் உயிர்போகும் என்று உனக்காக என் உயிரையும் கொடுப்பேன் என்று சொல்லி, அதை செய்தும் காட்டிய கர்ணனிடமிருந்து நாம் கற்பது..

    மறக்கக் கூடாதாததது நன்றி

    1. படைபலம் என்ன…? இந்த உறவினர்கள் உடன் பிறந்தோர்கள் என்ன…?உலகமே எதிர்த்து வந்தாலும், நீ என்னோடு இருந்தால் அதுவே போதும் என்று பணிந்து, தனக்கு மட்டுமல்ல, இந்த உலகத்துக்கே கீதை தந்த கண்ணன், அர்ச்சுனன் நட்பிலிருந்து நாம் உணர்ந்து கொள்வது.

    பிரியக்கூடாதது நட்பு

    1. தன் பரிசோதனைக்கூடத்தில் அனைத்து பொருட்களும் – தன் கண்டுபிடிப்புகளோடு சேர்த்து தீ விபத்தில் எரிந்த பின்பும், மனம் தளராமல் மீண்டும், மீண்டும் உழைத்து பல அறிய கண்டுபிடிப்புகளை வழங்கிய – Thomas Alwa Edisson – ன் வாழ்விலிருந்து நாம் அறிய வேண்டியது…

    உயர்வுக்கு வழி உழைப்பு

    1. கடுமையான காய்ச்சல் இருந்த போதும் தேர்வு நேரத்தில் தவறாமல் வந்து தன் திறமையை நிரூபித்த அதோடு மட்டுமல்லாமல், பல்வேறு சந்தர்ப்பங்களில் தன் முத்திரையையும், தடத்தையும் பதித்த சாதனை வீரர் (Sachin Tendulkur – டமிருந்து நாம் கற்றுத்தெளிய வேண்டியது.

    நழுவ விடக்கூடாது வாய்ப்பு

    இந்த 18தன்மைகளும் தனது உணர்வாக, இயல்பாக, தன்மையாக வாழ்வின் நெரிக்கும், வெற்றிக்கும் இடப்பட்ட கட்டளைகளாக வாழ்ந்து வந்தால் மனிதன் மனிதனாக வாழ இவை, 18 தன்னம்பிக்ன்ப்ப்ள் அல்ல – 18 நன்மைகள் என்று அறிவோம்.

    அடுத்த மாதம் மகிழ்ச்சியாக வாழ என்னதான்தேவை  என்று விவாதிப்போம்…

    உயிர் உலைக் கூடம்

    ஆகாச துகள்கள் என்பது மிக மிக நுண்ணிய அளவில் சக்தித் துகளாக மட்டுமே இருப்பதாகும். இவைதான் தற்சுழற்சியாலும், திணிவேற்றத்தாலும் காற்றாக தன்மாற்றம் அடைகிறது. இந்தக் காற்றானது மேலும் திணிவுபெற்றுச் சுழன்று அடர் காற்றான நெருப்பாகத் தன்மாற்றம் அடைகிறது. அது போலவே, நெருப்பானது அடர்த்தி பெற்று நீராகவும், நீர் அடர்த்தி பெற்று பருப்பொருளாகவும் (திடப்பொருளாகவும்) தன்மாற்றம் அடைந்து வந்துள்ளது. இப்படி நமது அண்டத்தில் மிகப் பெரிய பருப்பொருளாக உருவெடுத்த பின், அதன் ஊடே ஆகாசம் ஊடுறுவிய போது ஏற்பட்ட பெருவெடிப்பில் (Big Bang) வந்தவைகள்தான் கோடான கோடி விண்மீன் கூட்டங்கள் (Galaxies). இவற்றுள் ஒன்றான நமது பால்வெளியில் (Milky Way) ஒரு புள்ளிபோல் இருப்பதுதான் நம் சூரிய மண்டலம். இந்தச் சூரிய மண்டலத்தில் ஒரு கோளாக இருப்பதுதான் நமது பூமி உருண்டை. ஆக, இந்த பூமியானது (மண்ணானது) பெருவெடிப்பின் ஒரு தூசுதான் என்பது புரிகிறதா? ஆக, நமது பூமியானது ஆகாசத் துகள்களில் இருந்து வந்தது புரிகிறதா?.

    அண்டசராசரத்தில் குண்டூசி முனையளவுகூட இல்லாத பூமிப்பந்தில் வாழ்ந்து அல்லது வாழ முயற்சித்து கொண்டிருக்கும் மண்ணின் மைந்தர்களே! இன்று நாம் பார்க்கப் போவது என்னவென்றால், ஆகாச சக்தியும், திடப்பொருள் (மண்) சக்தியும் எப்படி நமது உடலில் இயக்க சக்தியாக விளங்குகிறது என்பதாகும். நண்பர்களே! நம் தோலானது ஆகாச சக்தியை கிரகித்து மண் சக்தியாக தன்மாற்றம் செய்து நமது மண்ணீரலுக்குச் சக்தியளிக்கிறது. இது புரிய நமக்குத் தெரிந்த அணு குண்டு (Atom Bomb) வெடிப்பு உதாரணத்தை, நாம் பார்ப்போம். மிகவும் திணிவு நிலையில்  இருக்கும் திடப்பொருளான உரேனியம் அல்லது புளுட்டோனியம் குண்டை ஒரு அணுத் துகளவுவே இருக்கும் நியுட்ரானானது, அதி விரைவாகத் தாக்கும் போது அதிபயங்கர வெடிப்பு நிகழ்கிறது. இதனால், அளப்பரிய சக்தி வெளிப்பட்டு அளவிட முடியாத சேதாரத்தை ஏற்படுத்துகிறது. நண்பர்களே! இந்த அணு குண்டு வெடிப்பு (Atomic Fission) போலத்தான் அண்டத்தில் ஏற்பட்ட பெருவெடிப்பும் (Big Bang) ஆகும். அன்பு நண்பர்களே! இதே போன்று பல்லாயிரம் கோடி அணு வெடிப்புகள் ஒவ்வொரு நொடியும் நமது உயிர் உடலில் நிகழ்ந்து கொண்டிருக்கிறது. என்ன அதிர்ச்சி அடைகிறீர்களா? அப்படி நடந்தால் நாம் நொடிப் பொழுதில் இருப்பது தெரியாத அளவுக்கல்லவா ஆகிவிடுவோம்? அப்படி நடக்கவில்லைதானே? அப்படியானால் இது சாத்தியம் இல்லைதானே? நண்பர்களே! இது சாத்தியமே. நமது அணு உலையில் அணு குண்டைப் போல பல்லாயிரம் கோடி அணு வெடிப்புகள் நிகழ்கின்றன. ஆனால், அவைகளிலெல்லாம் கட்டுப்பாடான நிலையில், சேதாரத்தை பூஜ்ஜிய அளவில்  வைத்திருக்கிறார்கள்.

    நண்பர்களே! நமது உடலிலும், உணவெனும் திடப்பொருளில் ஆகாசம் என்னும் அணுவினும் சிறியப் உயிர்ப் பொருள் உட்புகுந்து அணு வெடிப்பிற்கு (Atomic Fission) அல்லது பெரு வெடிப்பிற்கு (Big Bang) இணையான வெடிப்பை நிகழ்த்தி, அளப்பரிய சக்தியை (ATP Molecules) நம் உடலுக்கு அளிக்கிறது. இந்த நிகழ்வுகள் எல்லாம் உயிர் என்ற உடல் எல்லைக் கட்டிக் கொண்ட அமைப்பிற்குள் நடப்பதால், சேதாரம் பூஜ்ஜிய அளவில் இருக்கிறது. நண்பர்களே! நாம் உணவை வாயில் எடுத்து மென்று விழுங்குவதோடு நம் முயற்சி முடிவடைகிறது. பிற்பாடு அது செரித்து இரசமாகி, இரத்தமாகி, சதையாவதெல்லாம் நமது இச்சை (இஷ்ட) செயலில் இல்லை. அது நமது உள்ளே இருக்கும் இறையாற்றல் (உயிராற்றல்) பார்த்துக்கொள்கிறது. நாம் எந்த வித உணவாக இருந்தாலும், அறவை இயந்திரத்தில் போட்டு அறைத்தது போல் கூழாகிவிடுவதை நாம் அவ்வப்போது வாந்தி எடுக்கும் போது கவனித்து இருப்போம். கிட்டதட்ட திடப்பொருளாக இருந்த உணவானது அறைத்த கூழ்போல் ஆனதற்கு, ஆகாச சக்தி வடிவில் செயலாற்றிய நொதிகள்தான் காரணம். ஆக, திடப்பொருள் தூள் தூளாக மாறுவதற்கு ஆகாச சக்தியாக உள்ள உயிர்ச் சக்தி உறுதுணையாக இருக்கிறது. என்ன நாம் உள்ளே அனுப்பும் எரிபொருளானது தரமானதாக இருக்க வேண்டும்.

    வெற்றி மனப்பான்மை கொண்டவர்களுக்கு மூன்று துணைகள்….

    ஒரு மிகப்பெரிய வெற்றி என்பது ஒரு ஒருங்கிணைந்த கூட்டு முயற்சி மட்டுமே கிடைக்கும் என்பதுதான் வெற்றி பெற்றவர்களின் அனுபவ பூர்வ உண்மையாகும்.

    தனிப்பட்ட முயற்சிகளினால் வருகிற வெற்றியை விட, கூட்டு முயற்சிகளினால் பெறுகிற வெற்றி உயர்வானது, நிலையானது, நிரந்தரமானது. இது மற்றவர்கள் பாராட்டுதலுக்கும், அங்கீகாரத்திற்கும் உரித்தானதாகும்.

    நீங்கள் தனிப்பட்ட முயற்சிகளினால் ஒரு சாதனையாளராக, வெற்றி வீரராக வலம் வர முடியும். இருந்தபோதிலும் அந்த முயற்சி வட்டத்திற்குள் உங்களுக்கு இணையாக மற்ற தொழில் நுட்ப வல்லுநர்களையும் இணைத்துக் கொண்டு முயற்சித்தால் அவர்களோடு இணைந்து பெறுகிற வெற்றியானது உன்னதமானதாகவும், வரலாறு படைப்பதாகவும் இருக்கும்.

    உங்களுடைய அனுபவங்களும், திறமைகளும், கூட்டாளிகளினுடைய அனுவங்களும் இணையும்போது அங்கே ஒரு நிறைவான, நிலையான முழுமையான வெற்றி நமக்கு கிடைக்கிறது.

    தனிப்பட்ட வெற்றியாளர்கள் ஒரு வெற்றியை அடைவதற்கு எடுத்துக்கொள்ளக் கூடிய கால அளவு உண்மையாகவே அதிகமாக இருக்கும்.

    தனி முயற்சியினால் வெற்றி பெறும் காலஅளவு வெற்றி கால அளவு, ஒரு ஆண்டு என்றால் அதே இருக்கிற காலங்களை உங்கள் வெற்றி சிந்தனைகளை, செயல்பாடுகளை வேறு ஒரு காரியத்திற்காக பயன்படுத்த முடியும். வெற்றியை தொடும் கால அளவு குவைதால் நேர விரயம் தடுக்கப்படுகிறது. அந்த நேரங்களிலே வேறு பணிகளுக்கு அடிக்கல் நாட்டி பயணத்தை தொடர முடியும். தொடர் வெற்றிகளைப் பெற முடியும்.

    கூட்டு முயற்சி என்று சொல்கிற போது யாரோடு கூட்டு சேர்வது என்ற ஒரு மிகப்பெரிய கேள்வி கண் முன்னே எழும்.

    நம்மைவிட திறமைசாலிகள், நம்மைவிட சிறந்தவர்கள், நம்மைவிட அதிகமாக உழைப்பவர்கள், தொழில் நுட்பத்தில் மேன்மையானவர்கள், அணுகுமுறையிலும், நிர்வாக மேலாண்மையிலும், மக்கள் தொடர்பிலும், பணியாளர்கள் மேலாண்மையிலும் வல்லுநர்களாக இருப்பவர்களோடு கூட்டுச் சேர்ந்தால் நம்மை அவர்கள் வெற்றியின் உச்சத்திற்கு நிச்சயம் அழைத்துச் செல்வார்கள்.

    இந்த வெற்றிக்கு மூன்று துணைகள் நமக்கு உதவியாக அமையும். மேலை நாட்டு அறிஞர்கள் கூற்றுப்படியும், தொழில்நுட்ப அறிஞர்களின் அனுபவப்படியும், அந்த துறையில் தோல்வியுற்று, பாடம் கற்று, மீண்டும் முயற்சித்து வெற்றியை அறிமுகப்படுத்துகின்றன.

    1. நமது உள் உணர்வு

    இதுதான் நமது திறமைகளின் மையப்பகுதி. உங்கள் வளர்ச்சியின் அச்சாணி. உங்கள் மனதை நேர்வழியில் செலுத்துகிற ஒரு மாலுமி. நீங்கள் நினைத்த இடத்திற்கு நேரடியாக கூட்டிச் செல்கிற வழிகாட்டி. உங்களுடைய வாழ்க்கையின் திசைகாட்டி. இதுதான் உங்கள் மனச்சாட்சியின் குரல். பலபேர் இந்த உள்உணர்வை முதன்மையானது என்றும், வெற்றிக்கு முக்கியமான காரணி என்றும் எடுத்துக் கொள்வதில்லை. அவர்கள் உலகத்திற்கு காட்டுவதற்காக வெளி உணர்வுக்கு முக்கியத்துவம் தருபவர்கள். அவர்கள் வெற்றிக்கனியை தொட முடியாது. யாரொருவர் உள் உணர்வின் வழிகாட்டுதலின்படி எது சரி என்று தோன்றுகிறதோ, அதன்படி செயல்படுகிறார்களோ அவர்கள் வெற்றி பெறுகிறார்கள.

    1. உங்கள் கண் முன்னே இருக்கிற தேவதைகள்

    உங்கள் கவனத்தை பல வழிகளில் பல முறை ஈர்த்தவர்கள், உங்களை கவர்ந்தவர்கள், தன் திறமையால் உங்களால் ரசிக்கப்பட்டவர்கள். இவர்கள்தான் உங்கள் கண் முன் இருக்கும் உங்களைக் காக்கும் தேவதைகள். அவர்கள் உங்கள் நண்பர்களும் அல்ல, குடும்ப உறுப்பினர்களும் அல்ல. உங்கள் வட்டத்தைச் சேர்ந்தவர்களும் அல்ல. ஆனால், நேர்மறையாக உங்கள் எண்ணங்களை பாதித்தவர்கள். வெளிவட்டத்தில் அவர்களுடைய அணுகுமுறை, அவர்களுடைய திறமை, அவர்களுடைய உழைப்பு உங்களை ஆச்சரியப்பட வைக்கிறது. அவர்கள் உங்களுக்கு குருவாக, ஆசானாக, அமைச்சராக, ஆலோசகராக, வழிகாட்டியாக, வாழ்வை திசை திருப்பும் மாலுமியாக, நண்பராக, பாதுகாவலராக, நல்ல பயிற்சியாளராக உங்களுக்கு வழிகாட்டும் தெய்வமாக அமைகிறார்கள். அவர்கள்தான் உங்களுக்கு தன்னம்பிக்கையை ஊட்டுகிறார்கள். அவர்களுடைய அனுபவம் உங்களின் பயண நேரத்தை குறைக்கிறது. உங்களுடைய முழுத்திறமையும் வெளிக்கொணர அவர்களின் ஆலோசனை பயன்படுகிறது.

    ஒரு கிரிக்கெட் பந்து வீச்சாளனுக்கு உல்ல பயிற்சியாளர் அமைந்து விட்டால் அந்த பந்து வீச்சாளனுடைய முழுத்திறமையும் வெளிக்கொணர முடியும். அது போல அப்படிப்பட்ட திறமையாளர்களை தொழில் நுட்ப வல்லுநர்களை பயிற்சியாளராகவும், துணைவராகவும் ஏற்றுக்கொள்ளுங்கள். உங்களுக்குள் அடங்கியுள்ள முழுத்திறமையும் அவர்கள் வெளிக்கொண்டு வருவார்கள்.

    உங்களுக்கு உதவ உங்கள் கண்முன்னே நிற்கும்போது அவரை ஆலோசகர்களா பெறும் பேறினை நீங்கள் அடைய வேண்டும். அவர்களின் ஆலோசனைகளை விரும்பி வேண்டி கேட்டுப் பெறுங்கள். அவர்களுடைய தாக்கம் உங்கள் வாழ்வை மாற்றியமைக்கட்டும்.

    1. இறையருள்

    எல்லாவற்றையும்விட, நீங்கள் கற்பனை செய்த பார்க் முடியாத அளவு, நீங்கள் உங்களுடைய பிரார்த்தனைகளின் மூலமாகவும், தியானங்களின் மூலமாகவும், உங்களுடைய இறைசக்தியை மேம்படுத்தி இறையருள் துணையையும், வழிகாட்டுதலையும் பெற முடியும். இறைவனிடம் நீங்கள் எது கேட்கிறீர்களோ அது நீங்கள் எதிர்பார்த்ததை விட அதிகமாகவே கிடைக்கும். நினைத்ததற்கு மாளாகவே உங்களுக்கு எல்லாம் நல்லபடியாகவே அமையும். நன்மைகளும் கூடி வரும்.  “அவனின்றி ஓரணுவும் அசையாது”. “அவனை நம்பினோர் கெடுவதில்லை இது நான்கு மறை தீர்ப்பு”. நீங்கள் முழுமையாக இறைவனிடம் சரணடைய வேண்டும். இறையருள் துணை இருந்தால் நடக்காது என்று சொன்னவை எல்லாம் நடக்கும், ஜெயிக்காது என்று சொன்னவை எல்லாம் ஜெயிக்கும், கிடைக்காது என்று சொன்னவை எல்லாம் கிடைக்கும். எல்லா துணைகளை விட இந்த இறையருள் துணை இருந்தால் “தொட்டது எல்லாம் துலங்கும்”, கைபட்டது எல்லாம் விளங்கும், உன்னை அரசு பீடத்தில் அமர வைப்பதும், உன் தலையிலே புகழ் மகுடம் சூட்டுவதும் இறையருள் ஒன்றே. அதற்கு இணையில்லை. ஆதலின் இறைவன் துணையை நாடுங்கள். எல்லா வெற்றிகளையும் அடையுங்கள்.

    இன்றிலிருந்து ஒன்றை மட்டும் விட்டுவிடுங்கள். நான்தான் சாதித்தேன், என்னால்தான் இது நடந்தது, என் உழைப்பின்றி அது வந்ததில்லை, என் முயற்சியும், என் திறமையும் தான் இதற்கு அடித்தளம் என்று பேசும் ஆணவத்தையும், அகங்காரத்தையும் விட்டொழியுங்கள். இந்த வெற்றி கூட்டு முயற்சியினால் வந்தது என்று நினையுங்கள். என்னுடைய உள் உணர்வின் குரல், தொழில் சார்ந்த வல்லுநர்களுடைய உதவி. இறையருளின் துணை இவைகள்தான் வெற்றிக்கு காரணம் என்று நினையுங்கள். இதே பாணியில் கூட்டு முயற்சியால் வெற்றி என்று நினைக்க தொடங்க ஆரம்பித்தால், தொடர் வெற்றிகள் உங்கள் வாழ்க்கையை உச்சத்திற்கு இட்டுச் செல்லும். உங்கள் பெயர் வெற்றியாளர்கள் வரலாற்றில் இடம் பெறும். அப்போது நீங்கள் மற்றவர்களுக்கு குருவாக, ஆலோசகர்களாக வழிகாட்டியாக அமைவீர்கள். பலரின் வாழ்க்கை உங்களால் பயனுள்ளதாக அமையும்….

    குழந்தைகளுக்கு ஏற்படும் வயிற்றுப் போக்கு

    வயிற்றுப்போக்கு தொடர்ச்சியாக ஏற்பட்டால் அது இறப்பை ஏற்படுத்தும் அளவுக்கு மிகப்பெரும் நோயாக  வளரும் நாடுகளில் உள்ளது.

    ஓர் ஆண்டில் 73% இறப்பு குழந்தைகளில் குறிப்பாக 5 வயதுக்கு கீழ் உள்ள குழந்தைகளுக்கு ஏற்படுகிறது. இது நிமோனியா (19%), வயிற்றுப்போக்கு (18%), மலேரியா (8%), பிறந்த குழந்தைகளின் நிமோனியா (10%), குறைமாத பிரசவம் (10%), குழந்தைகளின் மூச்சுத்திணறல் (8%) ஆகியவற்றால் ஏற்படுகிறது. இந்தியக் குழந்தைகளில் சராசரியாக 5 வயதுக்கு குறைவான குழந்தைகளில் 2 -3 சதவீதம் பேருக்கு வயிற்றுப்போக்கு ஓர் ஆண்டில் ஏற்படுகிறது. நகரம் சார்ந்த சேரிகளில் வசிக்கும் குழந்தைகளுக்கு ஓர் ஆண்டில் 6-8 முறை வயிற்றுப்போக்கு ஏற்படுகிறது. உலக அளவில் 5 குழந்தைகளுக்கு ஒரு குழந்தை வீதம் (5:1) வயிற்றுப்போக்கால் இறக்கின்றனர்.

    வயிற்றுப்போக்கு என்பது திரவமான மலம் வெளியேறுதல், மற்றும் 24 மணி நேரத்தில்  மூன்று முறைக்கு மேல் மலம் வெளியேறுதல் ஆகும். இயல்பாக வெளியேறும் எல்லா வகை மலமும் வயிற்றுப்போக்கு அல்ல. தாய்ப்பால் மட்டுமே கொடுக்கப்படும் (பச்சிளங்) குழந்தைகளுக்குத் திரவமாக தான் மலம் வெளியேறும். அவை வயிற்றுப்போக்கு அல்ல.

    மூன்று வகையான முறைகளில் வயிற்றுப்போக்கு என்பது பிரிக்கப்படும். அவை,

    1) கடுமையான வயிற்றுப்போக்கு,

    2) வயிற்றுக் கடுப்பு மற்றும்

    3) தொடர்ச்சியான வயிற்றுப்போக்கு.

    1. கடுமையான வயிற்றுப்போக்கு (Acute diarrohea)

    கடுமையான வயிற்றுப்போக்கு என்பது 14 நாட்களுக்குக்

    குறைவாக நீர்போன்ற மலம் வெளியேறுதல் ஆகும். வாந்தி மற்றும் காய்ச்சல் ஏற்படும். கடுமையான வயிற்றுப்போக்கு காரணமாகச் செரிமானமின்மை ஏற்படுகிறது.

    காரணங்கள்

    கிருமித் தாக்கம்

    • வைரஸ் – ரோட்டா, அடினோ, கால்சி, நார்வாக், எச். ஐ. வி.
    • பாக்டீரியா – விப்ரியோ காலரா, ஈ-கோலை (E-coli), சால்மோனில்லா, சீஜெல்லா, ஸ்டஃபில்லோகாக்கி, ஏரோமோனஸ், ஹரோபில்லா, ஃபிலிசியோமோனஸ்.
    • புரோடோசோவா-ஜியார்டியா, கிரிப்டோ ஸ்போரிடியா மற்றும் இ- ஹிஸ்டோலைடிகா.
    • பூஞ்சை – கான்டிடா (Candida)

    மற்ற காரணங்கள்

    • ஆன்டிபயாடிக் மருந்து உபயோகித்தல்
    • உணவு ஒவ்வாமை, அஜீரணம் மற்றும் உணவு விஷமாதல்.
    • தன்னையறியாமல் மலம் கழித்தல் (Encopresis)
    1. வயிற்றுக்கடுப்பு (Dysentery)

    வயிற்றுக்கடுப்பு என்பது மலத்துடன் இரத்தமும் வெளியேறுதல் ஆகும். வயிற்றுக்கடுப்பின் முக்கியமான விளைவுகளாகப் பசியின்மை, தொடர்ச்சியான எடை குறைவு, பாக்டீரியாவினால் குடலில் பாதிப்பு ஏற்படும்.

    வயிற்றுக்கடுப்பின் காரணங்கள்

    கிருமித் தாக்கம்

    சிஜெல்லா – எஸ். டிசென்ட்டீயா (Shigella dysenteriae)

    எக்சரிஸ்யா கோலை  (E-Coli) – என்டரோஹெமரேஜிக் (Enterohemorrhagic), என்ட்ரரோஇன்வேசிவ் (enteroinvasive)

    காம்பைலோபாக்டர் ஜிஜீனி  (Campylobacter Jejini)

    சால்மோனெல்லா  (Salmonella)

    எர்சினியா என்டரோகோலிடிகா (Yersinia enterocolitica)

    மற்ற காரணங்கள்

    சூடோமெம்பரேனஸ் கோலைடிஸ் (Pseudomembranous colitis)

    உடலின் மற்ற உறுப்புகளில் (காது, நுரையீரல்) நோய்

    ரேடியேசன்  கோலைடிஸ்  (Radiation)

    செக்மென்டல் என்டர்டிஸ் (Segmental enteritis)

    வைரஸ்

    ரோடா வைரஸ் என்பது குழந்தைகளில் கடுமையான வயிற்றுப்போக்கை ஏற்படுத்தும் (மிகவும் முக்கியமான) காரணியாகும். 22-25% குழந்தைகளுக்கு ஏற்படுகிறது. இந்த வைரஸ் குறிப்பாக சிறு குடலைத் தாக்கும். இதன் முடிவாகக் குழந்தைகளுக்குக் கடுமையான நீர் வயிற்றுப்போக்கு ஏற்படும்.

    நோய் தொற்றுதலுக்கு அப்பால், பலவகையான உணவுகளை குடலால் ஏற்றுக்கொள்ள முடியாமல் இந்த வயிற்றுப்போக்கு ஏற்படுகிறது. லாக்டோஸ், குளுகோசுடன், பசும் பாலில் உள்ள புரோட்டின் ஆகியவற்றினால் கடுமையான வயிற்றுப்போக்கு ஏற்பட்டு அது தொடர்ச்சியான வயிற்றுப்போக்காக மாறுகிறது.

    1. தொடர்ச்சியான வயிற்றுப்போக்கு (Persistent Diarrhoea)

    இந்த வகையான வயிற்றுப்போக்கு ஆரம்ப நிலையில் கடுமையானதாக இருக்கும். இது நிலையற்றதாக நீண்ட நாட்களுக்கு இருக்கும். (14 நாட்களுக்கு மேல்)

    சிகிச்சையின் நோக்கம்

    கடுமையான வயிற்றுப்போக்கிற்கான சிகிச்சையின் முக்கிய நோக்கங்களாவன,

    1. உடலில் உள்ள நீர் பற்றாக் குறையைத் தவிர்த்தல் மற்றும்உணவுச்சத்து குறைபாட்டைத் தவிர்த்தல்
    2. நீர் பற்றாக்குறை ஏற்படும் போது அதற்கு சிகிச்சை அளித்தல்.

    புதிதாகக் கண்டறியப்பட்ட உப்பு சர்க்கரை கரைசல் நீர் உடலின் நீர் அளவை அதிகரிக்கும். உப்பு சர்க்கரை கரைசல் நீரில் குறைந்த அளவு குளுக்கோஸ் மற்றும் உப்பு உள்ளது. இது உடலில் நீர் அளவு குறைவதைத் தடுக்கிறது. புதிய ஓ.ஆர்.எஸ் பழைய ஒன்றை விட பயனளிக்கக் கூடியது என்று அறிவியல் ரீதியாக உறுதி செய்யப்பட்டுள்ளது மற்றும் தற்பொழுது அது  உலக சுகாதார மையம் மற்றும் யுனிசெப் நிறுவனத்தால் ஏற்றுக் கொள்ளப்பட்டது

    நீர் பற்றாக் குறை அறிகுறிகள்

    சுறுசுறுப்பின்மை மற்றும் சுயநினைவின்மை

    நீர் அருந்த முடியாது அல்லது நீர்  அருந்துவதில் கடினம்.

    தோலின் அழுத்தம் (turgor) மிகக் குறைவாக இருக்கும்.

    உடலின் மிதமான நீர் பற்றாக்குறை

    கீழ்க்கண்ட அறிகுறிகள்

    அமைதியின்மை, வெடுவெடுப்பான தன்மை

    வேகமாக அருந்துதல், தாகம் எடுத்தல்

    தோலின் அழுத்தம் குறைவாகும்.

    மாதங்களில் முத்திரை பதிக்கும் சித்திரை மாதம்…

    நித்திரையில் இருந்தாலும் தமிழா…! சித்திரைதானடா உமக்கு தமிழ் புத்தாண்டு என்று சித்திரைத் திருநாளே வருக, எங்கள் சிந்தையில் மகிழ்ச்சிகள் பெருக, நாங்கள் முத்திரை பதித்து வாழ்ந்திட, அனைத்து துறைகளும் உயர்ந்து, அகிலத்தையும் ஈர்த்திட, சீர்பெருகும் மாதம்  சித்திரை மாதம், ஏர்பூட்டும் உழவனின் ஏற்றமிகு நன்னாள், மகிழ்ச்சி பொங்க, மலரட்டும் தமிழ்புத்தாண்டு என்று தமிழ்மணம் கமழ, தரணியெங்கும் நிலைத்து மாதங்களில் முத்திரை பதிக்கும் மாதம் சித்திரை மாதம் என்பார்கள்.

    கோடை வெயில் தகிக்க, கொன்றை மலர் பூத்துக்குலுங்கி வரவேற்க, ஏர்பூட்டும் உழவனின் ஏற்றமிகு நன்னாளாக போற்றப்படும், சித்திரை மாதத்தின் சிறப்பென்ன…? அலசினோம் என்றால், சூரியனின் இயக்கத்தை அடிப்படையாக வைத்தே 12 தமிழ் மாதங்களையும் பகுப்புடன் தொகுத்திருக்கிறார்கள். அதனால்தான், தமிழ் மாதங்கள் சூரியமாதங்கள் என்றும் அழைக்கப்படுகிறது. அவற்றில் சூரியன் மேஷ ராசியில் பிரவேசிக்க, இளவேனிற்காலம் இன்முகத்துடன் எழ, வசந்த காலத்தை வரவேற்கும் மாதமான சித்திரையில் மாம்மரங்களும், வேப்பமரங்களும் பூத்துக்குலுங்கும். தமிழ் மாதங்களில் முதல் மாதமாக வரும் சித்திரை மாதத்தின் பிறப்பையே தமிழ் புத்தாண்டாக கொண்டாடி வருகிறோம்.

    ஒவ்வொரு ஆண்டும் ஏப்ரல் 14-ம் நாள் தமிழகத்தில் தமிழ்புத்தாண்டு, சித்திரைத்திருநாள், சித்திரைக்கனி என்றம் அண்டைய மாநிலமான கேரளாவில் ‘விஷூ’ என்ற பெயர்களிலும் கொண்டாடி மகிழ்கின்றனர். தமிழ் புத்தாண்டையொட்டி மக்கள், இல்லத்தூய்மையுடன் உள்ளத்தூய்மை கொண்டு, தங்கள் இல்லங்களில், மஞ்சள் பூசி மாவிலை தோரணம் கட்டி, புத்தாடை அணிந்து புதுப்பொலிவுடன் இறைவனை வழிபட்டு மகிழ்கின்றனர். ஒற்றுமை நிலைக்க, உறவினர்கள் படைசூழ பல பதார்த்தங்களுடன் உணவருந்தி அதில் வேப்பம்பூவை சேர்த்து உண்பது இப்பண்டிகையின் கூடுதல் சிறப்பாக இன்றைக்கும் நடைமுறையில் இருந்து வருவதை நாம் அறியமுடியும். அதுமட்டுமல்லாமல், தென்மாவட்டங்களில் சித்திரைத்திருநாளை சிறப்பிக்கும் வகையில் ஏர்பூர்டும் தினமாகவும் கொண்டாடி மகிழ்கின்றனர். இவை, கிராமத்திற்கு கிராமம் மாறுபட்டாலும், சித்திரையில் விதைவிதைத்தால் சிறப்பாக விளையும் என்று காலம் நேரம் கணக்கிட்டு, ராசிபலன் பார்த்து, குடும்பத்துடன் புத்தாடை புனைந்து, உழவனின் உற்ற தோழனாம் எருதையும், ஏர் உழும் கருவியான மேழிச்செல்வத்தையும் தொழுது, நம் குடும்பத்தில் ராசியான நபரின் கையால் முதலில் நவதானியங்களை அள்ளி, ஆத்மார்த்தமாக கழனிகளில் விதைத்து, களம் நிறைய வேண்டி களிப்புடன் கொண்டாடி வருகின்றனர். இவை, உழைப்பின் உன்னதத்தை பறைசாற்ற, உற்சாகம் பொங்க, ஊக்கமே ஆக்கமாகும் என்பதை பறைசாற்றி வருகின்றனர்.

    சித்திரைப்பூ பூக்க, சிந்தனைகள் துளிர, தரணியெங்கும் முத்திரை பதித்து, வெற்றிகள் பல குவிய, இன்றைக்கு, விலையாகும் விளைநிலங்கள் விளைந்து வளம் காணட்டும். புதுமைகள் படைத்து, புன்னகை பூத்துக்குலுங்க, வளர்ச்சியும், மகிழ்ச்சியும் நிலைத்து, உற்சாகத்துடன், உன்னத வாழ்வு வாழ அனைவருக்கும் இனிய தமிழ்ப்புத்தாண்டு நல்வாழ்த்துக்கள்….

    வாய்ச்சொல் வீரர்கள்

    சுதந்திரப் போராட்டம் தீவிரமாக நடைபெற்ற காலம்.

    இந்திய விடுதலைக்காக பல்வேறு தளங்களில் இந்திய மக்கள் இயங்கிக் கொண்டிருந்த நேரம். வீரர்களாக, போர்ப்படைத் தளபதிகளாக, ஊருக்கு உதவுபவர்களாக, அகிம்சை வழியில் ஆங்கிலேயரை விரட்டும் தலைவர்களாக, தொண்டர்களாக, பல்வேறு வடிவங்களில் இந்திய மக்கள் செயல்பட்டுக் கொண்டிருந்த வேளை.

    சுறுசுறுப்பாய் இயங்கிக் கொண்டிருந்தவர்கள் மத்தியில், சிலர் ஒய்யாரமாய் ஓய்வெடுத்துக் கொண்டிருந்தார்கள்.

    “ராமன் ஆண்டால் என்ன? ராவணன் ஆண்டால் என்ன?” என்று எண்ணி தங்களுக்குள் இந்த நாட்டைப் பற்றிய எந்தக் கவலையும் இல்லாமல் வாழ்ந்து கொண்டிருந்தார்கள். இந்தவகை மக்களில் பலர் வீண் பெருமை பேசி நின்றார்கள். சிலர் பயந்து ஒதுங்கினார்கள். இன்னும்சிலர், வீண் விவாதத்தில் நேரத்தை செலவிட்டு, தங்கள் பொழுதைப் போக்கினார்கள். இதைக் கவனித்த பாரதியார், இந்த வகை செயல்பாடு கொண்டவர்களை “வாய்ச்சொல் வீரர்கள்” என அழைத்தார். இந்த ‘வாய்ச்சொல் வீரர்கள்’ தன்னம்பிக்கை இல்லாதவர்கள் என்றும், வீணாக பயந்து நடுங்குபவர்கள் என்றும் பாரதியார் வேதனையோடு தம் கவிதை வரிகளில் குறிப்பிட்டார். இதனால்தான் –

    நெஞ்சில் உரமும் இன்றி

    நேர்மைத் திறமும் இன்றி

    வஞ்சனை செய்வாரடி – கிளியே

    வாய்ச்சொல்லில் வீரரடி

    – என்று பாடினார். நாட்டு விடுதலைக்கு துணை நிற்காமல் வீணாகப் பொழுதைக் கழிப்பவர்களைப் பார்த்து வேதனைப்பட்டார் பாரதியார்.

    அன்று – நாட்டு விடுதலைக்குப் பாடுபடாத மக்களில் சிலரைப்போல இன்றும் சிலர், நாட்டின் வளர்ச்சிக்குப் பயன்படாமல் வீணாகப் பொழுதைப் போக்குகிறார்கள். வீண் பேச்சுப் பேசுகிறார்கள். பிறரை வம்புக்கு இழுத்து சண்டைப்போடுகிறார்கள். பாரதி குறிப்பிட்டத்தைப்போல இந்த வகை மக்களையும் “வாய்ச்சொல் வீரர்கள்” என்று அழைக்கலாம்.

    வளவளவென்று பேசுவதும், பயன்படாத சொற்களை நிரப்பி, வார்த்தைகளை வடிவமைத்து, கருத்து இல்லாமல் கண்டபடி பேசுவதும், நல்ல பேச்சுக்கு அழகல்ல. நாம் பேசுகின்ற பேச்சு மற்றவர்களுக்கு மகிழ்ச்சியையும், மனநிறைவையும் தர வேண்டும். சமுதாயத்தின் வளர்ச்சிக்கு உதவ வேண்டும். உறவினர்களின் நல்லுறவைப் பேணுவதற்கு நமது பேச்சு பக்கப்பலமாக இருக்க வேண்டும். ஊர்க்காரர்களை இணைக்கின்ற அன்புப் பாலமாகவும் அது அமைய வேண்டும். அப்போதுதான் ஒருவருடைய பேச்சு அவருடைய வாழ்க்கையின் வெற்றிக்கு துணை நிற்கும்.

    “எப்படியும் பேசலாம்?” என்று மனம்போன போக்கில் பேசுபவர்களை ‘உளறித் திரிபவர்கள்’ என முத்திரை குத்திவிடுவார்கள். யாரிடம் பேச வேண்டும்? எப்போது பேச வேண்டும்? என்ன பேச வேண்டும்? எந்த இடத்தில் பேச வேண்டும்? எவ்வளவு நேரம் பேச வேண்டும்? எப்படியெல்லாம் பேச வேண்டும்? என்ற நுணுக்கத்தைத் தெரிந்தவர்கள் வாழ்க்கையில் சிறந்த நிலையை அடைகிறார்கள்.

    வாய்க்கு வந்தபடி பேசிவிட்டு, “நான் அப்படி நினைத்து சொன்னேன். இப்படி ஆகும் என்று நான் நினைத்துப் பேச வில்லை” என்றுசொல்லி தங்கள் வாதத் திறமையால் பிரச்சினைகளிலிருந்து தப்பித்துக் கொள்பவர்களும் உண்டு. இப்படி சமாளிப்பவர்களை யாரும் நம்பமாட்டார்கள்.

    ஒரு நாட்டில் ‘புகைப் பிடிக்கும்’ பழக்கம் இல்லாத மக்கள் வாழ்ந்து வந்தார்கள். சிகரெட் பிடிக்கும் பழக்கம் அங்கு இல்லாததால் அந்த மக்கள் மகிழ்ச்சியாக இருந்தார்கள். திடீரென ஒருநாள் அங்கு ‘சிகரெட் கம்பெனி’ ஒன்று உருவானது. நன்கு திறமையான ஒருவருக்கு அந்தக் கம்பெனி மேனேஜர் பதவி வழங்கியது.

    வியாபாரத்தைப் பெருக்குவதற்கு அந்த மேனேஜர் புதுமையான வியாபார யுக்தியைக் கடைபிடித்தார். பத்திரிக்கைகளில் பெரிய அளவில் விளம்பரம் செய்தார்.

    “நீங்கள் சிகரெட் பிடித்தால் மூன்று நன்மைகள் கிடைக்கும். 1. உங்கள் வீட்டிற்கு திருடன் வரமாட்டான். 2. உங்களுக்கு முதுமைத் தோன்றாது. 3. உங்களுக்கு பெண் குழந்தைப் பிறக்காது” – என்று தனது கம்பெனியின் விளம்பரத்தில் அந்த மேனேஜர் குறிப்பிட்டிருந்தார்.

    “இந்த விளம்பரம் தவறாகக் கொடுக்கப்பட்டிருக்கிறது. சிகரெட் பிடிப்பவர்களுக்கு ஏராளமான நோய்கள்தான் வருகிறது. தீமைதான் அதிகம் கிடைக்கும். நன்மை கிடைக்கும் என்பது நம்பத் தகுந்தது அல்ல” – என்று ஒருவர் நீதிமன்றத்தில் பொதுநல வழக்குத் தொடர்ந்தார்.

    வழக்கு விசாரணைக்கு வந்தது.

    நீதிமன்றத்திற்கு வந்த மேனேஜரை நீதிபதி விசாரித்தார்.

    “நீங்கள் செய்த விளம்பரம் நம்ப முடியாமல் இருக்கிறது. அறிவியல்பூர்வமாக இது சரியானதாக இல்லை” என்று சொன்னார்.

    மேனேஜர் நீதிபதிக்கு பதில் தந்தார்.

    “சிகரெட் பிடிப்பதால் 3 நன்மைகள் உள்ளது. உங்கள் வீட்டிற்கு திருடன் வரமாட்டான் என்பது முதல் நன்மையாகும். ஒருவர் சிகரெட் பிடிக்க ஆரம்பித்தால் அவருக்கு முதலில் வரும் நோய் ‘இருமல்’ நோயாகும். இரவு முழுவதும் விழித்துக்கொண்டே இருப்பார். இதனால் இவருக்கு தூக்கம் வராது அல்லவா? இவர் இரவு முழுவதும் விழித்திருப்பதால் அவரது வீட்டிற்கு திருடன் இரவு நேரத்தில் வரமாட்டான். எனவேதான் சிகரெட் பிடித்தால் உங்கள் வீட்டிற்கு திருடன் வரமாட்டான் என்று நாங்கள் விளம்பரம் செய்திருந்தோம்.

    சிகரெட் பிடித்தால் உங்களுக்கு முதுமை வராது என்றும் விளம்பரத்தில் குறிப்பிட்டிருந்தோம். அதுவும் உண்மைதான். அதிகமாக சிகரெட் பிடித்தால் முதுமை வருவதற்கு வாய்ப்பே இல்லை. ஏனென்றால் சிகரெட்டை மிக அதிகமாக பிடிப்பவர்கள் இளம்வயதிலேயே இறந்துபோய்விடுவார்கள். இதைத்தான் நாங்கள் சிகரெட் பிடிப்பவர்களுக்கு முதுமை வராது என்று சொன்னோம். இதில் ஒன்றும் தவறில்லையே!

    மூன்றாவதாக, உங்களுக்கு பெண் குழந்தைகள் பிறக்காது” என்ற உண்மையைச் சொன்னோம். சிகரெட் பிடிக்கும்போது சிகரெட்டிலுள்ள நிக்கோடின் நச்சுத்தன்மை கொண்டது. இந்த நச்சுத்தன்மை ஒருவரிடம் மலட்டுத் தன்மையை உருவாக்கிவிடும். சிகரெட் பிடிப்பவர்களுக்கு குழந்தைப்பேறு பாக்கியம் கிடைப்பது கடினம். சிகரெட் பிடிப்பவர்களுக்கு குழந்தைப் பெறுவதே பிரச்சினையாகும்போது, பெண் குழந்தை பிறக்காது என்பது உண்மைதானே?” – என்று தனது விளக்கத்தைச் சொன்னார் மேனேஜர்.

    நீதிபதி அதிர்ந்து போனார்.

    இந்த சம்பவத்தில்வரும் மேனேஜரைப்போலவே, சிலர் நம்மிடம் பொய்யான தகவல்களை உண்மையைப்போல தருகிறார்கள். இதயத்தில் இனிப்பைத் தடவுவது போன்ற உணர்வில் நாம் மயங்கிப் போகிறோம். நம்மை மகிழ்விக்கும் பேச்சு மட்டுமே உண்மை என நாம் நம்புவதால் பலரையும் நாம் எளிதில் நம்பிவிடுகிறோம். சிலவேளைகளில் அவர் பேச்சு உண்மைக்குப் புறம்பானது என்று நாம் உணரும்போது “நான் இப்படித்தானே சொன்னேன். நான் சொன்னது தவறா?” என்று கேள்வி கேட்டு நம்மையே மடக்கும் வாய்ச்சொல் வீரர்களையும் நாம் வாழ்க்கையில் காண்கிறோம்.

    வாழ்க்கையின் வளர்ச்சிக்குப் பயன்படாதவற்றை நாம் நம்பத் தகுந்தபடி பேசுபவர்களிடம் எச்சரிக்கை உணர்வோடு இருப்பது அவசியமாகும். பிறரைக் குறை சொல்வதும், அடுத்தவர்கள்மீது ஆதாரமில்லாமல் அவதூறுகளை அள்ளி வீசுவதும் வாய்ச்சொல் வீரர்களின் கைவந்த கலையாகும். இவர்களை இனம்கண்டு கொள்வதும், அவர்களிடம் கொண்டுள்ள தொடர்பை துண்டிப்பதும் நமது வெற்றிக்கு உறுதுணையாக அமையும் செயல்களாகும்.

    எனவே, வாய்ச்சொல் வீரர்களோடு இணைந்து செயல்படுவதை நிறுத்துவோம், வெற்றிகளைக் குவிக்கப் பழகுவோம்.

    சிகரமே சிம்மாசனம்

    தானங்கள் சிறக்கட்டும் – தலைமுறைகள் வாழ்த்தட்டும்

    மானுடப்பரப்பை அர்த்தப்படுத்தும் பல நிகழ்வுகள் வாழ்க்கையில் நடந்தேறிக் கொண்டேதான் இருக்கிறது. அவற்றில் சில நெஞ்சை நெருடும் சம்பவங்களாக முட்டி மோதிக் கொண்டுதான் இருக்கிறது. தானம் என்பவையே அவை. தானத்தில் சிறந்தது அன்னதானமா? நிதானமா? என்று பட்டிமண்டபம் நாள்தோறும் அனைவர் உள்ளத்திலும் நடந்து கொண்டுதான் இருக்கிறது. ரத்ததானம், கண்தானம், இதயதானம், உடல் உறுப்புதானம் – உடலே தானம் இப்படி பற்ப்பல பூமியை  பூரிப்பில் ஆழ்த்திக்கொண்டுதான் இருக்கிறது. வானம்கூட சிலநேரங்களில் மழைப்பொழிவு இல்லாமல் பொய்த்துப்போகும். ஆனாலும் மேலே கண்ட தானங்களில் உடல் உறுப்புதானம் என்பது பல தலைமுறைகளை வாழ வைக்கும் சாகாத சரித்திரங்கள் வரலாற்றின் வரவு பொக்கிஷங்கள்.

    விபத்துகளில் இறந்தவர்கள் (Brain Dead) மூளை இனி செயல் படவே முடியாத நிலையில் அவர்தம் உறுப்புகளை தாராளமாக தானம் கொடுக்கலாம். இரத்த அழுத்தத்தை ஸ்திரப்படுத்தி வைத்து உடனே அறுவை சிகிச்சை செய்து இதயம், கல்லீரல், சிறுநீரகம், கண்கள் அனைத்தையும் நீக்கி, காத்திருப்பில் உள்ளோருக்கு உடனே பொருத்திவிட வேண்டும். ஆறுமணி நேரத்திற்குமேல் உடல் உறுப்பை பொருத்த தாமதமானால், குறிப்பிட்ட உறுப்பை சில தனிப்பட்ட திரவங்களில் அலம்பி ஸ்டெரிலைஸ் பைகளில் வைத்து கூலரில் வைத்து விடுவார்கள். உடனடியாகப் பயன்படுத்தினால் பலன்தர அதிக வாய்ப்புண்டு. நீண்டநேரம் தாங்காது. ஆறுமணி நேரத்துக்கு மட்டுமே இறந்தவரின் ரத்த அழுத்தத்தை ஸ்திரப்படுத்தி வைக்க முடியும். இது மருத்துவத்தின் மகத்துவமாகவேப்படுகிறது. ‘அரிது அரிது மானிடராய் பிறத்தல் அரிது’ என்ற முண்டாசுக் கவியின் முழக்கம் காதில் தெரிக்கிறது. இவன் பாடுபொருளுக்குள்ளும், மானிடப் பிறப்பின் மர்ம முடிச்சுகள் அவிழ்க்கப்பட்டிருக்கிறது.

    மூளைச்சாவு அடைந்த குடும்பத்தார் சம்மதம் என்று தலைசாய்த்தால் மட்டுமே உறுப்புகள் தானமாக பெறப்படும். தானமாக பெறப்பட்ட இருதயம் ஆறுமணி நேரத்திற்குள்ளும், கல்லீரல் பன்னிரெண்டு மணி நேரத்திற்குள்ளும் நுரையீரல் பத்துமணி நேரத்துக்குள்ளும், சிறுநீரகம் இருபத்தி நான்கு மணி நேரத்துக்குள்ளும், பொருத்தப்பட வேண்டும் – மனப்பொருத்தம் போல் இங்கே மணிப்பொருத்தங்கள் உயிரின் மேல் ஒட்டப்பட்டிருக்கிறது.

    விபத்தில் மூளைச்சாவு அடைந்த 39 வயதை தொட்ட கோவையை அடுத்த வீர கேரளத்தைச் சேர்ந்த பாலசுப்பிரமணியன் விபத்தில் மூளைச்சாவு அடைந்தார். இவரின், உடல் உறுப்பு மூலம் ஐந்து பேருக்கு மறுவாழ்வு கிடைத்தது. இவரின் உடலை பார்த்த குடும்பத்தார் கதறி அழுதாலும் – வரலாற்றின் வடிவத்தில் ஐந்துபேருக்குள்ளும். இவர் மறு அவதாரம் எடுத்தாகவே மருத்துவ உலகம் மார்தட்டிக்கொள்கிறது.

    ஒற்றை மனிதன் தன் இறப்புக்குப் பின்னாலும் ஐந்துபேரை வாழ வைத்த அதிசயத்தை உலகின் பேரதிசயம் என்று சொல்லாமல் வேறு வார்த்தையால் எப்படி விமர்ச்சிக்க முடியும்? இதை அதிசயமாய் அண்ணாந்து பார்த்தாலும். இவரை மருத்துவம் வாழும் – வரலாற்று பெட்டகமாகவே தன் இருப்பு பெட்டியில் நிரப்பி வைத்திருக்கிறது.

    இன்னுமொருவர் – கர்நாடகம் தந்த தேவேந்திரன் விபத்தில் மூளைச்சாவு அடைந்து இருப்பதை மருத்துவ பரிசோதனையில் தெரிய வந்தவுடன் நிமிடங்களை நீட்டிப்பு செய்யாமல் அவர்தம் மனைவி கமலாவும் மகனும் உடல் உறுப்புகளை தானம் செய்ய முன்வந்தனர். இதன்படி கல்லீரல் ஒருவருக்கு, இரு கண்கண் வேறு இருவருக்கும், சிறுநீரகம் ஆளுக்கொருவராக இருவருக்கும் ஆகமொத்தம் ஐந்து பேருக்கு உடல்உறுப்பு தானம் செய்யப்பட்டது. தானம் கொடுத்த பின் மனைவி கமலா “ஐந்து பேரின் உருவில் என் கணவர் என்றும் வாழ்கிறார்” என்று கண்ணீர்க்கோடுகளோடு கதறி இருக்கிறார். வரலாறாகவே வாழ்கிறார்கள் சில தேவேந்திரன்கள். இரண்டு வருடங்கள் 8 மாத குழந்தையும் கூட – இதயத்தை இடமாற்றம் செய்த விந்தை – பெங்களுரில் மூளைச்சாவு அடைந்த குழந்தையின் இதயம் தனி விமானத்தில் சென்னைக்கு வந்து வெற்றிகரமாக ரஷிய குழந்தைக்கு பொருத்தப்பட்ட செய்தி ஒருமைப்பாட்டில் இந்தியா ஓங்கி நிற்கிறது என்பதையே காட்டுகிறது.

    பெங்களுரு கம்ப்யூட்டர் என்ஜினியர் அமீத் உபாத்யாயா மகன் எதார்த் மருத்துவ உலகிற்கு மற்றுமொரு சான்றாக நிற்கிறான் நாடுகளுக்குள் போட்டியும், பொறாமையும், போரும் அடிக்கடி ஏற்பட்டாலும் இங்கே – எதார்த் போன்றோரின் இதயம் இணைப்பு பாலம் போட்டிருக்கிறது. இனி போரில்லா சமாதான பூமியாக இந்தியா சிறக்கட்டும் வல்லரசாய் வலம் வரட்டும்.

    இங்கே ஒரு இலக்கியக் காட்சி எனக்குள் விரிகிறது. அன்று குமணனின் தலைக்கு தம்பியால் விலை பேசப்பட்டது. காட்டிலிருக்கும் குமணணை புலவர் சாத்தனார் பார்க்க வந்தவுடனே, புலவரை பார்த்து குமணன்,

    “அந்தநாள் வந்திலை அருங்கவிப் புலவோய்

    இந்தநாள் வந்துநீ நொந்தெனை அடைந்தாய்

    தலைதனைக் கொண்டுபோய்த் தம்பி கைக்கொடுத்து

    விலைதனைப் பெற்றுன் வறுமைநோய் களையவே!”

    நான் அரசுக் கட்டிலில் கொலுவீற்றிருந்த காலத்தில் புலவர் பெருமானே! அன்று நீவீர் வந்திருந்தால் பொன்னும் மணியும் கொடுத்து பூரிப்பில் ஆழ்த்தி உன்னை வணங்கி வழியனுப்பி வைத்திருப்பேனே! இன்றோ நான் நாடுகடத்தப்பட்ட நிலை போல கானகத்தில் அல்லவா தலைமறைவு வாழ்க்கை வாழ்ந்து வருகிறேன். என் செய்ய! பரவாயில்லை ஒருசெய்தி என் காது மடலுக்குள் கச்சிதமாய் வந்து விழுந்தது. என்தம்பி என் தலையை கொண்டு வருவோருக்கு ஆயிரம் பொற்காசுகள் தருவதாக அறிவித்திருக்கிறான். என்தலையை கொய்து, கொன்று, கொண்டுபோய் புலவர் பெருமானே! என் தலையைக் கொடுத்து உன் வறுமையைப் போக்கிக் கொள்வாயாக! இல்லை என்று சொல்லாத எனக்கு இருக்கு என்று கொடுக்க என் தலை மட்டுமாவது இப்போது இருக்கிறதே என்று பெருமை அடைகிறேன்” என்றான் வாரிக் வார்க்கொடுக்கும் வள்ளல் பிரான் குமணன்.

    இங்கே இருவேறு நிலைகள் – காட்சிப்படலங்களாய் கண்முன்னே விரிகிறது – தலைமுறையை வாழ வைக்கும் உடல் உறுப்பு தானங்கள், தலை கொடுக்க சம்மதித்த வள்ளல்தரும். வாழ்க்கைப் பாடங்களாய் இன்னும் புவிமீது இருப்பதால் தான் பூமி அழகாகவே இன்னும் இருக்கிறது இருக்கட்டும். இதுபோல் உடல் உறுப்பு தானம் கொடுப்போரை சிகர சிம்மாசனத்தில் நிறுத்தி வைப்போம். இதய மாளிகைக்குள் இருத்தி வைப்போம்.

    ஜனநாயகத் திருவிழா – 2016

    தமிழகத்தின் 15-வது சட்டப்பேரவைத் தேர்தல் வரும் மே மாதம் 16ம் தேதி  நடைபெற உள்ளது. ஒவ்வொரு தேர்தலுமே ஒரு ஜனநாயகத் திருவிழாதான். உலகின் மிகப்பெரிய ஜனநாயக நாடு இந்தியா. ஜனநாயத் தேவதையின் மூச்சுக்காற்றுதான் தேர்தல். இந்தியாவில் பஞ்சாயத்து தலைவர் முதல் பிரதமர் வரை தேர்தலில் ஓட்டளிப்பதன் மூலமே தேர்ந்தெடுக்கப்படுகின்றனர். 18 வயது நிரம்பிய ஒவ்வொரு இந்தியருக்கும் ஓட்டளிப்பது தலையாக கடமை. இதனை தவறாமல் நிறைவேற்ற வேண்டும். அப்போதுதான் மக்கள் விரும்பும் உண்மையான மாற்றம் ஏற்படும்.

    ஜனநாயக அமைப்பில் நம் எதிர்கால வாழ்க்கையை வரையறுக்கும் உரிமை நம்மிடம்தான் உள்ளது. நம் கையில் வழங்கப்பட்டுள்ள வாக்குச் சீட்டுதான் நம் வாழ்வை நிர்ணயிக்கும் துருப்புச்சீட்டு. ஒரு கணத்தில் நாம் தவறான முடிவெடுத்து, தவறான மனிதர்களுக்கு வாக்களித்தால் அதன் விளைவாக ஏற்படும் தீயவிளைவுகளை நாம்தான் ஐந்து ஆண்டுகளுக்கு அனுபவிக்க வேண்டி வரும். வரங்களோ, சாபங்களோ ஆண்டவன் அளிப்பது அல்ல. வாக்களிக்கும் முறையின் மூலம் நமக்கு நாமே வழஙக்கிக் கொள்கிறோம்.

    ஓட்டளிப்பது எவ்வளவு அவசியமோ, அந்த அளவிற்கு 18 வயது நிரம்பிய அனைவரும் வாக்காளர் பட்டியலில் தங்கள் பெயரைச் சேர்ப்பது அவசியம். தங்கள் பெயர் வாக்காளர் பட்டியலில்  இடம் பெற்றுள்ளதா…? என்பதை உறுதி செய்து கொள்ள வேண்டும். எந்தவொரு தேர்தலாக இருந்தாலும் சராசரி ஓட்டுப்பதிவு 60 சதவீதத்தை தாண்டுவதில்லை. அதாவது 40 சதவீத மக்களின் விருப்பம் எதுவென்று தெரியாமலேயே ஆட்சியாளர்கள் தேர்ந்தெடுக்கப்படுகிறார்கள். தேர்தல் நடப்பது ஐந்து ஆண்டுகளுக்கு ஒருநாள் மட்டுமே. ஆகவே, அந்த தினத்தில் அனைத்து வேலைகளையும் ஒதுக்கி வைத்துவிட்டு ஓட்டுரிமையை நிறைவேற்ற முன்வரவேண்டும்.

    ஜனநாயகத்தின் முதுகெலும்பாக விளங்குவது இந்தியத் தேர்தல் ஆணையம். இது ஒரு தன்னாட்சி அமைப்பு. 1950ம் ஆண்டு ஜனவரி மாதம் 25ம் தேதி ஏற்படுத்தப்பட்டது. தேர்தல் ஆணையத்தின் 60 ஆண்டு நிறைவை சிறப்பிக்கும் வகையில் 2011ம் ஆண்டு முதல் ஒவ்வொரு ஆண்டும் ஜனவரி 25ம் நாளை வாக்காளர் தினமாக அறிவித்து அதைப்பற்றிய விழிப்புணர்வை ஏற்படுத்தி வருகின்றனர். இத்தினத்தில் ஒரு உறுதிமொழியை எடுத்துக் கொள்ள வேண்டும்.

    வாக்காளர் தின உறுதிமொழி. ஜனநாயகத்தின் மீது இணங்கி நடக்கும் நம்பிக்கையுடைய இந்திய குடிமக்களாகிய நாம், நம் நாட்டின் ஜனநாயக மரபுகளையும், சுதந்திரமான, நியாயமான மற்றும் அமைதியான தேர்தல்களின் மாண்பையும் நிலைநிறுத்துவோம் என்றம், மேலும் ஒவ்வொரு தேர்தலிலும் அச்சமின்றியும், மதம், இனம், சாதி, வகுப்பு, மொழி ஆகியவற்றின் தாக்கங்களுக்க ஆட்படாமலும் அல்லது எந்தவொரு தூண்டுதலும் இன்றி வாக்களிப்போம் என்று உறுதி மொழிகிறோம்.

    இந்தியாவின் ஜனநாயக்பாரம்பரியம் பல நூற்றாண்டு காலப்பழமையும், பெருமையும் உடையது.  ஜனநாயகம் என்பதை குறிக்கும் ‘டிமாக்ரசி’ (Democracy) என்ற ஆங்கிலச் சொல் கிரேக்க மொழியிலிருந்து தோன்றியது. மக்களின் ஆட்சி என்பது இதன் பொருள். ஜனநாயகம் என்ற மக்கள் ஆட்சி.

    தேர்தல் நடவடிக்கைகள்…

    இந்திய வாக்குரிமைச் சட்டப்படி 18 வயது நிறைவடைந்த அனைவரும் சாதி, மதம், சமுதாயம், பாலினம் பிராந்திய வேறுபாடின்றி வாக்குரிமை அளிக்கப்பட்டுள்ளது. எவ்வித அச்சமும் இன்றி விருப்பமுள்ள அனைத்து குடிமக்களும் சுதந்திரமாக வாக்களிக்க இந்தியத் தேர்தல் நடைமுறை உறுதி செய்கிறது. ஒரு சில நாடுகளில் இருப்பதைப் போல அனைவரும் கண்டிப்பாக வாக்களிக்க வேண்டும் என்ற கட்டாயம் இந்தியாவில் இல்லை. இந்திôயவில் வாக்களிப்பது உரிமையே தவிர கடமை அல்ல.

    இந்தியாவின் வாக்காளர்கள் எண்ணிக்கை பல நாடுகளின் ஒட்டுமொத்த மக்கள் தொகையைவிட அதிகம் என்பது குறிப்பிடத்தக்கது. எனினும் தேர்தல்கள் சட்டப்படியே நடைபெறுவதுடன், பெரும்பாலும் அமையாகவே நடைபெறுகின்றன. பல ஆண்டுகளாக கடும் உழைப்பால் உருவாக்கப்பட் நடைமுறைகள் தேர்தல் அனுபவங்கள், தேர்தல் பணியாளர்களுக்க தீவிர பயிற்சி அளித்தல், தேர்தல் ஆணையத்தின் தீவிர கண்காணிப்பு ஆகியவற்றால் தேர்தல்களை அமையாக நடத்துவது சாத்தியமாகிறது.

    நாடாளுமன்ற மக்களவைக்கான தேர்தல் அட்டவணையை இந்திய தேர்தல் ஆணையம் தயாரிக்கிறது. தேர்லில் அதிக எண்ணிக்கையில் வாக்குகள் பதிவாக வசதியாக, அறுவடை  காலம், திருவிழாக்கள், பள்ளி, கல்லூரிகள் தேர்வு, தட்பவெப்ப நிலை, அமைதி நிலைமை உள்ளிட்ட பல்வேறு காரணிகளை கருத்தில் கொண்டே தேர்தல் அட்டவணை தயாரிக்கப்படுகிறது…

    வாக்கு சாவடிகள்…

    வாக்களிப்பதற்காக வாக்காளர்கள் வெகு தொலைவு பயணம் செய்வதையோ அல்லது நீண்ட தூரம் நடந்து செல்வதையோ தவிர்க்கும் வகையில் எவ்வளவு குறைந்த தூரத்தில் அமைக்க முடியுமோ அவ்வளவு குறைந்த தூரத்தில் வாக்குச் சாவடிகளை அமைக்க தேர்தல் ஆணையம்  அக்கறை செலுத்துகிறது.

    ஒவ்வொரு வாக்குச்சாவடியிலும் வாக்காளர்கள் நீண்ட நேரம் காத்திருப்பதைத் தவிர்க்க, ஒவ்வொரு வாக்குச்சாவடிக்கும் சமாளிக்கக் கூடிய அளவுக்க வாக்காளர்கள் ஒதுக்கப்படுகின்றனர். ஒவ்வொரு வாக்குச் சாவடிக்கும் சராசரியாக 1000 முதல் 1200 வரை வாக்காளர்கள் ஒதுக்கப்படுவார்கள்.

    ஒவ்வொரு வாக்குச்சாவடியை அமைக்கவும், அதிகாரிகளும், பொருட்களும் தேவைப்படுவதுடன் அனைத்து வகையான கட்டமைப்பு வசதிகளும் தேவைப்படுகிறது. தேர்தல் நாளன்று ஒவ்வொரு வாக்குச் சாவடிக்கும் ஐந்த அதிகாரிகள் அனுப்பப்படுகிறார்கள். வாக்குச்சீட்டுகள், வாக்குப்பதிவுகள் எந்திரங்கள், அழியாத மை மற்றும் இதர பொருட்களும் ஒவ்வொரு வாக்குச் சாவடிக்கும் அனுப்பப்படுகிறது.

    தேர்தல் சின்னங்கள்

    இந்திய தேர்தலில் குறிப்பிடப்பட வேண்டிய இன்னொரு அம்சம் அரசியல் கட்சிகளும், சுயேட்சை வேட்பாளர்களும் சின்னங்களும் ஒதுக்கப்படும் விதமாகும். தேர்தலில் வேட்பாளர்களுக்க சின்னம் ஒதுக்கப்படுவது நிரந்தமான ஒன்றாகி விட்டது. தொடக்கத்தில் வேட்பாளர்களுக்கு சின்னம் ஒதுக்கப்பட்டதற்குக்  காரணம், கல்வியறிவற்ற மக்களால் வேட்பாளர்களின் பெயரை படிக்க முடியாது என்பதால் மற்றவர்களின் துணையின்றி ரகசியமாக வாக்களிக்க வசதியாகவே சின்னங்கள் ஒதுக்கப்பட்டன. ஆனால், காலப்போக்கில் அரசியல் கட்சிகளுக்கு சின்னங்களே அடையாளமாகி விட்டன. பொதுமக்களைப் பொறுத்தவரை அரசியல் கட்சிகளை அடையாளம் காணவும், வேட்பாளர்களை வேறுபடுத்திக்காட்டவும், தேர்தல் சின்னங்கள்தான் உதவுகின்றன.

    தேர்தல் பிரசாரங்களின்போது பறவைகளும், விலங்குகளும் கொடுமைப்படுத்தப்படுவதைத் தடுக்க அவற்றை தேர்தல் சின்னங்களின் பட்டியலிலிருந்து நீங்குவதென 1991ம் ஆண்டில் தேர்தல் ஆணையம் முடிவு செய்தது. இப்போது சிங்கம், யானை ஆகிய இரு விலங்குகள் மட்டுமே அவற்றை கொடுமைப்படுத்த முடியாது என்பதால் தேர்தல் சின்னங்களாக உள்ளன.

    வாக்காளர்கள் தனியார்துறை, அரசுத்துறை என்று எவ்விதப்பணியில் இருந்தாலும் அவர்கள் வாக்களிக்க வசதியாக ஊதியத்துடன் கூடிய விடுமுறை அளிக்கப்படுகிறது. சில பிரிவினர் மட்டும் தபாலில் வாக்களிக்க அனுமதிக்கப்படுகின்றனர். மற்ற அனைவரும் அவர்களுக்கு ஒதுக்கப்பட்ட வாக்குச் சாவடிகளில்தான் வாக்களிக்க வேண்டும். இராணுவத்தினர் மட்டும் பிரதிநிதிகள் மூலம் வாக்க வகை செய்யப்பட்டிருக்கிறது.

    தேர்தல் கால ஒலிபரப்பு…

    வானொலியும், தொலைக்காட்சியும் சக்தி வாய்ந்த ஊடகங்கள். பொதுத்துறை நிறுவனமான பிரசார்பாரதி நடுநிலையுடன் செயல்பட கடமைப்பட்டுள்ளது. எனவே தேர்தல் காலத்தில் ஒலிப்பரப்பப்படும் நிகழ்ச்சிகள் எதுவும் எந்த ஒரு அரசியல் கட்சிக்கும் சாதகமாக இருந்து விடக்கூடாது என்பதில் மிகுந்த கவனம் செலுத்தப்படும்.

    தேர்தல் தேதி அறிவிக்கப்பட்டவுடன் தேர்தலுக்கான மாதிரி நடத்தை விதிமுறை தொடங்குகிறது. அதன்பிறகு தேர்தல் முடியும்வரை ஒலிப்பபரப்பாகும் நிகழ்ச்சிகளில் அரசியல் சார்புடைய கருத்துக்கள் தவிர்க்கப்படும். அரசியல் கட்சியினரோ, அவர்களோடு ஏதேனும் ஒரு வகையில் தொடர்புடையவர்களோ பங்கேற்கும் நிகழ்ச்சிகள் ஒலிபரப்பபட மாட்டாது.

    வலிமை மிக்க வாக்குறுதியைப்பயன்படுத்த வாக்குச்சாவடிக்குச் செல்வதற்கு முன்பு, நிதானமாகக் கொஞ்சம் சிந்தித்து முடிவெடுக்க வேண்டும். பணத்திற்காகவோ, பரிசுப்பொருளுக்காகவோ, விலைமதிப்பற்ற ஓட்டுக்களை விற்கக் கூடாது. இது நாட்டை விற்பதற்கு சமம். ஐந்து ஆண்டுகால ஆட்சியில் தவறு நிகழ்ந்தால் வாக்கைச் சரியாகப் பயன்படுத்தாத ஒவ்வொருவரும் அதற்குப் பொறுப்பு.

    நம்மில் பலர் வரிசையில் வெகுநேரம் நிற்க வேண்டுமே என்று சலிப்பில் வாக்களிக்க கொடுத்த விடுமுறையை வேறு வேலைக்குப் பயன்படுத்திக் கொள்கிறார்கள். சினிமாவுக்கு டிக்கெட் எடுக்கையில் கூட்டம் இருக்குமே என்று போகாமல் இருப்பதில்லை. ஐந்து வருடங்களைத் தீர்மானிக்கும் ஒரு உன்னதப்பணிக்காக வரிசையில் சற்று நேரம் காத்திருப்பதில் தவறில்லை. பொறுமை இல்லாமல் புறக்கணிப்பவர்களுக்கு இந்த புரிதல் அவசியம்.

    ஓட்டுப்போடாமல் மக்கள் தங்களது வாக்குரிமையை அலட்சியப்படுத்தினால் வெளிநாடுகளில் உள்ளது போல் ஓட்டுப்போடுவதை கட்டாயமாக்கி சட்டம் கொண்டு வரவேண்டி இருக்கும். வாக்களிக்காதவர்களுக்கு சிறை தண்டனை வழங்க வேண்டி வரும். அத்தகையதொரு நிலையை மக்கள் வரவழைத்துக் கொள்ளக்கூடாது.

    நம்முடைய  ஒரு வாக்கால் எல்லாம் மாறிவிடப்போகிறதா…? என்று சிலர் எண்ணக்கூடும். நாம் நினைப்பதையே ஒரு வேட்பாளர் நினைத்தால் நம் வீடு தேடி வருவார்களா…? என்று சிந்திக்க வேண்டும். ஒரு சிறு நெருப்புத் துண்டும் பெரும் நெருப்பாய் மாறி அழிக்கும். பல தொகுதிகளில் வெற்றி வித்தியாசம் மிகக் குறைந்த எண்ணிக்கையில்தான் அமைகிறது.

    இவ்வளவு அழுக்கை அகற்ற ஒரு துளி போதும் என சலவை விளம்பரங்களில் வருவது போல நம் விரலில் வைக்கப்படும் ஒரு துளி மை, சமுகத்தின் அழுக்கை நிச்சயம் சலவை செய்துவிடும். நாம் அதனை சரியாகப் பயன்படுத்தினால். நாட்டுப்பற்றுள்ள ஒவ்வொரு இந்தியக்குடிமகனும் தனது வாக்குரிமையை தவறாமல் முறையாகப்பயன்படுத்த வேண்டும்.

    வெயில் அடித்தால் வியர்வை வழியும். மழை பொழிந்தால் மேனி நனையும் என்று வாக்குச்சாவடிக்குச் செல்லாமல் வீட்டில் இருந்தபடியே தொலைக்காட்சியில் தொலைந்து போனால் நட்டம் நமக்குத்தான். எனவே, வாக்காளர்கள் எதற்கும் கலங்காமல், மயங்காமல், எனது வாக்கு விற்பனைக்கு அல்ல என்பதை பொட்டில் அடித்தாற் போல் புரிய வைத்து, வாக்களிப்பது புனிதமான கடமை என்று தேர்தல் நாளன்று பெருமிதத்தோடு வாக்குச்சாவடி செல்வோம். புதிய அரசியல் மாற்றத்துக்கு அடித்தளம் அமைப்போம்….