Home » Articles » ஞாலம் வரைந்த கவிதை ஓவியம் புத்தகமே!

 
ஞாலம் வரைந்த கவிதை ஓவியம் புத்தகமே!


சொக்கலிங்கம் சிவ
Author:

புத்தகம் என்பது இதயங்களின் காதல் கவிதை. மகிழ்ச்சியை நடவுச் செய்யும் இலக்கிய நாற்றாங்கால். தூரத்தில் இருப்போரையும் அருகே வந்து அரவணைக்கும் இதயக்குளிப்பு.

“”ஒரு மனிதன் எத்தனை புத்தகங்களைப் படித்தான் என்பதை வைத்துத்தான் அவன் வாழ்ந்த நாட்கள் கணக்கிடப்படும் என்பார்” ஹென்றி டேவிட் தோரோ. “”ஒருவன் மரணமடைவதற்கு முன்பு பத்தாயிரம் புத்தகங்களை படித்திருக்க வேண்டும்” என்பது சீன நாட்டின் பழமொழி. பழமொழிக்கு என் தலையின் தாழ்ந்த வணக்கங்கள்.

“புத்தகம் இல்லாத வீடு ஜன்னல் இல்லாத அறைபோன்றது. எந்த வீட்டில் நூலகம் இருக்கிறதோ அந்த வீட்டில் ஆன்மா இருக்கிறது” என்பார் சிந்தனையாளர் “பிளேட்டோ’.

புத்தகம் சில பொழுதை போக்கும்; சில பொழுதை ஆக்கும்

புத்தகம் சில கரைய வைக்கும்; சில உறைய வைக்கும்

புத்தகம் சில எழ வைக்கும்; சில அழ வைக்கும்

புத்தகம் சில பொங்க வைக்கும்; சில தங்க வைக்கும்

புத்தகம் சில வாழ்க்கையைச் சொல்லும்; சில வாழ்ந்திடச் சொல்லும் என்று தற்போது நான் எழுதிய சில வரிகளை ஈரங்காயாமல் இறக்கி வைக்கிறேன்.

புத்தகத்தோடு பொழுது நடத்திய வாசிப்போடு வாழ்க்கை நடத்திய தன் புத்தக அறைக்கு ‘மனநல மருத்துவ நிலையம்’ என்று பெயர் சூட்டினான் “பாரோ’ என்ற எகிப்து நாட்டு இலக்கிய அரசன்.

“தோழனே

இது புத்தகமல்ல

இதைத் தொடுபவன்

என்னையே தொடுகிறான்

நீயும் நானும் நெருக்கமாகிறோம்.

இதோ…

இதன் பக்கங்களிலிருந்து

உன் கரங்களுக்குத் தாவுகிறேன்” என்று அமெரிக்க கவிஞன் வால்ட் விட்மன் “புல்லின் இதழ்கள்’ கவிதையில் தன் இதழ் பதித்து எழுதியிருப்பான். “”தினமும் எவரும் படிக்காததை படியுங்கள். யாரும் சிந்திக்காதவற்றைச் சிந்தியுங்கள். எப்பொழுதும் ஒருமித்த கருத்தின் அங்கமாக இருப்பது என்பது மனதிற்கு கெடுதல்” என்பார் கிறிஸ்டோபர் மோர்லே.

புத்தகத்தில் எழுதப்படுவை வெறும் கிறுக்கல்கள் அல்ல; அவை உலக வரலாற்றையே புரட்டிப்போட்டிருக்கிறது. மானுட தர்மத்தின் மகிமைகளைப் புத்தகங்கள் சில புரிய வைத்திருக்கிறது. விஞ்ஞானத்தின் விந்தைகளை விவரித்திருக்கிறது. காகிதத்தில் சில கவிதைகளை இறக்கி வைத்து இதயங்களின் இணைப்புப் பாலம் நடத்தியிருக்கிறது. மர்மம் நிறைந்த சில முடிச்சுக்களை அவிழ்த்திருக்கிறது. வாழ்க்கை வாசிப்பிற்கும் நேசிப்பிற்கும் உரியவை என்பதை புரிய வைத்திருக்கிறது.

புத்தகத்தில் இருப்பவை தாள்கள் அல்ல; அவை இதயம். இது காகிதமல்ல; காகித விருட்சம். இது ஆர்ட்டீசியன் ஊற்று அல்ல; இதய ஊற்று. காலம் வரைந்த கவிதை ஓவியம். கற்பனைக்கும் எட்டாத ஞாலப்பை. எழுத்து யாகம்; எழுத்து வேள்வி; எழுத்து ஒரு தவம்! மக்களுக்கான எழுத்துதான் புனிதமாகும். மக்களுக்காக பேசும்போதுதான் அது இதயமாகும். எங்கே கலையழகோடு எழுத்துத்தேர் புறப்படுகிறதோ அங்கேதான் மானுடம் தழைக்கிறது; புதிய பூபாளத்திற்கான கதவு திறக்கப்படுகிறது. புதிய விடியல் பிறக்கிறது. என்னைப் பொறுத்தவரை எழுத்தை நான் எழுத்தாகப் பார்க்கவில்லை; காதலி தரும் முதல் முத்தமாகவே நினைத்து கரைந்து உருகிறேன்.

இந்த இதழை மேலும் படிக்க


Share
 

No comments

Be the first one to leave a comment.

Post a Comment


 

 


December 2015

முயன்றேன் வென்றேன்
என் பள்ளி
ஒவ்வொருவரிடமும் ஒவ்வொன்று
அவன் தான் மனிதன்
சாதனையைச் சிந்தி… சோதனையைச் சந்தி…
ஆஸ்துமா
2016 புத்தாண்டை வரவேற்போம்
முடியாததை முடித்துக்காட்டு! வெற்றிக்கு நீயே எடுத்துக்காட்டு!!
வாய்ப்புகளை உணருவோம்!
நட்பின் நெருக்கத்தை பேணி காப்பது எப்படி? நட்பின் நெருக்கத்தை அதிகப்படுத்துவது எப்படி?
சனி வரமா? சாபமா?
ஞாலம் வரைந்த கவிதை ஓவியம் புத்தகமே!
பூச்சரம்
தன்னம்பிக்கை மேடை
உள்ளத்தோடு உள்ளம்