Home » Articles » வல்லமை தாரோயோ

 
வல்லமை தாரோயோ


ரஜினிகாந்த் கே
Author:

சிந்தனை செய் நண்பனே

நண்பர்களே ‘நல்லவனாக இருந்தால் மட்டும் போதாது. வல்லவனாகவும் இருக்க வேண்டும்’. இது ஆன்றோரின் வாக்கு. இந்த வாக்கு எந்த அளவிற்கு முக்கியம் என்பதைப் பார்ப்போம்.

சிவசங்கரன் மிகவும் நல்லவர். யாருக்கும் எந்த கெடுதலும் செய்யாதவர். நன்கு படித்தவர். நல்ல உத்தியோகத்தில் இருந்தவர். உலக நடப்பு அறிந்தவர். அனைத்து விஷயங்களிலும் கைதேர்ந்தவர். இத்தனை இருந்தும் தனது 75 வயதிலும் வேலைக்குச் சென்றால்தான் பிழைக்க முடியும் என்ற நிலை. ஏன் அவருக்கு இந்த நிலை?
சிறிது காலம் முன்னோக்கிச் செல்வோம். தொழில்நுட்ப கல்வி பயின்ற சிவசங்கரன், ஒரு சர்வதேச கம்பெனியில் மானேஜராக பணிபுரிந்து கொண்டிருந்தார். நல்ல சம்பளம், வசதிகள் அனைத்தும் இருந்தது. அவருடைய வீட்டுச் செலவு, குழந்தைகளின் பள்ளிச் செலவு போக மிச்சம் இருந்த பணத்தை சிறுக, சிறுக சேமித்து, ஒரு வீட்டை கட்டினார் சிவசங்கரன். சிறிது காலத்திற்குப் பிறகு, அவருடைய உற்ற நண்பர் ஒருவர் வீட்டிற்கு வந்தார். அவர் சிவசங்கரனின் பால்ய காலம் முதல் நண்பராக இருப்பவர். அவருக்கு சிவசங்கரனைப் பற்றி நன்றாகத் தெரியும்.
வீட்டிற்கு வந்தவர் சிவசங்கரனிடம் தான் மிகவும் கஷ்டத்தில் இருப்பதாகவும், கடன் தொல்லை அதிகமாக உள்ளது என்றும், இந்த நேரத்தில் அவர் தந்தைக்கு உடம்பு முடியாமல் ஆஸ்பத்திரியில் இருப்பதாகவும் கூறினார். “உன்னுடைய வீட்டுப் பத்திரத்தைக் கொடு, ஒரு மாதத்தில் மீட்டுத்தந்து விடுகிறேன்” என்று கூறுகிறார். இதனை நம்பிய சிவசங்கரன் மறுபேச்சு இல்லாமல் வீட்டுப் பத்திரத்தைக் கொடுத்து, வெற்றுத்தாளில் கையெழுத்து இட்டுக் கொடுத்து விடுகிறார். தன் நண்பரிடம் இருக்கும் கண்மூடித்தனமான நம்பிக்கையின் காரணத்தால் இப்படி செய்கின்றார்.

ஒரு மாதம் ஆகிறது, இரண்டு மாதம் ஆகிறது. இப்படியே ஐந்தாறு மாதங்கள் ஓடி விடுகிறது. சிவசங்கரன் மிகவும் கவலை அடைகிறார். நண்பனின் வீட்டிற்குச் செல்கிறார். வீடு பூட்டி இருக்கிறது. பக்கத்து வீட்டில் கூறுகிறார்கள். அவர்கள் சிங்கப்பூர் சென்றுவிட்டார்கள் என்று பிறகு விசாரித்தால் தெரிகிறது. அவரின் நண்பர், சிவசங்கரனின் வீட்டை விற்றுவிட்டு, அவருடைய கடனை எல்லாம் அடைத்துவிட்டு, சிங்கப்பூர் சென்று விடுகிறார்.
சிறிது காலத்திற்குப் பிறகு, இதே போல் அவருக்கு கீழே பணிபுரியும் ஒருவரிடம் தனது நகைகளைக் கொடுத்து, பாங்கில் வைக்குமாறு கூறுகிறார். சிவசங்கரனுக்கு அவரை 20 வருடங்களாகத் தெரியும். ஒரு விதத்தில் அவர் சிவசங்கரனின் தூரத்து உறவு. நல்ல மனிதர் என்று நம்பி கொடுத்து விடுகிறார். அவரோ, அந்த நகைகளை எல்லாம் விற்றுவிட்டு காசை வாங்கிக் கொண்டு ஊரை விட்டே சென்று விடுகிறார்.
இதே போன்ற மற்றொரு சம்பவத்தில் சம்பளம் வாங்கிய அடுத்தநாள், சிவசங்ரனின் தம்பி, அவரிடம் வந்து, குழந்தைக்கு உடம்பு சரியில்லை என்று கூறி ரூ.2000 கேட்கிறான். சிவசங்கரனின் தம்பி ஒரு ஊதாரி, ஒழுங்காக வேலைக்குச் செல்லாமல், பொய், பித்தலாட்டம் செய்து ஊரை ஏமாற்றுபவன். இவை அனைத்தும் தெரிந்தும், குழந்தையின் உடம்புக்கு முடியவில்லை என்று கூறியதால் பணம் கொடுத்து விடுகிறார். பிறகு ஒருநாள் அது பொய் என்று தெரிகிறது. அது மட்டுமல்லாமல், அடுத்த நாளே அவருடைய மகளுக்கு ஸ்கூல் ஃபீஸ் கட்ட ரூ.2000 தேவைப்படுகிறது. தன்னிடம் இல்லாததால் சிவசங்கரன் கடன் வாங்கி ஃபீஸ் கட்டிவிட்டு, மாதத் தவணையில் கடனை அடைக்கிறார்.
இப்படி பல சம்பவங்கள், அவருடைய வாழ்க்கையில் ஏற்படுகிறது. அதனால், அவரால் ஒரு உயர்ந்த நிலையை அடையவே முடியவில்லை. தான் சம்பாதித்ததையும் இழக்க நேரிடுகிறது. தனது வயதான காலத்திலும் வேலைக்குச் சென்று சம்பாதிக்க வேண்டிய நிலை ஏற்படுகிறது. இந்த 75 வயதிலும் யாருக்கும் தொல்லை கொடுக்காமல் வேலைக்குச் சென்று சம்பாதித்து தனது மனைவியைக் காப்பாற்றி, பிள்ளைகளுக்கும் செய்ய வேண்டியதைச் செய்கிறார் சிவசங்கரன்.
சிவசங்கரனை எடுத்துக் கொண்டால், மிகவும் நல்லவர். முதலில் கூறிய சம்பவத்தில் அவருடைய உதவிபுரியும் குணம் தெரிகிறது. அடுத்த சம்பவத்தில் அவர் தனக்கு கீழே பணிபுரியும் நபரை மதிப்பவர், நம்பக் கூடியவர் என்பது தெரிகிறது. மூனறாவது சம்பவத்தை எடுத்துக் கொண்டால், நண்பர்கள் மட்டும் அல்லாது தனது குடும்பத்தில் உள்ளவர்கள் கஷ்டத்தையும் புரிந்து உதவிசெய்பவர் என்பது தெரிகிறது. இத்தனை நல்ல குணங்கள் இருந்தும், சிவசங்கரன் கடைசி காலத்தில் கஷ்டப்படுகிறார், ஏன்?
சிவசங்கரன், நல்லவராக மட்டும் அல்லாமல் வல்லவராக இருக்க என்ன செய்திருக்க வேண்டும் என்று யோசித்துப் பாருங்கள் நண்பர்களே.
நண்பன் பத்திரம் கேட்டவுடன், ஏன்? எதற்கு? எப்போது திருப்பிக் கொடுப்பாய்? வேறு வழி உள்ளதா? நண்பன் திருப்பிக் கொடுக்காவிட்டால் என்னவாகும்? போன்ற கேள்விகளுக்கு பதில் தேட வேண்டும்.
அதேபோல், நகையை பாங்கில் சேர்த்தவுடன் சிவசங்கரன் பாங்க் மானேஜரிடம், தொலைபேசியில் பேசி இருக்கலாம். நகை வந்து சேர்ந்து விட்டதா என்று விசாரித்து இருக்கலாம்.
தன்னுடைய தம்பிக்கு உதவுவதற்கு முன் அவர் கூறுவது உண்மையா, பொய்யா என்று ஆராய்ந்திருக்க வேண்டும். அது மட்டுமல்லாமல், தன்னுடைய குடும்பம் இதனால் பாதிக்கப்படுமா என்று யோசித்து முடிவு செய்திருக்க வேண்டும்.
நண்பர்களே நல்லவனாக இருங்கள். ஆனால் வல்லவனாக இருக்க மறந்து விடாதீர்கள்.

 

No comments

Be the first one to leave a comment.

Post a Comment


 

 


October 2010

கிராமம் என முடங்காதே சிகரம் உண்டு மறக்காதே!!
சாதிப்பதற்கு வயது ஒரு தடையல்ல
வரி சில வரிகளில்
உடலினை உறுதி செய்
விதை
தன் வினை தன்னை சுடும்
பயத்திற்கு குட்பை
ஊழலையும் லஞ்சத்தையும் ஒழிக்க ஆலோசனைகள்
கதையும் கருத்தும்
உனக்குள்ளே உலகம்-5
கோபத்தை அகற்றுங்கள்
ஜெயித்தவர்களிடம் அப்படி என்னதான் இருக்கிறது?
சாதனை வாழ்விற்கான சந்தோஷ வழிமுறைகள் 50
இடத்தை மாற்று வெற்றி நிச்சயம்
சோம்பலை சாம்பலாக்கி வெற்றி பெறு!
வெற்றி விலாஸ்
உங்கள் வாழ்க்கை உங்கள் கையில்
வல்லமை தாரோயோ
உள்ளத்தோடு உள்ளம்