June, 1996 | தன்னம்பிக்கை

Home » 1996 » June

 
  • Categories


  • Archives


    Follow us on

    நன்றியோடு வாழ்வோம்

    நன்றி மறப்பது நன்றன்று என்றார் வான்புகழ் கொண்ட வள்ளுவர். மனித வாழ்வு ஒவ்வொரு மனிதனுடனும் இணைந்துள்ளது. பள்ளியில் படிக்கும் மாணவனுக்கும் ஆசிரியருக்கும் ஆசிரியர் மாணவர் உறவு உருவாகின்றது. ஆசிரியரின் பெருமையை காக்க மாணவன் முற்படுகிறான். மாணவன் சிறப்பாக படித்து உலகம் போற்றும் மாணவனாக மிளிர ஆசிரியர் ஆசைப்படுகின்றார்.

    பஸ்ஸில் பயணம் செய்கின்றோம். ஓட்டுநர் பயணிகளை பத்திரமாக அவரவர்கள் போக வேண்டிய இடத்தில் இறக்க வேண்டிய பொறுப்பில் இருக்கின்றார். பயணம் இடர்பாடுகள் இல்லாமல் இனிமையாக அமைய மற்ற பயணிக்கு தொந்தரவு இல்லாமலிருக்க சக பயணிகளின் ஒத்துழைப்புத் தேவைப்படுகின்றது.

    இப்படி மனித வாழ்வு ஒவ்வொருவரும் ஏதாவது ஒருவகையில் இணைந்து போகும் நிலையில் தான் அமைந்துள்ளது.

    ஒவ்வொருவரும் அவரவர்களுக்கென்று தனித்தனிப் பொறுப்பு இருந்தாலும் அதன் மூலம் நன்மை அடைந்தவர்கள் நன்றியோடு புன்னகை பூத்தால் உதவியவரின் உள்ளம் குளிர்ந்து போகும். தன் பணியை பொறுப்பை இன்னும் பலர் நன்மையடைய வாய்ப்பு ஏற்படுகின்றது.

    ஏதோ ஒரு வகையில் மனிதர்கள் ஒவ்வொரும் இணைந்து வாழ வேண்டிய சூழ்நிலையில் இருக்கின்றோம். உறவு முறையில் உலகம் அமைந்துள்ளது. அந்த உறவு முறை நட்பு முறையில் அமைவது அவசியம். ரோல் ரிலேசன்சிப்பை உணர்ந்தாக வேண்டும். ஒரு கணவன் என்றால் அவர் ஆற்ற வேண்டிய பணிகள் உள்ளன. தாய்க்கு சில கடமைகள் உள்ளன.

    உணர்வுகளை நட்பால் உருவாக்கி கொள்ள வேண்டும். தினமும் பார்க்கின்றவர்களிடம் நட்பு உறவை வளர்த்துக் கொள்ள வேண்டும். மனைவியை நட்பாக நண்பராக ஏற்றுக்கொண்டு பழக வேண்டும். வெறும் மனைவியாக மட்டும் அதாவது – மனைவி என்றால் சமைக்க வேண்டும் – கிழிந்து போன பட்டனைத் தைத்து வைக்க வேண்டும் – துவைக்க துணிகளை அயன் செய்து வைக்க வேண்டும் என்று எண்ணாமல் அவளை மனித நேயத்துடன் இனிய நண்பராக ஏற்றுக்கொண்டு வாழ்ந்தால் அதில் கிடைக்கும் மகிழ்ச்சியே அலாதி. நண்பராக ஏற்றுக்கொண்டால் உரிமை எடுத்துக் கொண்டு பேசலாம். சலுகையை ஏற்படுத்திக் கொள்ளலாம். உரிமையுடன் விவாதித்து முடிவெடுக்கலாம். அது நலன் பயக்கும். நன்மை தீமைகளை ஆராய வழிவகுக்கும். நல்ல முடிவாக அமையும்.

    இப்படி வாழ்நாள் முழுவதும் பின்னிப் பிணைந்தவர்களே ஒருவருக்கொருவர் நன்றி சொல்லிக் கொண்டால் இல்லறம் மகிழ்ச்சிக் கடலில் துள்ளும்.

    தினசரி பார்க்கின்ற ஓட்டுநர் தான் ஆயிலும் வண்டியை விட்டு இறங்கும் போது ஒரு புன்னகையை நன்றியாக உதிர்த்துவிட்டு வந்தால் அந்த ஓட்டுநர் மனதில் நீங்கள் இடம் பெறுவீர்கள். ஒரு நாளில் நீங்கள் தாமதாக ஓடி வந்தாலும் உங்களுக்காக ஓடும் பஸ்ஸை ஓட்டுநர் நிறுத்தி உங்களை ஏற்றிச் செல்லுவார். இது பார்வை தந்த உறவு. நன்றியால் விளைந்த நட்புறவு.

    நாம் கடைக்குச் செல்கிறோம். பொருட்களை வாங்குகிறோம். பணம் கொடுக்கின்றோம். விடை பெறும்போது நன்றீங்க வருகிறேன் என்று சொல்லிப் பாருங்கள். அடுத்த முறை நீங்கள் அந்த கடைக்குச் செல்லும்போது எவ்வளவு கூட்டம் இருந்தாலும் உங்களுக்கு தனி முக்கியத்துவம் கொடுப்பதை நீங்கள் உணரலாம்.

    நெடுஞ்சாலை கூட நன்றி சொல்வதை நாம் பார்த்திருக்கிறோமல்லவா? மாவட்ட எல்லை முடிந்தது நன்றி மீண்டும் வருக என்ற போர்டுகளை மாவட்ட எல்லையில் நெடுஞ்சாலைத் துறையினர் வைத்திருப்பார்கள்Ð

    திரைப்படம் முடிந்தவுடன் நன்றி என்று போடுவதையும் பார்த்திருக்கின்றோம். விமான பயணிகள் இறங்கும்போது விமான பணிப்பெண்கள் இரு கரங்கûள் கூப்பி நன்றி சொல்வதைப் பார்க்கும் போதும் நம் உள்ளத்தில் குளிர்ச்சியும் மகிழ்ச்சியும் குடி கொள்கிறது.

    ஒருவரிடமிருந்து உதவி பெற்றால் தான் நன்றி சொல்ல வேண்டும் என்றில்லை. உள்ளம் உவந்தாலே நன்றி சொல்ல வேண்டும்Ð ஆனால் நன்றியை எதிர்பார்க்கக்கூடாது. லிப்டில் உடன் வந்தவர் லிப்டைவிட்டு இறங்கும்போது நன்றி சொல்லுவதை பார்த்திருக்கின்றோம் அல்லவாÐ உடன் பணியாற்றுயவர் ஓய்வு பெறும்போது விடைபெறுவிழா நடத்துகின்றோமல்லவாÐ அது கூட நன்றி தெரிவிக்கும் கூட்டம் தான். தேர்தலில் தோற்றவர்கள்கூட நன்றியறிவிப்பு கூட்டங்கள் நடத்துவதைப் பார்க்கின்றோம். ஜெயித்தவர்கள் மட்டும் தான் நன்றி சொல்ல வேண்டும் என்ற கட்டாயம் இல்லை.

    இதுக்கெல்லாம் அவர் நன்றியை எதிர்பார்க்க மாட்டார் என்று நீங்களே முடிவெடுத்துக் கொள்ளக்கூடாது. அவர் எதிர்பார்க்காவிட்டால் என்ன? நாம் நன்றி சொன்னால் அடுத்த உதவிக்கும் தயங்காமல் செல்லலாமேÐ அவ்வாறன்றி காரியம் முடிந்தவுடன் கண்டுக்காமல் போய்விட்டால் மீண்டும் அவரைச் சந்தித்து வேறு ஒரு உதவி கேட்க உங்களுக்கே தயக்கம் ஏற்படும். அவரும் இவனுக்கு வேற வேலை இல்லை என முகம் சுழிக்க வாய்ப்புண்டு.

    உதவி என்பது உங்களுக்குத் தேவைப்படாவிட்டாலும் உங்களது நண்பர்களுக்குத் தேவைப்படலாம். உறவினருக்கு ஏற்படலாம். எனவே இனி இவரிடம் ஏன் வரப்போகிறோம் என்று முடிவெடுத்தல் கூடாது. உங்களுக்கு இன்று நன்னடத்தைச் சான்றிதழ் வழங்கிய எம்.எல்.ஏ. நாளை அமைச்சர் ஆகலாம். இன்று ஒரு சின்ன உதவி செய்த அதிகாரி நாளை பெரிய அதிகாரியாக பதவி உயர்வு பெறலாம். அல்லது பெரிய அலுவலகத்தில் பணியாற்ற வாய்ப்பு கிடைக்கலாம். எனவே மனித சந்திப்புக்கள் – மனித உறவுகள் தொடர்ந்து நடக்கக்கூடியது; முடிவற்றது.

    உங்க தாத்தாவும், நானும் கிளாஸ்மேட்ஸ். நிறைய சந்தர்ப்பத்திலே எனக்கு உதவி இருக்கின்றான். ஒரு வேளை இன்று என் மகன் பேரக் குழந்தைகள் இன்று இவ்வளவு தூரம் முன்னேறி இருக்கின்றதற்கு அவனும் ஒரு காரணம் என்று சிலர் வெளிப்படுவதையும் பார்க்கலாம்.

    ஏதேச்சையாக நடந்தாலும் இன்முகத்துடன் நன்றி சொல்லும்போது இருவருமே மகிழ்ச்சியடைகின்றனர்.

    நன்றி சொல்லுவது உரிய நேரத்தில் நன்றி சொல்ல வேண்டும். காலங்கடந்து நன்றி சொல்வது கிண்டல் செய்தவற்கு சமமாகும். உரிய நாளில் உரிய முறையில் உள்ளம் உவந்து நன்றி சொல்லுவது அவசியம்.

    எல்லாவற்றிற்கும் மேலாக இறைவனுக்கு நன்றி சொல்லும் பழக்கத்தை பழகிக் கொள்வது – வாழ்க்கைக்க வேண்டிய பயனுள்ள பழக்கமாகும். தினசரி நன்றி சொல்ல வேண்டும். வாய்ப்பு கிடைக்கும் போதெல்லாம் நன்றி சொல்ல வேண்டும்.

    இறைவனுக்கு நன்றி சொல்லுவதற்காகவே தியானம்Ð கோவில்கள் ஆங்காங்கே கட்டப்படுவது மனிதன் சிரமப்பட்டால் நன்றி சொல்லவே. ஆனால் இறைவன் நன்றி எதிர்பார்த்துக் கொண்டிருக்கவில்லை.

    இந்த நாளை இறைவன் நமக்களித்திருக்கின்றான். நல்லன நடந்தன. நாம் இந்த நாளில் உயிர்வாழ இறைவன் வாய்ப்பளித்திருக்கின்றான். இந்த நாளை முழுமையாக துய்க்க அனுமதி தந்துள்ளான். இறைவன் அதற்காக நாம் நன்றி சொல்ல வேண்டும்.

    இப்படி இறைவனுக்கு நன்றி சொல்லுவது நமது உள்ளத்திற்கும் உடலுக்கும் நல்லது. வாழ்வில் உறுதி ஏற்படும் நல்லன நடக்கும் என்று நம்பிக்கை ஏற்படும்.

    ஆள் உயர மாலை போட்டுத்தான் நன்றி சொல்ல வேண்டும் என்ற அவசியமில்லை. உள்ளம் நிறைந்த ஒரு புன்னகை போதும். நன்றியை ஏற்பதிலும் மனப்பக்குவம் வேண்டும். பிறர் நம்மிடம் நன்றி சொல்லும்போது – அட இதற்கெல்லாம் எதுங்குங்க நன்றி என்னால் முடிந்ததைச் செய்தேன். என்றோ பரவாயில்லைங்க என்று புன்முறுவலோடோ ஏற்புரை சொல்ல வேண்டும். அவ்வாறன்றி இம் இம் இந்த நன்றி சொல்ல இவ்வளவு நாளா? அல்லது இப்பத்தான் கண் தெரிந்ததா? நன்றி சொல்ல: என்றோ உன் நன்றியை குப்பைத் தொட்டியில் கொண்டு போய் போடு என்றோ கோபத்துடன் சொல்லக்கூடாது. அது இருவருக்கும் பயனற்றது.

    நன்றியோடு இருப்பது நம் நல்வாழ்க்கைக்கு நல்லது. நட்பைத் தொடர அதுவகை செய்யும். வாழ்நாள் முழுதும் தொடரும் மனித உணர்வுகளின் உறவு வலுப்படும். வளர்ச்சிக்கு அது வழிகாட்டும். எங்கும் வெற்றி. எதிலும் மகிழ்ச்சி என்ற நிலை உருவாக வாய்ப்புக் கிட்டும்.

    நன்றியோடு இருப்போம். நலன் பெறுவோம். நல்வாழ்வு வாழ்வோம்.
    விடைபெறுகிறேன். நன்றி… வணக்கம்!

    எண்ணங்களும் வாழ்க்கையும்

    6. வள்ளுவர் காட்டும் மனம்

    தெய்வப் புலவர் திருவள்ளுவர் நாயனார் அவர்கள் அருளிய அரிய தமிழ் மறையாம் திருக்குறள் ஓதற்கெளிதாகி, உணர்தற் கரிதாகி, வேதப் பொருளாய் மிக விளங்கித்தீதற்றோர் உள்ளுதொறும் உள்ளுதொறும் உள்ளம் உருக்குகின்ற மாண்பினைப் பெற்றது. வள்ளுவருக்குப்பின் பல நூற்றாண்டுகளாக, மக்கள் மேன்மை அடைய மனித உள்ளத்தின் தன்மையையும், அது தொழிற்படும் பான்மையும் மேன்மேலும் உணர உணர, அப்பழங்காலத்துத் தமிழ்ப்பெருமகன் தன் ஆழ்ந்த உளத்தொளியில் ஐயமறக் கண்டறிந்த சிறந்த உளதத்துவ உண்மைகளை அடிப்படையாகக் கொண்டு, மக்கள் பயன்பெற்று உய்யுமாறு குறளென்னும் குன்றாப்புகழ் படைத்த, கோதிலா நூலை ஆக்கினார் என்பது நன்கு புலனாகின்றது.

    ‘மனத்தைப்’ பற்றி வள்ளுவர் பெருமான் கொண்டிருந்த கருத்துக்கள் என்ன என்பதைப் பற்றி இக்கட்டுரையில் சிறிது ஆராய முற்படுவோம். திருக்குறளில் அமைந்துள்ள ஆயிரத்து முந்நூற்று முப்பது குறட்பாக்களில் ‘மனம்’ என்ற சொல் நேரிடையாகவோ அல்லது வேறு பொருளுடன் சார்ந்தோ ஒன்பது அதிகாரங்களிலும் பதினெட்டு குறட்பாக்களிலும் வள்ளுவரால் கையாளப்பட்டுள்ளது.

    கடவுள் வாழ்த்து, அறன் வலியுறுத்தல், புலால் மறுத்தல், வாய்மை, இன்னா செய்யாமை, வரைவின் மகளிர் ஆகிய அதிகாரங்களில் முறையே ஒரு பாவிலும், கூடா ஒழுக்கம் என்ற அதிகாரத்தில் இரண்டு பாக்களிலும், கூடா நட்பு என்ற அதிகாரத்தில் மூன்று பாக்களிலும், சிற்றினம் சேராமை என்ற அதிகாரத்தில் ஏழு பாக்களிலும் மனம் என்ற சொல் காணப்படுகிறது.

    மனத்தூய்மையும் அறமும்

    மனத்தின்கண் தோன்றுகின்ற, துன்பங்களை நீக்குவதற்கான எளிய வழி, ஒருவாற்றானும் தனக்கு நிகரில்லாத எல்லாம் வல்ல, எங்கும் நிறைந்த இறைவனின் திருவடிகளை இடையறாது இணக்கத்துடன் தொழுதல் ஒன்றே என்பதை வள்ளுவர் கடவுள் வாழத்தில் வலியுறுத்திக் கூறுகின்றார். அறம் என்று கருதப்படுவது மனத்தின் பால் உள்ள குற்றங்களை (மாசு) நீக்கி மனத் தூய்மையோடு இருப்பதுவும் செயல்படுவதுமின்றி வேறொன்றில்லை. அஃதொழிந்த மற்றவையெல்லாம் அறம் எனப்படா எனத் தெளிவாகக் கூறுகிறார்.
    பாவச் செயலாகிய ஒன்றை மனத்தில் பற்ற விடுவோமானால் அதிலிருந்து மனம் எளிதில் விடுபட்டு அறநிலையை அடைவது கடினம் என்பதைக் குறிப்பிடும்போது, கொலைக் கருவியைத் தம் கையில் கொண்டவர் மனம் அதனால் செய்யும் கொலையையே நோக்குவது அல்லது அருளை நோக்காதவாறு போலப் பிறிதோர் உடலைச் சுவைபட உண்டவர் மனம் அவ்வூனையே நோக்குவதல்லது அருளை நோக்காது என்பதன் மூலம் விளக்குகிறார்.

    வஞ்சம் பொருந்திய மனத்தை உடையவனது மறைந்த (களவு) ஒழுக்கத்தை உடம்பாய் அவளோடு கலந்து நிற்கின்ற பூதங்கள் ஐந்தும் கண்டு தமக்குள்ளே நகும். போலி ஒழுக்கங் கொண்டவரைப் பற்றிக் குறிப்பிடும்போது காம, வெகுளி, மயக்கங்களாகிய மாசு தம் மனத்தில் குடி கொண்டிருக்கும்பொழுது, அவற்றை மறைத்து நீரில் மூழ்கிக் காட்டி பிறர்க்குத் தவத்தான் மாட்சிமையுடையவராய் இருப்பதாய்ச் சொல்லும் மாந்தர் இவ்வுலகத்தில் பலர் உள்ளனர் எனக் கூறுகின்றார்.

    ஒருவன் தன் மனத்தொடு பொருந்த வாய்மையைச் (உண்மையை) சொல்வானாயின் அவன் தானமும், தவமும் ஒருங்கு செய்வாரினும் சிறந்தவனாவான். மனத்தோடு உளவாகின்ற பழி, பாவம் போன்ற இன்னாத செயல்களை எக்காலத்தும் யாவர்க்கும் சிறிதாயினும் செய்யாமையே தலையாய அறம்.

    மனமும் இனமும்

    மாந்தர்க்கு ஏற்படுகின்ற பொதுவான உணர்வுகள் எல்லாம் மனம் காரணமாக உண்டாவனவாம். இவன் இத்தன்மையன் என்று உலகத்தாரால் சொல்லப்படும் சொல் இனம் காரணமாக (அதாவது அவன் எந்த இயல்புடைய மக்கள் இனத்தைச் சார்ந்தவன்) உண்டாவதாகும். அறிவு என்கின்ற விசேட உணர்வானது ஒருவற்கு மனத்தின் கண் உளதாவது போலத் தோன்றி உண்மையில் அது அவன் சேர்ந்த இனத்தின் கண்ணே உளதாகும்.

    மனத்தின் தூய்மை, செய்யும் செயலின் தூய்மை ஆகிய இவ்விரண்டும் ஒருவன் தான் சேர்ந்த இனத்தின் தூய்மையை பொறுத்தே ஏற்படுவதாகும். மனம் தூயர் ஆயினர்க்கு அவர்களுக்குப்பின் எஞ்சி நிற்கும் மக்கட்பேறு, புகழ் முதலியவை நன்மை பயப்பனவாகும். ஆனால் இனம் தூய்மையாக உள்ளவர்க்கு நன்மையாகாத செயல் இல்லை. அதாவது அவர்கள் செய்யும் எச்செயலும் அவர்க்கு நன்மை பயப்பதாகும். மனத்தின் நன்மை உயிர்க்கு ஆக்கம் அளிப்பதாகும். இனத்தின் நன்மையோ அவ்வளவோடு நிற்காமல் எல்லாப் புகழையும் கொடுக்கும். மன நன்மையை முன்னைய நல்வினையால் தாமே உறுதியாக உடையவர் ஆயினும் சான்றோர்க்கு இனத்தின் நன்மை மேலும் நல்ல வலுவான காவலாக அமைவதாகும். மனத்தின் நன்மையால் மறுமை இன்பம் உண்டாகும். இனத்தின் நன்மையால் அவ்வின்பம் மேலும் சிறப்புடையதாகும்.

    மனமும் நட்பும்

    தமக்கு உற்றவர் போன்று வெளிக்காட்டி உண்மையிலேயே உறாதவரோடு கொள்ளப்படுகின்ற நட்பானது பொது மகளிருடைய மனம் போன்று உள்ளொன்றும் புறமொன்றாக வேறுபட்டு நிற்கும். இதுபற்றியே உள்ளொன்று புறமொன்று பேசுவோர் உறவு கலவாமை வேண்டும் என இராமலிங்க அடிகளார் அருளிப் போந்தார். பல நல்ல நூல்களைக் கற்றுத்தேர்ந்த போதிலும் அவற்றின் பயனாக நல்ல மனம் உடையவராக, உள்ளன்போடு பழகுதல் என்பது உண்மையிலேயே மாட்சிமை அடையாதவர்க்கு இல்லையாகும். மனத்தால் தம்மொடு பொருந்தாமல் பழகுகின்றவரை அவர் கூறுகின்ற சொல்லைக் கொண்டு எத்தகைய ஒரு செயலிலும் நம்பித் தெளியக்கூடாது. இருவகைப்பட்ட மனம் உடைய பொது மகளிரும், சூதும் ஆகிய இம்மூவகையும் திருமகளால் நீக்கப்பட்டவரால் மேற்கொள்ளப்படுகின்ற உறவாகும்.

    மனமும் வினையும்

    “வினைத்திட்பம் என்ப தொருவன் மனத்திட்பம்
    மற்றைய எல்லாம் பிற”

    “வெள்ளத் தனைய மலர்நீட்டம் மாந்தர்தம்
    உள்ளத் தனைய துயர்வு”

    ஒரு தொழில் செய்வதற்கண் திண்மை என்று சொல்லப்படுவது அதனை முடித்தற்கு உரியான் ஒருவனது மனத்தினது உறுதியேயாகும். மற்றவையெல்லாம் வேறானவை. உறுதியான மனத்தின் கண் ஊக்கம் பிறக்கும். இவ்விரண்டும் சேர்ந்த மனத்தின் கண் உயர்வுள்ளம் தோன்றும். இந்த உயர்வான உள்ளத்துடனே செய்யப்படுகின்ற வினை எதுவும் மாந்தர் உயர்வடைய உறுதுணைபுரியும்.

    -வளரும்

    ஒரு தேர்த்திருவிழா…

    தேர்தல் தேர்…
    பாரத மாதாவைச் சுற்றித்
    தர தரவென
    இழுத்து… எறியப்பட்டது!

    தரையில் கிடப்பவன்
    துடிக்கிறான்…!
    மலைக் குடிமகன்
    தவிக்கிறான்…!

    அரியாசனக்காரனோ…?
    ஆயிரங் கோடிகளுக்கு
    அதிபதியாக…
    ஆலாய்ப் பறக்கிறான்!

    அதிகாரத்தில் இருப்பவனோ…?
    ஆஸ்த்தி சேர்க்க…
    ஆடுமாடுகளைப் போல
    ஆட்களை விரட்டியடிக்கிறான்!

    தேர்தல் வாக்குறுதிகளோ…?
    தெருத்தெருவாய்…
    குப்பைத் தொட்டிகளில்!
    கரையான் அரிக்கின்றன!

    அப்படியப்படியே… எல்லாமே…!
    எப்போதும் போல்…!

    வெற்றியின் வித்து…!

    மனம் நொறுங்கி
    மனிதன் வாழ்ந்து
    வெற்றி கண்டதாய்
    குறளிலும்… காணவில்லை!

    குலைந்துபோன
    அவநம்பிக்கையுடன்
    குழம்பி நாளும்
    குட்டையாயிருந்து
    தீர்வு மீனைப் பிடிப்பது எப்படி?

    வித்தையின் வேர்களைக்
    கண்டறி…
    தீர்வுகளின் தடங்களைத்
    தேடிப்பிடி…

    கடலலையென உன்
    கைக்குள்ளேயே…
    தன்னம்பிக்கை இருக்கும் போது
    ஆமையெனச்
    சுருண்டு கிடப்பது ஏன்?

    காலம் கனிவிக்கும்
    வெற்றியின் வித்தை
    காளையென
    நெஞ்சை நிமிர்த்து
    அஞ்சாமல்… ஆண்மையோடு
    ஆற்றலைப் பரப்பி ஆவன செய்!