Home » Articles » பெண் இன்றி அமையாது வாழ்வு

 
பெண் இன்றி அமையாது வாழ்வு


அனுராதா கிருஷ்ணன்
Author:

நாம் வாழும் பூமியைப் பெண்ணாக (பூமித் தாயாக) நாம் ஏன் உருவகப்படுத்துகிறோம் என்று தெரியுமா? அது புரிய ஒரு எளிய விளக்கம் இதோ. நாம் அமர்ந்து கொண்டிருக்கும் நாற்காலியானது நம் எடையைத் தாங்கும் அளவுக்கு வலிமையானதாக இருப்பதால்தான் நாம் கீழே விழாமல் அமர்ந்து இருக்கின்றோம். அதேபோல், நம் நாற்காலியைத் தாங்கி நிற்கும் தரையானது வலிமையாக இருப்பதால்தான் நம் நாற்காலி கவிழாமல் இருக்கிறது. அது போலவே, தரையைத் தாங்கும் இந்த பூமி மிகவும் வல்லமையாக இருப்பதால்தான் தரை நொருங்காமல் இருக்கிறது. அப்புறம், இந்த பூமியைத் தாங்கிக் கொண்டிருக்கும் ஏதோ ஒன்று சர்வ வல்லமை படைத்ததாக இருப்பதால்தான் நிலைத்திருக்கிறது. ஆக, அந்த ஏதோ ஒன்று தான் ஆகாச இருப்பு நிலை. இந்த இருப்புதான் நம் பூமியைத் தாங்கிப் பிடித்தும், சூழ்ந்து இருந்தும், சக்தியளித்து நிலைபெற வைக்கிறது. ஆக, பூமியின் பிரமாண்டம் நமக்குத் தெரியும். அந்த பிரமாண்டத்தையே தாங்கிக் கொண்டிருக்கும் வான் உண்மையில் சக்தி மிக்கதாகத்தானே இருக்க முடியும்? ஆக, இந்த அண்ட சராசரத்தில் வான் காந்தம் (இருப்பு) ஆண் தன்மையின் வெளிப்பாடாக திகழ்கிறது. இந்த இருப்பின் அசைவாக, இயக்க நிலையாக, சக்தியாக, பெண்தன்மையாக பருப்பொருளாக விளங்குகிறது. இங்கு வான் காந்தம் கொடுக்கும் தன்மையிலும், இயக்கப் பொருளாக இருக்கும் பூமி உள் வாங்கிக் கொள்ளும் தன்மையிலும் இருப்பதை கவனிக்க வேண்டும். ஆக, கொடுப்பது ஆண் தன்மையாகவும் (இருப்பு நிலை), உள் வாங்கிக் கொள்வது பெண் தன்மையாகவும் (சக்தியாக) அண்டத்தில் விளங்குவது புரிகிறதா?.
நண்பர்களே! இதே இருப்பும் சக்தியும் ஆகிய இறை நிலையின் இரண்டு தன்மைகளும் இந்த அண்டசராசரத்தில் உள்ள அனைத்து பருப்பொருளிலும் வெளிப்படுகின்றன. சான்றாக, ஒரு அணுவை எடுத்துக் கொண்டால், அதில் அணுக்கரு (Nucleus) இருப்பாகவும் (Positive Charged) அதனைச் சுற்றும் மின் அணுக்கள் (Electrons) சக்தியாகவும் (Negative Charge) விளங்குகின்றன. இந்த அணுக்கள் இணைந்து மூலக்கூறாக (Molecules) ஆகும் போதும் இரு கூறு (Bipolar) அமைப்பைக் கொண்டுள்ளாதாகவே இருக்கிறது. பல்வேறு மூலக்கூறுகள் பல வரிசைக் கட்டி உருவாகும் பல்கூறானதும் (Polymer) இரு துருவத் தன்மையைக் கொண்டதாகவே விளங்குகின்றன. இந்தப் பல்கூறுகள் இணைந்து மரபுக் கூறாக (DNA) உருவெடுக்கும் போதும் இரு நிலைப் பிரிகளாக (Positive and Negative Strands), ஒன்று ஆண் மற்றது பெண் வழி வந்த தன்மைகளாக வெளிப்படுகின்றன. மரபுக்கூறில் உள்ள இரு நிலைத் தன்மையே, உயிர் சுழற்சியால், நம் வலது ஆண் பகுதியாகவும், இடது பெண் பகுதியாகவும்; தலை தென் துருவமாகவும் பாதம் வட துருவமாகவும் வெளிப்படுகின்றன. இந்த விதமாகத்தான் ஆண், பெண் என்ற இரு பிரிவுகள் மனிதர்களிடத்திலேயும் உயிர்களிடத்திலேயும் இயங்குகின்றன. ஆக, இந்த அசைவற்று இருக்கும் (சிவனே என்று இருக்கும்) இருப்பை சிவன் என்றும், அசையும் இயக்கத்தை சக்தி என்றும் (அசைவதால் இருப்பின் சக்தி வெளிப்படும்) குறிப்பிடுகின்றனர். இதைத்தான் சக்தி இல்லையேல் சிவன் இல்லை என்றும், சிவனில்லையேல் சக்தி இல்லை என்று நம் முன்னோர்கள் சொல்லி வைத்தார்கள். இது புரியாமல், ஆணும் பெண்ணும் தனித்து இயங்க முனைவது சாதனையில் அல்ல வேதனையில்தான் முடியும்.
நம்மில் சில பேர்கள், பொருளீட்டு வதற்காக அயல் நாடுகளில் வேலை செய்து தனியாளாக இருக்க முனைகிறார்கள். கணவனும் மனைவியும் பல மாதங்கள் (ஒன்று முதல் இரண்டு வருடங்கள்) பிரிந்திருந்து, பின் சேர்ந்தாற்போல் ஒன்று அல்லது இரண்டு மாதங்கள் கலவியில் கலக்கும் வாழ்க்கையை வாழ்கிறார்கள். இதில் உள்ள சாதகமான விஷயங்கள் என்னவென்றால், நம் நாட்டில் கிடைக்காத அதிகப்பணம் கிடைக்கும்தான். குழந்தைகளுக்குத் தரமான கல்வி அளிக்க முடியும். வாழ்க்கைத் துணைவிக்கு நகைகள் வாங்க முடியும். கொஞ்சம் பணத்தை சேமிக்க முடியும்தான்.
அடுத்து பாதகமான விஷயங்களைப் பார்ப்போம். பிரிந்திருக்கும் காலங்களில் இல்லறத்தால் நிகழ வேண்டிய ஆண் பெண் சமன்பாடு, ஹார்மோனல் சமன்பாடு, வாத, பித்த மற்றும் கபச் சமன்பாடு, உயிர் உடல் இணக்க நிலை, பஞ்ச பூத சமநிலை, ஏழு தாது சமநிலை, அறுசுவை சமன்பாடு, குளிர் வெப்ப சமநிலை மற்றும் கற்பொழுக்க சமநிலை ஆகியன கணவன் மனைவி ஆகிய இருவருக்கும் சவாலாக இருக்கும். இந்தச் சவாலைச் சமாளிக்க யோக நிலையில் தவம் புரிந்தால், மேலே குறிப்பிட்ட சமநிலைகளை நிர்வகிக்க முடியும். ஆனால், தவம் புரிய உட்கார்ந்தால், துணை பிரிந்திருப்பதுதான் முன் வந்து நிற்கும். மருந்து சாப்பிடும் போது குரங்கை நினைக்கக் கூடாது என்று சொன்ன பிறகுதான் குரங்கு நினைப்பு வருவதுபோல், தவம் புரிய உட்கார்ந்தால் துணை நினைப்புதானே வரும்?. அப்படியில்லாமல் கட்டுப்பாடோடு இருக்க முனைவதால் ஏற்படும் மன உளைச்சல் மற்றும் மன அழுத்தம் நம் உயிர் உடல் சமன்பாடு தொடங்கி எல்லா சமன்பாட்டையும் குளைத்துவிடும். நண்பர்களே! எப்படியாவது கட்டுக்கோப்புடன் இருந்து, கனிசமான பணத்துடன் நாடு திரும்பியதும், ஆகா! இனிமேல் சந்தோஷமாக வாழலாம் என்று முடிவெடுக்கும் போது நீண்டகால நோய்கள் (Chronic Diseases) முன் வந்து நிற்கும். அப்போது சேமித்த பணம் மற்றும் சேர்த்த சொத்து ஆகியவற்றை ஈடாக கொடுத்தாலும் இழந்த ஆரோக்கியத்தை முழுவதுமாக மீட்டெடுக்க முடியாது. ஆக இல்லறத்தை இழந்து ஈட்டிய பொருளானது செல்லரித்து போவதுபோல் வீணாகிவிடும். இது புரிய நமக்கு விழிப்புணர்வு இல்லை என்றால், காலத்தால் அனுபவம் பெற்று, ஞானம் உண்டாகித்தான் உணர்வோம். அதுவரை, பணம் சம்பாதிப்பதிலேயே குறியாக இருப்போம். போதிக்கும் போது உணராது சிரிப்பவர்கள் பாதிக்கும் போது உணர்ந்து அழுவார்கள். இது தேவையா என்று யோசியுங்கள்.
நண்பர்களே! குடும்பம் ஓரிடம், குடும்பத் தலைவன் வேறிடம் என்று வாழ்பவர்களின் பிள்ளைகள், தாயின் அன்பு மட்டுமே கிடைக்கப் பெற்று, தந்தையின் அறிவும், ஒழுக்க நெறியும் கிடைக்கப் பெறாமல் இருப்பர். இத்தகையவர்கள், வெறும் உணர்ச்சி பிழம்பாகவே வாழ்ந்து தானும் நிம்மதியாக, அமைதியாக வாழாமல் அடுத்தவரையும் வாழ விடாமல் குடும்பத்திலும் சமுதாயத்திலும் வேண்டாத அதிர்வுகளை ஏற்படுத்துவர். “இப்படிப்பட்ட வாழ்க்கைத் தேவையா?” என்று நம்மை நாமே கேட்டுக் கொண்டால் போதும். அறிவையும் உணர்வையும் சமமாக பார்க்கும் இல்லற வாழ்க்கையைச் சரியாக அமைத்துக் கொள்வோம்.
நம்மில் சிலபேர், தமது தன் முனைப்பு மற்றும் அகங்காரங்களை விட்டொழிக்காமல், வாழ்நாள் முழுமைக்கும் வாழ்க்கைத் துணைவருடன் மல்லுக்கட்டும் நிலைக்குத் தயாராக இருக்கிறார்கள். இன்னும் சிலர், வாழ்க்கைத் துணையினை மாற்றிக்கொண்டே இருப்பதே வாடிக்கையாக வைத்துக் கொள்கிறார்கள். இவர்களின் சண்டையால் மற்றவர்கள் சம்பாதிக்கிறார்கள். மற்றும் சிலர் பொருளியலில் வெற்றி பெற்ற பின் இனிதாக இல்லறம் காணலாம் என்று மிகத் தாமதமாக இல்லறத்தில் அடி எடுத்து வைக்கிறார்கள். இவர்கள் எல்லோரும் ஹார்மோன் சமன்கெடுதல் உள்ளிட்ட பல்வேறு உயிர், உடல் மற்றும் மன வேறுபாடுகளுக்கு ஆட்பட்டு வாழ்க்கையை விட்ட இடத்தில் விட்டு, வாழும் காலம் வரை எங்கெங்கோ தேடிக் கொண்டிருப்பார்கள்.
இதற்கெல்லாம் காரணம், நாம் வாழ்க்கைத் துணையை தெரிவு செய்யும் முறையே ஆகும். நமது வலது கைக்கு ஏற்ற பொருத்தமான கை என்பது இதற்கு எதிர் வசமாக இருக்கும் இடது கைதானே. அப்படியில்லாமல் இடது கை இருக்கும் வசமாகவே இயற்கையானது (கடவுள்) வலது கையையும் அமைத்திருந்தால் வசதியாக இருக்குமா? ஆகவே, அன்பர்களே! நம் வாழ்க்கைத் துணையானவர் நம்மைப் போல் அல்லாமல் நம் தன்மைக்கு எதிர் தன்மையில் இருப்பதே நல்ல இல்லறத்திற்கு ஏற்றது என்று புரிந்து கொள்ள வேண்டும். இதுவே இல்லறத் துணை தெரிவு செய்வதில் உள்ள இரகசியமாகும். இது புரியாத நாம், நம்மைப் போலவே இருக்கும் வாழ்க்கைத் துணையைத் தெரிவு செய்து வாழ முற்படும்போது வாழ்க்கை போர்க்களமாகிறது.
இல்வாழ்க்கைத் துணைவர் நம்மில் இருந்து மாறுபட்டவராக இருப்பதே நன்று! அதனால் நல்வாழ்க்கை அமையப்பெற்று, அறிவும் உணர்வும் சமன்பட்டு, இன்புற்று வாழ்வோம்!

 

No comments

Be the first one to leave a comment.

Post a Comment


 

 


April 2011

என்ன படிக்கலாம்? எங்கு படிக்கலாம்?
பிக்மாலியன்
முயன்றேன்… வென்றேன்…
மேன்மைமிகு மேலாண்மையில் வலிமைமிகு வள்ளுவம்
எல்லாம் எவன் செயல்?
சாதனை வாழ்வுக்கான சந்தோஷ வழிமுறைகள் 50
நிலைத்திருக்கும் நினைவுகள்
இங்கிலீஸ் ரொம்ப ஈஸி
திருநங்கையர் தினம்
நிதானித்து நட
பிறப்பு தடையல்ல
பெண் இன்றி அமையாது வாழ்வு
மனம் விட்டு கேளுங்கள்
உனக்குள்ளே உலகம்-11
முடியாது என்ற சொல்லுக்கு முற்று புள்ளி வைப்போம்
உள்ளத்தில் திடம்!! வரலாற்றில் இடம்!!
அச்சீவர்ஸ் அவென்யூ
உடலினை உறுதிசெய்
உள்ளத்தோடு உள்ளம்