Home » Articles » சோம்பலை சாம்பலாக்கி வெற்றி பெறு!

 
சோம்பலை சாம்பலாக்கி வெற்றி பெறு!


முருகேசன் ஆர்
Author:

மலைப்பாதையில் பயணம் செல்லும் போது ஓங்கி வளர்ந்த மரங்களும் பசுமைநிறைந்த செடி, கொடிகளும் கண்ணுக்குள் குளிர்ச்சியான சந்தோசத்தை தென்றலாக மனதை மகிழ்விக்கும் அனுபவம் பெற்றிருக்கலாம். அந்த சந்தோசதருணம் தரும் இன்னொரு உண்மை வெற்றியின் தத்துவம். மரங்கள் பூமியின் எந்தபகுதியில் வளர்ந்தாலும் தன்னை வித்திட்ட இடத்தில் தன்நிலையை உறுதியாக நிலைநிறுத்திக் கொள்கிறது. அதே சமயம் தன்னை மேல் நோக்கி மேலும்மேலும் வளர்த்துக் கொள்கிறது. பூமியின் பள்ளத்தாக்கில் இருந்தாலும் உயர்மட்டபகுதியில் இருந்தாலும் உயர வளர்கிறது. பக்கவாட்டில் படர்ந்தாலும் உயரவளர்வதை முன்னிருத்திக்கொண்ட நோக்கமே அதனிடம் இருக்கிறது. அதைவிட்டு சற்றும் விலகிச் செல்வதில்லை. அந்த மரங்கள் மடியும் வரை வளர்கிறது. மடியும் போதுகூட இன்னொரு தாவரத்திற்கு உணவாக மண்ணோடு மண்ணாக மறித்துப் போகிறது. நண்பர்களே, மனிதனின் ஒவ்வொரு வெற்றியும் அப்படித்தான் இருக்க வேண்டும். நீங்கள் இருக்கும் உங்கள் நிலையை உறுதிபடுத்திக்கொள்ளுங்கள். உங்களது பிறப்பு, வளர்ப்பு எங்கே எப்படி என்பதைப் பற்றியெல்லாம் சிந்திக்காமல் இருக்கும் நிலையை ஆதாரமாக கொண்டு உயர வளர – சமுதாய வளர்ச்சியில் உயர வளர செயல்பட வேண்டும். மரங்கள் உணர்த்தும் தத்துவத்தைப் போல வாழும் வரை தொடர்ந்திட வேண்டும். வாழ்க்கைக்குப் பிறகும் மற்றவர்களுக்கு பயன் தரும் வகையில் நம் வளர்ச்சி இருக்க வேண்டும். நீங்கள் உங்கள் குழந்தைளுக்கு கொடுக்கும் கல்வியறிவு மற்றும் சொத்துக்கள் கூட இந்த தத்துவத்தின் ஒருபகுதி தான். அது சமுதாய முன்னேற்றத்திற்கு உதவும் வகையில் மாறும்போது உங்கள் வெற்றி வெளிச்சமிட்டு பிரகாசிக்கும். அது தான் உங்கள் புகழ். தான் உயிர்பெற்று வளர்ந்து இன்னொரு மரத்திற்கு வித்தாக மாறுவதுதான் மரத்தின் வளர்ச்சி நோக்கமாக இருந்தாலும் வளர்ந்து மற்றவர்களுக்கு கொடுக்கும் நிழலும் காய் கனிகளும் எப்படி மற்றவர்களை சந்தோச படுத்துகிறதோ அந்த நிலையை ஒவ்வொரு மனிதனின் வெற்றியும் அடைய வேண்டும். அப்போது தான் அந்த வெற்றியின் உச்சகட்டபயன் – சந்தோசத்தை உணர முடியும்.
வெற்றிக்கான உழைப்பு, ஒட்டம், பயிற்சி ஒரு குறிப்பிட்ட காலத்திற்குள் நின்றுவிடக்கூடாது. தொடர்ந்திட வேண்டும். செய்யலாம் ஆனால் எத்தனை கஷ்டங்கள் கடக்க வேண்டும் என எண்ணுகிறீர்களா? நண்பர்களே, வெற்றிக்கான அடையாளங்கள் சில காய வடுக்கள் தான். சில வேளைகளில் உடல், வேறு சிலவேளைகளில் மனதில் – பட்ட வடுக்கள் நிச்சயம் வெற்றியின் அடையாளமாகத்தான் திகழும். எப்போதாவது மனம் துவண்டுப்போனால் – போவதுபோல் உணர்ந்தால் சோம்பல் உங்களைச் ‘சேம்பிள்’ பார்க்கப் பார்த்தால் மகாகவி பாரதியின் இந்த கவிதை வரிகளை படியுங்கள்.
தேடிச்சோறுநிதந் தின்று -பல
சின்னஞ்சிறு கதைகள் பேசி-மனம்
வாடித்துன்பமிக உழன்று -பிறர்
வாடப் பல செயல்கள் செய்து
நரைகூடிக்கிழப்பருவமெய்தி-கொடுஞ்
கூற்றுக்கிரையெனப்பின்மாயும்-பல
வேடிக்கை மனிதரைப்போலே -நான்
வீழ்வேனென்று நினைத் தாயோ!
உரக்கப்படியுங்கள்.
இந்தப் புரட்சிக்கவிஞனின் மின்சார வார்த்தைகள் உங்கள் சோம்பலை சாம்பாலாக்கிவிடும். பட்டுக்கோட்டை கல்யாண சுந்தரத்தின்
வேலையற்ற வீணர்களின் மூளையற்ற வார்த்தைகளை
வேடிக்கையாக கூட நம்பிவிடாதே-நீ
வீட்டினுள் பயந்து கிடந்து வெம்பி விடாதே
பாட்டு வரிகள் உங்கள் செயல்பாட்டின் முட்டுக்கட்டைகளை மூட்டைக்கட்டி
வைக்க உதவும்.
சமுதாய நலமிக்க கவிஞர்களின் நூல்களை படியுங்கள். படிக்கும் போதே
கருத்துக்களை உங்கள் ஆழ்மனதில் வித்திடும் வித்தையை – விந்தையை கற்றுக்கொடுக்கும். மரத்தின் இயல்நிலையும் வளர்ச்சித் தத்துவமும் நல்ல கவிஞர்களின் ஞான வார்த்தைகளும் உங்கள் வெற்றிக்கான பாதையில் வெளிச்சமிடும். கம்பீரமாக நடந்து பாருங்கள், முன்னேற்றம் முடிவில்லாமல் உங்களைத் தொடரும்.

 

No comments

Be the first one to leave a comment.

Post a Comment