Home » Articles » நற்பண்புகள் என்னும் நீரோடையில்

 
நற்பண்புகள் என்னும் நீரோடையில்


admin
Author:


IN THE STREAM OF GOOD HABITS

நல்ல பண்புகள் பிறர் மனதில் நம்மைப் பற்றிய நல்ல எண்ணங்களைத் தோற்றுவிக்கும். முன்னேறத் துடிப்பவர்கள் எல்லோருடனும் இனிமையாகப் பழக வேண்டும். எளிமையோடு விளங்க வேண்டும். முன்னேறத் தனித்தன்மையோடு விளங்குவதே நோக்கம் என்றாலும் மக்களிடமிருந்து தனித்தும் விலகியும் நிற்கக்கூடாது. விலகினால் விலக்கப்படுவீர்கள் என்பது அனுபவ மொழி.

நமக்கும் நாட்டுக்கும் நலம் பயக்கின்ற நல்ல பழக்கங்களை மட்டுமே தொடர்ந்து வளர்த்துக் கொள்ள வேண்டும். நற்பண்புகள் எனும் நீரோடையில் குளித்து நம்மைத் தூய்மை செய்துகொள்ள வேண்டும். உலகம் பரந்து விரிந்தது. பழகிய எல்லோருடனும் நெருங்கிய தொடர்பு வைத்துக்கொள்ள எண்ணினால் பிறகு அதற்குத்தான் நேரமிருக்கும். வேறு செயல்களுக்கு நேரம் இருக்காது. அதனால்தான் முன்னேறத் துடிப்பவர்கள் கடிதங்களைக்கூட நறுக்கென்று நாலுவார்த்தையில் எழுதி முடித்துவிடுகிறார்கள். பழகுகின்றவர்களையும் தேர்ந்து கொண்டு பழகுகிறார்கள். ஆக்கம் தராதவர்களின் பழக்கங்களை தவிர்த்து விடுதல் வேண்டும்.

எளிமை

எளிமை (Simplicity) என்பது உடையாலும் உள்ளத்தாலும் எளிமையாக இருத்தல். நமது தோற்றம் இயற்கையில் அமைந்தது. அதைத் தூய எளிய உடையால் செம்மைப்படுத்திக் கொள்ள வேண்டும். தினமும் காலையில் குளித்துவிட்டு, துவைத்த அல்ல சலவை தூய ஆடையை உடுத்திப் பாருங்கள். நம்மையும் அறியாமல் ஒரு சுறுசுறுப்பு உண்டாகும். செயல்களை முடிக்க வேண்டும் என்ற உணர்வு பிறக்கும். நம்மைச் சந்திப்பவர்கள் கூட நம்மைப் பார்த்துச் சுறுசுறுப்புப் பெறுவார்கள். மாறாக முகச் சவரம் செய்யாமல், குளிக்காமல் அழுக்கான உடையணிந்து ஒரு செயலுக்குச் சென்றால் நமக்குள்ளேயே ஒரு தாழ்வு மனப்பான்மை ஏற்பட்டு எந்தக் காரியமும் சரிவர நடைபெறாது. நடந்தாலும் அதில் ஒரு செம்மை இருக்காது.

உடையிலும் ஆடம்பர உடையைத் தவிர்த்து, எளிய உடை அணிவது பெரிதும் விரும்பத்தக்கது. குறிப்பாக பெண்கள் சுமக்க முடியாத நகைகளை அணிவதும் கவர்ச்சியாகவும் ஆடம்பரமாகவும் உள்ள உடை உடுத்துவதும் தங்கள் செல்வ வளத்தை வெளிக்காட்டிக் கொள்வதுபோல் பேச்சிலும் செய்கையிலும் புலப்படுதுவதும் மறைமுகமாக அவர்களது குடும்ப முன்னேற்றத்தைக் குறைக்கும் செயல்களாகும். எவ்வளவு செல்வமும் இருந்தாலும் எவ்வளவு தான் தன் முயற்சியால் முன்னேறி இருந்தாலும் நடைமுறை வாழ்க்கையில் ஓர் அடக்கம் ஓர் எளிமை பின்பற்றப்பட வேண்டும்.

காலந்தவறாமை

காலந்தவறாமை (Punctuality) ஒருவனை முன்னேற்றத்திற்கு அழைத்துச் செல்லும் முதற்படியாகும். இந்த நேரத்தில் இதை இதைச் செய்து முடிப்பது, ஒருவரிடம் சொன்ன நேரத்தில் நாம் காத்திருப்பது, நாம் சந்திக்க ஏற்பாடு செய்யப்பட்ட நேரத்தில் சந்திக்க வேண்டியவர்களைச் சென்று சந்திப்பது போன்ற செயல்கள் அவ்வப்போது சிறுசிறு வெற்றிகளை நல்கும். மனத்திற்கு வளமூட்டும். மகிழ்ச்சியை அளிக்கும். இச்சிறுசிறு வெற்றிக்கெல்லாம் பெரிய வெற்றிக்கு நமது உயரிய குறிக்கோளுக்கு அடித்தளமாக அமையும்.

நேரிய வழியில்

நேரிய வழியில் செல்வதுதான் அழியாத வழி. அதுவே நிரந்தர நன்மை பயப்பது. பலர் குறுக்கு வழியில் சென்று மிகப்பெரிய அளவில் பொருள் சேர்த்து, பிற்காலத்தில் தன் பெண்டு பிள்ளைகளாலேயே நீங்கள் பொருள் சேர்த்த விதம் எங்களுக்குத் தெரியாதா? இப்படிக் கேவலமாக, கீழ்த்தரமாகப் பொருள் சேர்த்து எங்களை செல்வச் செழிப்போடு வளர்த்ததை விட ஏழைகளாகவே வளர்த்திருந்தால் நல்ல பண்புடையவர்களாகவாவது இருந்திருப்போம என்று கூறுவதையும், தகாத வழியில் வந்த பொருளால் குடும்பமே கட்டுக்கு அடங்காமல் கெட்டு அழிவதையும் நாம் ஊர்தோறும் காணுகின்றோம். மெல்ல உயர்ந்தாலும் நல்லவழியில், நேரிய வழியில் செல்வதுதான் சிறந்த வழியாகும்.

பிறரை நேசிக்கக் கற்றுக்கொள்க

முன்னேறத் துடிப்பவன் தன்னை நேசிப்பதுபோலவே தன்னைச் சார்ந்தவர்களையும் நேசிக்க வேண்டும். அன்பு செலுத்த வேண்டும். எப்போதும் தன்னை மட்டுமே நினைத்துக் கொண்டிருந்தால் அது தன்னலம். மற்றவர்களையும் நினைத்து அவர்களது உணர்வுகளை மதித்துச் செயல்பட்டால் தான் அது முன்னேற்றம். அதே போல் ஒருவன் தன்னுடைய கருத்துக்களை எவ்விதம் போற்றுகினோ அந்த அளவு மற்றவர்கள் கருத்திற்கும் மதிப்பளிக்க வேண்டும். வீண் விவாதங்களில் கலந்து கொள்வதும் வீண் செயல்களில் தலையிடுவதும் விரும்பத்தக்கது அல்ல. முன்னேற்றத்திற்கு செயல்தான் முக்கியமே தவிர பேச்சு அல்ல. இன்று என்ன செய்தோம் என்ற கேள்விக்கான விடையை நீங்கள் உங்களுக்குத் தந்தாக வேண்டும்”.

சமநிலை மனம்

முன்னேற்றப் பாதையில் செல்பவர்கள் அவரசப்படாமல் பதட்டப்படாமல் சமநிலை மனத்தோடு செயல்படவேண்டும். நம்மை மகிழ்ச்சியில் ஆழ்த்துகின்ற செய்திகள் கிடைத்தாலும் நம் நிலை தளர்ந்தோ, நம் நிலை கிளர்ந்தோ, சென்றுவிடுதல் கூடாது. இச்சமநிலை மனப்பான்மை நம்மை அணுகுகின்ற ஏழை, பணக்காரர் யாராய் இருந்தாலும் அடிப்படை அறம் ஒன்றாக இருக்க வேண்டும். ஆளுக்கு ஏற்றாற்போல் பழகுகின்ற, சூழ்நிலைக்கு ஏற்றாற்போல் மாற்றிக் கொள்கின்ற மனிதர்கள் தற்காலிக முன்னேற்றம் பெறலாம். ஆனால், நிரந்தர முன்னேற்றம் பெற இயலாது. அத்தகைய இரட்டை வேடமே அவர்களுக்குத் தோல்வியாக முடிந்துவிடும்.

உண்மையாக நடந்து கொள்க

ஒரே சொல்லில் சொல்ல வேண்டுமானால் நிலைத்த முன்னேற்றம் விரும்புகின்றார்கள். உண்மையாக நடந்துகொள்ள வேண்டும். எப்போதும் உண்மை பேசுவது, நிரந்தர வெற்றியை நல்கும். முன்னேற்றம் என்பது பொருள் சேர்ப்பது மட்டும் அல்ல. வாழ்க்கையில் அது ஒரு கூறு. வாழ்க்கைக்கு அடித்தளமானது. அதை வைத்துக் கொண்டு உண்மையாகவும் நேர்மையாகவும் வாழ்வதும் முன்னேற்றம்தான். சாதனை மிக்க வாழ்க்கைதான். இன்று எத்தனை பணக்காரர்களை நினைத்துக் கொண்டிருக்கிறோம்? ஆனால் உண்மையில் வழி நடத்த மகாத்மா காந்தி, உலகத்து மக்கள் எல்லார் உள்ளத்திலும் வாழ்கிறாரே! எது சாதனை என்பதை நீங்களே முடிவு செய்யுங்கள்.

இனிமை

பிறரிடம் இனிமையாகப் பேசுவதும் பழகுவதும் மிகவும் இன்றியமையாததாகும். இனிய பேச்சும் பழக்கமும் இடைவெளியைக் குறைக்கும்; நெருக்கத்தை உண்டாக்கும். நம்மைச் சுற்றியும் அன்பானவர்கள் இருக்கிறார்கள் என்று உணர்ந்தாலே மனம் எழுச்சிப் பெறும். ஆர்வம் பெருகும். புதிய ஆற்றல் உண்டாகும். நாம் எடுத்துக் கொண்ட செயலை அறிவோடும் ஆற்றலோடும் செய்து முடித்துவிடலாம். இதற்கு மாறாக நீங்கள் யாரிடமாவது கடுமையாக நடந்து கொண்டுவிட்டீர்கள் என்று வைத்துக் கொள்ளுங்கள். அவர்கள் எதிர்ப்பைத் தேடிக் கொண்டவர்கள் ஆவீர்கள். நமது அறிவும் ஆற்றலும் அவர்கள் எதிர்ப்பைச் சமாளிப்பதற்குத்தான் செலவிட வேண்டிவரும் ஒழிய, வளர்ச்சிக்குப் பயன்படுத்த முடியாது. ஒரு சிறிய உதாரணம்; உங்கள் மனம் நோகுமாறு யாரேனும் நடந்து கொண்டிருந்தால் அதை நினைத்தே அந்த ஒரு நாள் வீணாகிவிடுவதை நீங்கள் நன்கு அறிவீர்கள். அந்த நிகழ்ச்சியை மறந்து நீங்கள் மீண்டும் பழைய மனநிலைக்கு வர இரண்டு நாட்களுக்கு மேல் ஆகிவிடும். வாழ்க்கையில் இரண்டு நாட்கள் வீண். அதனால் நம் சூழ்நிலையை எப்போதும் இனிமையாக வைத்துக் கொள்வதே அறிவுடைமை. வளர்சிக்கு வழி.


Share
 

1 Comment

  1. வேங்கடராமன் says:

    யாவரும் இதைக் க்ற்று வாழ்க்கையில் கடைப்பபிடித்தால் உலகம் சுவர்க்கமாகும். ஐயா
    நிறைய எஃஜுதுங்கல். வணக்கம்.

Post a Comment


 

 


April 1994

நெஞ்சில் உரமேற்று
எது சாதனை?
புதிய வாய்ப்புக்களை உருவாக்குங்கள்
பேரன்புடையீர்
தன்னம்பிக்கை
நம்பிக்கை
உங்கள் கடிதங்கள்
மூன்று வகையான சோதனைக் கற்களின்
வெற்றி என்ற சாலையில் பயணம் செய்ய
ஆசிரியரின் டைரி குறிப்பு
நற்பண்புகள் என்னும் நீரோடையில்
முன்னேற்றத்திற்கு மூன்றே படிகள்
நாம் நினைத்த குறிக்ககோளை