– 2012 – December | தன்னம்பிக்கை

Home » 2012 » December (Page 2)

 
  • Categories


  • Archives


    Follow us on

    மர்மமாய் இருக்கும் மனசு – 3

    மனதின் மகத்தான ஆற்றலை இன்று மனிதர்கள் பயன்படுத்தத் தெரியாமல், மருகிக் கொண்டு இருக்கின்றார்கள். அவர்களின் மயக்கத்தை, அச்சத்தை பயன்படுத்திக் கொண்டு இன்றைக்கு எத்தனையோ வியாபாரிகள் கிளம்பி ‘மனதைக் கட்டுப்படுத்தலாம்’, ‘மனதை வெல்லலாம்’, ‘மனதை வளப்படுத்தலாம்’, ‘மன அமைதி பெறலாம்’ என்று மனிதர்களைப் பாடாய்படுத்திக் கொண்டு இருக்கின்றார்கள்.
    மனக்குறை ஏதுமின்றி ஒருகாலத்தில் மகிழ்வாய் வாழ்ந்து வந்த மனிதன், இன்று அவனுக்குள் ஆசைகள் பெருகப்பெருக, தேவைகள் அவனைத் திண்ணத் தொடங்கியதால், திக்குத்தெரியாத காட்டிற்குள் விழிபிதுங்கிச் செய்வதறியாத சிறுபிள்ளையாக, தேம்பித்தேம்பி அழத்தொடங்கிவிட்டான். இதனால் அவனுள் என்ன நேர்ந்தது?
    ‘மன எரிச்சல், மனமுடைதல், மன பேதலிப்பு, மனப்பிராந்தி, மனப்பிரமை, மன மயக்கம், மனப்பால் குடித்தல், மனப் பதற்றம், மன நெருடல், மன நடுக்கம், மனப்புழுங்கல், மன நோகல், மன ஏக்கம், மனத்தளர்வு, மனத்துயர், மனத்தாங்கல், மனத்தளர்ச்சி, மனச்சோர்வு, மனச் செருக்கு, மனச்சலிப்பு, மனச் சஞ்சலம், மனங்கோணுதல், மனக்கொதிப்பு, மனம் கூசுதல், மனங்குத்துதல், மனக்கோளாறு, மனக்குறை, மனக்குழப்பம், மனக்குருடு, மனக்கிளர்ச்சி, மனக்காய்ச்சல், மனவருத்தம், மனப்பிளவு, மனக்கவலை, மன மயக்கம், மனக்கடுப்பு, மனக்கசப்பு… என்று மனதோடு சம்பந்தப்பட்ட மனநோய்கள் ஏராளம்.
    அப்பப்பா, என்ன இது, இத்தனையும் போதாதென்று இன்னும் புதுதி புதிதாக கிளம்பி வந்துகொண்டே இருந்தால், பாவம் இந்த மனிதன் என்ன தான் செய்வான். பைத்தியம் பிடிக்காத குறையாகப் பரிதவித்துக்கொண்டு இருக்கின்றான். இதிலிருந்து தப்பிக்க, தன்னைக் காத்துக்கொள்ள அவன் ஏதாவது ஒரு முயற்சி எடுக்க வேண்டித்தான் உள்ளது. அந்த முயற்சி முட்டாள்தனமாக இருந்தால் கூட அவன் அதைப்பற்றிக் கவலைப்படுவதில்லை. அதிலும் பலர், தற்போதைக்கு ரிலீஸ் ஆனால் ‘போதும்பா’ என்கிற முடிவிற்கு வருவதுதான் அபத்தமானது.
    முள்ளை முள்ளாளே எடுப்பதுபோல, மனதை, மனதால் தான் கண்டுபிடிக்க முடியும் என மனதார அதைத் தேடிப்போனேன். மனம் பற்றிய ஆய்வு இன்று, நேற்று தோன்றியதல்ல, மனிதன் என்றைக்குச் சிந்தனை வயப்பட்டானோ, அன்று தொன்றுதொட்டே தோன்றலானது. என்றாலும், இன்னும் அதை முழுமையாக அறிந்த பாடில்லை.

    தொன்றுதொட்டு வரும் ஒருசில மனக்கருத்துக்கள்:
    ஒன்றறிவு அதுவே உற்றறிவு
    (Touching is the first sense)
    இரண்டறிவு அதுவே அதனோடு நாவே
    (Taste is the second sense)
    மூன்றறிவு அதுவே அற்றொடு முக்கே
    (Smell is the third sense)
    நான்கறிவு அதுவே அவற்றொடு கண்ணே
    (Sight is the fourth sense)
    ஐந்தறிவு அதுவே அவற்றொடு செவியே
    (Sound is the fifth sense)
    ஆறறிவு அதுவே அவற்றொடு மனமே
    (Mind is the sixth sense)

    மனம் என்பது மனிதனின் ஆறாவது அறிவு என்றார் தொல்காப்பியர்.

    “மனத்துக்கண் மாசிலன் ஆதல் அனைத்தறன்
    ஆகுல நீர பிற”
    “தனக்குவமை இல்லாதான் தாள்சேர்ந்தார்க் கல்லால்
    மனக்கவலை மாற்றல் அரிது”
    என்று மனம் குறித்து வள்ளுவம் பேசுகிறது.

    “மனமென்னும் பெண்ணேÐ
    ஒன்றையே பற்றி ஊசலாடுவாய்
    அடுத்ததை நோக்கி யடுத்தடுத் துலவுவாய்
    நன்றையே கொள்ளெனிற் சோர்ந்துகை நழுவுவாய்
    விட்டுவி டென்றதை விடாதுபோய் விழுவாய்
    தொட்டதை மீள மீளவுந் தொடுவாய்
    புதியது காணிற் புலனழிந் திடுவாய்
    புதியது விரும்புவாய், புதியதை அஞ்சுவாய்;
    பழமையாம் பொருளிற் பரிந்துபோய் வீழ்வாய்
    பழமையே யன்றிப் பார்மிசை யேதும்
    புதுமை காணோமெனப் பொருமுவாய், சீச்சீÐ
    பிணத்தினை விரும்புங் காக்கையே போல
    அழுகுதல், சாதல், அஞ்சுதல் முதலிய
    இழிபொருள் காணில் விரைந்ததில் இசைவாய்
    இன்பமென் றெண்ணித் துன்பத்து வீழ்வாய்
    தன்னை யறியாய் சகத்தெலாந் தொளைப்பாய்
    சகத்தின் விதிகளைத் தனித்தனி அறிவாய்
    பொதுநிலை அறியாய், பொருளையுங் காணாய்
    நின்னொடு வாழும் நெறியுநன் கறிந்திடேன்;
    நின்னை மேப்படுத் திடவே
    முயற்சிகள் புரிவேன்; முத்தியுந் தேடுவேன்
    – பாரதி

    இப்படி மனங்குறித்து பேசிய மகாகவி கூட
    “துணிவெளுக்க மண்ணுண்டு
    தோல்வெளுக்க சாம்பலுண்டு
    மணிவெளுக்க சாணையுண்டு
    மனம்வெளுக்க வழியில்லையே”
    என்று வருந்தியவன் தான்
    “பேயா யுழுலுஞ் சிறுமனமே
    பேணா யென்சொல் இன்றுமுதல்
    நீயா யொன்றும் நடாதே
    நினது தலைவன் யானேகாண்”
    என்று மனதின் மண்டையில் நறுக்கென்று குட்டுவதும், மேலும் முத்தாய்ப்பாக அவர் முடிப்பதைப் பாருங்கள்.
    “சித்தினியன்பு மதன்பெருஞ் சக்தியின்
    செய்கையுந் தேர்ந்துவிட்டால் – மனமேÐ
    எத்தனை கோடி இடர்வந்து சூழினும்
    எண்ணஞ் சிறிது முண்டோД என்று முடிக்கின்றார்.
    பாரதிக்குப் பின் வந்த கண்ணதாசனோ, பாமரனுக்கும் கூட புரியும்படி, மனம் என்றால், இதுதாண்ட என்கிற பாடத்தை நடத்திவிட்டுப் போய்விட்டார்.
    “மனித ஜாதியில் துயரம் யாவுமே
    மனதினால் வந்த நோயடாД
    என்றவன்,
    “மனமிருந்தால் பறவைக் கூட்டில்
    மான்கள் வாழலாம்
    வழியிருந்தால் கடுகுக்குள்ளே
    மலையைக் காணலாம்
    துணிந்துவிட்டால் தலையில்
    எந்தச் சுமையும் தாங்கலாம்”
    என்று மனத்தின் மகத்தான ஆற்றல் குறித்து பேசியவர் முடிவில்,
    “உன்னையறிந்தால் நீ உன்னையறிந்தால்
    உலகத்தில் போராடலாம்
    உயர்ந்தாலும் தாழ்ந்தாலும்
    தலைவணங்காமல் நீ வாழலாம்”
    என்று மிகப்பெரிய உண்மையை சர்வசாதாரணமாகச் சொல்லிவிட்டுப் போனார். காட்டு மிராண்டியாய் அலைந்து திரிந்த மனிதன், என்றைக்கு ஒரு வரைமுறைக்குள் கட்டுப்பட்டு வாழத் தொடங்கினானோ, அன்றைக்கே உருவானதுதான் இந்த மனம்.
    இந்த மனம் என்னும் மந்திரகோல் செயல்படத் தொடங்கிய பின்தான் பல நவீன மாற்றங்கள் உலகில் தோன்றலாயின. அதன் உச்சகட்ட நிலைதான் இன்றைய நவநாகரிக உலகின் வெளிப்பாடு என்றால் அது மிகையாகாது. அப்படிப்பட்ட மனத்தைக் குறித்து அகராதியில் உள்ள விளக்கம் என்னவென்று அறிந்துகொள்ள அடுத்த இதழ்வரை காத்திருங்கள்…

    இரகசியம்

    வெற்றியின் இரகசியம் என்ன? தோல்விக்கான இரகசிய காரணம் என்ன? என்றெல்லாம் நிறைய முறை நிறைய பேர்கள் பேசி கேட்டிருக்கின்றோம். வெற்றி தோல்விகளின் வெளிப்படையான முகங்களுக்குப் பின்னணியில் இரகசியங்கள் புதைந்து கிடக்கின்றன என்று நிறைய பேர் நம்புகின்றனர். “சாவகாசமாக யோசியுங்கள்! எக்கச்சக்கமாக சாதியுங்கள்!” என்றொரு என்று ஒரு புத்தகம் (Think Lazy Grow Rich by John Ruck) படித்தோம். தொடர் முயற்சி, கடின உழைப்பு, சிரமமான வாழ்வு என்பதைப் பற்றி இருந்த கற்பனைகளை எல்லாம் கரைந்து போகச் செய்கின்ற புத்தகம்.

    அடுத்த விநாடி என்கின்ற நாகூர் ரூமி அவர்களின் புத்தகத்தில் சொல்லியிருந்த மாதிரி வெற்றி பெற வேண்டுமெனில், தோல்வி அடைய உழைக்கின்ற அளவில் பாதி அளவு பணி செய்தாலே போதும். நாம் சொல்கின்ற இரகசியம் என்ற வகைப்பாட்டில் இந்த தகவல்கள் சேருமா? சேராதா? என்பது ஒரு கேள்வி. சேர்ந்தாலும் அதை சொன்னால் புரியுமா? என்பது மற்றொன்று…… பதிலாக பிறந்திருக்கிறது இக்கட்டுரை…..

    இரகசியங்களை சற்றே நெருக்கமாக கையிலெடுத்துப் புரட்டிப் பார்க்கின்றோம். இரண்டொரு நாட்களுக்கு முன்பு நைனாமலை என்று நாமக்கல் அருகிலிருக்கின்ற ஒரு மலை மீது ஏறுகின்ற வாய்ப்பு கிடைத்தது. மேலே செல்கையில் மனது இலேசானது. அந்த அனுபவம் அலாதியானது. நிறைய இடங்களில் மலையேறுவதற்கான வாய்ப்புக்களை நம் முன்னோர்கள் எற்படுத்திக் கொடுத்துள்ளனர். ஒரு தேர்வுக்குத் தயாராவதும் மலை ஏறுவதைப் போன்றது தான். நைனாமலை ஒரு ஆயிரம் படிகளுக்கு அருகே கொண்டிருக்கும் போல, வழி நெடுகிலும் வானரங்களின் பாசப் பிணைப்பு வேறு…….. உடன் ஒரு பைரவர் பயணம் செய்தார். பஞ்ச பாண்டவர்கள் சொர்க்கத்திற்குப் பயணிக்கையில் உடன் ஒரு நாயும் சென்றது என்று புராண கதையொன்று உண்டு அதுபோல இந்த நாய் எங்களுடன் உச்சி வரை இலவச பாதுகாப்பு சேவையை வழங்கி வந்தது. ஆந்திர மாநிலம் குண்டூரில் பணபுரிகின்ற பழைய கல்லூரி நண்பன் திடீரென இரண்டு நாட்கள் முன்பு சொன்ன செய்தியில் நைனாமலை இடம் பெற்றிருந்ததால் சந்தோஷம் கரைபுரள நான்கு மணிக்கெல்லாம் எழுந்து ஐந்தரை மணிக்கு மலையடிவாரத்தில் நண்பனுக்காக காத்திருக்கத் தொடங்கினோம். பன்மையில் சொல்வதற்கு காரணங்கள் இருக்கின்றன. வானரங்கள் பதினைந்தும் பைரவர்கள் இருவரும் என்னோடு சேர்ந்து கொண்டன. அச்சம் மனதின் ஓரத்தில் எட்டிப் பார்த்து, துணைக்கு வராவா? என்று கேட்டபொழுது, பரவாயில்லை கால்நடை மருத்துவம் படித்திருக்கின்றேனில்லையா? இதற்கு முன்பு இவ்வளவு சுதந்திரமான பிராணிகளோடு எப்போது அளவளாவி இருக்கின்றோம்! என்று உள்மனம் கேள்வி கேட்டது. குரங்கொன்று என்னுடைய தோள் பைக்குள் என்ன இருக்கின்றது? அது தனியுடைமையா? பொதுவுடைமையா? என்று கேள்வி கேட்பதுபோல அசைந்தாடியது……… பல்லவி ஐயர் என்று ஒரு பத்திரிக்கையாளர் எழுதிய “விலகும் திரை…… சீனா” என்கின்ற நல்லதொரு புத்தகத்தை இரண்டொரு வாரம் முன்பு முழு ஞாயிற்றுக்கிழமையை முதலீடு செய்து முடித்தேன் (முனாவிற்கு முனா?) அற்புதமான ஒன்று. சீனா எப்படி இருபது வருடங்களில் பொருளாதாரப்புரட்சி செய்துள்ளது….. அவர்கள் அதற்காகக் கொடுத்த விலை என்ன? என்றெல்லாம் விலாவாரியாக விவரித்தது இப்புத்தகம். தமிழாக்கம் செய்த பாங்கை எவ்வளவு பாராட்டினாலும் தகும்….. சில தமிழ் பண்பாட்டுக்கு உவந்த உவமைகளை…. அட்சரம் பிசகாமல் உணர்ந்து அனுபவிக்கின்ற வண்ணம் தமிழாக்கியிருந்தார் திரு.இராமன் இராஜா இரகசியங்களை புரட்டிப் பார்க்க தொடங்கியபொழுதுதான் நைனாமலை வழியே சீனா சென்றடைந்துவிட்டோம்…. திரும்ப வருவோம்.

    ஒரு சாதாரண பொருளுரையாக நிறைய பேருக்கு தெரியாத ஒன்றை இரகசியம் என்று விளக்கம் தரலாம். நண்பர்கள் சிலர் இதை வேறு யாரிடமும் சொல்லி விடாதீர்கள்? என்று ஒரு நிபந்தனையோடு சொல்லத் தொடங்குகையில், சங்கடம் மனதை வியாபிக்கின்றது. ஏனெனில் அதே நிபந்தனையோடு கிட்டத்தட்ட ஆறேழு நண்பர்கள் அதே விஷயத்தை வேறு வேறு வண்ணத்துடன் சொல்லியிருப்பார்கள். இரகசியங்கள் கற்பனைக் கதவுகளின் படைப்பாற்றல் பூட்டின் உருவத்திற்கு ஏற்ப பல நேரங்களில் படியெடுக்கப் படுகையில் படிப்படியாக தோற்ற மாற்றம் அடைகின்றன.

    பரம இரகசியங்கள் பல்வேறு மனதுகளில் மீண்டுவராத அளவு ஆழ் துயில் கொண்டுள்ளன. இதுவரை! திரையிடும் மணலினும் பலரே! என்று சங்க இலக்கியம் சொல்வதைப் போல கடற்கரையில் இருக்கின்ற மணல் துகளினும் அதிகமான மக்கள் இப்பூவுலகில் வாழ்ந்து முடித்துள்ளனர், வாழவும் போகின்றனர். அவர்களின் உள்ளங்களுக்குள் எவ்வளவோ இரகசியங்கள் எப்படித்தான் உறங்கிப் போயிருக்கும்? என்று யோசிக்கையில் பிரமிப்பாக இருக்கின்றது.

    இரகசியங்களின் எடையை கிலோ கணக்கில் அளந்து பார்க்க முடியும் என்றால் – எவ்வளவு வரும்? எது அதிகமானது? எது குறைவானது?குடும்ப இரகசியம், தொழில் இரகசியம், தொழில் நுட்ப இரகசியம், இராஜ இரகசியம், அதீத இரகசியம், என்று ஆயிரக்கணக்கான வகைகளோடு வாழ்ந்து வருகின்றன ஆண்டாண்டு காலமாக இரகசியங்கள்.

    கடவுள் வாழ்வின் அமைதிக்கான இரகசிய வழியை எங்காவது மறைத்து வைக்கவேண்டும் என்று விரும்பி ஆழ்ந்த சீராய்விற்குப் பிறகு அதனை அவரவர் உள்ளங்களுக்கு உள்ளேயே புதைத்துவிட்டதாகவும், மனித இயல்புக்கு ஏற்ப மனிதர்கள் இரகசியங்களை தமக்கு வெளியிலேயே தேடிக்கொண்டு இருப்பதாகவும் அறிஞர் ஒருவரது புத்தகத்தில் படிக்க நேர்ந்தது. நிதர்சனமான உண்மை.

    தன்னை அறியும் அறிவை அறிந்தபின் தன்னையே அர்ச்சிக்கத் தானிருந்தானே? என்கின்றார் திருமூலர். மூவாயிரம் வருடம் வாழ்ந்ததாக குறிப்பிடப்படும் இவர், தன்னை அறிவதே பெரிய இரகசியம் என்கிறார். ஆரோக்கியத்தின் இரகசிய வழி உடற்பயிற்சி, மலையேறுதல் மனதிற்கு மகிழ்வு தரும் என்பது ஒரு இரகசியம், உணவுத் தேர்வு உடல்வளமைக்கு உன்னதமான இரகசிய பாதை, அதிகாலை ஆற்றலான உடலுக்கு அற்புத இரகசியம், அன்றே படித்தல் மாணவர்கட்கு மனப்பாட இரகசியம், பன்முக வெளிப்பாடு மனிதர்களுக்கு மனவள இரகசியம், கவலைகளை இதயத்திலிருந்து இறக்கி வைத்துக் கொண்டு மூளைக்கு ஏற்றுமதி செய்தல் மூப்பின்மையின் இரகசியம், என்று இவ்வளவு இரகசியங்களும் வெளிப்படையானவையே. அடிப்படையான இரகசியங்கள் அப்பட்டமாக வெளிப்படையாக தெரியக் கூடியவையே.
    தொடரும்…

    மீண்டும் அதிபராகிறார் ஒபாமா

    உலக வல்லரசு நாடான அமெரிக்காவின் இப்போதைய அதிபர் ஒபாமா (51) மீண்டும் அதிபராக தேர்ந்தெடுக்கப்பட்டுள்ளார். சென்ற மாதம் நடைபெற்ற அதிபர் தேர்தலில் ஜனநாயகக் கட்சி சார்பில் மீண்டும் போட்டியிட்டு குடியரசுத் கட்சி வேட்பாளர் மிட்ரோம்னியை தோற்கடித்து அமோக வெற்றி பெற்றிருக்கிறார். கருப்பினத்தைச் சேர்ந்த ஒருவர் தொடர்ந்து இருமுறை அதிபரானது அமெரிக்க வரலாற்றில் இதுவே முதல்முறை. அமெரிக்காவின் 45வது அதிபராக 2013 ஜனவரி மாதம் 21ம் தேதி பதவி ஏற்கிறார்.

    நான்கு ஆண்டுகளுக்கு முன்பு அதாவது 2009ம் ஆண்டு ஜனவரி 20ம் தேதி ‘முதல் கறுப்பின அதிபர்’ என்ற வரலாற்று பதிவுடன் அதிபர் பதவியை ஏற்றுக்கொண்டார் பராக் ஒபாமா. ‘மாற்றம்’ என்ற ஒற்றைச் சொல் மந்திரத்தின் மூலம் கடந்த தேர்தலில் மாயா ஜாலத்தை நிகழ்த்தி அதிபரானார்.

    தற்போது அமெரிக்காவில் மிகப்பெரிய பொருளாதார நெருக்கடி ஏற்பட்டுள்ள நிலையிலும் ஒபாமா மீது நம்பிக்கை வைத்து மக்கள் அவரை வெற்றிபெறச் செய்துள்ளனர். ‘நாம் அமெரிக்க குடும்பத்தைச் சேர்ந்தவர்கள். நாம் ஒன்றாகவே உயர்வோம். ஒன்றாகவே தாழ்வோம்’ என்றும் ‘எனது வெற்றி அமெரிக்கர்களின் வெற்றி’ என்றும் வெற்றி பெற்ற பின்பு ஒபாமா தெரிவித்துள்ளார்.

    பெரும் பணக்காரர்களுக்கு அதிக வரி விதிப்பு என்கிற ஒபாமாவின் திட்டமும், பொருளாதாரத் தேக்கத்தை மாற்ற அரசு தலையிட்டாக வேண்டும் என்கிற அவரின் கருத்தும், “தனியாரும், சந்தையும் பாரத்துக்கொள்ளும், அதில் அரசு தலையிடக் கூடாது” என்கிற ரோம்னியின் கருத்தும், அதிபர் தேர்வின் முடிவுகளில் மிகப்பெரிய தாக்கத்தை ஏற்படுத்தி இருப்பதாக சொல்லப்படுகிறது.
    அனைத்து மாகாண மக்கள் பிரதிநிதிகள் அடங்கிய வாக்காளர் குழுவில் மொத்தம் 535 வாக்குகள் உள்ளன. இவற்றில் 303 வாக்குகள் பெற்று ஒபாமா வெற்றி வாகை சூடினார். அவரை எதிர்த்துப் போட்டியிட்ட மிட்ரோம்னி 206 வாக்குகள் மட்டுமே பெற்றார். அதிபர் தேர்தலில் வெற்றி பெறுவதற்கு 270 வாக்குகளைப் பெற வேண்டும். ஒபாமா அதைவிட 33 இடங்கள் கூடுதலாகப் பெற்று வென்றுள்ளபோதிலும், கடந்த 2008 ஆம் ஆண்டில் அவருக்கு 349 வாக்குகள் கிடைத்தது குறிப்பிடத்தக்கது.

    பத்து சதவிகிதத்திற்கும் அதிகமாக உள்ள லத்தீன் அமெரிக்க வாக்காளர்;களும், கறுப்பர் இனத்தவரும், ஆசிய அமெரிக்கர்களும் பெருவாரியாக அதிபர் ஒபாமாவுக்கு ஆதரவளித்திருக்கிறார்கள். அதிபர் ஒபாமாவை மத்தியதர வகுப்பினரும், அடித்தட்டு மக்களும் ஆதரித்ததற்கு மிக முக்கியமான காரணம், அவர் வேலைவாய்ப்பை அதிகரிப்பார் என்கிற எதிர்பார்ப்பைவிட, சமூகக் காப்பீட்டுச் செலவினங்களைக் குறைக்க மாட்டார் என்பதும், கருக்கலைப்பு, ஒருபால் திருமணம் போன்ற பிரச்னைகளில் எதிர்ப்புக் காட்ட மாட்டார் என்பதும்தான்.

    அமெரிக்காவில் 4 ஆண்டுகளுக்கு ஒருமுறை அதிபர் தேர்தல் நடக்கிறது. அங்குள்ள சட்டப்படி ஒருவர் இரு முறைக்கு மேல் அதிபராக முடியாது. முன்னாள் அதிபர் பில் கிளின்டனும், அவரைத் தொடர்ந்து வந்த புஷ்ஷும் இருமுறை தொடர்ச்சியாக அதிபராக இருந்தனர். அதே சாதனையை தற்போது ஒபாமாவும் படைத்துள்ளார்.

    ஒபாமா கடந்த 4 ஆண்டு ஆட்சி காலத்தில் அவர் சந்தித்த சவால்களும், சாதனைகளும் ஏராளம். அமெரிக்காவுக்கு சிம்ம சொப்பனமாக விளங்கிய அல்கொய்தா அமைப்பின் தலைவர் ஒசாமா பின்லேடனை ஒழித்துக் கட்டியது இவரது சாதனை என்று கூறப்படுகிறது.

    அமெரிக்க வரலாற்றில் தனது முதல் பதவிக்காலத்தில் இந்தியாவுக்கு வந்த முதல் அதிபர் ஒபாமாதான். இந்தியாவுடனான நட்புறவை வலுப்படுத்ததுவதில் ஆர்வமாக இருந்து வருகிறார். ஐ.நா. பாதுகாப்பு கவுன்சிலில் இந்தியாவை நிரந்தர உறுப்பினராக நிரந்தர உறுப்பினராக சேர்க்க வேண்டும் என்று வலியுறுத்தினார். தனது அலுவலகத்தில் ஏராளமான இந்தியர்களுக்கு முக்கிய பொறுப்புகளை கொடுத்துள்ளார். உள்நாட்டு நெருக்கடி காரணமாக இந்தியாவுக்கு அவுட்சோர்சிங் பணி வாய்ப்புகளை வழங்க எதிர்ப்பு தெரிவித்தார் என்பதும் குறிப்பிடத்தக்கது.

    பராக் உசேன் ஒபாமா (Barack Hussein Obama) என்பதுதான் இவரது முழுப் பெயர். இவர் 1961ஆம் ஆண்டு நவம்பர் மாதம் 4ஆம் தேதி ஹவாய் தீவின் ஹோனோலுலுவில் பிறந்தார். தந்தையார் கென்யாவைச் சேர்ந்த பொருளாதார நிபுணர் ஆவார். தாயார் அமெரிக்காவைச் சேர்ந்தவர். ஹவாய் பல்கலைக்கழகத்தில் சந்தித்துக் கொண்ட ஒபாமாவின் பெற்றோர் காதல் திருமணம் செய்து கொண்டனர்.

    ஒபாமாவின் குழந்தை பருவம் பெருமளவு தன் தாத்தா, பாட்டியுடன் கழிந்தது. 1992ம் ஆண்டு மிச்சல் ராபின்சன்-ஐ திருமணம் செய்து கொண்டார். இவர்களுக்கு சஷா மற்றும் மலியா ஆகிய இரண்டு மகள்கள் உள்ளனர். ‘வெள்ளை நிற சிறுவர்களும், கறுப்பு நிற சிறுமிகளும் கைகோர்த்து நிற்கும் நாள் ஒன்று வரும் என்பதே என் கனவு’ என்று மார்டின் லூதர் கிங் 1961ல் கறுப்பர் உரிமைக்குப் போராடிய அந்த காலத்தில் ஒபாமா ஒரு பள்ளிச் சிறுவன்.

    ஒபாமா கொலம்பியா பல்கலைக்கழத்திலிருந்தும் ஹார்வர்ட் சட்டக் கல்லூரியிலிருந்தும் பட்டங்கள் பெற்றவர். அரசியலில் நுழைவதற்கு முன்பு சிகாகோவில் சமுதாய ஒருங்கிணைப்பாளாராகவும், சட்ட வழக்கறிஞராகவும் பணியாற்றி உள்ளார். 1997ல் இலினொய் மாநிலத்தின் சட்டமன்றத்திற்கு தேர்ந்தெடுக்கப்பட்டு 2004 வரை சட்டமன்ற உறுப்பினர் பதவியில் இருந்துள்ளார். சிக்காகோ பல்கலைக்கழக சட்டக் கல்லூரியில்; பேராசிரியராகவும் இருந்திருக்கிறார். 2009ஆம் ஆண்டில் அமைதிக்கான நோபெல் பரிசு ஒபாமாவுக்கு வழங்கப்பட்டது.

    ‘அமெரிக்க ஐக்கிய நாடுகள்’ என்பதுதான் ஆங்கிலத்தில் ‘யு.எஸ்.ஏ.’ என்றும், தமிழில் அமெரிக்கா என்றும் சுருக்கமாக அழைக்கப்படுகிறது. இது ஐம்பது மாநிலங்களும் ஓர் ஐக்கிய மாவட்டமும் கொண்ட குடியரசு நாடாகும். பரந்துபட்ட நிலப்பரப்பைக் கொண்டது. அமெரிக்காவின் வடமுனையான அலாஸ்காவுக்கும், கிழக்கு முனையான ஹவாயிக்கும் 6 மணிநேர வித்தியாசம் உண்டு என்றால் பார்த்துக் கொள்ளுங்கள்.

    அமெரிக்க அதிபர் தேர்தலில் தனது வாக்கை முன்கூட்டியே செலுத்தினார் பராக் ஒபாமா. அமெரிக்க வரலாற்றில், அதிபர் பதவியில் இருப்பவர் தனது வாக்கை முன்கூட்டியே செலுத்துவது இதுவே முதல் முறை. அமெரிக்காவில் வாக்குகளை முன்கூட்டியே செலுத்தும் முறை நடைமுறையில் உள்ளது. தீவிர பிரசாரத்தில் ஈடுபட்டுள்ள ஒபாமா வெர்ஜீனியாவில் இருந்து தனது சொந்த ஊரான சிகாகோவுக்கு விமானம் மூலம் சென்று அங்குள்ள மார்ட்டீன் லூதர் கிங் மையத்தில் உள்ள வாக்குச் சாவடிக்குச் சென்றார். ஓபாமா அதிபர் என்ற போதிலும், அவரை அடையாளபடுத்திக் கொள்வதற்காக ஓட்டுநல் உரிமத்தை வாங்கி சரிபார்த்த பின்னரே அங்கிருந்த பெண் அதிகாரி அவரை வாக்களிக்க அனுமதித்தார். வாக்களித்த பின் தனது வாக்கு முறையாக பதிவாகிவிட்டதை அதிகாரிகளிடம் கேட்டு உறுதிப்படுத்திக் கொண்டார். ‘ஓட்டுநர் உரிமத்தில் உள்ள புகைப்படத்தில் எனது தலை முடி பழுப்பு நிறத்தில் இருக்காது’ என்று அப்போது ஒபாமா நகைச்சுவையாகக் குறிப்பிட்டுள்ளார்.

    அமெரிக்க அதிபரின் அலுவலக கட்டிடம்தான் வெள்ளை மாளிகை என்றழைக்கப்படுகிறது. வெள்ளை மாளிகைக்கு 220 ஆண்டுகளுக்கு முன், அதாவது 1792ஆம் ஆண்டில் அடிக்கல் நாட்டப்பட்டது. முதல் ஜனாதிபதி ஜார்ஜ் வாஷிங்டன் இம்மாளிகையில் வசிக்கவேயில்லை. கட்டிடப் பணிகள் முடியும் முன்பே அவர் காலமாகி விட்டார். 1800ஆம் ஆண்டில்தான் பணிகள் நிறைவடைந்தன. இந்த மாளிகையை வடிவமைத்த பிரதான கட்டிடக் கலைஞர் அயர்லாந்து நாட்டைச் சேர்ந்த ஜேம்ஸ் ஹோவன். இரண்டாவது ஜனாதிபதி ஜோன் அடம்ஸ் வெள்ளை மாளிகையில் முதன் முதலில் குடியேறியவர். 1901ஆம் ஆண்டுதான் அமெரிக்க ஜனாதிபதி மாளிகைக்கு வெள்ளை மாளிகை (ஒய்ட் ஹவுஸ்) என்று அமெரிக்காவின் 26வது ஜனாதிபதி தியோடர் ரூஸ்வெல்ட் பெயர் சூட்டினார்.

    இந்த வெற்றி குறித்து ஒபாமா கூறும் போது ‘மக்களே அதிக சக்தி வாய்ந்தவர்கள் என்பதை நான் ஒவ்வொரு முறையும் நினைவுபடுத்திக் கொள்வேன், நான் அவர்களின் பிரதிநிதி, அவர்களின் சேவகன்’ என தெரிவித்திருப்பது மக்களாட்சியின் மகத்துவத்தை எடுத்துரைப்பதாக உள்ளது.

    இலக்குகளை அடைய 10 வழிகள்

    மனிதனாகப் பிறந்த ஒவ்வொருவருக்கும் வாழ்க்கையில் இலக்கு என்பது அவசியம். இலக்கு இல்லாத மனிதன் மாலுமி இல்லாத படகு போல தத்தளிப்பான். மனிதன் நிர்ணயிக்கும் இலக்குதான் பிற்காலத்தில் அவன் வாழ்க்கையை மாற்றியமைக்கப்போகும் திருப்பு முனை. அதேபோல் இலக்கைத் தேர்வு செய்வதிலும், தேர்வு செய்த இலக்கை அடைவதிலும் மிகுந்த கவனம் செலுத்த வேண்டும். இல்லாவிட்டால், வாழ்க்கையில் தோற்றவர்களின் பட்டியலில் உங்களின் பெயரும் இடம்பெற்றுவிடும்.
    அதற்காக நீங்கள் தேர்ந்தெடுக்கும் இலக்கு மிகப்பெரிய அளவில் இருக்க வேண்டிய அவசியம் இல்லை. எப்போதும் உங்கள் சக்திக்குத் தகுந்ததாகவும், உங்கள் பொருளாதார வசதிக்கு ஏற்றதாகவும் இருக்கும்படி பார்த்துக் கொள்வது சிறப்பு. இப்படி இலக்குகளை வகுத்துக்கொண்டு அதை சிறிது சிறிதாக அடைய முயற்சி செய்யலாம்.
    இங்கே இலக்குகளை வகுத்து அவற்றை அடைவதற்காகப் பயணம் மேற்கொள்ள 10 வழிகளைக் கூறுகிறேன் நிச்சயம் உங்களுக்கு அவை வழிகாட்டும் என்ற நம்பிக்கையில்.
    வழி 1: இலக்கு நிர்ணயித்தல்
    உங்கள் இலக்குகளை ஒரு நோட்டுப் புத்தகத்தில் தெளிவாக எழுதுங்கள். இலக்குகளை எழுதிப்பார்த்து, அவற்றை அடிக்கடி படித்து மனதில் பதிய வைத்துக் கொள்ளுங்கள். அப்படி மனதில் பதிய வைத்தவர்களில் 80 சதவிகிதம் பேர் வெற்றி பெற்றிருக்கிறார்கள் என்று புள்ளி விபரங்கள் தெரிவிக்கின்றன. எனவே உங்களது இலக்குகளையும் எழுதுங்கள். அப்படி நீங்கள் நிர்ணயிக்கும் இலக்கு அளவிடக் கூடியதாகவும், அடையக் கூடியதாகவும், குறிப்பாக குறிப்பிட்ட காலத்திற்குள் முடியக் கூடியதாகவும் இருக்கக் கூடிய “ஸ்மார்ட்”டான இலக்காக நிர்ணயித்துக் கொள்ளுங்கள்.
    வழி 2: திட்டமிடல்
    திட்டமிடத் தவறுவது, தோல்விக்குத் திட்டமிடுவதற்கு ஒப்பாகும். எனவே திட்டமிடல் அவசியம். அப்படி நீங்கள் இலக்குகளை அடைய வகுக்கும் திட்டங்கள் சிறியதாக இருக்கும்படியும், எளிதில் செயல்படுத்தக் கூடிய வகையிலும் வகுத்துக் கொள்ள வேண்டும். மேலும் குறிப்பிட்ட காலத்திற்குள் முடிக்குமாறு திட்டங்களை அமைத்துக் கொள்வதுடன், வகுத்த திட்டத்தை, எழுதி வைத்த இலக்கை மாதம் ஒருமுறை மனதிற்குள் அசைபோட்டுக் கொண்டே இருங்கள்.
    வழி 2: காரணங்களை எழுதுங்கள்
    உங்களுடைய இலக்குகளுக்கான காரணங்களை எழுதுங்கள். அந்த இலக்குகளை அடைவதற்கு உங்களை உந்தும் காரணிகளையும் எழுதி வையுங்கள். அவை உங்கள் மனதிற்கு ஊக்கக் கிளர்ச்சியையும், புத்துணர்ச்சியையும் அளிப்பவையாக இருக்கும்படி பார்த்துக் கொள்ளவும். நீங்கள் ஆழ்ந்து, நுட்பமாக சிந்திக்கும்போது அந்த இலக்குகள் மிகுந்த முக்கியத்துவம் மிகுந்தவையாக இருக்க வேண்டும். இப்படி எல்லா விதத்திலும் உங்களுடைய இலக்குகளைப் பூர்த்தி செய்பவையாகக் காரணங்கள் இருந்தால் மேற்கொண்டு சிறிதும் தாமதம் இன்றி வெற்றியை நோக்கி உங்கள் பயணத்தைத் தொடருங்கள்.
    வழி 4: நேர்மறை எண்ணங்கள்
    நேர்மறையான எண்ணங்களை உள்ளத்தில் உருவாக்கும் பொருட்டு பல புதிய நேர்மறை வாக்கியங்களை உங்களுக்கென்று உருவாக்கி எழுதி வையுங்கள். ‘என்னால் முடியும்’ (I Can) , ‘என்னால் முடியாவிட்டால் வேறு யாரால் முடியும்’ (If not me then Who?), ‘ஒரு வாரத்திற்குள் முடித்துவிடுவேன்’ போன்ற நேர்மறையான எண்ணங்களை உள்ளத்தில் உருவாக்கிக் கொண்டு தன்னம்பிக்கையைக் கொடுக்கக் கூடிய பல புதிய நேர்மறையான வாக்கியங்களை உங்களுக்காகவே உருவாக்கிக் கொள்ளுங்கள். அப்படி உருவாக்கும் வாக்கியங்கள் உங்களது தன்னம்பிக்கையைத் தூண்டச் செய்யுமாறு பார்த்துக் கொள்ளுங்கள்.
    வழி 5: உருவகம் செய்யுங்கள்
    எப்போதும் உங்கள் மனதில் தோன்றும் இலக்குகளை உருவகம் செய்யப் பழகிக்கொள்ளுங்கள். தெளிவாகவும், எளிமையாகவும் கூறினால் கனவு காணுங்கள். நீங்கள் என்னவாக விரும்புகிறீர்களோ அது குறித்து அடிக்கடி மனதில் கற்பனை செய்யுங்கள். முடிவு செய்திருந்த உங்களது இலக்கை அடையும்வரை அந்த நினைப்பு மூச்சில் நிறைந்து, உயிரில் கலந்திருக்கும் படி உருவகம் செய்து கொள்ளுங்கள்.
    வழி 6: செயல்படுதல் / அமல்படுத்துதல்
    இதுவரை சொல்லப்பட்ட நடைமுறைகளை அன்றாட வாழ்க்கையில் அமல்படுத்த காலையில் படுக்கையில் இருந்து எழுந்தவுடனே உங்களுடைய இலக்குகளை மனதில் அசைபோடுங்கள். உற்சாகம் தரக்கூடிய வார்த்தைகளையும், தன்னம்பிக்கை தரக்கூடிய வார்த்தைகளையும் சத்தமாக உரக்க உச்சரித்து இலக்குகளை உருவகம் செய்து பாருங்கள்.
    இதை மட்டும் செய்துவிட்டு முடிந்துவிட்டதாக நினைக்கக்கூடாது. நாள்தோறும், ஏதேனும் ஒரு திட்டம் அல்லது நடவடிக்கையைத் தெளிவாக வகுத்துச் செயல்படுத்துங்கள். மறக்காமல் அவற்றைக் குறித்து வைத்துக் கொள்ளுங்கள். இவற்றையெல்லாம் செய்து முடித்தபிறகு செயலில் இறங்குங்கள். இத்தகைய இலக்கை நோக்கிய பயணத்தில் எத்தகைய சூழ்நிலை வந்தாலும், அன்றைய இலக்கை அடைவதற்கான நடவடிக்கையில் இருந்து சிறிதும் பின்வாங்காதீர்கள்.
    வழி 7: எதிர்மறை எண்ணங்களை நீக்குதல்
    உங்கள் உள்ளத்தில் இருந்து எதிர்மறையான எண்ணங்களை முதலில் துடைத்தெறியுங்கள். மனதில் ஏதாவது ஒரு ஓரத்தில் ஒளிந்திருக்கும் அவைகள் தான் உங்கள் இலக்குகளை அடையும் நோக்கத்தைச் சீர்குலைக்கும் தடைக்கற்கள்.
    நல்ல சிந்தனைகள் உருவாவதற்கும், நம்பிக்கையூட்டும் வாக்கியங்கள் மனதில் நிறைவதற்கும் எதிர்மறை சிந்தனைகளே தடைகளாக இருப்பதால் அவற்றைத் தூக்கி எறிந்துவிட்டு, இலக்கை அடைவதற்குத் துணை செய்யும் நேர்மறை வாக்கியங்களை எப்போதும் மனதில் அசைபோடுங்கள்.
    வழி 8: சவால்களைச் சமாளி
    உங்களுடைய இலக்குகளை அடையும் முயற்சியில் நாள்தோறும் நீங்கள் பல்வேறு சவால்களைச் சந்திக்க நேரும். அப்போது அவற்றை நீங்கள் குறித்து வையுங்கள். அவற்றை நீங்கள் சமாளிக்க மேற்கொண்ட முயற்சிகளை, நடவடிக்கைகளைப் பதிவு செய்யுங்கள். அப்போது நீங்கள் எதிர்கொண்ட தடைகளை வரிசைப்படுத்துவதுடன் அவற்றைத் தகர்க்க மேற்கொண்ட முயற்சிகளையும், பெற்ற வெற்றிகளையும் குறித்து வையுங்கள். ஏனென்றால் வரிசைப்படுத்தும் போது தான், நீங்கள் சந்தித்த தடைகள் எத்தனை? அவற்றை சமாளித்துப் பெற்ற வெற்றிகள் எத்தனை என்பது தெரியும். அப்படி செய்தால் தான் சவால்களைத் தகர்க்க நீங்கள் மேற்கொண்ட வழிகள், கிடைத்த வெற்றிகள் என்பதையெல்லாம் உணர்ந்து அடுத்த கட்டத்திற்கு நீங்கள் செல்ல உதவியாக இருக்கும்.
    வழி 9: நண்பர்களைத் தேர்வு செய்
    ஒவ்வொருவரும் தங்களுடைய இலக்கை அடைவதற்கு நல்ல நண்பர்கள் அவசியம் தேவைப்படுவார்கள். நண்பர்கள் தான் இலக்கை நோக்கிச் செல்வதற்கு உறுதுணையாக இருப்பார்கள். எனவே உங்களுக்கு யார் உந்துதலாக இருக்கிறார்களோ அத்தகைய நண்பர்கள் வட்டாரத்தில் உங்களை இணைத்துக் கொள்ளுங்கள். உங்களால் முடியுமானால், இலக்குகளை அடைவதற்கு மிகச் சரியான வழிகாட்டியான அவர்களைத் தேடிச்சென்று நட்பு பாராட்டுங்கள். உங்களுடைய இலக்குகளை அடைவதற்கு ஊக்கமளிக்கும், உந்துதல் அளிக்கும் காரணியாக இருக்கும் உங்களின் ஆசிரியர், சகோதர சகோதரி, அண்டை வீட்டார் யாராகவும் இருக்கலாம். அவர்களை உங்கள் வழிகாட்டியாக ஏற்றுக்கொண்டு நட்பு பாராட்டுங்கள்.
    வழி 10: பாராட்டிக் கொள்ளுங்கள்
    இலக்கு நோக்கிய பயணத்தில் நீங்கள் மேற்கொண்ட முயற்சிகளில் சிறிய வெற்றி கிடைக்கிறதா? அதற்கு உங்களை நீங்களே பாராட்டிக் கொள்ளுங்கள். பெரிய வெற்றியை நோக்கிய உங்கள் பயணத்தில் இத்தகைய சின்னச்சின்ன வெற்றிகள் தான் உங்களுக்கு உந்து சக்தியாக இருக்கும். எனவே சிறுசிறு இலக்குகளை நிர்ணயித்து அதை எளிதாக அடைய முயற்சி செய்யுங்கள். சிறிய வெற்றி கிடைத்தாலும் உங்களை நீங்களே பாராட்டிக் கொள்ளுங்கள். அந்த மகிழ்ச்சி உங்களை உற்சாகப்படுத்துவதுடன் இலக்குகளை நோக்கி ஓடும் ஓட்டத்தை வேகப்படுத்தும்.
    மேற்கூறிய 10 வழிகளில் நீங்கள் ஒன்றைப் புரிந்துகொள்ள வேண்டும். நீங்கள் தேர்வு செய்யும் இலக்கு உங்களுக்கு அச்சத்தை, நடுக்கத்தை ஏற்படுத்தி உங்களை சோர்வடையச் செய்து மூலையில் முடங்கச் செய்துவிடக் கூடியதாக இருக்கக்கூடாது என்பதை எப்போதும் நினைவில் நிறுத்துங்கள். நீங்கள் வகுத்த இலக்கு உங்கள் மனதில் அச்சத்தை உருவாக்கினால் அவற்றைச் சிறிதும் தயங்காமல் தூக்கியெறியுங்கள். அடுத்த இலக்கைத் தேர்வு செய்து பயணத்தைத் தொடருங்கள். ஏனென்றால் சாதனை உலையில் எரிபொருள்களே இலக்குகள் தான்.

    நேரடி அந்நிய முதலீடு விவசாயத்தில் மாற்றத்தை ஏற்படுத்துமா?

    இந்தியாவில் விளைவிக்கப்படும் காய்கறிகள், பழங்கள் விவசாயிகளிடம் இருந்து வீட்டில் உள்ள சமையல் அறை வருவதற்குள் 33% பாழடைந்து விடுகிறது. மற்ற நாடுகளுடன் ஒப்பிட்டுப் பார்க்கும்போது சேத அளவு அதிகமாகவே உள்ளது. ஆஸ்திரேலியாவில் 1% மட்டுமே சேதமாக உள்ளது.
    இந்தியாவில் பல கார் கம்பெனிகள் உள்ள நிலையில் நிகான், டோயோட்டோ போன்ற கார் கம்பெனிகளை ஏன் அனுமதித்தோம்? அப்படி அனுமதித்ததால் மக்கள் பல வகையான கார்களை வாங்கிப் பயன்படுத்த ஆரம்பித்துவிட்டார்கள். இதற்கு பல உதாரணங்களை சொல்லலாம். இந்தியாவில் 20 ஆண்டுகளுக்கு முன்பு தொலைதொடர்பு சேவையை இந்தியத் தொலைபேசி நிறுவனம் மட்டுமே கொடுத்தது. ஆனால் தற்போது பல வெளிநாட்டு செல்போன் நிறுவனங்கள் மக்களுக்குத் தேவையான தொலைதொடர்பு சேவைகளை செய்து வருகிறது.
    மக்கள் உபயோகப்படுத்தும் அனைத்து வணிகப்பொருட்களில் அந்நிய முதலீடுகளை ஏற்கும் நாம், ஏன் பல்பொருள் சந்தையில் அந்நிய முதலீடுகளை ஏற்க மறுக்கிறோம்.
    இதுவரை விவசாய விளைபொருள்களுக்கு உற்பத்தி முதல் விநியோகம் வரை தேவையான கட்டமைப்புகளை நம்மால் சிறந்த முறையில் கொடுக்க இயலவில்லை. ஏனென்றால், இந்திய விவசாய விலைபொருள்கள் பலவகையானது. மேலும் இவற்றின் அடிப்படை கட்டமைப்பை மேம்படுத்த வேண்டும். ஆனால் அதிக அளவில் தனியார் முதலீடு தேவைப்படுகிறது. தனியார் முதலீடு விவசாயத்திற்கு வரவேண்டுமானால் அதற்கு முக்கிய மொத்த வியாபாரத் துறையில் அதிக முதலீடு வந்தால் இது வேளாண்மைத் துறை சார்ந்த தொழில்களில் முன்னேற்றம் ஏற்படும்.
    விவசாயிகள் விளைவித்த பொருள்களுக்கு சந்தையில் எப்போதும் சீரான வருவாய் கிடைப்பதில்லை. விளைவித்த பொருட்களை உள்நாட்டு தேவைக்குப் பூர்த்தி செய்யப்பட்டவுடன் அயல்நாட்டு சந்தைக்கு எடுத்துச் செல்ல வேண்டும். ஆனால் விளைவித்த பொருட்கள் வெளிநாட்டு சந்தைக்கு எடுத்துச் செல்லக்கூடிய கட்டமைப்பு வசதிகள் இல்லாத காரணத்தால், விவசாயிகளுக்கு விலை கட்டாதபோது அதைத் தெருவில் கொட்ட வேண்டிய சூழ்நிலை ஏற்பட்டுள்ளது.
    விவசாயிகள் விளைவித்த பொருட்களுக்கு உள்நாட்டு சந்தையில் விலை கட்டுபடி ஆகாதபோது, அதை பதப்படுத்தி வைக்கவோ, வெளிநாட்டு சந்தைக்கு எடுத்துச் செல்லவோ, பெரும் முதலீட்டாளர்கள் தற்போது இல்லை. நேரடி அந்நிய முதலீடு வரும்போது பலதரப்பட்ட காய்கறிகள், பழங்கள், விவசாய விளைபொருட்கள் எளிதாக சந்தைப்படுத்தக் கூடிய வாய்ப்புகள் உருவாகும். இதனால் உரிய விளை கிடைக்க வாய்ப்புகள் ஏற்படும்.
    தற்போது பஞ்சாபில் பாரதி வால்மார்ட் விவசாயிகளிடம் நேரடி கொள்முதல் செய்வதால் 7 – 10% வருமானம் அதிகரித்துள்ளதாக தகவல் வெளியாகி உள்ளது. தற்போதுள்ள நிலையில் நேரடியாக விவசாயிகளிடம் கொள்முதல் செய்வதால், பல விவசாயிகளுக்கு கட்டுபடியான விலை கிடைப்பதற்கான வாய்ப்புகள் அதிகமாகி உள்ளது. இதுபோல் பல தனியார் நிறுவனங்கள் நேரடி கொள்முதல் மூலம் விவசாயிகளிடம் பொருள்களை வாங்க வரும்போது, அந்த விவசாய விளைபொருட்கள் சேமித்து வைக்க சேமிப்பு கிடங்குகள், விளைபொருட்களைத் தரப்படுத்தும் முறைகள், சிறந்த சேமிப்பு முறைகள் என பலவகையான தொழில்நுட்ப முன்னேற்றங்கள் ஏற்படும்.
    இந்தத் துறையிலும் ஏராளமான வேலைவாய்ப்புகள் கிடைக்கும். விவசாயத்தில் புதிய தொழில்நுட்பங்கள், புதிய உற்பத்தி முறையில் உலக வர்த்தகத்தில் இந்திய இளைஞர்களும் போட்டிபோடும் நிலை உருவாகும்.
    இந்திய மென்பொருள் நிபுணர்கள் உலகத்தரம் வாய்ந்த மென்பொருள்களைக் குறைந்த விலையில் இந்தியாவில் உருவாக்கும்போது, இந்திய விவசாயிகள் உலகத்தரம் வாய்ந்த உணவுப்பொருள்களை உலகசந்தைக்கு கொண்டுவருவதும் சாத்தியமேÐ

    உனக்குள்ளே உலகம்-31

    கல்லூரி மாணவர்களிடம் காணப்படும் முக்கிய பிரச்சனைகள் குறித்து மேற்கொண்ட ஆய்வில் மாணவர்களின் மனநிலையைப் பாதிக்கும் சில பொதுப் பிரச்சனைகளில் படிப்பு, பணம், பணி, வீட்டுக்கவலை போன்றவற்றை கடந்த இதழில் பார்த்தோம். மேலும் சில பிரச்சனைகளை இப்போது பார்ப்போம்….

    5. மன அழுத்தம் (Depression)

    கல்லூரிப் பருவத்தில் ஒரு மாணவன் அல்லது மாணவிக்கு பெரும்பாலும் வயது 17 முதல் 20 வயதிற்குள் அமைந்திருக்கும். அதாவது “டீன் – ஏஜ்” (Teen Age) எனப்படும் குமாரப் பருவத்தின் உச்சநிலையில் இருக்கும் மாணவ – மாணவிகளுக்கு பல்வேறு “மன அழுத்தங்கள்” உருவாக வாய்ப்புள்ளது. நல்லதைத் தேர்ந்தெடுப்பதில் குழப்பம், படிப்பதை நெஞ்சில் நிறுத்துவதில் சிக்கல். நல்ல நண்பர்களை அடையாளம் காண்பதில் சிரமம் – போன்ற குழப்பங்கள் மனச் சிக்கலை உருவாக்கிவிடும். இதனால் தாழ்வு மனப்பான்மை, எரிச்சல், கோபம், வெறுப்பு, பகை உணர்வு, எதையும் எதிர்க்கும் தன்மை, சோம்பல், பொறாமை – போன்றவற்றில் சில இந்த இளைய மனங்களுடன் ஒட்டிக்கொண்டு அவர்களுக்கு மன அழுத்தத்தை ஏற்படுத்திவிடும் இந்த மன அழுத்தத்தை நீக்குவதற்கு முயற்சி செய்தாலும் அவர்களால் நீக்கமுடியாத நிலை உருவாகிவிடும்.

    மன அழுத்தத்தால் பாதிக்கப்பட்டவர்கள், கல்லூரிகளில் இயங்கும் “ஆற்றுப்படுத்தும் மையத்தை” (Counseling Cell) அணுகி அவற்றிற்கான வழிமுறைகளை கேட்டறிந்து தெரிந்துகொள்ளலாம். மாணவர்களின் பிரச்சினையை தெரிந்துகொண்டு அதற்கு சரியான தீர்வை வழங்கும் விதத்தில் அந்த “கவுன்சலிங் சென்டரில்” மாணவர்களின் மன அழுத்தத்தை நீக்குவதற்காக கவுன்சிலர்கள் நியமிக்கப்பட்டிருப்பதால் மன அழுத்தத்தை குறைக்க இயலும்.

    6. உடல்நிலை (Health Condition)

    இளமைப் பருவத்தில் பல மாணவ – மாணவிகளுக்கு பதற்றம் (Stress) மற்றும் தூக்கமின்மை (Lack of Sleep) போன்ற காரணங்களால் உடல் சம்பந்தப்பட்ட பிரச்சினைகள் உருவாகும். சுத்தமில்லாமல் இருப்பதும், சுற்றுப்புறச் சூழல் சரியில்லாமல் இருப்பதும் சிலருக்கு வைரஸ் காய்ச்சலை உருவாக்கி உடலின் சக்தியைக் குறைத்துவிடும்.

    எனவே கல்லூரியில் படிக்கும் மாணவ – மாணவிகள் அந்தந்த நேரத்தில் சத்தான உணவை உண்ணவேண்டும். தங்களது கைகள், பயன்படுத்தும் கழிப்பறைகள், விடுதியில் தங்கும் அறைகள், அறையின் ஜன்னல் கதவுகள் – போன்றவற்றை சுத்தமாக வைத்துக் கொள்ளவேண்டும். இரவு நேரங்களில் நன்றாக தூங்கி ஓய்வு எடுக்கவேண்டும். இத்தகைய எச்சரிக்கையான பழக்கவழக்கத்தைமீறி நோய் வந்துவிட்டால் மருத்துவரை அணுகி உடல்நிலையை உடனே பாதுகாக்க முயற்சிகள் மேற்கொள்ள வேண்டும்.

    7. நண்பர்கள் (Friends)

    “உன் நண்பன் யாரென்று சொல்; நான் உன்னை யாரென்று சொல்கிறேன்” என்பது பழமொழி. பள்ளி – கல்லூரிகளில் படிக்கும்போது நல்ல நண்பர்களை தேர்ந்தெடுத்து கொள்ளவேண்டும். குறிப்பாக – கல்லூரி விடுதிகளில் தங்கிப் படிக்கும்போது அறையில் உறுப்பினர்களாக இருப்பவர்களோடு இணைந்து பழகி நல்ல நண்பர்களாக மாற்றிக்கொள்ள வேண்டும்.

    ஒரே வகுப்பில் படிக்கும் மாணவர்கள் இணைந்து நண்பர்களாக மாறுவது சிறந்தது. இதனால் ஓய்வுநேரத்தில் இன்டர்நெட் பார்ப்பதற்கும், நல்லப் புத்தகங்களை படிப்பதற்கும் நேரம் ஒதுக்கிக்கொள்வது எளிதாகும். நண்பர்களாக இணைந்து பழகும்போது, கருத்து வேறுபாடுகள் ஏற்பட்டாலும் அதனை விட்டுவிட்டு அவர்களோடு இணைந்து பழகி அவர்களை நண்பர்களாக தக்கவைத்துக் கொள்வது நல்லது.

    8. விழா (Party)

    கல்லூரி பயிலும் நாட்களில் வெவ்வேறு விதமான விழாக்களில் மாணவ – மாணவிகள் பங்குபெறும் வாய்ப்புகள் உருவாகும். குறிப்பாக – கல்லூரி விழா, விடுதி விழா, விளையாட்டு விழா, பிறந்தநாள் விழா, வெற்றி விழா, நண்பர்கள் விழா – போன்ற பல விழாக்கள் கல்லூரியில் கொண்டாடப்படும். சில குறிப்பிட்ட விழாக்களை மாணவ – மாணவிகள் சிறு குழுக்களாக தனியாகப் பிரிந்து கொண்டாடுவார்கள். அந்த விழாக்கள் கல்லூரி வளாகத்திற்கு வெளியே கொண்டாடப்படும். இப்படி கொண்டாடப்படும் சில விழாக்கள் மது விருந்தாகவும், போதை மருந்து அருந்தும் பழக்கமாகவும், எல்லை மீறிய கொண்டாட்டமாகவும் மாறிவிடும். மதுப்பழக்கம் இல்லாத மாணவன்கூட இப்படிப்பட்ட விழாக்களில் கலந்துகொள்வதால் மதுப் பிரியராகி படிப்பில் மனமில்லாத சூழலை உருவாக்கிவிடுவார்கள்.

    இப்படிப்பட்ட நல்ல குணத்தை அழிக்கும் விழாக்களில் கலந்துகொள்வதை மாணவ – மாணவிகள் தவிர்க்கவேண்டும். விழா பற்றி முன்கூட்டியே தெரிந்துகொண்டு தகுந்த முன்னெச்சரிக்கையுடன் நடந்துகொள்ள வேண்டும். இத்தகைய விழாக்களில் கலந்து கொள்ளாமல் தவிர்ப்பது சிறந்தது. மாணவப் பருவத்தில் பொறுப்புள்ளவர்களாகவும், சமூக நலன்கருதி செயல்படுபவர்களாகவும் மாணவர்கள் தங்களை மாற்ற முயற்சிசெய்ய வேண்டும். அப்போதுதான் இந்த கவனம் சிதைக்கும் விழாக்களில் கலந்துகொள்ளாமல் இருக்க இயலும்.

    9. உறவுமுறைகள் (Relationships)

    வீட்டில் உருவாகும் நல்ல உறவுமுறை ஒரு மாணவன் அல்லது மாணவியின் படிப்பில் முக்கியப் பங்கு வகிக்கிறது. ஒரு வீட்டில் பிரச்சினைகள், சண்டைகள், கருத்து வேறுபாடுகள் அதிகம் இருந்தால் அந்தக் குடும்பத்திலுள்ள மாணவன் அல்லது மாணவியின் படிப்பு பெரிய அளவில் பாதிப்புக்கு உள்ளாகும். குறிப்பாக – “தாய் – தந்தை தகராறுகள்” இளம் நெஞ்சில் வேதனையை உருவாக்கிவிடும்.

    “நமது அப்பாவும், அம்மாவும் இப்படி தினமும் சண்டை போடுகிறார்களே” என்று நினைத்து வேதனைப்படுவதால் அந்தக் குடும்பத்தில் வளரும் மாணவ – மாணவிகளின் படிப்பின்மீதுள்ள ஆர்வம் குறைந்துவிடுகிறது. இதனை நீக்குவதற்கு பெற்றோர்கள் தங்களிடமுள்ள கருத்து வேறுபாடுகளைப் போக்க முயற்சிகள் மேற்கொள்ள வேண்டும்.

    இதைப்போலவே, தங்கள் பெற்றோர்கள்மீதும் சில மாணவ – மாணவிகளுக்கு வெறுப்பு ஏற்படுவதுண்டு. கருத்து வேறுபாடுகளும் அதிகமாக உருவாகுவதற்கு வாய்ப்புகள் உள்ளது. “நன்றாக படிப்பது மட்டும்தான் எனது குறிக்கோள்” – என்று சிந்தித்து செயல்படும் மாணவ – மாணவிகள் தங்கள் பெற்றோர் மீதுள்ள வருத்தங்களை கண்டிப்பாக குறைத்துக்கொள்வது சிறந்தது. குடும்பத்திலுள்ள உறவுமுறைகளை வளர்ப்பதற்கு தடையாக இருக்கும் காரணிகளை கண்டுபிடிப்பதற்கு கல்லூரியில் வழிகாட்டும் ஆசிரியர்களின் உதவியை நாடலாம்.

    இப்படி கல்லூரியில் பயிலும்போது உருவாகும் பிரச்சினைகளை அடையாளம் காணவும், அவற்றிற்கான தீர்வுகளை அறிந்துகொள்ளவும் முயற்சிகளை மேற்கொண்டு கவனமுடன் படித்தால் உயர்கல்வியில் சிறப்புப் பெறலாம். உயர்ந்த பதவிகளை அடையலாம். வாழ்க்கையில் உன்னத நிலையை உருவாக்கலாம்.

    புனித யாத்திரை – கயிலயங்கிரி

    சார், முக்கியமான ஒரு சில வார்த்தைகளுக்கான சீன மொழி வார்த்தைகளை நீங்களே சொல்லிவிடுங்கள் என்று பல வாசகர்கள் கேட்டதால் – கீழே ஒரு சில உள்ளன.
    டாய்லெட் – கர்ப்பல் டுகே;
    சிறுநீர் – சிம்பா தங்குனே;
    சிறிது நில் – அல்லே குவா;
    சிறிது தூரம் நடக்கிறேன் – நே கல்லிஜ் டும்னே
    இவை திபெத்திய வார்த்தைகள் என்று கூறினர். சீன மொழியில் – சிம்ப்பா – என்றால் டாய்லெட் என்று அர்த்தம்.

    உடல் பாதிப்பு:
    கயிலைப் பயணத்தில் பெரும்பாலான யாத்ரிகர்களுக்கு தலைவலி மற்றும் வாயு தொந்தரவு உண்டாகிறது. காரணம் தட்பவெப்ப நிலையில் மாற்றமும், உணவில் மாற்றமும் ஆகும்.
    போதிய அளவு ஆக்ஸிஜன் கிடைக்காதபோது மூளைக்குச் சோர்வு ஏற்பட்டு அதனால் தலைவலி வரும். எனவே ஆழ்ந்த மூச்சுப்பயிற்சி செய்ய வேண்டும். வலது நாசி மூலமே மூச்சை இழுத்து வெளிவிடும் சூரிய மூச்சும் மேற்கொள்ள வேண்டும். இதனால் குளிரின் தாக்கம் குறையும்.
    உணவில் பலவகையான கொட்டைகள் வேக வைத்துத் தருகிறார்கள். மேலும் அளவுக்கு அதிகமாகச் சாப்பிட்டாலும் சீரணமாகாமல், வாயு (Gas) உற்பத்தியாகும். எனவே அளவாகச் சாப்பிடுவதும், ராஜ்மா உட்பட பலவித கொட்டைகளை உண்ணாமலிருப்பதும் பாதுகாப்பு நடவடிக்கைகளாகும்.

    சக்தி பானம்:
    மேலே செல்லச்செல்ல உணவில் நாட்டம் இருக்காது. காரணம் சீரண சக்தி குறையும். மலம் கழிதலும் தாமதமாகும். எனவே சிலருக்கு மயக்கம் அல்லது சோர்வு உண்டாகலாம். ரெட்புல் (Red Bull) என்ற பெயரில் விட்டமின் பானம் விற்கின்றனர். சுமார் 150 மி.லி. பாட்டில் 5 முதல் 8 யுவான் வரை இடத்துக்குத் தகுந்தாற்போல் விற்கின்றனர்.
    இது இனிப்புச் சுவையுடையதால், சர்க்கரை நோய் உள்ளவர்கள் சாப்பிடாமல் இருப்பது நல்லது. எங்கள் குழுவில் ஒரு சர்க்கரை நோயாளி இதைக் குடித்தார். சோர்வுக்காக இரு பாட்டில் குடித்ததால் இரத்தத்தில் சர்க்கரை அளவு அதிகமானது. சரியாக உணவு சாப்பிடாததால் சோர்வு, உணவு சாப்பிடாததால் மாத்திரைகளும் போதிய அளவில் சாப்பிடவில்லை. விளைவு மூளையில் பார்வை நரம்பில் பாதிப்பு உண்டானது. எனவே ரெட்புல் என்ற சக்தி பானத்தை சர்க்கரை நோயாளிகள் தவிர மற்றவர்கள் அருந்தலாம். இது போதை பானமல்ல.

    குளிர்:
    நேபாளத்தில் நம்மூர் போலவே வெப்பமும், குளிரும் உள்ளது. சைனாவுக்குள் நுழையும்போதே மலைப்பகுதி என்பதாலும், முதல் தங்குமிடமான நியாளம் என்ற ஊரே சுமார் 13,000 அடி உயரத்திலிருப்பதாலும், குளிரும் அதிகம், காற்றும் அதிகம். அங்கிருந்து சாகா, பர்யாங், தார்ச்சன் போன்ற எல்லா தங்குமிட ஊர்களும் இதைவிட உயரமாகவே உள்ளன.
    எனவே குளிக்க, குடிக்க வெந்நீர் உபயோகிப்பது நல்லது. மானசரோவர் ஏரி நீர் மிகவும் குளிராக இருக்கும். சில இடங்களில் கீழே நீரும், மேலே ஐஸ் படலங்களும், வேறு சில இடங்களில் மேலே நீரும் கீழே ஐஸ் கட்டிகளும் இருக்கும்.
    பரிக்ரமா வழியில் பனிக்கட்டிகள் ஆங்காங்கு வழியில் கிடக்கும். குளிர்காற்று வீசும். முழு பாதுகாப்பு உடை அணிந்தபின் யார் என்று அடையாளம் காண்பது மிகவும் கடினம். விண்வெளி வீரர் போன்ற தோற்றம் பெறலாம். காதுக்கு பஞ்சு வைப்பது அவசியம். முடிந்தால் மூக்குக்கும் வைப்பது சிறப்பது.
    முகம் பனிக்காற்றால் கட்டாயம் கறுக்கும். தாக்கத்தைக் குறைக்க லோசன்கள், எண்ணெய் வகைகள் தடவிக் கொள்ள வேண்டும். உதடுகளும் வெடிக்கும். அடிக்கடி எச்சிலால் தடவுவதும், தேங்காய் எண்ணெய் அல்லது பாதிக்காத களிம்புகள் தடவுவதும் அவசியம்.

    டாய்லெட்:
    நம்மூரில் எப்படி வேண்டுமானாலும், எப்போது வேண்டுமானாலும் கழிவை நீக்கும் பழக்கமுள்ளவர்கட்கு சிரமம் தான். நியாளம், பர்யாங் ஆகிய இடங்களில் தங்கும் விடுதிகளில் பொது கழிப்பிட வசதி உள்ளது. சாகாவில் அறையிலேயே உள்ளது. அங்கு குளிர் நீர்தான் இருக்கும். தேவையெனில் வெந்நீர் நாம் எடுத்துச் செல்ல வேண்டும். அதுவரை டாய்லெட், டிஸ்யூ பேப்பர் தேவைப்படாது.
    தார்ச்சனில் திறந்தவெளி கழிப்பிடம் தான். பரிக்ரமா பாதையில் தங்கும் இரு இடங்களான திராபுக் மற்றும் ஜுதுல்புக் போன்ற பகுதிகளிலும் இதே நிலைதான். வெந்நீர் தருவார்கள். மக்கில் எடுத்து வைத்த சில நிமிடங்களில் குளிர்ந்துவிடும். எனவே அங்கு டாய்லெட் டிஸ்யூ பேப்பர் நன்கு கைகொடுக்கும். பலர் வீட்டில் வெஸ்டர்ன் டாய்லெட்டில் இருந்தே பழகியிருப்பர். அல்லது சிலரால் கீழே உட்கார முடியாது. இவர்கள் அங்கு சிரமப்படாமலிருக்க, நம் ஊரிலேயே பயிற்சி மேற்கொள்வது பாதுகாப்பு.
    குறைவாக சாப்பிடுவதும், எச்சரிக்கையாக இருப்பதும் யாத்திரையை சுகமாக்கும்.

    தொலைதொடர்பு வசதிகள்:
    நேபாள நாட்டின் ‘காத்மாண்டு விமான நிலையத்தில் இறங்கியபின் நமது சொந்த செல்போன்களை சுவிட்ச் ஆப் செய்துவிடுவது நல்லது. ஒரு சிலர் அந்த நாட்டு சிம்கார்டு வாங்கி உபயோகிக்கின்றனர். விலையோ மிக அதிகம்.
    காத்மாண்டுவிலிருந்து நம் ஊருக்குப் பேச மளிகைக் கடைகளில் இண்டர்நெட் இணைப்பு போன் வைத்துள்ளனர். இடத்துக்கு இடம் கட்டணம் வேறுபடுகிறது. ஒரு நிமிடத்துக்கு ரூ. 3, 4, 5, 6 எனவும் லாட்ஜ்களில் ரூ. 30, 40, 60 எனவும் வசூலிக்கின்றனர். உள்ளூரில் உள்ள எண்களுடன் தொடர்பு கொண்டாலும் நிமிடம் ஒன்றுக்கு ரூ. 3 தான். சிறிது சிரமப்படாமல் விசாரித்து அறிந்து கொண்டால் குறைந்த செலவில் அதிகம் பேச முடியும்.
    சைனாவில் நியாளம், சாகா போன்ற இடங்களில் சைனா போஸ்ட், சைனா டெலிகிராப் என இருந்தாலும் அங்கு போன் இயக்கமின்றி சைனா போஸ்ட், சைனா உள்ளது. அருகிலுள்ள கடைகளில் போன் பேச முடியும். நிமிடத்துக்கு ரூ. 50 முதல் ரூ. 100 வரை வசூலிக்கின்றனர். அங்கு யுவான் தான் செல்லும்.
    தார்ச்சனில் கூட (கைலாயப் பகுதி) பொது தொலைபேசிகள் உள்ளன. விசாரித்துப் பேசுவது நல்லது. தவிர, சுற்றுலா ஏற்பாட்டாளர்கள், தம் தமிழ்நாடு அலுவலகத்திலிருந்து, நம் வீடுகளில் நாம் தெரிவித்த செல் நெம்பர்கட்கு SMS மூலம் ஒவ்வொரு நாளும் எங்கு உள்ளோம் எனத் தகவல் அனுப்புகின்றனர். உடல் நலம் குன்றிய சிலர் வீடுகட்கு தகவலும் கூறுகின்றனர்.

    வளர்ப்புப் பிராணிகள்:
    சீன வசிப்பிடப் பகுதிகளில் மக்கள் யாக் எருமை மற்றும் நாய்களை வளர்க்கின்றனர். நாய்கள் குலைப்பது இரவில், அமைதியான நிலையில் பயத்தையே உண்டாக்கும். வீதியில் செல்லும் போது குரைத்துக்கொண்டு வந்தாலும், அசையாமல் நின்றுவிடுவது ஆபத்தில்லாதது என்றனர்.
    யாக் எருமையைத் தினமும் ஓட்டிச்சென்று மாலை அழைத்து வருகின்றனர். நம்மூர் எருமைகளை விடக் கொஞ்சம் சுறுசுறுப்பாக உள்ளன. பொதி சுமக்கப் பயன்படுத்தப்படுகின்றனர். முடி அதிகமாய் உள்ளது; குளிரால் பாதிக்காமலிருக்க.

    அன்பளிப்பு (இனாம்):
    சைனாவில் திபேத் பகுதியில் சுமார் 900 கி.மீ. சாலைப்பயணம், தங்குமிடங்களில் மக்கள் வறுமைநிலை தெரிகிறது. அங்குள்ளோர் நம்மூர் ஸ்டிக்கர் பொட்டு, வளையல்கள், மாணவர்கள் பென்சில் போன்ற எழுதுபொருட்கள் கேட்கின்றனர். உடன் சாக்லேட் வைத்துக்கொள்வதும் நன்று.
    பரிக்ரமா முடித்தபின் உடன்வந்த சுமை தூக்கிய அன்பருக்கு ஏதாவது பொருட்கள் கொடுத்தால், அவர்களது முகத்தில் உண்டாகும் மகிழ்ச்சியைக் கண்டு நாமும் மகிழலாம்.

    மக்கள் வாழ்க்கை:
    நேபாள நாடு பெரும்பாலும் மலைப் பகுதிகளாயிருப்பதால், விளை நிலங்கள் குறைவு. சுமாரான வசதியுள்ள நாடு. சுற்றுலா பயணிகளை வெகுவாக எதிர்பார்த்துக் காத்துள்ளது.
    சைனாவிலும் மக்கள் ஆடம்பரமின்றியே வாழ்கின்றனர். வழியில் பல இடங்களில் ஒரு வீடு, எருமைக்கான பட்டி இதுபோல் பல பார்த்தோம். துணிகள் துவைப்பதை வீட்டு முன்புறத்தில் அமர்ந்து செய்கின்றனர். ஷாக்ஸ், ஷூ, உல்லன் ஆடைகள் கட்டாயம் தேவை. அவ்வப்போது எல்லாவற்றையும் தூய்மைப்படுத்துகின்றனர்.

    ஷாப்பிங்:
    நேபாளத்தில் ருத்ராட்சம், ஸ்படிகம், முத்து, பவளம் போன்றவைகள் விற்கப்படுகின்றன. தரம் என்ற ஒன்றைக் கூறி விலை வேறுபாட்டை நியாயப்படுத்துகின்றனர். ஒரு முக ருத்ராட்சம் ஓரிடத்தில் ரூ. 250, மற்றோரிடத்தில் ரூ. 400. இதிலேயே நல்ல தரமுள்ளதை ரூ. 3000 என வாங்கினோம். இன்னும் அதிக விலையிலும் கிடைக்கும் என்றனர்.
    சைனாவில் நம்மூர் விலையை விடச் சிறிது கூடுதலாக அல்லது சமமாகப் பொருட்கள் கிடைக்கின்றன. குழந்தைகளுக்கான ரெடிமேட் ஆடைகள் சிலர் வாங்கினர். நான் ரூ. 180க்கு ஒரு மடக்கு வாக்கிங் ஸ்டிக் வாங்கினேன். அங்கு என்ன விலை என்று சைகையால் கேட்டால் கால்குலேட்டரில் 10, 20 என அடித்துக் காண்பிக்கின்றனர். அத்தனை சீன யுவான் என்று அர்த்தம். நாம் பேரம் பேசியும் வாங்கலாம்; வாய்திறக்காமலேயே.
    அதே கால்குலேட்டரில் நாம் கேட்கும் விலையை அடித்துக் கொடுக்கலாம். கட்டுபடியானால் கொடுப்பார். இல்லாவிட்டால் மேலும் குறைக்க நாம் ஏற்ற எப்படியோ வாங்கிவிடலாம்.
    இனி காத்மாண்டுவில் முக்கிய இடங்களுக்கு பயணிப்போம்.

    – தொடரும்

    வேகமாய் வருகிறது வெற்றி – 2

    வெற்றி அடைய வேண்டும் என்ற வெறி உள்ளுக்குள் தீ மாதிரி எரிந்து கொண்டே இருக்க வேண்டும். அதற்கான ஆசையை மனதிற்குள் சித்திரமாக வரைந்து வைத்துக்கொள்ள வேண்டும். ஏனென்றால் ஆசைதான் வெற்றிக்கான முதற்படி. ஆசை அழிவிற்குக் காரணமல்ல. பேராசை தான் அழிவைக் கொணரும். நியாயமான ஆசை நிறைவேறியே தீரும். எனவே இலட்சியம் எனப்படும் ஆசை மனதில் உருவாக வேண்டும். இதன் அடுத்த கட்டம் அதற்கான திறமைகளை வளர்த்துக் கொள்ளுதல் ஆகும். உயர்நிலையை அடைய வேண்டும் என்று தீர்மானித்துக் கொண்டபின், அதற்கான வழிமுறைகளைத் தேட வேண்டும். அதற்கு முதற்படி நமக்குள் இருக்கும் திறமைகளை ஒருங்கிணைத்தல் ஆகும்.
    படைக்கப்பட்ட போதே சில திறமைகளை நம்முடன் இணைத்துதான் பூமிக்கு நம்மை கடவுள் அனுப்பி இருக்கிறார் இறைவன் என்பதை நம்புங்கள். திறமை என்பது இல்லாத மனிதன் யாருமே இல்லை என்பது உறுதி. “என்ன சார்Ð எங்கிட்டே என்ன திறமை இருக்குங்கறீங்க. ஒண்ணுமே கிடையாது. நான் below average. பட்டப் படிப்பு முடிக்கவே படாதபாடு பட்டுட்டேன். நான் பொறியியல் பட்டதாரி ஆக வேண்டுமென்று அப்பா, அம்மா ஆசைப்பட்டார்கள். நடக்கவே இல்லை. BA Economics முடிக்கவே படாத பாடு ஆகிவிட்டது. என்னிடம் மிகவும் பயம் அதிகம். மேடை ஏறினால் நடுக்கம். ஆசிரியர் கேள்விகேட்டால் பயம். கூட்டத்தில் நண்பர்கள் நடுவே ஒரு ஜோக் சொல்லக்கூட பயம். நான் எதிர்காலத்தில் என்ன செய்வது” – ஓர் இளைஞனின் புலம்பல் இது.
    இப்படி ஆயிரம் ஆயிரம் இளைஞர்கள் நம்மிடையே தவித்துக் கொண்டிருக்கிறார்கள். தம்மிடம் எத்தகைய தனித்திறமையும் இல்லை என்பது அவர்களது தீராக் கவலை. திறமையே இல்லாத போது திறமைகளை ஒருங்கிணைப்பது எங்ஙனம்? இதுவே அவர்களின் வேதனை.
    அவர்களுக்குத் தான் இந்த வழிகாட்டு நெறி. ஒன்றை திடமாக நம்ப வேண்டும். ஒவ்வொருவரிடமும் ஒரு திறமை இருக்கிறது. இருக்கும் திறமை குறித்து கர்வம் கொள்ள வேண்டும். தாழ்வு மனப்பான்மையால் தளர்ந்து போவதைவிட, கர்வம் கொண்டவனாக தன் திறமையால் அகந்தை கொண்டவனாக இருப்பது மேல். இந்த அகந்தையும் கர்வமும் எதிரிகளை பந்தாடப் பயன்படுத்துவதைவிட, தன் திறமைகளை மென்மேலும் அதிகரித்துக் கொள்ள பயன்படுத்தப்பட வேண்டும்.
    எப்படி என கேட்கிறீர்களா? syllabus புத்தகங்களை தவிர வேறு புத்தகங்களையே படிக்காத கல்லூரி மாணவர்கள் இருப்பார்கள். அவர்கள் நடுவே நீங்கள் படித்த புத்தகங்கள் பற்றி பேசுங்கள். அது Jefrey Archer நாவல்களாக இருக்கலாம். அல்லது ராஜேஷ் குமார் நாவல்களாக இருக்கலாம். திருக்குறளாக இருக்கலாம். ஜெயகாந்தன் நாவல்களாக இருக்கலாம். வே. இறையன்பு தன்னம்பிக்கைக் கட்டுரைகளாக இருக்கலாம். குமுதத்தில் வெளிவந்த சினிமா டைரக்டர் பேட்டியாக இருக்கலாம். அபிஷேக் பச்சன் பற்றி ஆங்கில நாளிதழில் வெளிவந்த பேட்டியாக இருக்கலாம். ஏதோ ஒன்றை புதிதாகப் படித்துவிட்டு அதைப்பற்றி நண்பர்களுடன் பேசுங்கள். உங்கள் மதிப்பு உயரக் காணலாம். உங்களைப் பற்றி பெருமையாக நினைப்பார்கள். எந்தவித நூலாக இருந்தாலும், வார இதழாக இருந்தாலும் அதில் உங்களுக்கு ஈர்ப்புடைய ஒரு செய்தி இருக்கும். அதை மனதிற்குள் பதித்துக் கொள்ளுங்கள். அதை தக்க இடத்தில் வெளிப்படுத்துங்கள். அதுதான் திறமைகளை ஒருங்கிணைத்தல்.
    படிக்க வேண்டும். அதில் உங்களைக் கவர்ந்த ஓர் குறிப்பினை அல்லது செய்தியினை மனதில் பதிவு செய்யுங்கள். பின் நண்பர்களிடையே சாதாரண உரையாடலில் அதை வெளிப்படுத்துங்கள். இப்படி சேகரிக்கப்பட்ட கருத்துக்களால் ஓர் உரையினை தயார்செய்ய காலப்போக்கில் உங்களால் முடியும்.
    ஒருமுறை மேடையில் பேசி கைதட்டல் வாங்கிவிட்டால் உற்சாகம் பெருக்கெடுக்கும். தயக்கத்தை அது நீக்கும். தன்னம்பிக்கையை அது வளர்க்கும். சபைக்கூச்சம் போக்கும். தலைநிமிர்ந்து பேச தைரியம் பிறக்கும்.
    எனவே திறமைகளை படிப்படியாக சேகரித்து கூர்மைப்படுத்தி வளர்ச்சி பெறச் செய்யுங்கள். அவற்றை ஒருங்கிணைத்து வெளிப்படுத்த கற்றுக்கொள்ளுங்கள். இது உங்களை புதிய உயிராக்கும். மனத்திடம் ஓங்கும்.

    நம்பிக்கை இருந்தால்
    உட்செவி திறக்கும்; அகக்கண் ஒளி தரும்
    அக்கினி தோன்றும்; ஆண்மை வலியுறும்;
    திக்கெலாம் வென்று ஜெயக்கொடி நாட்டலாம்
    கட்செவி தன்னைக் கையிலே எடுக்கலாம்
    அச்சம் தீரும்; அமுதம் விளையும்;
    வித்தை வளரும்; வேள்வி ஓங்கும்
    என்கிறார் மகாகவி பாரதி. என்றென்றும் எந்நாளும் நினைத்துப் பார்க்க வேண்டிய பாடல் அது.
    அச்சத்தாலும் தாழ்வு மனப்பான்மையாலும் வாடும் இளைஞர்கள் படிக்கும் பழக்கத்தை வளர்த்துக் கொண்டால் எத்தகைய மாறுதல்களைப் பெறலாம் என்பதை இப்பாடல் உணர்த்தும். இத்தகைய சிறிய பயிற்சிகள் பெரிய உயரங்களைத் தொட உதவும் என்பதை மறவாதீர்கள்.
    இப்படிப்பட்ட படிக்கும் பழக்கம் எல்லோருக்கும் வேண்டும். கிரிக்கெட், ஹாக்கி, மல்யுத்தம், கார் ரேஸ் பார்முலா பந்தயம், கைப்பந்து, கால்பந்து, துப்பாக்கி சுடுதல், வில் வித்தை, கபடி – இப்படிப்பட்ட விளையாட்டுக்களின் வீரர்களாயினும், ஓவியக் கலைஞராக இருந்தாலும், நாட்டியக் கலை தாரகையா இருந்தாலும், இசைக் கலைஞராக இருந்தாலும், நடிகர் நடிகையாக இருந்தாலும், ஒளிநுட்ப கலைஞராக இருந்தாலும் பேச்சுத்திறமை அவர்களுக்கும் அவசியமே. வாய்ப்புகள் பெற உரிய அதிகாரிகளோடு உரையாடும்போதும், பத்திரிக்கைகளுக்கு தொலைக்காட்சிகளுக்கு பேட்டி தரும்போதும் இப்பேச்சாற்றாலும் கருத்தாழமும் அவர்களுக்கு தன்னம்பிக்கையோடு கூடிய வெளிப்பாட்டுத் திறனை மேம்படச் செய்யும். அதுதான் அவர்களை புகழின் உச்சிக்கு இட்டுச் செல்லும்.

    நல்ல சிந்தனை

    மற்றவர்கள் நம்மைப் புகழ வேண்டும் என்று நாம் ஆசைப்பட்டால் நாம் அனைவரையும் புகழ்ந்து பேசி வருவதைப் பழக்கமாக வைத்துக்கொள்ள வேண்டும். நம்மிடம் இருக்கும் பெரிய இன்பம், பிறரிடம் அன்பு செலுத்துதல், பிறரை மனமாற பாராட்டுதல்.
    எல்லாவித ஆற்றல்களையும், திறமைகளையும் நம்மிடமே வைத்துக்கொண்டு இறைவனிடம் இதைக்கொடு, அதைக்கொடு என்று கேட்பது கோடீஸ்வரரிடம் கீரைக்கட்டு கேட்பது போலாகும்.
    நம்மிடம் என்னென்ன திறமைகள் உள்ளன என்பதை வைத்து எடை போடுவது இல்லை. அந்த திறமையை வைத்து என்ன சாதித்து இருக்கிறோம் என்பதைக் கொண்டுதான் மதிப்பீடு செய்வார்கள்.
    பயன்படாத திறமை துருப்பிடித்த வாளுக்குச் சமமாகும் என்பதை என்றும் நினைவில் வைக்க வேண்டும். தன்னம்பிக்கை இழந்துவிட்டால் எல்லாமே வெற்றிடமாகத்தான் தெரியும்.
    குறிக்கோள் இல்லாத பயணம், அவிழ்க்க முடியாத முடிச்சு, நட்சத்திரம் இல்லாத வானம், அர்த்தம் இல்லாத கதையாக வாழ்க்கை அமைந்துவிடும்.
    அமெரிக்க கோடீஸ்வரர் ராக்பெல்லரிடம் “உங்களுடைய முன்னேற்றத்திற்கு அடிப்படைக் காரணம் என்ன?’ என்று கேட்டார்கள். “வாழ்க்கையில் முன்னேற வேண்டும் என்று உறுதி எடுத்துக்கொண்டடேன். அந்த உறுதியோடு திட்டமிட்டு கடுமையாக உழைத்தேன். உயர்வு பெற்றேன்” என்றார்.
    “இந்தப் பிறப்பிலேயே மனஉறுதி இல்லாதவன், அடுத்தப் பிறப்பில் புழுவாகத்தான் பிறப்பான்” என்று கூறினார் பாரதியார்.
    நிகழ்காலத்தில் தலை கவிழ்ந்து இருப்பதை விட்டுவிட்டு தலையைத் தூக்கி வருங்காலத்தை எதிர்நோக்கும் பண்புதான் நம்மை வெற்றியை நோக்கி அழைத்துச் செல்லும்.
    தண்ணீருக்குத்தான் ஆழம் இருக்கிறது என்பது இல்லை. சிந்தனையில் ஊறிப்பிறக்கும் செயலிலும் ஆழம் உள்ளது. “நம்மால் என்ன செய்ய முடியும் என்பதை வைத்தே நம்மை எடைபோட்டுக் கொள்கிறோம். ஆனால் மற்றவர்களோ நாம் செய்ததை வைத்து எடைபோடுகிறார்கள்” என்கிறார் நெப்போலியன்.
    “என்னால் எதுவும் செய்ய முடியும் என்று சொல். அப்போது விஷம் கூட உன்னைக் கொல்லாது” என்கிறார் விவேகானந்தர்.
    “உன்னால் எதைச் செய்ய முடியாது என்று மற்றவர்கள் சொன்னார்களோ, அதையே செய்துகாட்டு” என்கிறார் நபிகள் நாயகம்.
    அனேகம் பேர் தங்களுடைய நிழலைப்பார்த்துக் கொண்டே வாழ்க்கையைக் கழிக்கின்றனர். அதனால் நாளடைவில் தாங்களே தேய்ந்து நிழலாகி விடுகின்றனர்.
    “பிரச்சனைகளை அறிவுடனும், தன்னம்பிக்கையுடனும் சந்திக்கும் போது துணிவு ஏற்படும். அதுவே எல்லா செயல்களிலும் வெற்றிபெற உதவி செய்யும்” என்கிறார் அறிஞர் ஹார்வே.
    எப்படி செயல்பட்டால் குறிக்கோளை அடையலாம் என்பதைப் பற்றியே சிந்தித்துக்கொண்டு இருக்க வேண்டும். அந்த சிந்தனையே செயல்பட வைத்து வெற்றி பெற வழிவகுக்கும்.
    வாழ்க்கையில் எதையும் துணிவுடன் செய்யாமல் இருந்தால் நாம் விரும்பும் எந்தக் காரியமும் வெற்றியுடன் அமையாது. பயன்தரும் பெரிய மரமாக நம்மை வளர்த்துக் கொள்வது நல்லது. முட்புதராக இருக்கக்கூடாது. கால் தவறி முட்புதரில் விழுந்துவிட்டால் காயம் ஏற்படும்.
    நம்மை மற்றவர்கள் மாற்றும்படியாக இருந்துவிடக் கூடாது. நம்மை நாமே மாற்றிக்கொண்டு செயல்பட்டால் தான் வெற்றியைப் பெற முடியும். நம்முடைய சக்திக்கு ஏற்றபடி ஆசைப்பட்டால் நிச்சயம் கிடைக்கும். சக்தியை மீறி ஆசைப்பட்டால் நடக்காமல் போவதுடன் வாழ்க்கையே மாறிவிடும்.
    ஆசைப்படுவது நியாயமானது. பேராசைப்படுவது அநியாயமானது.
    என்ன செய்யலாம் என்று யோசித்துக் கொண்டே இருந்தால் எதையுமே செய்ய முடியாது. என்ன செய்ய வேண்டும் என்று யோசித்தால் உடனே செயல்புரிய முடியும்.
    உடற்பயிற்சியால் உடம்பு எப்படி ஆரோக்கியம் அடைகிறதோ, அதேபோல தொடர்ந்துவரும் வெற்றியால் மனம் ஆரோக்கியம் அடையும். எதுவும் கிடைக்கவில்லையாÐ நீங்கள் இப்பொழுது உயிரோடு இருப்பதே பெரிய விஷயம். அதற்காக மகிழ்ச்சி அடையுங்கள். அந்த மகிழ்ச்சியே எல்லாவற்றையும் கொண்டுவந்து தரும் என்கிறார் எமர்சன்.
    நாம் நன்றாக வாழ்ந்தால் தான் உடல் உறுப்புகள் எல்லாம் நன்றாக வேலை செய்து உயர்வுக்கு அழைத்துச் செல்லும். அதனை சரியான முறையில் பயன்படுத்தியே தீர வேண்டும்.
    ஒரு பொருளைப் பயன்படுத்தாமல் இருந்தால் அது விரைவிலேயே கெட்டுப் போய்விடும். இது இயற்கையின் நியதி. பொருளுக்கு இருக்கும் தன்மை நம்முடைய உடம்புக்கும் பொருந்தும்Ð நம்மை நாமே உபயோகப்படுத்தாமல் இருந்தால் நம்முடைய உடம்பு என்னவாகும்?
    உபயோகப்படுத்தப்படும் பொருள் பயன் உடையதாக இருக்கும். அதுபோலவே நம்முடைய உடலும் எண்ணமும் உபயோகப்படுத்தும் பொழுது வாழ்க்கை பயனுடையதாக மாறும்.
    நாம் பயன்பெறும் படியாகவும், பயன்படுத்தும்படியாகவும் வாழ வேண்டும். இதனை அறிந்துகொண்டால் நிச்சயமாக நன்றாக வாழ முடியும். வாழ்க்கையை எப்படி வாழ்வது என்று ஆராய்ந்து அறிந்து கொண்டு அதற்கு ஏற்றபடி மாற்றி அமைத்துக் கொள்ள வேண்டும்.

    வலி என்பது நிரந்தரமல்ல…

    ஆஸ்திரேலியா நாட்டின் மெல்பர்ன் நகரத்தில், அந்த இளம் கிறிஸ்தவத் தம்பதியர் தனது முதல் குழந்தையின் வரவுக்காக ஆயிரமாயிரம் கனவுகளோடும், கற்பனைகளோடும் காத்துக் கிடந்தனர். 1982ம் ஆண்டு டிசம்பர் திங்கள் 4ம் நாள் அதிகாலைப் பொழுதில் கடவுள் ஒரு அழகான ஆண் குழந்தையைக் கொடுத்தார்.

    Continue Reading »