November 2013 - Page 2 of 3 - தன்னம்பிக்கை

Home » 2013 » November (Page 2)

 
  • Categories


  • Archives


    Follow us on

    “நேர நிர்வாகம் – நிதர்சனமான வழிமுறைகள்”

    ஈரோடுதன்னம்பிக்கைவாசகர்வட்டம்வழங்கும்
    சுயமுன்னேற்றப் பயிலரங்கம்

    நாள்                :    24.11.2013; ஞாயிற்றுக்கிழமை

    நேரம்                :    மாலை6.00 மணி முதல்8.00 மணி வரை

    இடம்                :     மாயாபஜார்A/Cஹால்,
    Opp. E.B. அலுவலகம் எதிரில்,
    E.V.N. ரோடு,
    ஈரோடு.

    தலைப்பு            :    “நேர நிர்வாகம் – நிதர்சனமான வழிமுறைகள்”

    சிறப்புப்பயிற்சியாளர்        :     திரு. சண்முகசுந்தரம்
    JCIமண்டலபயிற்சியாளர்
    போன்: 94879 27963

    தொடர்புக்கு

    தலைவர்Jc. A. குப்புசாமி – 98432 69931
    செயலாளர்Jc.நூர்முகம்மது- 99945 00575
    பொருளாளர் Jc. S.சையது ஜைனலாபுதீன் – 99942 29080

    அனுமதி இலவசம்!!!

    “வாசிக்க! சுவாசிக்க! எளிதாக, மிக வேகமாகபடிக்க அரிய பயிற்சி!”

    திருச்செங்கோடுதன்னம்பிக்கைவாசகர்வட்டம்மற்றும்JCI திருச்செங்கோடுடெம்பிள்
    இணைந்துவழங்கும்சுயமுன்னேற்ற பயிலரங்கம்

    நாள்                :    17.11.2013; ஞாயிற்றுக்கிழமை

    நேரம்                :     மாலை6.00 மணிமுதல் 8.30 மணி வரை

    இடம்                :    ஹோட்டல் சித்தார்த்தாகான்பிரன்ஸ்ஹால்
    ஜோதி தியேட்டர்அருகில்
    திருச்செங்கோடு

    தலைப்பு            :    “வாசிக்க! சுவாசிக்க! எளிதாக, மிக வேகமாகபடிக்க அரிய பயிற்சி!”

    சிறப்புப்பயிற்சியாளர்        :    Jc. HCF. ரமேஷ், K.V.
    மனிதவளமேம்பாட்டுபயிற்சியாளர்
    கரூர்
    போன்: 94431 22569

    தொடர்புகளுக்கு:
    தலைவர்: JCI. Sen. G.கோவிந்தசாமி – 98427 96868
    செயலாளர்: Jc. A. திருநாவுக்கரசு- 99429 66554
    ஒருங்கிணைப்பாளர்: Jc. Dr. S.சரவணகுமார்- 94423 83833

    அனுமதி இலவசம்!!!

    “மூச்சுக்காற்றாகட்டும்முன்னேற்றம்”

    கோவைதன்னம்பிக்கைவாசகர்வட்டம்மற்றும்பி.என். புதூர், அறிவுத்திருக்கோயில்
    இணைந்துவழங்கும்சுயமுன்னேற்றப்பயிலரங்கம்

    நாள்                :    17.11.2013; ஞாயிற்றுக்கிழமை

    நேரம்                :     காலை 10.00 மணி

    இடம்                :    அறிவுத்திருக்கோயில்
    ஆனந்தாநகர், முல்லைநகர்பஸ்ஸ்டாப்
    மருதமலைரோடு, பி.என். புதூர்
    கோயம்புத்தூர்- 41

    தலைப்பு            :    “மூச்சுக்காற்றாகட்டும்முன்னேற்றம்”

    சிறப்புப்பயிற்சியாளர்        :    அருள்நிதி Jc.S.M.பன்னீர்செல்வம்
    சுயமுன்னேற்றப் பயிற்சியாளர்
    கோவை
    போன்: 97893 75278

    தொடர்புக்கு:
    தலைவர் திரு. A.G. மாரிமுத்துராஜ்- 9842259335
    செயலாளர் திரு. A. சரவணகுமரன்- 9092092080
    பொருளாளர் திரு. ஆனந்தன்- 74026 10108

    அனுமதி இலவசம்!
    குடும்பத்துடன்வருக!!

    உள்ளத்தோடு உள்ளம்

    நரகாசுரன் சம்ஹாரம் செய்யப்பட்ட அந்த நாளைத்தான்‘தீபாவளி’என்று கொண்டாடுகிறோம்.
    பெரும்தவம், பேராற்றல் எனப் பன்முகத் திறமைகள் இருந்தாலும் அரக்க குணம் ஒருவருக்குள் மேலோங்கிக் கொண்டே சென்றால் அவருக்கு அழிவு நிச்சயம் என்பதை ஒவ்வொருவரும் உணர்ந்து தங்களது செயல்பாட்டை உயர்வாக்கிக் கொள்ள வேண்டும் என்பதைத்தான் தீபாவளி நமக்குஉணர்த்துகிறது.
    ஒவ்வொரு பண்டிகையும் நாம் செல்ல வேண்டிய பாதைகளை நமக்கு அவ்வப்போது  நினைவூட்டிக் கொண்டே இருக்கிறது என்பதை எண்ணிப்பார்க்கிறோமா?  என்றால்இல்லை என்றுதான் தோன்றுகிறது.
    பண்டிகை தினங்களில் புத்தாடை அணிந்து, விருந்து உண்டு மகிழ்ந்து, தொலைக்காட்சி பெட்டி முன் அமர்ந்து பொழுதைக் கழிக்கக் கூடியவர்களாகவே மாறியிருக்கிறோம்.
    பிறரின் மகிழ்ச்சிக்கு  என்ன செய்தோம்…தன்னை விட்டு எந்தக் கூடா பழக்கத்தை விரட்டியடித்தோம் ? எண்ணிக் கூடப் பார்ப்பதில்லை.
    நம்மிடம் உள்ள அகங்காரம், பொறாமை, தலைக்கனம் போன்ற இருட்டை விலக்கி அன்பு, பாசம், நேசம், கருணை என்ற வெளிச்சத்தைக் கொண்டு வரும் நாட்களாக பண்டிகை  தினங்களை மாற்றும் மாற்றம் இனிவர  வேண்டும் என்பதே நம் விருப்பம்.
    அனைவருக்கும் “தீபாவளி திருநாள் நல்வாழ்த்துக்கள்!”

    “விருந்தோம்பல்”

    “மோப்பக்குழையும் அனிச்சம் முகம்திரிந்து
    நோக்கக்குழையும்விருந்து”– என்பது வள்ளுவர் வாக்கு

      எத்தகைய எதிர்பார்ப்போ கைம்மாறோ கருதாமல் வீட்டுக்கு வருகிற புதியவர்களைக் கனிவாக விருந்தினராக ஏற்றுக்கொள்வதே விருந்தோம்பல் என்பார்கள். நம் இல்லங்களுக்கு விருந்தினர்கள் வரும்போது அவர்களை வரவேற்கும் விதமும், உபசரிக்கும் முறையும் உன்னத நிலையில் இருக்க வேண்டும்.

    முகமலர்ச்சியோடு நன்முறையில் விருந்தினரைப் பேணுகிறவன் வீட்டில் உள மகிழ்ச்சியோடு, திருமகள் தங்கியிருப்பாள் என்கிறது வள்ளுவம். பிறருக்கு உணவளிக்கும் போது அன்புடன் முகம் மலர்ந்து மகிழ்ச்சியுடன் அளிக்க வேண்டும். அவ்வாறு இல்லாமல் கோபத்துடன் உணவு பரிமாறினால் அது நமக்கும் உணவு உண்பவருக்கும் மிகுந்த தீமையை அளிக்கும். தாயும் கூட தான் பெற்ற குழந்தைக்குப் பால் கொடுக்கும் போது அமைதியான மனத்துடன் கொடுத்தால் தான் குழந்தைக்கு ஆரோக்கியம் கூடும். அவ்வாறு இல்லாவிடில் குழந்தையின் நலத்துக்குப் பாதிப்பு அதிகமாகும்.

    ஒப்புடன்முகமலர்ந்துஉபசரித்துஉண்மைபேசி
    உப்பில்லாகூழிட்டாலும்உண்பதுஅமிர்தமாமே!
    முப்பழம்பாலொடு அன்னம்முகம்கடுத்திடுவாராகில்
    கப்பியபசியினோடுகடும்பசிஆகும்தானே! – என்பது ஆன்றோர் வாக்கு

    உபசரிப்பவர்கள் சிரித்த முகத்துடன், மகிழ்ச்சியுடன் உள்ள நிறைவோடு அன்புடன் படைக்கும் உணவு உப்பில்லாது இருந்தாலும் தேவலோக அமிர்தத்திற்கு இணையாகும் .அவ்வாறு முக மலர்ச்சியின்றி அன்பில்லாமல் கடுகடு என்ற முகத்தோடும், கோபத்தோடும், வேண்டா வெறுப்போடும், முப்பழங்களோடு பாலும் கலந்து உணவு படைத்தாலும்  அது பயன்தராது.

    சைவ நாயன்மார்களில் தலைசிறந்த உழவாரத்தொண்டு புரிந்தவர் திருநாவுக்கரசு சுவாமிகள்.தன் உழவாரப் பணிக்காக திங்களூர் செல்கிறார்.திங்களூரில் திருநாவுக்கரசு சுவாமிகளின் மேல் அளவு கடந்த பக்தியும்,அன்பும் கொண்டவரான சிவனடியார் அப்பூதியடிகள்,திருநாவுக்கரசு சுவாமிகளை வரவேற்று உபசரித்து தன் வீட்டில் விருந்துண்ண வேண்டும் என்று வேண்டுகிறார்.

    திருநாவுக்கரசு சுவாமிகளும் தன் மீது அப்பூதியடிகள் வைத்துள்ள அளவற்ற பக்தியையும், அன்பையும் கண்டு விருந்துக்கு வருவதாக ஒப்புக்கொள்கிறார். அப்பூதியடிகளும் அவர்தம் அன்புமனைவியும் அளவு கடந்த மகிழ்ச்சியடைந்தனர். அவர் துணைவியார் விருந்து தயாரித்து முடித்து தன் மூத்தமகனை அழைத்து விருந்தினர்களுக்கு வாழையிலை அறுத்துவருமாறு பணித்து அனுப்புகிறார். வாழையிலை அறுக்கச் சென்ற அப்பூதியடிகளாரின் மூத்தமகனை வாழைமரத்தில் இருந்த நாகம் தீண்ட அவன் இறந்து போகிறான்.

    விருந்தினரை உபசரிக்கும் நேரம்,மகனோ!  பாம்பு தீண்டி இறந்துவிட்டான். துக்கத்துடனும் சோகத்துடனும் தன்மகன் இறந்ததை மறைத்துவிட்டு திருநாவுக்கரசு சுவாமிகள் அவர்களுக்கு, அப்பூதியடிகளும், அவர் துணைவியாரும் உணவு பரிமாறுகிறார்கள். இதை அறியாத திருநாவுக்கரசு சுவாமிகள் தங்கள் மகன் எங்கே?  எனக்கேட்டு மகன் வந்து தன்னோடு அமர்ந்து உணவு உண்ணவேண்டும்  என  வற்புறுத்துகிறார்.

    உபசரித்துக்கொண்டு இருந்த சிவனடியார் செய்வதறியாது திகைத்து உண்மையைச் சொல்லி விம்மி அழுது மன்னிப்பு கோருகிறார்.எங்கள் மகன் இறந்துவிட்டான் என்ற செய்திகேட்டால் தாங்கள் உணவு உண்ண மாட்டீர்கள் என்றுதான் உண்மையை மறைத்துவிட்டோம் என்று அழுது வேண்டுகிறார்கள்.திருநாவுக்கரசு சுவாமிகள் அந்த இறந்த இளம் பாலகனைக் கோயிலுக்குத்தூக்கிச் சென்று சிவபெருமான் முன்கிடத்தி பதிகம்பாடி உயிர் பிழைக்கவைக்கிறார்.

    மகன் இறந்த நிலையிலும் கூட அதை மறைத்துவிட்டு விருந்தோம்பிய சிவனடியார் அப்பூதியடிகளும், அவர் தம் துணைவியாரின் பண்புகளும் இன்றும் சிறப்புடன் பேசப்படுகிறது; நாளையும் பேசப்படும்.

    கனிவு, சலுகை, தியாகம், அறச்செயல், இன்முகம், அன்புநலம், நேசம், பாசம் ஒரு இனம்புரியாத பிரியம் ஆகிய பண்பு நலன்களால் அலங்கரிக்கப்படுவதே விருந்தோம்பல். உண்மையான அன்புநிறைந்த உறவும், கலங்கமில்லாத  அகநக நட்பும் கலந்த கலவையே விருந்தோம்பல்.

    பச்சைமயில்கள் நடனமிடும் பசுஞ்சோலைகள் கண்களுக்கு விருந்தாகும், குயில்களின் இசையும், கிளிகளின் மொழிகளும் செவிகளுக்கு விருந்தாகும், மரம், செடி கொடிகளிலிருந்து வெளிவரும் மலர்களின் நறுமணம் நாசிக்கு விருந்தாகும். தென்றலின் தீண்டுதல் உடலுக்கும், மனத்துக்கும் விருந்தாகும், இதுபோன்ற இயற்கை திருவிளையாடல் ஒவ்வொன்றும் நமக்குவிருந்து படைத்து உள்ளத்தை வளப்படுத்தி உடலை நலமுறச் செய்துவிருந்தோம்பல் பண்பைகளை மனிதனுள் விதைக்கின்றது.

    செல்விருந்து ஓம்பிவரும் விருந்து பார்த்திருந்து விருந்தோம்பவேண்டும். முகர்ந்தால் வாடிவிடும் அனிச்ச மலர்போல-விருந்தினர் முகம்வாடாமல் விருந்தோம்ப வேண்டும். ஏனெனில் நாள்தோறும் தன்னை நாடிவரும் விருந்தினர்களைப் போற்றுபவரின் இல்வாழ்க்கையில் என்றுமே துன்பம் வருவதில்லை.

    ஆதலின் புனிதமான புதிய உறவு விருந்தோம்பல் என்பதற்கு இரண்டாவது கருத்துக்கு இடமில்லை. விருந்தினர்களை இன்முகத்தோடு வரவேற்போம். அவர்கள் முகம் கோணாமல் விருந்தோம்பி மகிழ்வோம். விருந்தோம்பல் மனித நேயத்தின் முதல்படி என்பதை உணர்ந்து மகிழ்வோம்.

    இந்த மாத இதழை EBook வடிவத்தில் படிக்க – Click

    தன்னம்பிக்கை மேடை

    செ.சைலேந்திர  பாபு IPS பதில்கள்

    எனது தந்தை அருப்புக்கோட்டை தாலுக்காவில் பரளச்சி கிராமத்தில் உள்ள காவல் நிலையத்தில் பணி செய்து 2001ம் ஆண்டு ஓய்வுபெற்று இறந்துவிட்டார். எனது தந்தை பணியாற்றிய காவல் துறையில் சேர்வதற்காக ஆசைப்படுகிறேன். அதற்காக இப்போது தமிழ்நாடு சிறப்பு காவல் இளைஞர் படை தேர்விற்கு முயற்சித்து வருகிறேன். எனவே தாங்கள் எனக்கு அத்தேர்வுக்குத் தயார் ஆவதற்கான புத்தகங்களையும், வழிமுறைகளையும், அறிவுரைகளையும் தருமாறு அன்புடன் வேண்டுகிறேன்.

    பா. ஜெயசூர்யா
    மேலையூர் (அஞ்சல்)
    அருப்புக்கோட்டை, விருதுநகர்
    80983 85596

    பதில்:

    தந்தையார் பணிசெய்த காவல்துறை மீது நீங்கள் கொண்டுள்ள நம்பிக்கையும், மரியாதையும் மேலும் அதே தமிழ்நாடு காவல்துறையில் சேர வேண்டும் என்கிற ஆர்வத்தையும் அறிந்து பெருமைப்படுகிறேன்.

    இன்றைய நிலையில் காவல்துறையில் இளைஞர் படை சிறப்பு காவலராக (Youth Brigate) சேர்வதில் போட்டி கடுமையாகவே இருக்கும். பல ஆயிரம் இளைஞர்கள் இந்தத் தேர்வில் சேர முயற்சி செய்வார்கள். இத்தேர்வில் போட்டியிட்டு வெற்றிபெறும் நபர்களுக்கு மட்டுமே பதவி கிடைக்க வாய்ப்பு உண்டு. அதற்கு நீங்களும், தன்னம்பிக்கை வாசகர்களும் கவனிக்க வேண்டியது…

    எழுத்துத் தேர்வு: விடைகளைத் தெரிவு செய்து எழுதும் வகையிலானது கொள்குறி வகைத் தேர்வு. நேரம் 1 மணி 40 நிமிடங்கள், வினாத்தாள் தமிழில் இருக்கும். மொத்த மதிப்பெண்கள் 100, எழுத்துத் தேர்வில் குறைந்தபட்சம் 35 மதிப்பெண்கள் பெற வேண்டும். பாடத்திட்டம் பத்தாம் வகுப்பு வரையிலான தமிழ், ஆங்கிலம், கணிதம், பொது அறிவியல், இந்திய வரலாறு, புவியியல், பொருளாதாரம் மற்றும் வணிகம். இந்திய தேசிய இயக்கம், நடப்பு நிகழ்வுகள், போக்குவரத்துச் சைகைகள் மற்றும் முதலுதவி, எழுத்துத் தேர்வில் தேர்ச்சி பெறுபவர்களில் அந்தந்த மாநகர – மாவட்ட காலிப் பணியிட எண்ணிக்கைக்கு ஏற்றவாறு 1 : 5 விகிதாச்சாரப்படி இன வாரியாக அடுத்த கட்டத் தேர்வான உடற்கூறு அளத்தல் மற்றும் உடல் தகுதித் தேர்வுக்கு அழைக்கப்படுவார்கள்.

     உடற்கூறு அளவு: உயரம் – பொது. பிற்படுத்தப்பட்டோர். பிற்படுத்தப்பட்டோர் (இஸ்லாமியர்), மிகவும் பிற்படுத்தப்பட்டோர் – சீர் மரபினர் 170 செ.மீ. இருக்க வேண்டும். ஆதி திராவிடர். ஆதி திராவிடர் (அருந்ததியர்) மற்றும் பழங்குடியினர் 167 செ.மீ. இருக்க வேண்டும். மார்பளவு – அனைத்து வகுப்பினருக்கும் சாதாரண நிலையில் குறைந்தபட்சம் 81 செ.மீ. இருக்க வேண்டும். மூச்சினை முழுமையாக இழுத்த நிலையில் குறைந்த பட்சம் 5 செ.மீ. மார்பு விரிவாக்கம் இருக்க வேண்டும்.

    உடற்தகுதி தேர்வு உடற்கூறு அளவில் தேறியவர்கள் பின்வரும் உடற்தகுதி தேர்வில் தேர்ச்சி பெற வேண்டும்.

    1.    1500 மீட்டர் ஓட்டத்தினை 7 (ஏழு) நிமிடம் அல்லது அதற்குக் குறைவான நிமிடங்களில் ஓடி முடிக்க வேண்டும்.

    2.    உயரம் தாண்டுதல் – 1.20 மீட்டர் (அல்லது) நீளம் தாண்டுதல் – 3.80 மீட்டர்

    3.    100 மீட்டர் ஓட்டம் – 15 வினாடிகள் அல்லது அதற்குக் குறைவான வினாடிகளுக்குள் ஓடி முடிக்க வேண்டும் (அல்லது) 400 மீட்டர் ஓட்டம் – 80 வினாடிகள் அல்லது அதற்குக் குறைவான வினாடிகளுக்குள் ஓடி முடிக்க வேண்டும்.

    4.    கயிறு ஏறுதல் – 5 மீட்டர் ஏறுதல் வேண்டும்.

    விண்ணப்பதாரர்கள் மேற்குறிப்பிட்ட 4 நிகழ்வுகளிலும் கலந்து கொண்டு தகுதி பெற வேண்டும். ஏதேனும் ஒரு நிகழ்வில் தகுதியிழந்தால் மீதமுள்ள நிகழ்வுகளில் கலந்துகொள்ள தகுதியற்றவராவார். இந்த 4 நிகழ்வுகளும் தகுதிச் சுற்றுத் தேர்வுகளே, மதிப்பெண் வழங்கப்பட மாட்டாது. இந்நிகழ்வுகளில் உயரம் தாண்டுதல் – நீளம் தாண்டுதல் நிகழ்வுக்கு மட்டும் இரண்டு வாய்ப்புகள் கொடுக்கப்படும். இரண்டு வாய்ப்புகளில் விண்ணப்பதாரரின் உயர் அளவு கணக்கில் எடுத்துக் கொள்ளப்படும். 100 மீட்டர் (அல்லது) 400 மீட்டர் ஓட்டம் நிகழ்வுகளுக்கு ஒரே ஒரு வாய்ப்பு மட்டுமே கொடுக்கப்படும். கயிறு ஏறும்போது கைகளைத் தவிர, கால்களையோ அல்லது மற்ற எந்த உடல் பாகங்களையோ பயன்படுத்தக்கூடாது.

    அசல் சான்றிதழ்கள் சரிபார்த்தல்: உடல் தகுதித் தேர்வில் தேர்ச்சி பெறும் அனைத்து விண்ணப்பதாரர்களுக்கும் அசல் சான்றிதழ்கள் சரிபார்த்தல் நடத்தப்படும். விண்ணப்பத்துடன் அனுப்பிய சான்றொப்பமிட்ட சான்றிதழ்களின் அசல் சான்றிதழ்கள் அனைத்தையும் தேர்வு மையத்திற்கு சரிபார்ப்பதற்காகக் கொண்டு வர வேண்டும். உடற்தகுதித் தேர்வு மற்றும் சான்றிதழ்கள் சரிபார்த்தல் வரை பெறும் தகுதிகள் தற்காலிகமானது.

    பணிபுரியும் வயது வரம்பு: இப்பணிக்குத் தேர்வு செய்யப்படுபவர் 40 வயது வரை இப்படையில் பணிபுரியலாம்.

    காவல்துறைக்கு தேர்வு செய்தல்: இப்பணிக்கான அனைத்துப் பயிற்சிகளிலும் முழுமையாகத் தேர்ச்சியடைந்து ஒரு வருட காலம் முழுமையாக இப்படையில் பணிபுரிபவர்கள். காவலர் தேர்வுக்கான தகுதிகளிருப்பின் தமிழ்நாடு காவல்துறைப் பணிக்குத் தேர்வு செய்யப்படுவதற்காக தமிழ்நாடு சீருடைப் பணியாளர் தேர்வுக் குழுமத்தால் நடத்தப்படும் சிறப்புப் பொதுத் தேர்வில் கலந்து கொள்ளத் தகுதி உள்ளவர்கள் ஆவார்கள்.

    எழுத்துத் தேர்வு நடைபெறும் நாள் 10.11.2013

    ஜெயசூர்யாவாகிய இனி, நீங்கள் உடனடியாக உடல் தகுதியை வளர்ப்பதற்கு 100 மீட்டர் ஓட்டம் மற்றும் நீளம் தாண்டுதல், கயிறு ஏறுதல் போன்ற பயிற்சிகளை மேற்கொள்ள வேண்டும். தமிழ்நாடு பாடநூல் நிறுவன புத்தகங்கள் ஒன்றாம் வகுப்பு முதல் 10ம் வகுப்பு வரையிலான புத்தகங்களைப் படித்தல் வேண்டும். மிக முக்கியமாக தமிழக வரலாறு, தமிழக புவியியல், தமிழ் புத்தகங்கள் அனைத்தையும் தவறாமல் சேகரிக்க வேண்டும். மன தத்துவ (Psychology) கேள்விகளுக்கான பதிலைத் தெரிந்து கொள்ள கடைகளில் கிடைக்கும் புத்தகங்களை வாங்கிப் படிக்க வேண்டும்.

    இந்த மூன்று காரியங்களில் தீவிரமாக ஈடுபட்டால் போட்டித் தேர்வில் உங்களுக்கு வெற்றி கிடைக்க வாய்ப்புண்டு. உங்களுக்கும், உங்களைப் போன்ற ஆயிரக்கணக்கான தன்னம்பிக்கை வாசகர்களுக்கும் எனது வாழ்த்துக்கள்!

    இந்த மாத இதழை EBook வடிவத்தில் படிக்க – Click

    சாம்பியன் உருவான கதை

    “உலகின் மாபெரும் கிரிக்கெட் வீரரான சச்சின் டெண்டுல்கர்
    சாம்பியனாக உருவான கதை!”

    “நான் ஆடவந்த போது எல்லாம் மங்களாக இருந்தது. வாசிம் அக்ரம், வரிசையாக நான்கு பவுன்சர்கள் வீசினார். இதுதான் டெஸ்ட் கிரிக்கெட் என நினைத்தேன்”- 1989ம் ஆண்டு, 16 ஆண்டுகள் 206 நாட்களில் இந்தியாவுக்காக விளையாடும் மிகவும் இளம் வீரராக பாகிஸ்தானுக்கு எதிராக கராச்சியில் அறிமுகமான முதல் போட்டியின் போது சச்சின் சொன்ன வார்த்தைகள் இவை.

    1989 நவம்பர் 15ம் தேதி இந்திய அணியின் சீருடை அணிந்து சுருண்ட தலைமுடியுடன் 16 வயதில் கிரிக்கெட் களத்தில் காலடி எடுத்து வைத்ததிலிருந்து கடந்த 24 ஆண்டுகளாக ஒரு தலைமுறையை நிர்ணயிக்கும் உருவகமாக சச்சின் திகழ்ந்து வந்திருக்கிறார்.

    டெஸ்ட்டில் 16,000 ரன்கள். ஒருநாள் போட்டியில் 18,426 ரன்கள், 100 சர்வதேச சதங்கள் என நம்பமுடியாத எண்ணிக்கைகளை அவர் சேர்த்து வைத்திருக்கிறார். இத்தனை சாதனைப் புதையல் விபரங்களைத் தன்னிடம் வைத்திருக்கும் சச்சினின் வாழ்க்கை அவருக்குச் சொந்தமான கதை அல்ல. கிரிக்கெட் என்ற விளையாட்டின் மீது மோகம் கொண்ட ஒவ்வொரு இந்தியனுக்கும் சொந்தமான கதை.

    சச்சின் முதல் போட்டிக்காக தேர்வானதே ஒரு நெகிழ்ச்சியான கதை தான்.

    1989, நவம்பர் 4 வான்கடே ஸ்டேடியத்தில் இராணி கோப்பை கிரிக்கெட் போட்டி. 16 வயது சச்சின் விளையாடுதைப் பார்த்தார் இந்தியத் தேர்வுக் குழுவின் உறுப்பினர்கள் ஐந்து பேரில் ஒருவரான ஆகாஷ் லால். சச்சினின் திறனைப் பற்றி தன்னுடைய டைரியில் குறித்துக் கொண்டார்.

    5 நபர்கள் கொண்ட தேர்வுக்குழு பாகிஸ்தானுக்கு செல்லப்போகிற அணியைத் தேர்வு செய்ய கூடுகிறது. தேர்வுக் குழுவின் தலைவர் ராஜ்சிங் துங்கர்பூர் சச்சினின் பெயரை முன்மொழிகிறார்.

    தேர்வுக் குழுவில் இருந்த இருவர்,“சச்சின் வயதில் மிகவும் இளையவராக இருப்பதால் இம்ரான்கான், வாசிம் அக்ரம், வாக்கர் யுனிஸ் போன்றோரை சமாளிக்க முடியுமா?” என்ற சந்தேகத்தை எழுப்பினர்.

    “18 வயதில் ஹனிப் முகம்மது, 17 வயதில் இயன் க்ரெய்க் போன்றவர்கள் விளையாடிய போது, ஏன் சச்சின் விளையாடக் கூடாது” என்று கேட்டார் ஆகாஷ் லால். இறுதியில் டெல்லிக்கு எதிரான போட்டியில் 100 ரன்கள் எடுத்தால் அவர் பாகிஸ்தான் போகலாம் என்று முடிவானது.

    ரெஸ்ட் ஆப் இந்தியா அணிக்காக விளையாடிய டெண்டுல்கர் முதல் இன்னிங்ஸில் 39 ரன்களில் ஆட்டமிழந்தார். 2வது இன்னிங்ஸில் 9 விக்கெட்டுகளை இழந்திருந்த போது, சச்சின் 83 ரன்களில் இருந்த போது குர்சரண் தன் கையில் ஏற்பட்ட எலும்பு முறிவால் மைதானத்திலிருந்து வெளியேறினார். அப்போது ராஜ்சிங் துங்கர்பூர் குர்சரணிடம், “அந்தப் பையன் 100 அடிக்க வேண்டும்.அவனுக்கு உதவுங்கள்” என்று கேட்டுக் கொண்டார். குர்சரண் மீண்டும் பேட் செய்வதற்காக மைதானத்திற்குள் செல்கிறார். சச்சின் முகத்தில் சந்தோசம். குர்சரண், “ஒரு கையால் சமாளிக்கிறேன். எப்படியாவது 100 எடுங்கள்” என்று சச்சினிடம் சொல்கிறார்.

    அதன்பின் ஒவ்வொரு பந்தையும் கவனமாக எதிர்கொண்டு நூறு அடித்தார். சச்சின் இந்திய அணிக்குத் தேர்வானார். பாகிஸ்தான் பறந்தார்.

    இன்று சச்சின் புள்ளி விபரங்களை அதன் உச்சத்துக்குக் கொண்டு சென்று, அவை மூலமே தன்னைப்பற்றி சொல்ல வைத்துள்ளார். நிறைய சாதித்திருக்கிறார்.அதிலும் நீண்ட காலம் தொடர்ந்து சாதித்திருக்கிறார். அவரது ஆரம்பம் நாம் டீ.வியில் பார்ப்பது போலவே சுவையானது. ஒருநாள் பக்கத்து வீட்டில் இருந்த மரத்தில் இருந்து மாங்காய் திருடிய போது பிடிபட்டு ராம்காந்த் ஆச்சரேகரிடம் அழைத்துச் செல்லப்பட்டார் சச்சின்.

    அப்படி சென்ற சச்சின் கிரிக்கெட்டில் முதலில் சம்பாதித்தது 25 பைசா. பயிற்சி நேரம் முழுவதும் ஆட்டம் இழக்கமால் இருந்ததற்காக ஆச்சரேகர் கொடுத்த பரிசு அது. அன்றில் இருந்து ஆச்சரேகரின் ஸ்கூட்டரில் பின்னே அமர்ந்து மைதானம் மைதானமாக சென்று ஒவ்வொரு நாளும் குறைந்தபட்சம் 4 போட்டிகளில் விளையாடினார். போட்டிக்குத் தயாராவது என்பது அவருக்கு மிகுந்த ஈடுபாடுடையது. ஒவ்வொரு டெஸ்ட் போட்டிக்கு முன்னதாகவும் அவரால் சரியாகத் தூங்க முடியாது.

    பிப்ரவரி 24, 2010 சர்வதேச ஒருநாள் கிரிக்கெட் போட்டியில் இரட்டைச் சதம் அடித்த முதல் வீரராக சச்சின் டெண்டுல்கர் புதிய சாதனை படைத்தார். இதற்கு முன் நடந்த 2961 சர்வதேச ஒருநாள் கிரிக்கெட் போட்டிகளில் ஒருவருமே 200 ரன் எடுத்ததில்லை.டெஸ்ட் போட்டிகளிலும், ஒருநாள் போட்டிகளிலும் அதிக எண்ணிக்கையிலான ரன் எடுத்தவர் சச்சின்.

    அவருடைய சாதனையையும், வாழ்க்கைப் பயணத்தையும் கொஞ்சம் பின்னோக்கிப் பார்த்தால் அவர் சாம்பியன் ஆன கதை புரியும். மனிதர்களுக்கிடையே விஸ்வரூபம் எடுத்தவரின் ஒரு சிறிய வரலாறு இதோ…

    1989, டிசம்பர் பாகிஸ்தானின் சியால்காட் நகரம். இந்தியா – பாகிஸ்தான் நாடுகளுக்கு இடையே நடந்து கொண்டிருந்த டெஸ்ட் தொடரின் நான்காவது போட்டி அது.சச்சினின் கிரிக்கெட் வாழ்க்கையிலும் அது நான்காவது போட்டி.

    மூன்று போட்டிகளுக்குப் பிறகு அந்தத் தொடர் 0 – 0 என்ற கணக்கில் இருந்தது. நான்காவது டெஸ்டின் முதல் இன்னிங்ஸில் 65 ரன்களுடன் முன்னணியில் இருந்தது இந்தியா. ஆனால் இரண்டாவது இன்னிங்ஸில் பாகிஸ்தானின் வாக்கர் யுனிஸூம், வாசிம் அக்ரமும் இந்திய ஆட்டக்காரர்களைத் திணறடித்துக் கொண்டிருந்தார்கள்.

    4 விக்கெட்டுகள் இழப்புக்கு 38 ரன்கள்.தோல்வியின் விளிம்பில் இந்திய அணி. போட்டியில் வெற்றி பெறவில்லை என்றால் தொடரை இழக்க வேண்டிய நிலை. அப்போது சித்துவுடன் கைகோர்த்தார் சச்சின். மஞ்ரேகர், ஸ்ரீ காந்த், அசாருதீன், ரவி சாஸ்திரி போன்றவர்கள் கூட பாகிஸ்தான் வீரர்களின் பந்துவீச்சை தாக்குப்பிடிக்காமல் பெவிலியனுக்குத் திரும்பி இருந்தனர். 16 வயதில் மொழு மொழு கன்னத்துடன் இருந்த இளம்பிஞ்சு எப்படி அந்தப் புயல்வேகப் பந்துவீச்சை எதிர்கொள்ளப் போகிறது?

    வக்கார் யுனிஸ் மிக மோசமான பௌன்சர் ஒன்றைப் போட்டார். அது சச்சினின் மூக்கைப் பதம் பார்த்தது. மூக்கில் இருந்து இரத்தம் கொட்டியது. எல்லோரும் ‘உச்’ கொட்டினார்கள். 16 வயது பையனுக்கு இப்படி பவுன்சர் போடுவதைத் தடுக்க சட்டம் கொண்டுவர வேண்டும் என்று கூட சிலர் நினைத்திருப்பார்கள். பாகிஸ்தான் வீரர்கள் இரத்தம் வடிவதைப் பார்த்துக் கொண்டிருக்க, இந்திய அணியின் மருத்துவர் முதலுதவிக்காக மைதானத்துக்குள் ஓட, சித்து சச்சினைத் தூக்கிவிட அவர் அருகில் சென்றார்.

    மருத்துவர் சச்சினின் மூக்கில் வடியும் ரத்தத்தை நிறுத்த முயற்சிக்க, ‘காயம் சரியானவுடன் விளையாட வா’ என்று அறிவுரை கூறுகிறார் சித்து… காயம் சற்று பெரிய அளவில் இருந்தது…‘போ… சற்று ஓய்வு எடுத்துக்கொண்டு விளையாட வா’ என்று சித்து மீண்டும் கூறினார். இதுவே சச்சினுக்குக் கடைசி போட்டியாக அமைந்து விடுமோ என்று கூட நினைத்தார் சித்து…‘வா நான் மருந்து இடுகிறேன்’ என்றார் மருத்துவர்.

    ஆனால் சச்சின் யார் சொல்லியும் கேட்பதாக இல்லை. அனைவரும் சச்சினை அந்தப் போட்டியில் இருந்து விலகிக் கொள்ளுமாறு அறிவுறுத்தியதைக் காதில் ஏற்றுக்கொள்ளவில்லை.

    ‘நான் விளையாடுவேன்’ என்று சச்சின் சொன்னார். அந்த நிமிடம் தான் ஒரு நட்சத்திர வீரன் இந்திய அணிக்கு ஜொலிக்க ஆரம்பித்தான். அந்த இரண்டு வார்த்தைகள், வெற்றியடைய முயலும் ஓர் இளைஞனின் உத்வேகத்தை எடுத்துக் காட்டின.

    அந்த சமயத்தில் சச்சின் டிரெஸ்ஸிங் ரூமிற்குச் சென்று சாவகசாமாக ஓய்வெடுத்துக் கொண்டு இருந்திருக்க முடியும். ஆனால் அவர் அப்படி செய்யவில்லை. இந்தியா மிகவும் இக்கட்டான நிலையில் இருந்தது. மூர்க்கத்தனமான அந்தத் தாக்குதல் உச்சத்திற்குச் சென்றது. கையுறை, மேல்சட்டை, முகம், தன்னம்பிக்கை என அனைத்தின் மீதும் குருதி படிந்திருந்தது.

    ஆனால் அதைப் பற்றி எந்தக் கவலையும் அந்தச் சிறுவன் அடையவில்லை. நான் விளையாடுவேன் என்று களத்தில் நின்று 57 ரன்கள் எடுத்ததுடன், சித்து – சச்சின் இணை பார்ட்னர்சிப்பாக 101 ரன்களை எடுத்தனர். ‘நான் விளையாடுவேன்’ என்ற சச்சினின் அந்த இரண்டு வார்த்தைகள் தான் திறமையான ஒருவரை சியாட்டில் மேதையாக உருமாற்றியது.

    எப்போதுமே இப்படித்தான் சாதாரண வீரர்களிடம் இருந்து சாம்பியன்களை வித்தியாசப்படுத்துவது திறமை மட்டும் அல்ல அவர்களின் மனப்பாங்கும் கூட. அவர்களின் மன உறுதியும், இக்கட்டான சூழலில் போராடுவதற்கான உள்ளக்கிடக்கையும், நான் விளையாடுவேன் என்கிற அந்தத் துடிப்பு, ஒருவரின் தனிப்பட்ட விருப்பங்களுக்காக அல்லாமல் தன் அணியின் உயர்வுக்காக விளையாடும் வெறி.

    நம் மீது அழுத்தம் அதிகரிக்க, நம்மை அந்த அழுத்தம் சுழற்றி வீசுவது போல உணர்கிற பல சமயங்கள்.நம் வாழ்வில் இருக்கின்றன.அந்த சமயங்களில் தாக்குப்பிடித்து நிற்கிற விரல்விட்டு எண்ணக்கூடிய மனிதர்களில் ஒருவராக நீங்கள் இருக்க வேண்டும். நான் விளையாடுவேன் என்று சொல்வதற்கான நேரம் தான் அது.

    16 வயதில் கிரிக்கெட் விளையாடத் துவங்கியது முதல் சச்சின் நெருக்கடியைத் தவிர வேறு எதையும் சந்தித்ததில்லை. அவர் தோளில் எந்த அளவு எதிர்பார்ப்பின் சுமையைக் கொண்டுள்ளார் என்பதை உணர இந்தியாவில் அவர் விளையாடப் பார்க்க வேண்டும். அவர் புகழை எப்படி கையாள்கிறார் என்பது மற்றும் அவரின் செயல்கள் எல்லாம் விளையாட்டு வீரர்களுக்கு முன்னுதாரணமானது. அத்தகைய வீரர்கள் கிடைத்தது கிரிக்கெட்டுக்கு நல்லது என்று சொல்கிறார் முன்னாள் ஆஸ்திரேலிய வீரர் ஷேன் வார்ன். தன்னுடைய ‘மை டாப் 100 டெஸ்ட் பிளேயர்ஸ்’ புத்தகத்தில்.

    ஷேன் வார்ன் சொன்னதைப் போல கடந்த 24 வருடங்களாக தன் செயல்பாட்டினால் நம்மை மகிழ்ச்சிக்கு உள்ளாக்கியிருக்கிறார் சச்சின். தன் திறமையால் பல வெற்றிகளை இந்தியாவின் பக்கம் இழுத்ததை நாம் இமை மூடாமல் கண்டு களித்திருக்கிறோம். அவர் ஆட்டம் இழந்தால் தேசம் முழுவதன் நம்பிக்கையும் தவிடு பொடியாவதையும் நாம் கவலையுடன் பார்த்திருக்கிறோம். நம் கனவுகள் மெய்ப்பட, நாம் வெற்றியடைய அவர் உதவியிருக்கிறார். தன் வழியில், நாம் சிறந்தவர்கள் என்று நமக்கு உணர்த்தி இருக்கிறார். நாம் இந்தியர்கள் என்று பெருமைப்பட்டுக் கொள்ளச் செய்திருக்கிறார்.

    சச்சின் டெண்டுல்கரின் கிரிக்கெட் வாழ்க்கை எழுச்சி பெறும் இளம் இந்தியாவின் அடையாளமாகத் திகழ்கிறது. சச்சினின் மிகப்பெரிய பங்களிப்பு இந்த தேசம் முழுவதற்கும் எதிர்த்து நின்று போராடக் கற்றுக்கொடுத்தது தான். விட்டுக் கொடுக்காமல் இருக்கக் கற்றுக் கொடுத்திருக்கிறார்.

    பல நேரங்களில் ஒரு தலைவராக, உங்களை எப்போதும் இந்த உலகம் மட்டம் தட்டுவதாக நீங்கள் உணரலாம். வெற்றி பெறுவதாக நீங்கள் எதிர்பார்க்கலாம். ஆனால் தோல்வி உங்கள் முகத்தில் அறையும். அதுபோன்ற சமயங்களில் நல்ல தலைவர்கள் தன் அணியில் இருக்கும் நல்ல மனிதர்களை ஒருங்கிணைக்க வேண்டும். சச்சினைப் போல நான் விளையாடுவேன் என்கிற துடிப்பு உள்ளவர்களாக இருக்க வேண்டும். அந்தத் துடிப்பு தொற்று போன்றது. ஒருவர் கை தூக்கினால் இன்னொருவர் கை தூக்குவார். அடுத்து ஒருவர். பிறகு அந்த அணிக்கே தன் மீது நம்பிக்கை ஏற்படும்.போராடவும், வெற்றி கொள்ளவும் கற்றுத் தந்திருக்கிறார் சச்சின். நான் விளையாடுவேன் என்ற இரண்டு வார்த்தைகளின் மூலம். சாம்பியன் துடிப்பை வரையறுத்த அந்த இரண்டு வார்த்தைகள், திறமையான செயலாற்றலாக மாற்றிய அந்த இரண்டு வார்த்தைகளை நமது பேரக் குழந்தைகளுக்கு கற்றுக்கொடுப்போம்.

    மாஸ்டர் பிளாஸ்டர் ஓய்வு பெறுகிறார். இனிமேல் பவுண்டரிக்கான ஆன்டிரைவ், சிக்சருக்குப் பிறந்த அப்பர்கட், ஒவ்வொரு சாதனைக்குப் பின்னும் தலையைப் பின்னே சாய்த்து, வானத்தை நோக்கி பேட்டை தூக்குவது ஆகியவை வீடியோ கிளப்புகளாகத்தான் இருக்கும். எழுச்சி பெறும் இளம் இந்தியாவின் அடையாளமான சச்சினுக்கு ஒரு நன்றி.

    இந்த மாத இதழை EBook வடிவத்தில் படிக்க – Click

    நோபல்பெற்றுத்தந்த‘கடவுள் துகள்’

    பிரபஞ்சத்தில் எங்கும் நிறைந்துள்ள எண்ணற்ற துகள்களின் நிறைக்குக்காரணம், கண்ணுக்குத் தெரியாத பெருங்கடலான ஆற்றல் எங்கும் நிறைந்திருப்பது தான் என்று கூறியபீட்டர் ஹிக்ஸ், ஃப்ரான்ஸ்வா ஆங்லெர் ஆகிய இரு இயற்பியலாளர்களுக்குத் தான் இந்த ஆண்டு இயற்பியலுக்கான  நோபல் பரிசு.

    ஸ்காட்லாந்தில் உள்ள எடின்பர்க் பல்கலைக்கழகத்தைச் சேர்ந்த பீட்டர் டபுள்யு. ஹிக்ஸ், பெல்ஜியத்தில் உள்ள லிபர் டி பிரஸெல்ஸ் பல்கலைக்கழகத்தின் ஃப்ரான்ஸ்வா ஆங்லெர் தனக்குக் கிடைக்கும் நோபல் பரிசுத் தொகையான ஏழரை கோடி ரூபாயைப் பகிர்ந்து கொள்கிறார்கள்.

    ‘ஹிக்ஸ் போஸான்’ என்று இதை முதலில் கூறிய ஹிக்ஸ் பெயரால் இத்துகள் அழைக்கப் பட்டாலும் ஊடகங்களால்  கடவுள் துகள்  என்ற பெயர் பிரபலமாகிவிட்டது.

    கடவுள் துகள் பற்றிய கருதுகோள் 1964-ளிலேயே உருவாகிவிட்டது. ஆனால் ஒரு தலைமுறை விஞ்ஞானிகள் கடுமையாக உழைத்து, கடந்த ஆண்டில் ஹிக்ஸ் போஸானைக் கண்டுபிடித்தனர்.

    சுவிட்சர்லாந்தில் உள்ள ‘செர்ன்’ ஆய்வகத்தில் துகள் தாக்குவிப்பான்களில் கோடிக்கணக்கான முறை அணுகுத்துகள்களை மோதவிட்டுப் பார்த்ததில் ஒரு வழியாக கடந்த ஆண்டு ஹிக்ஸ் போஸானின் இருப்பு உறுதி செய்யப்பட்டது.

    செர்ன் அறிவியலாளர்கள் அணுவின் அமைப்பைப் பற்றி உருவாக்கிய படித்தர வடிவம் (Standard Model) மூலம் பிரபஞ்சத்தின் அடிப்படைக்கட்டுமானப் பொருட்களையும், அதற்கு ஆதாரமான விசைகளையும், அவற்றிற்கு இடையேயான தொடர்பையும் கண்டுபிடிக்கும் முயற்சியின் முழுமை தான் இந்த ஹிக்ஸ் போஸான்.

    இந்த படித்தர வடிவத்தை பொறுத்தவரை, பிரபஞ்சம் பாகுபோல் செய்லபடும் ஆற்றலால் இந்த பிரபஞ்சமே நிரம்பி இருக்கிறது. அதன் ஊடாகச் செல்லும் துகள்களுக்கு அந்த ஆற்றல் நிறையைக் கொடுக்கிறது. அந்த ஆற்றல் புலம்தான் ஹிக்ஸ் புலம்.

    காந்தத்தைச் சுற்றி காந்தப்புலம் இருப்பதைப் போலத்தான் ஹிக்ஸ் போஸானைச் சார்ந்து ஹிக்ஸ் புலம் இருக்கிறது. இந்தப் புலம் இல்லையென்றால் எலக்ட்ரான்கள் போன்ற அடிப்படைத் துகள்கள் ஒளிவேகத்தில் சென்று ஒன்றையொன்று இறுக்கிக் கொள்ளும், அதன் பிறகு அணுக்களும் இருக்காது. நாமும் இருக்கமாட்டோம் என்றும், இந்த பிரபஞ்சமானது துல்லியமான, இயற்கை விதிகளுக்கு உட்பட்டு இயங்குவதற்கு காரணம் ஹிக்ஸ் போஸான் என்று உறுதிப் படுத்தினார்கள் இந்த அறிவியலாளர்கள்.

    இதில் காணப்படும் குறைகளும், இடைவெளிகளும் தான் நாம் உட்பட எல்லாவற்றையும் விநோதமானவையாகத் தோன்றச் செய்கின்றன. ஹிக்ஸ் போஸான் என்பது இயற்கையுடன் தொடர்புடையது.இயற்கை சீராகவும், ஒழுங்கான அமைப்பையும் ஏற்படுத்தி இருக்கிறது. பிரபஞ்சத்தின் அடிப்படை விசைகள்யாவுமே இயற்கையானது. எல்லாவற்றிற்கும் சீர்மையையும், ஒழுங்கையும் ஏற்படுத்த முயல்வதால் தான் 1954ல் ஆராய்ச்சியாளர்கள் ரிங்யாங், ராபர்ட் எல்.மில்ஸ் ஆகியோர் ஆய்வுகளை மேற்கொண்டு அறிவித்த தன் தொடர்ச்சியான விளைவுகள் தான் ஹிக்ஸ் போஸானின் கண்டுபிடிப்பு.

    1964ல் மூன்று வெவ்வேறு இயற்பியல் அறிஞர்கள் ஹிக்ஸ் துகள் குறித்து வெவ்வேறு இடங்களில் ஆய்வுகளை மேற்கொண்டிருந்தனர்.

    ஆனால் ஹிக்ஸ் துகள் குறித்து முதலில் பதிப்பித்தவர்கள் டாக்டர் ஆங்லெரும், அவருடைய சகா ராபர்ட் பிரௌட்டும்தான். ராபர்ட் பிரௌட் 2011ல் இறந்து விட்டார். ஹிக்ஸ் துகள் கண்டு பிடிப்பில் ராபர்ட்முக்கு முக்கிய பங்கு உண்டு என்றாலும் இறந்தவர்களுக்கு நோபல் பரிசு வழங்குவதில்லை என்ற மரபின் காரணமாக அவருக்கு வழங்கப்படவில்லை.

    டாக்டர் ஆங்லெர் பெல்ஜியம் நாட்டின் எட்டர்பீக் நகரைச் சேர்ந்தவர்.பொறியியல் இயற்பியல் படித்தவர். கார்னல் பல்கலைக்கழகத்தில் ஆய்வில் ஈடுபட்டபோது டாக்டர் பிரௌட்டுடன் சேர்ந்து கொண்டார்.

    இவர்கள் இருவரும் இந்தக் கோட்பாடு குறித்து ஆய்வு செய்து கொண்டிருந்த போதுதான் இங்கிலாந்தின் நியூகேசலைச் சேர்ந்த டாக்டர் ஹிக்ஸ் தன்னுடைய பாணியில் இத்துகள் பற்றிய ஆய்வுகளை மேற்கொண்டிருந்தார்.

    ஹிக்ஸ் அனுப்பிய ஆய்வறிக்கையை செர்னில் உள்ள ‘பிசிக்ஸ் லெட்டர்ஸ்’ பிரசுரிக்க மறுத்து விட்டது. எனவே போட்டியாளரை ‘பிசிகல் ரெவ் யூலெட்டர்ஸ்’ நிறுவனத்துக்கு அனுப்பினார். அதில் தான் புதிய துகள் குறித்து அடிக்குறிப்பாக கூறியிருந்தார்.அதுதான் தற்போது ஹிக்ஸ் துகளாக உலகப் புகழ்பெற்ற கடவுள் துகள்.

    இதற்கிடையில் லண்டன் இம்பீரியல் கல்லூரியைச் சேர்ந்த டாம் கிப்பின், ரோசஸ்டர் பல்கலைக்கழகத்தைச் சேர்ந்த கார்ல்ஹேஜன், பிரௌன் பல்கலைக்கழகத்தைச் சேர்ந்த ஜெரால்ட்குரால்நிக் என்ற மூன்று இயற்பியலாளர்கள் தங்களுடைய ஆய்வுகளை அறிக்கையாகத் தயாரித்து, அதைப் பிரசுரிக்க அனுப்பிய போது தபால்துறை வேலை நிறுத்தத்தில் இருந்ததால் ஹிக்ஸ், ஆங்லெர் பிரௌட் ஜோடி தயாரித்த இரண்டு அறிக்கை மட்டுமே வந்தது. அன்றில் இருந்தே இதை யார் கண்டுபிடித்தது என்ற சர்ச்சை நடந்தது.

    கடந்தாண்டு ஜூலை 4ம் தேதி இறுதியாக அறிவிக்கப்பட்டதும் சர்ச்சை முடிவிற்கு வந்தது. அன்று தான் ஹிக்ஸூம், ஆங்லெரும் முதல் முறையாக சந்தித்துக் கொண்டனர்.

    ஹிக்ஸ் துகள் குறித்த ஆய்வை ஆயிரக்கணக்கான அணுத்துகள் இயற்பியலாளர்கள் செர்ன்நகரில் உள்ள அறிவியல் ஆய்வகத்தில் ஆண்டுக் கணக்கான மேற்கொண்டனர். இந்தக் கண்டுபிடிப்புக்கான நோபல் விருதின் பெருமையில் இவர்களுக்கும் பங்கு இருக்கிறது.

    உயிரணுக்களுக்கு இடையே மூலக்கூறுகளை கொண்டு செல்லும் முறையை ஆய்வுசெய்த தற்காக மருத்துவத்திற்கான நோபல்பரிசை அமெரிக்க விஞ்ஞானிகள் ஜேம்ஸ் ரோத்மேன், ராண்டி செக்மேன், ஜெர்மனியில் பிறந்து தற்போது அமெரிக்காவில் ஆய்வு செய்யும் தாமஸ் சுவேதாப் ஆகியோர் பெறுகிறார்கள்.

    செல்கள் அனைத்தும் மூலக்கூறுகளை உற்பத்தி செய்து அனுப்பும் பணிகளை மேற்கொள்கின்றன என்பதைத் தான் இவர்கள் நிரூபித்துள்ளனர். உதாரணமாக, நமது கணையம் பகுதியில் உள்ள செல்கள், இன்சுலினைத் தயாரித்து ரத்தத்தில் கலக்கச் செய்கின்றன. நரம்பு மண்டலத்தில் உள்ள செல்கள் தகவல்கள் தொடர்பான குறியீடுகளை குறிப்பிட்ட இரசாயனங்களை உற்பத்தி செய்துமற்ற செல்களுக்கு அனுப்புகின்றன. இந்த செல்களுக்கு இடையே மூலக்கூறு எவ்வாறு செல்கின்றன, அதுவும் மிகத்துல்லியமாக சரியான நேரத்தில், மிகச்சரியான இடத்தில் எப்படி நிகழ்கிறது என்பதைத் தான் இவர்கள் கண்டறிந்துள்ளனர்.

    உயிர்தொழில் நுட்பத்துறை சார்ந்த தொழில் வளர்ச்சியில் மிகப்பெரிய முன்னேற்றத்ததை ராண்டி செக்மேனின் ஆய்வு ஏற்படுத்தியுள்ளது. மேலும் இவரின் ஆய்வுசெல்கள் உற்பத்தி செய்யும் நொதிகளில் ஏற்படும் மாறுபாடு குறித்தும், செல்கள் உற்பத்தி செய்யும் மூலக்கூறுகளை பிசிறில்லாமல் எடுத்துச் செல்வதற்கான ஜீன்களின் நொதிகள் எவை என்பதையும் கண்டறிந்துள்ளார். அமெரிக்காவில் கலிபோர்னியா பல்கலைக்கழகத்தில் செல் உயிரியல் துறையில் பேராசிரியராகப் பணியாற்றும் ராண்டி செக்மேன் செல்கள் உற்பத்தி செய்யும் புரத மூலக்கூறுகள் எவ்வாறு தான் சென்று சேரவேண்டிய இலக்கைத் துல்லியமாக அடைகின்றது என்பதைக் கண்டறிந்துள்ளார். யேல் பல்கலைக்கழகத்தில் செல் உயிரியல் துறைத் தலைவராக பணிபுரியும் ஜேம்ஸ் ரோத்மேன் செல்களில் இருந்து மூலக்கூறுகள் எவ்வாறு துல்லியமாக அனுப்பி வைக்கப்படுகின்றன என்று கண்டறிந்துள்ளார். ஸ்டான்போர்டு பல்கலைக்கழகத்தில் பேராசிரியராகப் பணியாற்றும் தாமஸ் சுவேதாப்.

    இந்த மாத இதழை EBook வடிவத்தில் படிக்க – Click

    மரித்துப் போகும் வரை சாதனை “நிக் வாலெண்டா”

    ஒருமுறை கின்னஸ் சாதனை செய்வதற்குள்ளேயே மனிதனின் வாழ்நாள் முடிந்துவிடுகிறது. ஒருவர் ஏழாவது முறை கின்னஸ் சாதனையைப் புரிந்துள்ளனர்.

    கடைசியாக அவர் செய்த சாதனை அமெரிக்காவில் உள்ள அரிஸோனா மாநிலத்தில், கென்யான் பகுதியில் ஓடும் லிட்டில் கொலராடோ நதியைக் கடந்தது… சும்மா வெறுமனே நீந்திக் கடந்துவிடவில்லை…

    1500 அடிக்குமேல் உயரம் கொண்ட நதியின் கரையில் உள்ள இரு மலைகளையும் ஒரு கம்பியால் கட்டி அந்தக் கம்பியின் மீது நடந்து நதியைக் கடந்தார். பார்த்தாலே தலை சுற்றிவிடும் 1500 அடி உயரம், தரையில் பாதுகாப்பாக நின்று கொண்டிருக்கும் மனிதர்களையும் சாய்ந்துவிடும் பேய்க்காற்று, மேலே இருந்து விழுந்தால் ஒரு எலும்பைக்கூட பெற முடியாத கொடூரமான பாறைகள், இப்படிப்பட்ட சூழ்நிலையுள்ள இடத்தில் தான் எந்தவொரு பாதுகாப்பும் இன்றி தனி ஆளாக தன்னம்பிக்கையைக் கொண்டு இச்சாதனையைச் செய்திருக்கிறார் நிக் வாலெண்டா.

    200 வருடமாக, ஏழு தலைமுறையாக கம்பியின் மீது நடந்து கொண்டிருப்பதால், ‘ஃபிளையிங் வாலெண்டாஸ்’ என்று அழைக்கப்படுகிறது நிக் வாலெண்டா குடும்பம். நிக் வாலெண்டாவின் மூதாதையர்கள் சர்க்கஸில் பார் விளையாடுவது, கம்பி மீது நடப்பது போன்றவற்றையே தங்கள் தொழிலாகக் கொண்டிருந்தவர்கள்.

    நிக் வாலெண்டாவின் கொள்ளுத்தாத்தா தான் முதல் முறையாக சர்க்கஸ் கூடாரத்துக்குள் அதுவரை செய்யப்பட்டு வந்ததை கூடாரத்துக்கு வெளியே செய்தார். தொடர்ந்து நிக்கின் தாத்தா கர்ல் வாலெண்டா இரண்டு மிக உயர்ந்த கட்டிடங்களுக்கு இடையே கம்பியைக் கட்டி, அதில் நடந்து பல சாதனைகளைச் செய்திருக்கிறார்.

    தன்னுடைய 73வது வயதில், 1978ம் ஆண்டு வழக்கம் போல மிக உயர்ந்த இரண்டு கட்டிடங்களுக்கு இடையே கம்பியைக் கட்டி நடக்கும்போது ‘போலன்ஸ்’ தவறி கீழே விழுந்து, உடல் சிதறி உயிர்விட்டார்.

    ஆனாலும் அத்துடன் நின்றுவிடவில்லை அவரது குடும்பத்தினர். நிக்கின் மாமா, அவரின் மகன் ஆகியவர்கள் இதே மாதிரி சாதனையை நிகழ்த்தும்போது தவறி விழுந்து உயிர்விட்டிருக்கிறார்கள்.

    இப்படிப் பல இழப்புகள் தங்கள் குடும்பங்களில் ஏற்பட்டிருந்தாலும் தொடர்ந்து அதிலேயே ஈடுபட்டார்கள் நிக்கின் குடும்பத்தினர். அதற்குக் காரணமாக அவர்கள் சொல்வது, ‘சாதனை என்பதே மரணத்துக்கும், வாழ்வுக்கும் இடையே நடக்கும் போராட்டம் தானே. அதில் ஏதாவது ஒன்று தானே ஜெயிக்க முடியும். பல நேரங்களில் சாதனைகளைப் பரிசாக பெற்ற நாங்கள் சில நேரங்களில் மரணத்தைப் பரிசாகப் பெற்றிருக்கிறோம். இதனால் எங்களின் துணிச்சல் குறைந்துவிடவில்லை. எங்கள் குடும்ப உறுப்பினர்களின் மரணங்கள் எங்கள் குடும்பத்தை எந்த விதத்திலும் பாதிப்பதில்லை என்பதால்.

    கடந்த ஜூன் மாதம் 23ம் தேதி அமெரிக்க – இந்தியப் பழங்குடியினர் வாழும் கரடுமுரடான கென்யான் பகுதியில் லிட்டில் கொலராடோ என்ற நதி ஓடுகிறது. லிட்டில் கொலராடோ ஒரு காட்டாறு. திடீர் வெள்ளப் பெருக்கும், திடீர் வறட்சியும் இதன் இயல்பு. அங்கு நிலவும் சீதோசன நிலையும் அப்படித்தான் இருக்கும். அதிக குளிர், அதிக வெயில் என்று எப்படி வேண்டுமானாலும் மாறும்.

    1400 அடி அகலம் கொண்ட அந்த நதியின் கரையில் இருக்கும் இரண்டு மலைகளுக்கு இடையே 5 செ.மீ. அகலம் கொண்ட இரும்புக் கேபிளால், தலையில் இருந்து 1500 அடிக்கு மேல் உயரத்தில் கட்டி, மணிக்கு 55 கி.மீ. வேகத்தில் காற்று வீசிக்கொண்டிருந்த நேரத்தில், இரண்டு கேமரா, ஒரு மைக், கையில் 20 கிலோ எடைகொண்ட பேலன்ஸ் போல் (Balance Pole), காலில் ஃபிலக்ஸிபில் லெதர் ஷு அணிந்து கம்பியின் மீது நடக்கத் தொடங்கினார் நிக்.

    கம்பியின் மேல் நடக்க ஆரம்பித்தது முதல் 13 நிமிடங்களுக்கு ‘தேங்யூ ஜீஸஸ்” என்று கூறிக்கொண்டே நடந்தார். பிறகு தன் கையில் இருந்த மைக்கின் மூலம் தன்னுடைய உணர்வு எப்படி இருக்கிறது, காற்றின் வேகம் எப்படியுள்ளது என்று சொன்னபடி இருந்தவர், சிறிது நேரம் நடக்காமல் ஒரு காலை மடக்கி கம்பியின் மீது அமர்ந்து கொண்டார். காரணம் காற்றின் வேகம் அதிகமாக இருந்ததால் பேலன்ஸ் செய்ய கடினமாக இருப்பதாகக் கூறினார். சிறிது நேரத்தில் நடக்கத் தொடங்கி 27 நிமிடங்கள், 54 விநாடிகளில் நதியைக் கடந்தார்.

    கம்பியில் இருந்து இறங்கியது நிலத்தை முத்தமிட்ட நிக் வாலெண்டா தனது கனவு நிறைவேறிவிட்டது. அடுத்த கனவான நியூயார்க்கில் உள்ள எம்பெயர் ஸ்டேர் பில்டிங்கிற்கும், கிறிஸ்லர் பில்டிங்கிற்கும் இடையே நடப்பது தான் என்று கூறி அதற்கான முயற்சியில் ஈடுபடத் தொடங்கினார். அவரது கனவுகள் நனவாக வாழ்த்துவோம்!.

    இந்த மாத இதழை EBook வடிவத்தில் படிக்க – Click

    படிப்பது எப்படி?

    வாழ்க்கையின் ஒவ்வொரு நிலையிலும் நினைவு சக்தி மனிதர்களுக்கு அதிக அளவில் பயன்படுகிறது. கடந்த காலத்தை திரும்பிப் பார்த்து நிகழ்காலத்தை ரசித்து, எதிர்காலத்தைபற்றி சிந்தித்து செயலாற்றும் போதுதான் வாழ்க்கையில் வெற்றி எளிதாக கிடைக்கிறது.

    “கார் ஓட்டும்போது முன்பக்கம் மட்டும் பார்த்து காரை ஓட்டினால் விபத்துக்களை தவிர்த்துவிடலாம். விரைவாகச் சென்றுவிடலாம்” என்று ஆலோசனை சொல்பவர்களும் உண்டு. ஆனால் – முறையாக கார் ஓட்டும் பயிற்சியைப் பெற்றவர்கள் சொல்லும் ஆலோசனை சற்று வித்தியாசமானது.

    “முன்பக்கம் பார்த்து கார் ஓட்டும்போதே பின்பக்கத்தைக் காட்டும் கண்ணாடிகள் மூலம் வலது மற்றும் இடதுபுறங்களில் வருகின்ற வாகனங்களையும், பின்பக்கமாக வரும் வாகனங்களையும் கவனித்து கார் ஓட்டினால்தான் விபத்து இல்லாமல் முறையாக கார் ஓட்ட முடியும்” – என அறிவுரை வழங்குவார்கள்.

    இதேபோலத்தான், பாடங்களை படிக்கும்போது அந்தந்த வகுப்பில் நடத்தப்படும் பாடங்களை மட்டும் படித்து தேர்வில் வெற்றி பெற்றால் மட்டும் போதாது. கடந்த காலங்களில் கற்ற பாடங்களையும் நினைவில் வைத்துக்கொண்டு, அதன் அடிப்படையில் பல்வேறு சிந்தனைகளை வளர்த்துக்கொண்டு செயல்படுவதும் அவசியமாகும்.

    “கடந்தகால தகவல்களை நினைவில் நிறுத்தி செயல்பட்டால்தான் வாழ்க்கையில் உயர்ந்த நிலையை அடைய முடியும்” என்பதால் பள்ளி பருவத்திலேயே முறைப்படி பாடங்களை படித்து நினைவாற்றல் கலையை வளர்த்துக் கொள்வது மாணவ – மாணவிகளின் அடிப்படை கடமையாகும்.

    பள்ளி – கல்லூரிகளில் படிக்கும்போது பல்வேறு திறமைகளை மாணவ – மாணவிகள் வளர்த்துக்கொள்ள வாய்ப்புகள் வழங்கப்படுகின்றன. இருந்தபோதும் அவர்களின் நினைவுக்கலையை வளர்ப்பதற்கான பயிற்சிகள்தான் இந்தக் கல்வி நிலையங்களில் மிக அதிகமாக வழங்கப்படுகிறது.

    “நினைவுக்கலை” என்பது ஒரேநாளில் கற்றுக்கொள்ளக்கூடிய வித்தை அல்ல. இந்தக்கலையை நாள்தோறும் முறையான பயிற்சி மூலமே வளர்த்துக் கொள்ள இயலும்.

    “உலகம் நம் உள்ளங்கையில்” என்று சொல்வார்கள். உலகத்திலுள்ள அனைத்துத் தகவல்களையும், செய்திகளையும் மிக அதிகமாக தெரிந்துகொண்டு அதனை சரியான நேரத்தில் நினைவுக்குக்கொண்டுவந்து வாழ்க்கைக்கு ஏற்றவாறு பயன்படுத்திக் கொண்டவர்கள் எளிதில் வெற்றி பெறுகிறார்கள். சிறந்த புகழும் பெறுகிறார்கள்.

    இளம் வயதில் பள்ளி – கல்லூரிகளில் பயிலும்போது வாழ்க்கைக்கு வேண்டிய கருத்துக்களையும், தகவல்களையும் எவ்வாறு சேகரிக்க வேண்டும்? என்னும் கலையை கண்டிப்பாகக் கற்றுக்கொள்ள வேண்டும். அப்போதுதான் வாழ்க்கை மனமகிழ்ச்சியும், மனநிறைவும் கொண்டதாக அமையும்.

    படிக்கின்ற காலத்தில் படிப்பதன் நோக்கத்தை தவறாகப் புரிந்து கொண்டவர்களால் சரியான முறையில் தங்கள் படிக்கும் பழக்கத்தை அமைத்துக் கொள்ள முடிவதில்லை. இதனால் பாடத்தில் கவனம் இல்லாமலும், படிப்பில் ஆர்வம் குறைந்தும், மனவேதனையோடு பள்ளி – கல்லூரிகளில் காலத்தை கடத்தும் மாணவ – மாணவிகளும் உண்டு.

    படிப்பதன் நோக்கம் என்ன? என்பதை முதலில் தெளிவாக்கிக் கொள்ள வேண்டும். “பண்புகளை வளர்த்துக் கொள்வதற்கும், அறிவை பெருக்கிக் கொள்வதற்கும், தேவையில்லாத பழக்கங்ளை நீக்கிக் கொள்வதற்கும், ஆளுமையை மேம்படுத்துவதற்கும் முழுமையாகப் பயன்படுவதுதான் படிப்பதன் முக்கிய நோக்கம்” – என்பதை பள்ளிப் பருவத்தில் அறிந்து கொண்டவர்கள் தங்கள் படிக்கும் பழக்கத்தை நெறிப்படுத்திக் கொள்கிறார்கள்.

    எவ்வாறு படிக்க வேண்டும்? என்பதை அறிந்துகொள்வது தான் படிக்கும் பழக்கத்தின் முதல்படி ஆகும். ஒவ்வொரு மாணவரும் ஒவ்வொரு விதமாக தங்களின் கற்றுக்கொள்ளும் திறனை வளர்த்துக் கொள்கிறார்கள். வெவ்வேறு விதமான படிக்கும் பழக்கத்தை நடைமுறைப்படுத்தி “கற்றல்” (Learning) கலையை வளர்த்துக் கொள்ள முயற்சி செய்கிறார்கள். தான் கற்கும் முறை சரியானதுதானா? என்பதுகூட தெரியாமல் சில மாணவ – மாணவிகள் பள்ளிகளில் பாடங்களை படிப்பதும் உண்டு. எனவே முறைப்படி கற்கும் கலையைப்பற்றித் தெரிந்துகொள்வது அவசியமாகும்.

    ஒரு நிகழ்வில் இருந்துகூட பாடத்தை கற்றுக்கொள்ள முடியும். அதேபோல் விளையாட்டாக விளையாடும்போதும் பாடங்களைக் கற்றுக்கொள்ளலாம். குறிப்பாக – நாம் பார்க்கும் பார்வைகள் (Sight), கேட்பவைகள் (Hearing), செய்யும் செயல்கள் (Doing) ஆகியவற்றின்மூலம் பாடங்களைக் கற்றுக் கொள்ளலாம்.

    “மெய்”, “வாய்”, “கண்”, “மூக்கு”, “செவி” – என்னும் இந்த ஐம்புலன்களும் (Five Senses) நம்மைச் சுற்றி நடக்கின்ற பல்வேறு தகவல்களை நம் மனதினுள் கொண்டுவருகிறது. இந்தத் தகவல்களை முறைப்படுத்தி தேவையானவற்றை மட்டும் உள்வாங்கும் பழக்கத்தை வழக்கமாக்கிக் கொண்டால் படிக்கும் காலத்திலேயே “நெறிவாழ்க்கை” வாழ்வதற்கான பயிற்சியை எளிதாகப் பெற்றுவிடலாம்.

    “பார்த்தல்”, “கேட்டல்”, “செய்தல்” – ஆகிய 3 முறைகளையும் பயன்படுத்தி முறையாக கல்வி கற்க வேண்டும்.

    “பார்த்தல்” எனப்படும் “பார்வை” என்பதுதான் கற்பவருக்கு அவர் படித்தத் தகவல்களை எளிதான முறையில் நினைவில் கொண்டுவருவதற்கு உதவுகிறது. எனவே பாடத்தை கவனமுடன் படிக்கும்போது எவற்றையெல்லாம் படிக்க வேண்டும்? என்பதை மனதிற்குள் முதலில் காட்சிப்படுத்திக் (Visualisation) கொள்ள வேண்டும்.

    “காட்சிப்படுத்துதல்” என்பது செய்யவேண்டிய செயல்களை மனக்கண்ணில் கொண்டுவந்து ஒவ்வொன்றாக சிந்தித்து பார்ப்பது ஆகும். உதாரணமாக – “இன்று மாலை படிக்க வேண்டும்? என்று நீங்கள் திட்டமிட்டிருந்தால் காட்சிப்படுத்துதல் முறையில் இதனைப்பற்றி இப்படி கீழ்க்கண்டவாறு சிந்திக்கலாம்.

    நான் பள்ளியைவிட்டு 4 மணிக்கு வீட்டுக்கு புறப்பட வேண்டும். சைக்கிளில் வீட்டிற்குச் செல்லும்போது மணி 4.30 ஆகிவிடும். முகம் கழுவ வேண்டும். அம்மா டீ தருவார்கள். அதனை சாப்பிட்டு முடிக்கும்போது மணி 5 ஆகிவிடும். அதன்பின்னர் முதலில் ஆங்கிலம் பாடத்தை படிக்கவேண்டும். ஆங்கிலப் பாடத்தை படித்தபின்பு அறிவியல் பாடத்தை முடிக்க வேண்டும். பின்பு “ஹோம் வொர்க்”கை செய்துமுடிக்க வேண்டும். இரவு 7 மணி வரை படித்தபின்பு கொஞ்சநேரம் டி.வி. பார்க்க வேண்டும் 7.30 மணிக்கு சாப்பிட்டுவிட்டு செய்தித்தாள்கள் படிக்கவேண்டும். சாப்பிடும்போது அம்மாவிடமும், தங்கையிடமும் இன்று நடந்த செய்திகளைக் கேட்டுத் தெரிந்துகொள்ள வேண்டும். 8.30 மணியிலிருந்து 10.30 மணிவரை மீண்டும் பாடங்களைப் படிக்க வேண்டும்” – என்று காட்சிப்படுத்துதல் முறையில் முன்கூட்டியே திட்டமிட்டுக்கொள்ள வேண்டும்.

    ஒரு திரைப்படத்தில் அடுத்தடுத்து வரும் நிகழ்வுகள்போல செய்யவேண்டிய பணிகளை முறைப்படுத்தி மனதிற்குள் முன்கூட்டியே திட்டமிட்டுக் கொள்வதைத்தான் “காட்சிப்படுத்துதல்” என அழைப்பார்கள்.

    படிப்பது மட்டுமல்ல, எந்தவொரு செயலில் ஈடுபட்டாலும் “காட்சிப்படுத்துதல்” அந்த செயல் வெற்றிக்கு அடித்தளமாக அமையும். செய்ய வேண்டிய செயல்களை காட்சிப்படுத்துதல் மூலம் முன்கூட்டியே திட்டமிட்ட பின்பு அதனை நடைமுறைப்படுத்துவது எளிதாகும்.

    காட்சிப்படுத்துதலை அடுத்து எப்படி படிக்க வேண்டும்? என்பவற்றையும் தெளிவாக சிந்தித்து செயல்பட வேண்டும். படிப்பதற்காக நேரம் ஒதுக்கி வீட்டில் படிக்கும் நேரத்தில் தேவையான நோட்டுப் புத்தகங்களை அருகில் வைத்துக்கொள்ள வேண்டும். இல்லையென்றால் தேவையான புத்தகங்களும், நோட்டுகளும் எங்கே இருக்கிறது? என்பதை கண்டுபிடிக்கும் விதத்தில் “தேடுதல் வேட்டை”யில் ஈடுபட வேண்டிய சூழல் உருவாகிவிடும்.

    வகுப்பில் பாடவேளையில் எடுக்கப்பட்ட குறிப்புகளைக் கொண்ட நோட்டுகளையும் அருகில் வைத்துக் கொள்ள வேண்டும். அந்த குறிப்பு நோட்டுகளில் குறிக்கப்பட்ட மிகவும் முக்கியமான குறிப்புகளை மட்டும் கலர் பென்சில் கொண்டு அடிக்கோடு இட்டுக்கொள்ள வேண்டும். இதன்மூலம் முக்கியக் குறிப்புகளை மனதில் எளிய முறையில் பதியச் செய்யலாம்.

    வகுப்பில் ஆசிரியர்கள் நடத்திய பாடங்களையும் காட்சிப்படுத்துதல் முறையில் அடிக்கடி நினைவுக்குக் கொண்டுவர வேண்டும். தேவையான இடங்களில் படங்கள் வரையவும், வரைபடங்களை பயன்படுத்தவும் பயிற்சிகள் மேற்கொள்ளலாம். சிலவேளைகளில் பாடங்கள் பற்றிய தெளிவான குறிப்புகள் கிடைக்கவில்லையென்றால் இண்டர்நெட்டை பயன்படுத்தி இணையதளங்கள் மூலம் படிக்கும் பாடத்திற்கு உதவும் வகையில் அதிக தகவல்களை அதிகமாக சேகரித்துக் கொள்வதன் மூலமும் பாடங்களை எளிதில் கற்க இயலும்.

    சிறந்த முறையில் படிப்பதற்கு உதவும் வகையில் பல்வேறு ஆடியோ சி.டிக்கள் (CD) வெளிவந்துள்ளன. அதைப்போலவே வீடியோ சி.டி.க்களும் வெளியிடப்பட்டுள்ளன. பாடத்தை எளிதாக கற்கும் வகையில் அந்தவகை சி.டி.க்கள் உதவுவதால் அவைகளையும் பயன்படுத்தி கற்பதற்கு முயற்சிகள் மேற்கொள்ள வேண்டும்.

    தனியாக இருந்து அறையில் படிக்கும்போது படித்தவற்றை திரும்ப ஒருமுறை புத்தங்களைப் பார்க்காமல் சொல்லிப்பார்த்து நினைவாற்றலை வளர்க்கலாம். மேலும் நெருங்கிய வகுப்பு நண்பர்களை சந்தித்தும் தான் படித்த பாடங்களை அவர்களோடு பகிர்ந்துகொண்டு பாடம் சம்பந்தப்பட்ட மேலும் பல தகவல்களை பெறுவதற்கு முயற்சிகள் மேற்கொள்ள வேண்டும்.

    வகுப்பில் ஆசிரியர்கள் சிலவேளைகளில் குழு விவாதம் (Group Discussion) மூலம் பாடங்களை கற்றுக்கொள்வதற்கான வாய்ப்புகளை வழங்குவார்கள். அந்தவேளைகளில் ஆர்வத்தோடு மற்ற குழு உறுப்பினர்களோடு சேர்ந்து கருத்துக்களை பரிமாறுவதற்கும், முரண்பாடுகள் இல்லாமல் மற்ற குழு உறுப்பினர்களோடு பழகுவதற்கும் கற்றுக்கொள்ள வேண்டும். குழு விவாதத்தின்போது ஒருவர் தனது பகுப்பாய்வு திறனையும் (Analytical Skill), முடிவெடுக்கும் திறனையும் (Decision Making Skill), பிறறோடு இணைந்து பழகும் திறனையும் (Interpersonal Skill) வளர்த்துக் கொள்வதற்கு அருமையான வாய்ப்புகள் இருக்கிறது என்பதை உணர்ந்து கொண்டு குழு விவாதத்தில் பங்குகொள்ள வேண்டும். அப்போதுதான் அறிவாற்றலையும், மற்றவர்களோடு பிரச்சினை இல்லாமல் இணைந்து பழகும் திறனையும் வளர்க்க இயலும்.

    அறையில் ஒரே இடத்தில் அமர்ந்து தொடர்ந்து பல மணிநேரங்கள் படிக்கும்போது களைப்பு ஏற்படலாம். இந்தக் களைப்பைப் போக்குவதற்கு இடையிடையே எழுந்துநின்று கொள்ளலாம். சிலவேளைகளில் புத்தகத்தை மூடிவைத்துக் கொண்டு அங்கும் இங்குமாக கொஞ்சநேரம் நடந்தும் வரலாம். தொடர்ந்து படிக்கும்போது ஏற்படும் களைப்பை நீக்குவதற்கு இடையிடையே இடைவெளிவிட்டு (Breaks) படிப்பது நல்லது.

    படித்த பாடங்கள் எளிதில் நினைவில் நிற்கும் வகையில் படித்தவற்றை தனியாக ஒரு நோட்டுப் புத்தகத்தில் எழுதிப்பார்ப்பது நல்லது. இதேபோல் அறிவியல் பாடங்களில் உள்ள சோதனைகளை (Experiments) வீட்டில் தனியாக செய்து பார்த்து அந்தப் பாடம் பற்றி மேலும் கற்றுக்கொள்ள முயற்சிசெய்ய வேண்டும்.

    படிப்பது என்பது நினைவுக்கலையை வளர்ப்பதற்கான ஒரு பயிற்சி என்பதை புரிந்துகொண்டவர்கள் சிறுவயது முதலே பாடங்களை ஒழுங்காகப் படிக்க ஆரம்பித்துவிடுவார்கள் என்பதுதான் கல்வியாளர்களின் கருத்தாகும்.

    மனதை ஒருமுகப்படுத்தவும், திறமைகளை வளர்க்கவும், வாழ்க்கையை வளப்படுத்தவும் கல்விதான் மிகப்பெரிய துணை என்பதை அனைவரும் புரிந்துகொண்டு செயல்பட்டால் வாழ்க்கையில் வெற்றிகள் குவியும்.

    இந்த மாத இதழை EBook வடிவத்தில் படிக்க – Click