Home » Articles » தகவல்கள் இங்கே! முடிவுகள் எங்கே?

 
தகவல்கள் இங்கே! முடிவுகள் எங்கே?


கவிநேசன் நெல்லை
Author:

பள்ளி – கல்லூரிகளில் படிக்கும்போதே இந்த வெற்றியின் வாசலைத் தேடும் முயற்சியில் இளைஞர்கள் ஈடுபடுவது நல்லது.

பள்ளியில் பயிலும்போதே இளைய உள்ளங்கள் தங்களின் வாழ்க்கையின் குறிக்கோளை (Career goal) தீர்மானித்துக் கொள்ள வேண்டும். அதாவது, டாக்டராக வேண்டுமா? தொழிலதிபராக வேண்டுமா? வழக்கறிஞராக வேண்டுமா? என்ஜினியராக வேண்டுமா? ஆசிரியராக வேண்டுமா? அல்லது வேறு ஏதேனும் ஒரு தொழில் அல்லது வேலை செய்ய வேண்டுமா? என்பதை இளம்வயதிலேயே முடிவுசெய்துகொள்ள வேண்டும். ஏனென்றால், ஏதேனும் ஒரு தொழில் அல்லது வேலை செய்து கிடைக்கும் வருமானத்தில் வாழ்வதுதான் சிறந்த வாழ்க்கையாக அமைகிறது. தான் செய்கின்ற தொழில் அல்லது வேலையை ஒருவர் அடிக்கடி மாற்றிக்கொண்டிருந்தால் வாழ்க்கையின் பொன்னான நேரங்கள் வீணாகிவிடும். எனவே இந்தக் குழப்பத்திற்குத் தீர்வுகாண விரும்புபவர்கள் இளமையிலேயே தங்கள் வாழ்க்கையின் குறிக்கோளை தீர்மானித்துக்கொள்ள வேண்டும்.

பஸ் பயணத்தில், “எந்த ஊருக்குச் செல்ல வேண்டும்?” என்பதை முதலில் முடிவு செய்தால்தான், “எந்த பஸ்ஸில் செல்ல வேண்டும்?” என்பதைப்பற்றி முடிவு எடுக்க முடியும். இதைப்போலவே, வாழ்க்கையில் “என்ன ஆக வேண்டும்?” என்பதை இளைஞர்கள் முதலிலேயே முடிவு செய்தால்தான் மேற்படிப்பில் என்ன பாடம் எடுத்துப் படிக்க வேண்டும்? எங்கு படிக்க வேண்டும்? என்றமுடிவுகளை எடுக்க இயலும்.

மேற்படிப்புக்கு ஆலோசனைகள் கேட்க வரும் பல மாணவ – மாணவிகள் என்னிடம் முதலில் கேட்கும் கேள்வி இதுதான்.

“சார்…. நான் பிளஸ் 2 தேர்வில் 1000க்குமேல் மார்க் வாங்கியிருக்கிறேன். நான் மேற்படிப்பாக எந்தப் படிப்பைத் தேர்ந்தெடுத்துப் படிக்கலாம்?”.

இதைப்போலவே பெற்றோர்கள் கேட்கும் கேள்விகளும் இப்படித்தான் இருக்கிறது.

“சார்… என் பிள்ளை நன்றாகப் படிக்கிறாள். பிளஸ் 2 தேர்வில் 900 மார்க்குக்குமேல் வாங்குவாள். இவளை எந்தக் கல்லூரியில் சேர்க்கலாம்? என்ன பாடம் எடுத்துப் படிக்க வைக்கலாம்?” – என்னும் கேள்விகளைக் கேட்பதற்கு பெரும்பாலான பெற்றோர்கள் தவறுவதில்லை.

அன்று தகவல்கள் (Information) கிடைக்காமல் பலர் தவித்தார்கள். ‘வாழும் வாழ்க்கைக்கு ஒரே வழிகாட்டி ஆசிரியர்தான்’ என்றும் நம்பினார்கள். இதனால் சரியான தகவல்களை மாணவ – மாணவிகளுக்கு வழங்கி அவர்களுக்குத் தேவையான முடிவுகள் எடுத்தவர்கள் ‘குரு’ என்று அழைக்கப்பட்ட ஆசிரியர்கள்தான். ஏனென்றால் “தகவல்கள் தெரிந்தவர்கள்”, “விவரம் புரிந்தவர்கள்”, “உலக ஞானம் தெரிந்தவர்கள்” என ஆசிரியர்களை மாணவ – மாணவிகள்  நம்பினார்கள். ஆசிரியர்கள் தகவல்களை மட்டும் சேகரித்து வைக்காமல் மாணவ – மாணவிகளின் வாழ்க்கைக்குத் தேவையான முடிவுகளையும் எடுத்து அந்த முடிவுகளை நடைமுறைப்படுத்தவும் உதவினார்கள்.

இன்று கல்வி முறையில் பல்வேறு மாற்றங்கள் ஏற்பட்டுவிட்டது. ஆசிரியரை மட்டுமே நம்பியிருந்த கல்விமுறைஇன்று தொழில்நுட்பத்தை நம்ப ஆரம்பித்துவிட்டது. பேஸ்புக் , டுவிட்டர் , வாட்ஸ்அப்   என புதிய தொழில்நுட்ப வசதிகளை இளைஞர்கள் பயன்படுத்த ஆரம்பித்துவிட்டார்கள்.

ஆயிரக்கணக்கான தகவல்கள் நாள்தோறும் இளைஞர்களைத் தேடி வர ஆரம்பித்துவிட்டன. தொலைக்காட்சி, கம்ப்யூட்டர், இண்டர்நெட், செல்போன், காமிரா, வீடியோ கேம், யு டியூப் என பல வழிகளில் தகவல்கள் இளைய உள்ளங்கள் விரும்பினாலும் விரும்பாவிட்டாலும் அவர்களிடம் வந்து சேர்ந்துவிடுகின்றன.

தகவல்கள் இப்போது தாராளமாய், ஏராளமாய் இலவசமாய் கிடைக்கிறது.

இந்தத் தகவல்கள் மன உறுதியையும், நல்ல நம்பிக்கையையும் அவர்களுக்கு வழங்குகிறது. ஆனால் சிறந்த முடிவுகள் எடுக்கும் திறமையை இந்த தகவல்கள் மட்டும் வழங்குவதில்லை. போதிய அனுபவமும்,  முடிவெடுக்கும் திறமையும் தெளிவான சிந்தனையும்  கொண்ட ஆசிரியர்களால் சிறந்த முடிவுகளை எடுக்க இயலும்.

இப்போது இந்தத் திறமைகள் பெரும்பாலான மாணவ – மாணவிகளிடம் இல்லாத நிலையில் காணப்படுவதால் அவர்களால் தங்கள் வாழ்க்கைக்குத் தேவையான சிறந்த முடிவுகளை எடுக்க முடியாமல் போய்விடுகிறது.

முன்பு மாணவ – மாணவிகளுக்காக முடிவு எடுத்தவர்கள்  ஆசிரியர்கள் மற்றும் பெற்றோர்கள். ஆனால் இன்று மாணவ – மாணவிகளே தங்கள் வாழ்க்கைக்குத் தேவையான முடிவுகளை அவர்களே எடுத்துக் கொள்கிறார்கள்.

‘முடிவு எடுத்தல்” என்பது ஒரு தனிக்கலையாகும். வாழ்க்கையில் எடுக்கும் முடிவுகள்தான் ஒருவருடைய வளர்ச்சிக்கும், வீழ்ச்சிக்கும் அடிப்படையாக அமைகிறது. வாழ்க்கை முடிவுகளை தீர்மானிப்பதற்குமுன்பு முடிவெடுப்பதற்குத் தேவையான தகவல்களைச் சேகரித்துக்கொண்டு அந்தத் தகவல்கள் சரியானவைதானா என்பதை உறுதி செய்து நமது வாழ்க்கையின் குறிக்கோளோடு இணைத்து முடிவுகளை மேற்கொள்ள வேண்டும்.

“டீன் ஏஜ்” எனப்படும் வளர் இளம்பருவத்தில் வாழ்வில் முன்னேற்றத்திற்குத் தேவையான தகவல்களில் மட்டுமே கவனம் செலுத்தப் பழகிக்கொள்ள வேண்டும். அவ்வாறு செயல்பட இயலாத சிலர் தொழில்நுட்ப உதவியோடு தேவையற்ற தகவல்களையும் சேகரித்து வைக்கிறார்கள். இதனால் வாழ்க்கை முழுவதும் சேதம் அடைந்துவிடும் என்பதை இந்த இளைய உள்ளங்கள் புரிந்துகொள்ள வேண்டும்.

வாழ்க்கையில் வெற்றி பெறுவதற்குத் தேவையான தகவல்களை அதிக அளவில் சேகரித்து நல்ல முடிவுகளை எடுப்பதற்கான பயிற்சியினை முறையாக மேற்கொள்வது அவசியமாகும். குறிப்பாக – பள்ளிகளில் படிக்கும் மாணவர்கள் தங்களது எதிர்காலத்தை எப்படி அமைத்துக்கொள்ள வேண்டும்? என்னும் முடிவை பள்ளியில் படிக்கும்போதே தீர்மானித்துக்கொள்ள வேண்டும்.

அது ஒரு நகரத்தின் சாலை.

அந்த சாலை ஓரத்தில் அமைக்கப்பட்டுள்ள இருக்கையில் மாலை வேளைகளில் ஒருவர் வழக்கமாக தனது நாயோடு வந்து உட்கார்ந்திருப்பார். இதனை நாள்தோறும் கவனித்த இன்னொருவர் “சார்…. நீங்கள் தினந்தோறும் உங்கள் நாயோடு வந்து இங்கு உட்கார்ந்து கொள்கிறீர்கள். ஆனால், உங்கள் நாய் இந்த ரோட்டில் செல்கின்றவாகனங்களைப் பார்த்ததும் சத்தம் போடுகிறது. கார், மோட்டார் சைக்கிள் இவைகள் செல்லும்போது அதிகமாக சத்தம் போட்டபடியே வேகமாக அந்த வாகனங்களின் பின்னால் ஓடுகிறது. பிறகு உங்களிடமே வந்து உட்கார்ந்துகொள்கிறது. அந்த வாகனங்களை முந்திச் செல்லமுடியாது என்பதை தெரிந்தபின்பும் உங்கள் நாய் ஓடி, ஓடி சத்தம்போடுகிறதே! இது உங்களுக்கு இடையூறாக இல்லையா?” என்று கேட்டார்.

நாயின் உரிமையாளர் மெதுவாகச் சிரித்தார்.

“இந்த நாயினுடைய செயல்களைப்பற்றி நான் கவலைப்படுவதில்லை. ஏனென்றால் அந்த நாயால் எந்த வாகனத்தையும் ஓடிச்சென்று முந்த முடியாது என்பது எனக்குத் தெரியும். அதனால் பிரச்சனையில்லை. ஆனால், இந்த நாய் யாரையாவது கடித்துவிட்டால் பிரச்சனை உருவாகிவிடும். அதன்பின்புதான் நான் இந்த நாயைப்பற்றி கவலைப்பட வேண்டும்” என்றார் அவர்.

இந்த நாயின் செயலைப்போலத்தான் பலர் தனது வாழ்க்கையில் அர்த்தமற்ற குறிக்கோளை வைத்துக்கொண்டு அங்கும் இங்கும் அலைகிறார்கள். இதனால்தான் கிராமத்தில் “நாய்க்கு வேலையும் இல்லை, உட்கார நேரமும் இல்லை” என்று பழிமொழியாக இதனைக் குறிப்பிடுவார்கள்.

அர்த்தமற்ற குறிக்கோள்களை தங்கள் வாழ்க்கையில் வைத்துக்கொண்டவர்கள் தேவையில்லாமல் அங்கும், இங்கும் அலைய வேண்டிய சூழல் ஏற்படும். இவர்கள் நல்ல தகவல்களைத் தேடி அலைந்து திரிந்தாலும் அவர்களுக்கு நல்ல தகவல்கள் கிடைப்பதில்லை. செல்போன், இண்டர்நெட், டி.வி., என நவீன தொழில்நுட்பங்களைப் பயன்படுத்தினாலும் இவர்களுக்கு சிறந்த தகவல்கள் கிடைப்பதில்லை. இவர்களது ‘நோக்கம்’ எனப்படும் ‘குறிக்கோள்’ சரியாக இல்லாததால்தான் இவர்களுக்கு சரியான தகவல்கள் கிடைப்பதில்லை. சரியான தகவல்கள் கிடைக்காதபோது எடுக்கும் முடிவுகள் அனைத்தும் தவறான முடிவுகளாக மாறிவிடும். எனவேதான் வாழ்க்கையின் குறிக்கோள்கள் மற்றும் சேகரிக்கும் தகவல்கள் ஆகியவற்றை சிறந்ததாக வைத்துக்கொள்ள வேண்டும். இவை, இரண்டும் தெளிவாக இருந்தால் நல்ல முடிவுகள் தானாக உருவாகும்.

நல்ல தகவல்கள் நல்ல முடிவுகளை எடுக்க அடிப்படையான ஒன்றாக அமைகிறது. ஆனால், வெறும் தகவல்கள் மட்டுமே வாழ்க்கை முடிவுகளை எடுப்பதற்கு உதவாது. பெற்றோர்களுடைய ஆலோசனையும், பெரியவர்களுடைய வழிகாட்டலும், ஆசிரியர்களின் அறிவுரையும், நல்ல நண்பர்களின் துணையும், சிறந்த புத்தகங்களின் கருத்துக்களும் நல்ல முடிவுகளை எடுப்பதற்கு பக்கபலமாக அமையும்.

பள்ளியில் படிக்கும்போதே என்ன படிக்க வேண்டும்? எங்கு படிக்க வேண்டும்? என்ன வேலையில் சேர வேண்டும்? என்ன தொழிலில் ஈடுபட வேண்டும்? என்பதைத் தெளிவாக தெரிந்துகொண்டு தேவையான தகவல்களை முறைப்படி சேகரித்துக்கொண்டால் வாழ்க்கையில் நல்ல முடிவுகளை எடுக்க இயலும். இதன்மூலம் இளம் பருவத்து முடிவுகள் வாழ்க்கைப் பயணத்தின், வெற்றிகரமான முடிவுகளாக நிச்சயம் மாறும்.

இந்த இதழை மேலும்

 

No comments

Be the first one to leave a comment.

Post a Comment


 

 


November 2014

என் பள்ளி
நலமாக வாழ நயமான நல்பத்துக் கூற்றுகள்
தயாராகுதல்
கரிம உணவுகள் (ஆர்கானிக் உணவுகள்)
அகல் விளக்கு ஏற்றுவோம்
தகவல் பரிமாற்றம்
நீங்கள் நீங்களாகவே இருங்கள்
சர்க்கரை நோயைக் கட்டுப்படுத்துவதில் கேழ்வரகின் பங்கு…
விரக்தி வீழ்த்துகிறது விடா முயற்சி வெல்கிறது
உலகையே ஒரு குலுக்கு குலுக்கியது
வெற்றி வேண்டுமா? – 2
தொழில் திறனை வளர்ப்பது எப்படி?
சிரிப்பு
அச்சம் என்பது மடமையடா…
தகவல்கள் இங்கே! முடிவுகள் எங்கே?
அடுத்தவர் நலனில் அக்கறை அகில உலகமே உச்சரிக்கும் பெயரை!
தன்னம்பிக்கை மேடை
உள்ளதோடு உள்ளம்