Home » Articles » குணம் நாடி… குற்றம் நாடி…

 
குணம் நாடி… குற்றம் நாடி…


ராமசாமி R.K
Author:

தேரான் பிறனைத் தெளிந்தான்  வழிமுறை

தீரா  இடும்பை  தரும்.

ஒருவனைப் பற்றி  அவனது குணங்கள் மற்றும் குறைகளைப் பற்றியும் முழுமையாக, தெளிவாக ஆராயாமல் அவனை நமக்குத் துணையாக வைத்துக் கொண்டால்,

நமக்கு மட்டுமின்றி நம் வழிமுறையில் வருபவர்களுக்கும்  அது தீராத துன்பத்தை  உண்டாக்கும்.

தோற்க  யாரையும்  தேராது  தேர்ந்தபின்

தேறுக தேறும் பொருள்

ஒருவனுடைய குணங்களையும், குறைகளையும் தெளிவாகவும், முழுமையாகவும், ஆராயாமல் யாரையும் நம்புதல் வேண்டாம். அவ்வாறு ஆராய்ந்து தெளிந்து நம்பி, நம் துணைக்கு வைத்துக் கொண்ட பின்பு அவர் சொல்லும் அறிவுரைகளை நல்லவை என்று நம்புதல் வேண்டும்.

உங்களது குணங்கள் தான் உங்கள் வெற்றியை நிர்ணயிக்கிறது. உங்களது எதிர்காலத்தை நீங்களே உருவாக்க முடியும். ஏற்கனவே நடந்து முடிந்ததை குறித்து வருத்தம் அவசியம் இல்லை. எல்லையற்ற எதிர்காலம் உங்கள் முன்னால் விரிந்து பரந்திருக்கிறது. உங்களுடைய ஒவ்வொரு சொல்லும், செயலும், சிந்தனையும் அதற்கு ஏற்றபலனைத் தரும் என்பதை எப்போதும் நீங்கள் நினைவில் வைக்க வேண்டும்.உங்களது தீய எண்ணங்களும், செயல்களும் புலிகளைப் போல உங்கள் மீது பாய்வதற்குத் தயாராக இருக்கின்றன. அதைப்போலவே உங்களது நல்ல எண்ணங்களும், செயல்களும் ஒரு நூறாயிரம் தேவைகளின் ஆற்றலுடன் உங்களை எப்போதும் நிரந்தரமாக பாதுகாப்பதற்குத் தயாராக இருக்கின்றன என்ற உயர்ந்த நம்பிக்கை இருக்கிறது.இதை நீங்கள் எப்போதும் நினைவில் வைத்துக்கொள்ள வேண்டும் என்கிறார் சுவாமி விவேகானந்தர்.

விதை நல்லதாய் இருந்தால் பலன் நல்லதாய் இருக்கும். விதைக் கெட்டதாய் இருந்தால் பலனும் கெட்டதாய் இருக்கும். அதுபோல நல்வினை நற்பலன்களையும், தீவினை தீய பலன்களையும் தருகிறது. தகுந்த காலத்தில் பயிரிட்டால்தான் விதை தகுந்த பலனைத் தரும். அதுபோலவே தகுந்த முயற்சியும், தன்னம்பிக்கையும் இருந்தால்தான் உங்களுடைய நல்வினையும் பலனைத்தரும்.

முயற்சியை பூமி என்றும் உங்களுடைய வினையை விதை என்றும் சொல்லாம். நிலமும், விதையும் சேர்ந்து பயிர் உண்டாவதைப்போல முயற்சியும் உங்களுடைய வினையும் சேர்ந்தால்தான் பலன் கிடைக்கிறது. முயற்சி செய்யாதவனுக்கு அதிர்ஷ்டத்தினால் எதுவுமே கிடைக்காது. முயற்சிக்கு உரிய பலன் அவசியம் உண்டு. இல்லையெனில் தெய்வத்தை நம்பி காரியத்தில் ஈடுபடாமல் மக்கள் இருந்து விடுவார்கள். முயற்சி உள்ளவனுக்கு தெய்வமும் முன் வந்து உதவுகின்றது. எண்ணெய் இல்லாது போனால், விளக்கு அணைந்து விடுவது போல் முயற்சி இல்லாதவனுக்கு தெய்வமும் உதவாமல் இருந்து விடுகிறது… முயற்சி இல்லாதவனால் தெய்வம் கொடுத்ததை எப்படி அனுபவிக்க முடியும்…? செலவு செய்து கொண்டே இருப்பினும் முயற்சி உள்ளவனுக்கு செல்வம் பெருகிக்கொண்டே இருக்கும். நல்ல குணங்களும், விடாமுயற்சியும் தன்னம்பிக்கையும் உள்ள மனிதன்  செல்வத்தையும் அடைவான். சொர்க்கத்தையும் அடைவான் என்று மகாபாரத்தில் பீஷ்மர் சொல்கிறார்.

உங்களது வெற்றிக்கு உதவி செய்ய, உங்கள் கீழ் பணிபுரிய நல்ல குணங்கள் கொண்ட, திறமையான அலுவலர்களை தேர்வு செய்வது என்பது ஒரு தனிக்கலை…

ஆராய்ந்து தெளிந்து தேர்வு செய்தால் தான் உங்களுக்கு நல்ல அலுவலர்கள் கிடைப்பார்கள். அறிவார்ந்த செயல்களில் ஈடுபட அவனுடைய அறிவு உங்களுக்கு உதவும். அந்த உதவியும், உங்களது முயற்சியும் வெற்றிப்பாதைக்கு இட்டுச் செல்லும். உங்கள் அலுவலர்களை தேர்வு செய்வதில் ஏமாந்து போனால், உங்களது அனைத்து முயற்சிகளும் செயல் திறனும் வீணாகிப்போகும்.

ஒரு தொழிலில் அல்லது நிறுவனத்தில் அல்லது எத்துறையை சார்ந்ததாக இருந்தாலும், உங்களுக்கு உதவ நல்ல அலுவலர்களைத் தேர்வு செய்து, பணிக்கு அமர்த்திக் கொள்வது என்பது உங்கள் முன்னேற்றத்தில் பெரும் பங்கு வகிக்கிறது. தேர்வு செய்யும் முறையைப்பற்றி ஈராயிரம் ஆண்டுகளுக்கு முன்பாக வள்ளூவர் ஒரு வழிமுறையை வகுத்து தந்துள்ளார்.

“குணம்நாடிக் குற்றமும் நாடி அவற்றுள்

மிகைநாடி மிக்க கொளல்” – என்றகுறள் உன்னதமானது, ஓராயிரம் பொற்காசுகளின் மதிப்பைவிட, ஓராயிரம் முறை உயர்ந்த மதிப்புடையது.

ஒருவனைத் தேர்வு செய்யும் போது அவனது நல்ல குணங்களைப் பட்டியல் இடு. அவனது குற்றம் குறைகளையும், தனியாக பட்டியல் இடு. இந்தாண்டில் எது மிகுதி என்பதை தெரிந்து நல்ல குணங்கள் மிகுதியாக இருந்தால், அவரை தேர்வு செய்து கொள்ள வேண்டும். அவரிடம் குறைகள் மிகுதியாக இருந்தால் அவரை தேர்வு செய்வதை தவிர்க்கலாம் என்று வள்ளூவர் வரையறுத்துக் கூறுகிறார்.

இதை இப்படியும் சொல்லலாம். ஒருவனது பலம் என்ன என்பதையும் பட்டியல் இடுவோம். பலவீனம் என்ன என்பதையும் பட்டியல் இடுவோம். இரண்டையும் ஒப்பிட்டு பார்க்கும் போது, பலம் அதிகமாக இருந்தால் தேர்வு செய்து கொள்ளலாம். பலவீனம் அதிகமாக இருந்தால் தவிர்த்து விடலாம். இந்தக் குறள் தரும் பாடம் பணியாளையோ, துணையாளையோ தேர்வு செய்வதற்கு மட்டுமின்றி தொழில்துறை, நிர்வாகவியல் துறை, வணிகவியல்துறை, மனிதவள மேம்பாட்டுத்துறை போன்ற எல்லாத்துறைகளுக்கும் எல்லாத் தொழில்களுக்கும் இந்த குறளை ஒப்பிட்டுத் தேர்வு செய்யலாம்.

ஒரு தொழில் தொடங்குவதாக இருந்தால் பலம் என்ன…? பலவீனம் என்ன…? என்று பட்டியலிடு, அது பலம் என்றால் தொடங்கலாம். பலவீனம் என்றால் விட்டுவிடலாம். இந்தக் குறளினுடைய கருத்தை உங்கள் வாழ்வின் எல்லா இயல்களுக்கும் பொருத்திப் பார்க்க முடியும்.

கற்பது, கேட்பது, பணிசெய்வது, நண்பர்களைத் தேர்ந்தெடுப்பது, பணியாளர்களைத் தேர்ந்தெடுப்பது, தொழில் தொடங்குவது, வியாபாரம் தொடங்குவது, ஒரு காரியத்தை செய்வது, ஒரு முயற்சியில் ஈடுபவடுவது, ஒரு புதிய முயற்சியில் ஈடுபடுவது, ஒரு சொத்தை வாங்குவது அல்லது விற்பது, ஒரு புதிய முயற்சியில் ஈடுபடுவது, முதலீடு செய்வது, குடும்ப நிர்வாகம், பொது நிர்வாகம், உங்கள் கீழ் பணிபுரியும் அதிகாரிகளையோ, அலுவலர்களையோ பங்குதாரர்களையோ தேர்வு செய்வதில் இந்த குறளின் கோட்பாடு மிகப்பெரிய வழிகாட்டியாக அமையும்…

முத்தாய்ப்பாக உங்கள் வாழ்வியலுக்கு எது தேவை என்று எங்கெல்லாம் தேடல் தொடங்குகிறதோ, அங்கெல்லாம் இந்த குறளின் ஒப்பீடு உங்களின் செயல் திறனையும் வாழ்வியலையும் மேம்படுத்தும்…

ஏறத்தாழ இரண்டாயிரம் ஆண்டுகளுக்கு முன்பாக சொல்லப்பட்ட இந்த குறளினுடைய கோட்பாட்டுடன், தற்போது நாம் நடைமுறையில் பின்பற்றி வரும் நிர்வாகவியலின் தாரக மந்திரம் என்று சொல்லப்படுகிற கோட்பாட்டுடன் ஒப்பிட்டுப் பார்த்தால் SWOT ஆனந்தமும், ஆச்சரியமும் ஏற்படும்…

SWOT கோட்பாடு என்பது ஆல்பர்ட் ஹாம்ரே என்ற அமெரிக்காவைச் சேர்ந்த வணிக மற்றும் நிர்வாகவியல் நிபுணரால் 1960-1970களில் கண்டுபிடிக்கப்பட்டது…

       S  –   Strength – பலம்  குணம்

      W – Weakness    – பலவீனம்  குறைகள்

      O – Opportunity   – வாய்ப்புகள்

      T  – Threats       – பயமுறுத்தல்கள்

– என விளக்கம் தரப்பட்டுள்ளது.

இந்தக்கோட்பாடு தற்போது உலகம் முழுவதும் நிர்வாகவியல், வணிகவியல் மாணவர்களுக்கு ஒரு சூத்திரமாக சொல்லப்படுகிறது.  இந்த நரஞப கோட்பாட்டை எல்லாத்துறைகளிலும் பயன்படுத்த வேண்டும், பின்பற்றவேண்டும் என்ற நியதி கூட பேசப்படுகிறது. இந்த கோட்பாட்டைப் பின்பற்றினால் தான் தொழில்துறை, வணிகத்துறை சிறந்து விளங்கும் என்பதும் சுட்டிக்காட்டப்படுகிறது.

ஒரு தொழிலைத் தொடங்கும் போது தொழிலிலோ அல்லது வணிகத்திலோ பலம் என்ன…? பலவீனம் என்ன…? எதிர்காலத்தில் என்ன வாய்ப்புகள் அதனால் உண்டு…? இதற்கு என்ன வகையான பயமுறுத்தல்கள் அல்லது அச்சுறுத்தல்கள் வரும் என தீவிரமாக தெளிந்து பின்பு உங்கள் தொழிலைத் தொடங்கலாம் என்று சொல்லித்தரப்படுகிறது…

இந்தக் கோட்பாடு ஈராயிரம் ஆண்டுகளுக்க முன்பு வள்ளுவர் சொல்லித்தந்த குணம்நாடி, குற்றம் நாடி என்றகோட்பாட்டுடன் நூற்றுக்கு நூறு பொருந்துகிறது…

Strength – என்றால் பலம் அல்லது குணம் என்றும் Weakness – என்றால் பலவீனம்  அல்லது குறைகள் என்றும் வைத்துக் கொண்டு பார்த்தால்  குறளின் முழுக்கருத்தும் இந்த கோட்பாட்டுன் ஒத்துப்போகிறது. அந்தக் குறளைப் பின்பற்றிதான், இந்தக் கோட்பாடு எழுதப்பட்டுள்ளதோ என்று ஐயம் தோன்றுகிறது. இந்த ஒப்பீடு நிர்வாகவியல், மேலாண்மையியல், வணிகவியல், மனிதவள மேம்பாட்டுவியல் போன்றத்துறைகளில் வள்ளுவப்பெருந்தகைக்கு இருந்த ஞானம் ஒப்பு உயர்வற்றதாக உள்ளது…

வருந்தத்தக்க  செயல் என்னவென்றால் வள்ளூவர் சொன்னதை மறந்து விட்டோம். மேலைநாட்டு அறிஞர் சொன்னதை தலையில் வைத்துக் கொண்டாடுகிறோம். வள்ளூவர் சொல்லியிருந்தாலும் சரி, மேலைநாட்டு அறிஞர் சொல்லியிருந்தாலும் சரி, நாம் ஒன்றைபுரிந்து கொள்ள வேண்டும். குணம் என்னும் பலத்தையும், குறைகள் என்னும் பலவீனத்தையும் ஆராய்ந்து தெளிந்து நமது முயற்சியை தன்னம்பிக்கையோடு தொடங்கினால் வெற்றி என்ற லட்சியத்தை அடைய முடியும்…

ஒரு சொட்டு நீர்

பூமிக்கோ அது அலட்சியம்

புல்லுக்கோ அது லட்சியம்

வாழ்க்கை அவரவர் சம்பந்தப்பட்டது…


Share
 

No comments

Be the first one to leave a comment.

Post a Comment


 

 


August 2015

என் பள்ளி
மனித வாசத்திற்கு அஞ்சும் பாம்புகள்
காலக் கணித மாமேதை
இரவா பகலா?
எழுந்து நட! சிகரம் தொட!
விடுதலை நெருப்பில் பூத்த தியாக தீபங்கள்
தாய்ப்பாலின் மகத்துவம்
வெற்றி உங்கள் கையில் 20 நேரம் இல்லையே…!
தானியங்கள் உதிராமல் இருக்க காரணமானதும் இரையை தேடி அலைந்த மனிதனை விவசாயம் செய்ய வழிவகுத்ததுமான ஜீன் (Gene) கண்டுபிடிப்பு
குணம் நாடி… குற்றம் நாடி…
தூண்டில்
இடைவெளியை பூஜ்யமாக்கும்
தன்னம்பிக்கை மேடை
உள்ளத்தோடு உள்ளம்