Home » Articles » உன்னைத்தேடி வீதிகள் வாரா!

 
உன்னைத்தேடி வீதிகள் வாரா!


கருமலைத்தமிழன்
Author:

கண்மூடிக் கனவுகளில் கதிரைக் கண்டால்
காலையெழில் இன்பத்தை நுகர்ந்த தாமோ
விண்முளைக்கும் விடியலினைக் காண்பதற்கே
விழித்துவெளி வந்தால்தான் தெரியும் ஞாலம்

மண்ணுக்குள் புதைக்கின்றவிதையும் தானாய்
மரமாகி வளராது நிரை ஊற்றிக்
கண்ணாகத் தினம் பார்த்து வேலியிட்டுக்
காத்தால்தான் மலர்பூத்துப் பலன்கொடுக்கும்!

வீட்டிற்குள் கால்மடக்கி அமர்ந்திருந்தால்
வீதிகளோ உனைத்தேடி வந்திடாது
ஏட்டிற்குள் இருந்ததினை விழுங்கி விட்டால்
ஏற்றந்தான் தானாக வந்திடாது

கூட்டிறகுள் முடங்காமல் இரையைத் தேடிக்
குறுஞ்சிறகை விரிதலயும் குருவி போல
நாட்டிற்குள் கால்பதித்து நடையைக் காட்டு
நாற்திசையும் உன்சுவடின் பின்னே நிற்கும்!

உன்னுள்ளே நம்பிக்கை ஒளியை ஏற்று
உன்னுள்ளே முயற்சியெனும் எழுச்சி யேற்று
உன்கரந்தான் உனையேற்றும் அறிவைத் தீட்டு
உரத்தோடு தடைகளினைத் தூள்தூ ளாக்கு

முன்னேற்றம் என்பதுன்றன் மூச்சாய் ஆக்கு
மூலதனம் என்கின்ற உழைப்பைத் தேக்கு
விண்முட்டும் இமயத்தின் சிகரம் செல்வாய்
வியந்துன்னைப் பார்காண புகழில் வெல்வாய்!

 

No comments

Be the first one to leave a comment.

Post a Comment