Home » Cover Story » எங்கும் உயர்ந்தே நில்! எதிலும் தமிழே சொல்!!

 
எங்கும் உயர்ந்தே நில்! எதிலும் தமிழே சொல்!!


ஆசிரியர் குழு
Author:

அமெரிக்காவில் புலம்பெயர்ந்து வாழ்ந்து கொண்டிருக்கும் தமிழர்கள், தங்களின் மரபுகள், வரலாறு, கலைகள், சமூக, பொருளாதார, அரசியல் தளங்கள் போன்றவற்றில் எத்தகைய மாற்றங்களை ஏற்படுத்திக் கொண்டிருக்கிறார்கள் என்பது குறித்து வடஅமெரிக்க தமிழ்ச்சங்கப் பேரவை (FeTNA) நிர்வாகிகளிடம் நாம் தொடர்பு கொண்டோம். அப்பேரவை பொறுப்பாளர்கள் பல்வேறு கருத்துக்களை நம்மோடு பகிர்ந்து கொண்டார்கள். அவர்களோடு இனி நாம்…
புலம்பெயர்தல் என்பது தமிழர்கள் வாழ்வில் எப்போது, ஏன் தொடங்கியது?
1800களில் பிரிட்டீஸ் அரசால் பெருந்தோட்டப் பயிர் செய்வதற்காகத் தென்னிந்தியாவில் இருந்தும், இலங்கையின் வடபகுதியில் இருந்தும் குறிப்பிடத்தக்க அளவில் தமிழர்கள் தென்கிழக்கு ஆசிய நாடுகளான மலேசியா, சிங்கப்பூர், பர்மா, தாய்லாந்து, இந்தோனேசியா, ஜாவா, சுமத்ரா, கம்போடியா போன்ற நாடுகளில் குடியமர்த்தப்பட்டார்கள். இவ்வாறே 19ம் நூற்றாண்டின் நடுவில் மொரீசியஸ், மடகாஸ்கர், தென்னாப்பிரிக்கா போன்ற ஆப்பிரிக்க நாடுகள் பலவற்றிலும் தமிழர்கள் குடியேறியுள்ளார்கள். 20ம் நூற்றாண்டில் தொழில் வாய்ப்புக்கள் பெற்று மத்திய ஆசிய நாடுகளுக்குச் சென்று வசிக்க ஆரம்பித்தனர்.
அமெரிக்காவை நோக்கி தமிழர்கள் எப்போதிருந்து புலம்பெயர்ந்தனர்?
1950களின் பின்னர் தமிழர்கள் தொழில் வல்லுனர்களாக ஐரோப்பா மற்றும் அமெரிக்க நாடுகளுக்குப் புலம் பெயர்ந்தனர். குறிப்பாக இங்கிலாந்து, பிரான்ஸ், ஜெர்மனி, சுவிட்சர்லாந்து, டென்மார்க், நார்வே போன்ற ஐரோப்பிய நாடுகளுக்கும், கனடா, அமெரிக்கா போன்ற நாடுகளுக்கும் பெருமளவில் கல்விக்காகவும், வேலை வாய்ப்புக்காகவும் புலம் பெயர்ந்தார்கள். இவ்வாறு இடம்பெயர்ந்தவர்களில் கணிசமானோர் குடியுரிமை பெற்று அந்தந்த நாடுகளின் மொழிகளைக் கற்று, பொருளாதார வளர்ச்சியடைந்து வாழ்கின்றனர். உலகில் 7 கோடி மக்கள் தமிழைத் தாய் மொழியாகவும், 90 இலட்சம் மக்கள் தமிழை இரண்டாம் மொழியாகவும் பயன்படுத்திக் கொண்டிருக்கிறார்கள்.
புலம்பெயர்ந்த தமிழர்களின் நோக்கம் முதலில் எது சார்ந்து இருந்தது?
1960ன் காலகட்டத்தில் அமெரிக்காவிற்குப் புலம்பெயர்ந்த தமிழர்கள் நோக்கம், மருத்துவக் கல்வி கற்பதற்காகவே இருந்தது. மருத்துவம் மற்றும் அது சார்ந்த படிப்புகளைப் படிப்பதற்கே அதிகமான தமிழர்கள் புலம்பெயர்ந்து அமெரிக்காவிற்கு வந்தனர். அவர்களில் பெரும்பாலானோர் மருத்துவக் கல்வி கற்ற பின்னர் அமெரிக்காவிலேயே தங்களுக்கான பணி வாய்ப்புக்களைப் பெற்றுக் கொண்டு நிரந்தர குடியுரிமையையும் பெற்று வாழ்ந்து கொண்டிருக்கிறார்கள்.
1980 காலகட்டத்திற்குப் பின்னர் அறிவியல் மற்றும் பொறியியல் துறையில் ஏற்பட்ட புரட்சியின் பயன்பாட்டைப் பயன்படுத்திக் கொள்ள தமிழர்கள் முடிவெடுத்து பொறியியல் துறை சார்ந்த படிப்புகளைப் படிக்கவும், எம்.எஸ். போன்ற அறிவியல் சார்ந்த உயர்கல்வி கற்கவும் புலம் பெயர்ந்தார்கள்.
1990ம் ஆண்டின் பிற்பகுதியில் தகவல் தொழில் நுட்பத்தில் ஏற்பட்ட புரட்சியை தனதாக்கிக் கொண்டவர்கள் தமிழர்கள். இந்தக் காலகட்டத்தில் அமெரிக்க விசாவிற்கான நடைமுறைகள் தளர்த்தப்பட்டதால் அதிகமான தமிழர்கள் தகவல் தொழில்நுட்பம் சார்ந்த படிப்புக்களைப் படிக்கவும், அது சார்ந்த வேலைவாய்ப்புகளுக்காகவும் பெருமளவில் புலம்பெயர்ந்தார்கள். அமெரிக்க பொருளாதாரத்தில் கணிசமான பங்களிப்பு இந்த புலம்பெயர்ந்த தமிழர்களால் உயர்ந்தது. அமெரிக்கப் பொருளாதாரம் மட்டுமின்றி இந்தியாவின் அந்நியச் செலாவணியும் பெருமளவில் கிடைக்கச் செய்தவர்கள் இந்த புலம்பெயர்ந்த தமிழர்கள் தான்.
மேலும் புலம்பெயர்ந்த தமிழர்கள் உணவகங்கள், தொழிற்சாலைகள், வியாபார அங்காடிகள், சேவை நிறுவனங்கள் ஆகியவற்றை ஏற்படுத்தி இருக்கிறார்கள். குறிப்பிட்ட தொகையினர் மருத்துவம், நிதித்துறை மற்றும் பொறியியல் போன்ற உயர் தொழில் திறன் வேண்டிய துறைகளில் தலைமைப் பொறுப்புகளில் இயங்கி வருகிறார்கள்.
கனடா மற்றும் ஐக்கிய அமெரிக்காவின் சில பகுதிகளில் தமிழ் ஊடகங்களில் ஒலி பரப்புத்துறை அல்லது வானொலிகள் ஒரு முக்கிய இடத்தைப் பெற்றுள்ளது. குறிப்பாக இலங்கைத் தமிழர்கள் பெருமளவில் வானொலிக் கலைஞர்களாக இந்தத் தமிழ் ஒலிபரப்புத் துறையில் பங்குபெறுவதால் செய்தி வாசிப்பு, உரையாடல் என அனேக நிகழ்ச்சிகளில் ஆங்கிலம் கலப்பில்லாத தமிழ் மொழியாகவும், தெளிவான தமிழ் உச்சரிப்பும் கொண்டதாக இருக்கிறது.
அரசியலில் புலம்பெயர்ந்த தமிழர்களின் ஈடுபாடு என்பது எந்தளவுக்கு?
தொழில் வாய்ப்புக் கருதி 1960களில் தொடங்கி 1980கள் வரை தமிழ்நாட்டில் இருந்தும், பிற நாடுகளில் இருந்தும் புலம்பெயர்ந்த தமிழர்கள் அரசியலில் அவ்வளவு ஈடுபாடு காட்டவில்லை. ஆனால் 1980களுக்குப் பின்பு அரசியலில் செயல்பட்டார்கள். குறிப்பாக வடஅமெரிக்கப் பகுதிகளில் உள்ள பல்கலைக்கழகம், நகராட்சி, மாகாணம் என பல்வேறு நிலைகளிலும் தமிழர்கள், மைய நீரோட்டத் தேர்தல்களில் பங்குபெற்றுக் கொண்டிருக்கிறார்கள்.
அமெரிக்காவில் தமிழ்க்கல்வி திட்டங்கள் செயல்படுத்தப்படுகின்றனவா?
1980களின் இறுதியில் இருந்து கனடா, அமெரிக்காவின் பல பகுதிகளில் தமிழ்க்கல்வி நடைபெறத் தொடங்கியது. 7 கோடி மொத்த மக்கள் தொகையில் இந்தியா, இலங்கை, மலேசியா, தென் ஆப்பிரிக்கா, கனடா ஆகிய நாடுகளுக்கு அடுத்ததாக அமெரிக்காவிலும் அதிக தமிழ் மக்கள் (1.25 மில்லியன்) வசிக்கிறார்கள். இங்கு பல தன்னார்வ, அரசு தமிழ் வகுப்புகள், தமிழ் கல்வித் திட்டங்கள் செயல்படுத்தப்படுகின்றன. ஒரு கணிப்பின்படி 15,000 தமிழ் சிறார்களில் ஏறக்குறைய பாதியளவு பிள்ளைகள் தமிழ் படித்துக் கொண்டிருக்கிறார்கள். கனடாவில் அடிப்படை பள்ளியில் இருந்து பல்கலைக்கழக கல்வி வரை தமிழை ஒரு பாடமாக எடுக்க வாய்ப்புகள் உள்ளன. குறிப்பாக தமிழர்கள் அதிகம் வாழும் கனடாவின் டொரொன்டோ, வடஅமெரிக்க பகுதிகள் போன்றவற்றில் இந்த வாய்ப்புக்கள் அதிகம் உண்டு.
டொரோண்டோ பல்கலைக்கழகம், யோர்க் பல்கலைக்கழகம் போன்றவற்றில் தமிழ் வகுப்புகள் இருக்கின்றன. தமிழ் மொழிக் கல்வி பெரும் தமிழ் மாணவர்களின் விழுக்காடு தொடர்ச்சியாக உயர்ந்து கொண்டே வருகிறது. பெரும்பாலான இரண்டாம் தலைமுறை மாணவர்கள் தமிழ்க்கல்வி, தமிழில் பேசத் தெரிந்தவர்களாகவே உள்ளனர். தமிழ் மொழிக் கல்வி கற்பிப்பது, தொடர்ச்சியான தமிழ் வாசிப்பு என்று தன் பிள்ளைகளுக்குத் தமிழைத் திறம்பட கற்றுத் தருகிறார்கள் பெற்றோர்கள்.
அடுத்த 20 அல்லது 30 ஆண்டுகளில் தலைமுறை மாற்றத்தால் தமிழ் மொழிக் கல்வி தேக்க நிலையை அடையாமல் இருக்கவும், மூன்றாம் தலைமுறையினர் தமது வேர்களையும், மொழியையும் ஆர்வத்துடன் தேடும் நிலையையும் உருவாக்கும் பொருட்டு பல்வேறு இயக்கங்கள் செயல்பட்டுக் கொண்டிருக்கின்றன. குறிப்பாக பல தமிழ்ச் சங்கங்கள் ஒரு கூட்டமைப்பாக இணைந்து இந்தப் பணியைச் செய்து கொண்டிருக்கின்றன.
தமிழ் மொழியையும், பண்பாட்டையும், சமூகத்தையும் மேம்படுத்திப் பயன் பெறுவதை நோக்கமாகக் கொண்ட அமைப்பான உலகத் தமிழ்மொழி அறக்கட்டளை (International Tamil Language Foundation), வடஅமெரிக்கத் தமிழ்ச்சங்கப் பேரவை (Federation of Tamil Sangam of North America) போன்றவற்றில் உலகத் தமிழர்கள் பலரும் இணைந்து செயலாற்றுகின்றனர். தமிழர்களிடையே தமிழ்மொழி பரவலாகப் பேசப்படாவிட்டாலும் தமிழர் பண்பாட்டுக் கூறுகளும், உணர்வுகளும் உயிர்ப்புடன் இருப்பதற்கு இத்தகைய அமைப்புகள் பெரிதும் காரணமாக இருக்கின்றன.
வட அமெரிக்காவில் தமிழர்களின் வாழ்வு குறித்தும் வடஅமெரிக்க தமிழ்ச்சங்கம் (FeTNA) குறித்தும் சொல்லுங்களேன்…
அமெரிக்கத் தமிழர் என்பவர்கள் தமிழ் பின்புலத்தைக் கொண்டு ஐக்கிய அமெரிக்காவில் வசிப்பவர்கள். பல்வேறு பகுதிகளில் இருந்தும் தமிழர்கள் கல்விக்காகவும், வேலைக்காகவும், தொழில் தொடங்குவதற்காகவும் கடந்த 50 வருடங்களாக அமெரிக்காவில் குடியேறி வாழ்ந்து வருகிறார்கள். குறிப்பாக 1980களின் பின்பு பெருமளவில் குடியேறியுள்ளார்கள். இப்படிக் குடியேறியவர்கள் பல்வேறு குறிக்கோள்களுக்காக அமைப்பு முறையில் ஒருங்கிணைந்து செயல்பட ஆரம்பித்தார்கள். மொழி, அரசியல், வணிகம், தொழில், சமய ஈடுபாடுகள் எனப் பல நோக்கங்களை வைத்து தமிழ் அமைப்புகள் அமெரிக்காவில் இயங்கி வருகின்றன. அதில் முக்கியமானது
வட அமெரிக்க தமிழ்ச்சங்கப் பேரவை (FeTNA) என்பதாகும். தமிழர் இனம், கலை, இலக்கியம், பண்பாடு முதலானவற்றைப் பேணவும், போற்றவும் செயல்பட்டுக் கொண்டிருக்கும் வட அமெரிக்க தமிழ்ச்சங்கப் பேரவை ஏற்படுத்தப்பட்டு 25 ஆண்டுகள் ஆகின்றன. ஒன்றுபட்டு பலரும் பல்வேறு சேவைகளைச் செய்துவருகிறோம்.
வடஅமெரிக்க தமிழ்ச்சங்கப் பேரவையின் தோற்றம், நோக்கம் மற்றும் வளர்ச்சிப் பணிகள் குறித்து?
கடந்த 25 ஆண்டுகளுக்கு முன்னர் புலம்பெயர்ந்து அமெரிக்கா சென்ற தமிழர்கள் அமெரிக்க மண்ணில் தமிழ் மொழியையும், தமிழர்களின் பண்பாட்டையும், அவர்தம் அரும்பெரும் கலைகளையும் காக்கின்ற அரிய நோக்கத்துடனும், புலம்பெயர்ந்து வரும் தமிழர்களின் முன்னேற்றத்திற்காகவும் செயல்பட வேண்டும் என்ற சீரிய எண்ணத்துடனும் ஏற்படுத்தப்பட்டதுதான் இந்த வடஅமெரிக்க தமிழ்ச்சங்கப் பேரவை.
அமெரிக்காவில் உள்ள 50 மாகாணங்களில் பல்வேறு தமிழ்ச்சங்கங்கள் செயல்பட்டுக் கொண்டிருக்கின்றன. வடஅமெரிக்கக் கண்டத்திலுள்ள கனடா மற்றும் அமெரிக்காவில் இயங்கி வரும் தமிழ்ச் சங்கங்களையும் தமிழ் அமைப்புக்களையும் தன்னுள் இணைத்து, ஒரே குடையின் கீழ் மத்திய அரசின் வரிவிலக்குப் பெற்ற அமைப்பாக கடந்த 25 ஆண்டுகளாக ஒரே கூட்டமைப்பாக செயல்பட்டுக் கொண்டிருக்கிறது இந்த வடஅமெரிக்க தமிழ் சங்கப் பேரவை.
தமிழ்மொழி, கல்வி, தமிழர் பண்பாட்டின் மீது அளவற்ற பற்றும் மதிப்பும் கொண்டுள்ள அமெரிக்க மற்றும் கனடாவையும் உட்படுத்திய தமிழ்ச்சங்கங்களின் கூட்டமைப்பாக செயல்பட்டுக் கொண்டிருக்கும் இப்பேரவையின் 25வது ஆண்டு தமிழ் விழா ஜுலை 5 முதல் 8 முடிய நடைபெறவுள்ளது. இத்தகைய நீண்ட நெடிய பயணத்தில் இப்பேரவையின் செயல்பாடுகளைச் சீர்தூக்கிப் பார்த்தால் புலம்பெயர்ந்த தமிழர்களின் மொழிவளர்ச்சி, கலாச்சாரத்தைக் காத்தல், இனத்திற்காக குரல் கொடுப்பது போன்ற செயல்பாடுகளில் தன்னை எந்தளவு ஈடுபடுத்திக் கொண்டிருக்கிறது என்பது புரியும்.
அமெரிக்காவில் கிட்டத்தட்ட 40 தமிழ்ச்சங்கங்கள் செயல்பட்டுக் கொண்டிருக்கின்றன. அந்தத் தமிழ் சங்கங்கள் அனைத்தும் ஒருங்கிணைந்து ஒரு கூட்டமைப்பாக செயல்பட்டால் தங்கள் மொழிக்கும், இனத்திற்கும் அதிகமான பங்களிப்பைத் தரமுடியும். சங்கங்கள் ஒருங்கிணையும் போது சக்தி அதிகரிக்கும். உலகில் பல்வேறு நாடுகளில் இருந்து புலம்பெயர்ந்து வந்துள்ளவர்களுக்கு அதிகபட்ச அளவு உதவிகளைச் செய்துதர முடியும் என்பதால் பல்வேறு சங்கங்களும் இணைந்து ஒரு கூட்டமைப்பாக இந்த வடஅமெரிக்க தமிழ்ச்சங்கப் பேரவை செயல்படுகிறது.
தமிழர்களின் ஒற்றுமையையும், தமிழர்களின் மேன்மையையும், உலகினருக்கு எடுத்துக்காட்டும் ஒரு அமைப்பாக இந்தப் பேரவை செயல்பட்டுக் கொண்டிருக்கிறது. மேலும், அடுத்த தலைமுறைக்கு இந்த மொழியைக் கொண்டு செல்லத் தேவையான வழிகாட்டுதல்களைச் செய்து கொண்டிருக்கிறோம். உதாரணமாக, பள்ளிகள் மற்றும் பல்கலைக்கழகங்களின் தமிழ் மொழிக்கான அமர்வுகளை ஏற்படுத்திக் கொண்டிருக்கிறது.
புலம்பெயர்ந்து வரும் தமிழர்களுக்கு கல்வி மற்றும் வேலைவாய்ப்பில் தேவையான வழிகாட்டுதல்களைச் செய்து வருகிறது.
ருபரவை உறுப்பினர்கள் எப்படித் தங்களை இந்த அமைப்பில் இணைத்துக் கொண்டார்கள்?
ஒன்றைவிட்டு பிரிந்து வந்தால் தான் அதன் அருமை புலப்படும் என்பார்கள். அதுபோலத்தான் நாங்கள் புலம்பெயர்ந்து இங்கே வந்தவுடன் தமிழ்மொழியின் மீதும், தமிழ் இனத்தின் மீதும் இருந்த பற்று அதிகரித்தது. நம்முடைய கலாச்சாரத்தை, இனத்தைக் காக்க வேண்டும் என்ற உந்துதல் ஏற்பட்டது. இத்தகைய காரணங்களால் புலம்பெயர்ந்த தமிழர்கள் பல்வேறு சங்கங்களில் தங்களை இணைத்துக் கொண்டு, தங்களின் பணிநேரம் போக எஞ்சிய நேரத்தை மொழிக்காகவும், இனத்திற்காகவும் செலவு செய்தனர். இப்படித் தன்னலமற்ற, இலாப நோக்கற்ற இதயங்களால் ஏற்படுத்தப்பட்ட இந்த பேரவையில் அதேபோன்ற எண்ணங்களையும், செயல்பாடுகளையும் கொண்டவர்கள் தங்களை இணைத்துக்கொண்டு சீரிய முறையில் செயல்பட்டுக் கொண்டிருக்கிறார்கள். அப்படித்தான் நானும் என்னை இணைத்துக் கொண்டு தலைவராக செயல்பட்டு வருகிறேன்.
FeTNA-வின் எதிர்கால இலக்கு என்பது…
வடஅமெரிக்க தமிழ் சங்கப்பேரவை ஏற்படுத்தப்பட்டு 25 ஆண்டுகளாகின்றது. பேரவையானது தொடர்ந்து தமிழ் ஈழத்துக்காகக் குரல் கொடுத்துக் கொண்டிருக்கிறது. தமிழர்களின் பண்பாட்டைப் பாதுகாக்கும் குறிக்கோளில் இருந்து சிறிதும் நழுவாமல் செம்மையாக தன் வழியில் செயல்பட்டுக் கொண்டிருக்கிறது.
பல்வேறு அறப்பணிகளில் தன்னை ஈடுபடுத்திக் கொண்டும், வடஅமெரிக்கத் தமிழர்கள் என்பதையும் கடந்து உலகத் தமிழர்கள் என்கின்ற வரையறையையும், தேவைக்கேற்ப ஏற்படுத்திக் கொண்டு செயல்படுகிறது. உதாரணமாக, தமிழகத்தில் உள்ள கும்பகோணத்தில் சில வருடங்களுக்கு முன்பு பாடசாலையில் தீ விபத்தில் சிக்குண்ட தமிழ்ச்சிறார்களுக்கு உதவிக்கரம் நீட்டியதையும், இலங்கையில் மனித உரிமைகள் நசுக்கப்பட்ட போது எதிர்ப்புக் குரல் கொடுத்ததையும், கொடுத்து வருவதையும், சுனாமி என்ற ஆழிப்பேரலையில் சிக்கித் தமிழர்கள் அல்லலுற்ற போது பல்வேறு உதவிகளை செய்ததையும் கூறலாம்.
இப்படி அமெரிக்கத் தமிழர்களின் வாழ்வியல் முன்னேற்றத்திற்காகவும், மொழியின் வளர்ச்சிக்காகவும் செயல்பட்டுக் கொண்டிருக்கும் இந்தப் பேரவையின் அடுத்த இலக்காக பல்வேறு பணிகளைத் திட்டமிட்டுள்ளது. குறிப்பாக, தமிழ் மொழியை இங்குள்ள பிள்ளைகள் கற்க பள்ளிகளை ஏற்படுத்துவது என்றும், கல்லூரிகள் மற்றும் பல்கலைக்கழகங்களில் தமிழுக்காக ஓர் இடத்தை ஏற்படுத்தவும் தன் முயற்சிகளை மேற்கொண்டுள்ளது.
எப்படித் தமிழை அடுத்த தலைமுறைக்கு எடுத்துச் செல்வது? தமிழர்களின் கலையையும், தமிழர்களின் படைப்புக்களையும் எப்படி பாதுகாப்பது என்று பல செயல்பாட்டு அமைப்புகளை ஏற்படுத்த திட்டமிடப்பட்டுள்ளது.
2012 FeTNA-விற்கு வெள்ளிவிழா ஆண்டு. அது குறித்து?
ஆண்டுதோறும் நாடளாவிய தமிழ்த்திருவிழாவைக் கொண்டாடி வரும் இப்பேரவையானது இவ்வாண்டு 24 ஆண்டுகாலப் பணியை நிறைவு செய்கிறது. அமெரிக்க தமிழ்த் திருவிழாவினைத் தனது வெள்ளி விழாவாக, மிகப்பிரம்மாண்டமான முறையில் மேரிலாந்து மாகாணத்தில் உள்ள பால்ட்டி மோர் நகரில் ஜுலை 6, 7 மற்றும் 8 ஆகிய நாட்களில் கொண்டாட உள்ளது. ஒவ்வொரு ஆண்டும், இந்தத் தமிழ்த் திருவிழாவினை தமிழறிஞர் ஒருவருக்குச் சிறப்புச் செய்யும் விதத்தில் அவர்தம் பெயர் சூட்டி பெருமை செய்து வருகிறது இப்பேரவை. கடந்தாண்டு பெருமழைப்புலவர் பொ.வெ. சோமசுந்தரனார் நூற்றாண்டு விழாவாகப் பரிணமித்தது. அவ்விதத்தில் இந்தாண்டு முனைவர் மு. வரதராசனாரின் நூற்றாண்டு விழாவாக இருப்பதால், வெள்ளிவிழா வரதராசனார் நூற்றாண்டு விழாவாக மலரவிருக்கிறது. “தமிழால் இணைவோம்ஙு செயலால் வெல்வோம்” எனும் இயன்மொழியைக் கொண்ட அமெரிக்கத் தமிழ்த்திருவிழாவில் தமிழ்க்கலை, இலக்கியம், பண்பாட்டைப் போற்றுமுகமாகப் பல நிகழ்ச்சிகள் இடம் பெற உள்ளன. இவ்விழாவில் உள்ளூர் கலைஞர்களைக் கொண்டும், தம் வீட்டுப் பிள்ளைகளைக் கொண்டும் கலை, இலக்கிய, நாடக, நாட்டியங்களும், மொழித்திறன் வளர்க்கும் போட்டிகள் பலவும் நடத்தப்படுகின்றன.
இதைத்தவிர, பல்வேறு துறைகளில் சிறந்த கலைஞர்களான வாழும் கலைப்பயிற்சி, ஸ்ரீ ஸ்ரீ ரவிசங்கர்ஜி அவர்களின் உரை, மூத்த தமிழறிஞர் மறைமலை இலக்குவனார் சொற்பொழிவு, மாவட்ட ஆட்சியர் சகாயம் அவர்களின் எழுச்சியுரை, வீரத்தாய் வேலுநாச்சியார் நாடக நாட்டியம், நாட்டுப்புறக் கலை ஆராய்ச்சியாளர் டாக்டர் பிரெண்டாபெக், எழுத்தாளர் எஸ். இராமகிருஷ்ணன் அவர்களின் இலக்கியப் பாசறை, கவிஞர் தமிழச்சி தங்கபாண்டியன் அவர்களின் கவியரங்கங்கள் மற்றும் பல நிகழ்ச்சியாளர்கள் பங்குபெற்று தங்களின் திறமைகளை வெளிக்கொணர இருக்கிறார்கள்.
இப்படிப்பட்ட தமிழ் விழாக்களினால் ‘பயன்கள்’ என்பதுதான் என்ன?
ஆண்டுதோறும் இத்தமிழ் விழாவினை நடத்துவதால் இசை, கலை, அறிவியல், படைப்பாற்றல் என்று பல்வேறு தளங்களில் தமிழர்கள் செய்துள்ள சாதனைகளை உலகத்தவர்களுக்கு தெரியப்படுத்த முடிகிறது. குறிப்பாக வட அமெரிக்காவிலும், ஏனைய மற்ற நாடுகளிலும் புலம் பெயர்ந்திருக்கும் தமிழர்கள் தங்களுடைய மொழிப்பற்றினாலும், மொழியறிவினாலும் தங்களுக்கு வாய்த்திருக்கும் பல புதிய தொழில்நுட்பங்களைப் பகிர்ந்து கொள்ள உதவுகிறது.
இவ்விழாவின் சிறப்பாக விழா நடக்கும் ஒவ்வொரு நாளும் பல்வேறு தலைப்புகளில் பல்வேறு அமர்வுகள் நடக்கின்றன. தொழிலதிபர்கள் தங்களின் தொழில் வளர்ச்சிக்குத் தேவையான கருத்துக்களைப் பெறவும், தங்களின் தொழில் வளர்ச்சியைப் பற்றி பகிர்ந்து கொள்ளவும், புதிய தொழில் வாய்ப்புகள் பற்றி அறிந்து கொள்ளவும் இத்தகைய அமர்வுகள் பெரிதும் உழ்வுகின்றன.
மேலும் இந்தியாவிலும், பல்வேறு நாடுகளிலும் தங்கள் கல்லூரிகள், பல்கலைக்கழகங்களில் படித்தவர்கள் ஒன்றாகப் பார்த்துக் கொள்ள ஒரு வாய்ப்பாகவும் இந்த விழா அமைகிறது.
வணிக அமைப்புக்கள், மொழி உணர்வாளர்கள், தொழில்நுட்ப சாதனையாளர்கள், புகழ்பெற்ற கலைஞர்கள், சிறப்பான அரசியல், பொருளாதார செயல்பாட்டாளர்கள் என்று ஒவ்வொரு தமிழர்களின் வாழ்வை மேம்படுத்த உழைத்துக் கொண்டிருக்கும் உணர்வாளர்களைச் சந்திக்கும் இவ்விழாவின் மூலம் தொழில் முனைவோர் வாணிகத்தைப் பெருக்கவும், கலைஞர்கள் திறனை வளர்த்துக் கொள்ளவும் ஒரு வாய்ப்பாக இது அமைகிறது.

 

No comments

Be the first one to leave a comment.

Post a Comment


 

 


July 2012

ஏமாற்று வேலைகள்…..எச்சரிக்கை நடவடிக்கைகள்!
சாதிக்கலாம் வாங்க
நோய்வாய்ப்படாது நூறாண்டுகள் வாழும் வழிமுறைகள்
உங்கள் பிள்ளைகள் புத்திசாலிகளாக வேண்டுமா?
உலக மக்கள் தொகை தினம்
விவசாயத்தின் இப்போதைய தேவை
எங்கும் உயர்ந்தே நில்! எதிலும் தமிழே சொல்!!
விவசாயம் + தொழில்நுட்பம்
wifi வலையமைப்பு
அம்மாவின் கைகள்
பாதை மாறிய பயணங்கள்
அந்நிய முதலீடும் பண வீக்கமும்
உற்சாக ஊற்று உங்களுக்குளே
மாறுவேஷம்
உங்களால் முடியும்
எழவேண்டும் தன்னம்பிக்கை கலாச்சாரம் …